سينابون احترافي بالنكهة الأصلية وبالتفصيل مع حكاية صغيرة ههههه ملكة الشتاء

182 6٬990
 

سينابون احترافي بالنكهة الأصلية وبالتفصيل مع حكاية صغيرة ههههه ملكة الشتاء

السينابون

سينابون احترافي بالنكهة الأصلية وبالتفصيل مع حكاية صغيرة ههههه ملكة الشتاء

سينابون احترافي بالنكهة الأصلية وبالتفصيل مع حكاية صغيرة ههههه ملكة الشتاء , معكم صديقة زاكي الشيف الموهوبة , اجييييت وجبتلكم سينابون تحفة بنافس سينابون المحلات وبفركشو وبيسبقو بسهولة هههههه للأمانة إلي فترة عاملتو ومرتين اجيت لنزلو لاقيت وصفات سينابون مزينة زاكي من المبدعات (أم علي وفرح) فأجلت تنزيلها لأنو الوصفات رااائعة وبتستحق تاخد ساحة زاكي من جمالها اللهم بارك
كمان وصفة السينابون طلبتها أخت معنا مني بس ماتذكرت مين بالضبط وخايفة خربط بالاسم وطولت لعملتها بسبب ظروف الحظر هههههه
وإذا مابتعرفو الحظر المفروض على حبيبتكم ننوشة تابعو لآخر الوصفة رح احكيلكم حكاية هههههه وهلأ نطو معي نشوف مقادير العجينة:

المقادير

  • 4 كوب طحين
  • ثلث كوب سكر
  • نصف ملعقة ملح
  • بيضة
  • ظرف فانيليا
  • نصف كوب كريما سائلة (لو ما انوجدت منبدلها بحليب مدوب فيه ظرف كريما بودرة)
  • ثلثين كوب حليب دافئ
  • ملعقة كبيرة خميرة
  • نصف كوب زبدة سايحة بس ماتحطوها وهية سخنة
  • للحشوة منحتاج:
  • زبدة لينة أو قشطة دهن
  • خليط من السكر والقرفة (لكل 5 ملاعق سكر ملعقة قرفة مطحونة) بالأساس يستخدم السكر البني بس بصراحة ماحسيت بفرق واضح بالطعم عدا انو السكر الأبيض متوفر بكل بيت وأرخص ههههه
  • للتوبينغ (سوس الجبن) منحتاج:
  • كوب سكر بودرة
  • 3 ملاعق جبن كريمي
  • ثلث كوب زبدة لينة أو قشطة دهن

الخطوات

“بسم الله الرحمن الرحيم”

تجهيز العجينة

* منخلط الطحين مع السكر والملح

ومنضيف عليهم الكريما والبيضة مع الفانيليا

والخميرة اللي منكون مدوبينها مع الحليب ومنبلش نعجن هالمكونات سوا

* منضيف الزبدة بالتدريج أثناء العجن ومنضل نعجن حوالي عشر دقايق لنوصل لعجينة طرية وملمومة

* منغطيها ومنتركها تختمر ويتضاعف حجمها

* بعد ماتنفش الغالية منمدها بشكل مستطيل وبارتفاع حوالي نصف سانتي أقصى حد

* مندهنها بالزبدة أو القشطة ومنفرد عليها كمية من السكر والقرفة ومنضغطهم شوي بالإيد أو بالشوبك ليتداخلو نتفة مع العجينة ومنلف بهدوء وحنية لتطلع اللفة راكزة

أهم شي الحنية يا يامو

* بس يصير عنا رول حلو متلكم (عيشو بهالنعم) منجيب خيط ومندخلو تحت الرول ومنقطع فيه مشان يحافظلنا عالشكل الحلو

* قطعو بالأحجام اللي بدكم ياها أنا بقطع بشكل عشوائي مشان كل واحد ياخد الحجم اللي بناسب كروشتو وأكيد أكبر قطعة الي هههههههه

* منحط القطع بصينية ومنغطيها لترجع تختمر ومندخلها فرن محمى على درجة حرارة 190 لتستوي وتتحمر

* بهالأثناء منجهز التوبينغ ببساطة منحط كل مكوناتو سوا ومنضربهم عالخلاط أو بالخفاقة الشبك لتتجانس المكونات ومنحطها عالسينابون بعد مانطالعو من الفرن بشي 5 دقايق بكون هدي شوياية

ومنلتهمو وهو دافي أو كيف مابتحبو (الديموقراطية دابحتني)

بتمنى الوصفة تعجبكن وتعجب الأخت اللي طلبتها وتجربوها وأنا متأكدة انكن رح تدعولي ان شاء الله لأنو الطعم خرافييييييي..

وهلأ دور الحكاية

“صفوءة قلبي هاتيلك شي حلة قهوة للصبايا وتعالو احكيلكن حكاية”

كان ياما كان في قديم الزمان بنت بتنسى حالها بالمطبخ وبدورو عليها الأهل والجيران..

وتطورت معها الحالة ياسادة ويا إخوان وصار شغل الحلو وأكلو عندها إدمان..

الحجي عندها مابياكل حلويات ومافي غيرها بتطلع بالصواني وبتسابق حالها كمان..

مناعتها صارت يامسكينة كل مالا لورا وطلعلها من الدوالي عرقان رقيقان

بسبب وقفتها الطويلة عالغاز والأفران..

نبهها هالحجي وماخلا طريقة ومافي نتيجة وبقي معها حيران

لحتى اجى يوم وطلع ونادى فرماااااان..

مرتي الحلوة خلص طفشتيني وبالحلويات وروايحها جننتيني وكل يوم صحتك لورا وماعم تسمعيني وأنا مارح خليكي تضلي هيك وصحتك عندي بالحسبان..

شغل الحلويات ممنووووع إلا بالمناسبات سمعتيني؟؟

ولما تشتهي أي شي بتجي بتخبريني

وأنا بجبلك اللي على بالك وبتنقضى الشهوة بشوية حلو مو بأطناااان..

وهالمرة قراري حاسم وأنا مابحكي شكلان هههههه

ورضخت الننوشة للأمر الواقع خاصة بعد شوفة الأرقاااام الكبيرة عالميزان

وصارت تمرقلا شي أكلة كل فترة طويلة لو لاقت الحجي عنها سهيان..

وعملت هالسينابون بالسرقة لأنو الشغب ماشي بالأوردة والشريان

وهيك يا حبايب ويا خلان خلصت حدوتة ننوشة والله يجعلها خاتمة الأحزان..

 

 

عرض التعليقات (182)