ملفوف طبخة شتوية 100/100

57 4٬234
 

ملفوف طبخة شتوية 100/100

ملفوف طبخة شتوية 100/100

ملفوف طبخة شتوية 100/100

ملفوف طبخة شتوية 100/100, معكم صديقة زاكي الشيف الموهوبة ,

المقادير

  • راس ملفوف كبير
  • رز حبة وسط يعني حسب الكمية
  • كيلو لحمة مفرومة على فكرة هالكمية عملت عليها راسين ملفوف كبار كل واحد بيوم لحال كانت حفلة ملفوف
  • زيت نباتي
  • ملح
  • فلفل
  • بهارات مشكلة
  • بندورة
  • شرحات بصل
  • شرحات ثوم
  • ليمون

الخطوات

كيفكم يا شيفات زاكي المعدلات طبعا كلكم بتعرفوا هالاكلة الطيبة خصوصا بالشتوية وكيف بتنعمل وبظن معروفة بهالاسم بأغلب البلدان العربية ما عدا مصر بيسموها محشي كرنب وما بعرف شو بيسموها بالمغرب بلكي بتفيدنا أختنا العزيزة ماما عايدة وبسوريا ولبنان بحس كمان هالطبخة مش كتير إلها صيت عندهم متل محشي الكوسا إلي بيعملوه بمية البندورة أكتر شي والمخشي أو (شيخ المحشي) متل ما بيقولوله واليبرق إلي هو ورق الدوالي عنا وورق العنب بمصر وكمان إذا عملوه للملفوف بسوريا وقليل بيعملوه بيطبخوه بمية البندورة كمان متل ما شفت ببرنامج طبخ لشيف سورية

المهم وبعد هالمقدمة الطويلة هي طبخة لذيذة ومحبوبة من الكبار والصغار وبتحب لمة العيلة عليها وقت البرد والشتا وهاد أحلى شي فيها رغم إنها بتاخد وقت بالتحضير

هلأ الطريقة بنغسل راس الملفوف وبنقطعه لأربع أجزاء وبنكون حاطين طنجرة كبيرة عالغاز فيها مي بس تقرب تغلي بنحط الملفوف فيها لينسلق ورق الملفوف بس مش لدرجة إنو يدوب ويهتري كتير بس يطرى شوي

بنطلعه وبنصفيه وبنكون ناقعين الرز بهالفترة بغسله وبصفيه وبضيفله اللحمة والملح والبهارات والفلفل والزيت وبفرم بندورة وبضيفها كمان وبخلطهم مع بعض وبتكون الحشوة جاهزة بفرد ورق الملفوف بالحجم إلي بتحبوه وبحط من الحشوة وبلف لتخلص الكمية وبقاع الطنجرة إلي بدي اطبخه فيها بحط عيدان الملفوف وشرحات ثوم وبصل وبين طبقات الملفوف كمان وبغمره بمي مو كتير بيستوي عالبخار لأنه وبغطيه ويفضل نحط عليه ثقل لحتى ما يفتحوا حبات الملفوف لحد ما يغلي بنوطي عليه لتنشف المي ويستوي الورق والحشوة جواته

بيتقدم مع الليمون واللبن وممكن سلطة وبدون أي شي بيشهي

وصحة وهناااااا

عرض التعليقات (57)