img
الرئيسة / حلويات / حلا تحفة ومميز بنكهة البرتقال والشوكولاتة

حلا تحفة ومميز بنكهة البرتقال والشوكولاتة

/
/
/
1884 مشاهدات
 

حلا تحفة ومميز بنكهة البرتقال والشوكولاتة

حلا تحفة ومميز بنكهة البرتقال والشوكولاتة

حلا تحفة ومميز بنكهة البرتقال والشوكولاتة

حلا تحفة ومميز بنكهة البرتقال والشوكولاتة, معكم صديقة زاكي الشيف الموهوبة , وصفة اليوم سهلة وكتكوتة وممتازة لما نكون بدنا شي سريع او يجونا ضيوف على فجأة ((ماهو الضيوف بهالغربة مقتلين بعضن قال يعني)) ماعلينا يامو المهم تعالو نشوف المقادير بعدين منكمل كركرة
منحتاج لوصفتنا الحبوبة

المقادير

  • ملعقتين كبار زبدة ونتوفة زيت
  • ثلث كوب سميد ناعم
  • كوب برتقال مطحون ممكن بقشرو او عصير برتقال صافي حسب مابتحبو
  • 3 ملاعق سكر (اختياري وحسب حلاوة البرتقال)
  • كاسترد بالشوكولا جاهز او مهلبية شوكولا منطبخها بالبيت انا استخدمت هون الجاهز لأني كنت مستعجلة ولأني عاملتها قبل هههه
  • بسكويت سادة

الخطوات

“بسم الله الرحمن الرحيم”

* أول شي منطحن البرتقال مع السكر ومنخليهم على جنب

* منحمص السميد بالزبدة والزيت ليبلش لونو يتغير منصب عليه خليط البرتقال ومنطبخ فيه السميد ليمتص العصير وينشف

* منحط نايلون بالطبق اللي بدنا نعمل الحلا فيه ومنثبت السميد بعد مايبرد شوي عالأطراف كلها

* منصب بالنص خليط الكاسترد بعد مانطبخو بالطريقة المعتادة ومنحط قطع البسكويت بالنص وبس نخلص منترك الأطباق ليبردو ويصيرو بحرارة الغرفة

* منغطيهم ومندخلهم البراد ليتماسكو منيح وبعدا صار الحلو جاهز للتقديم

* لكل اللي بحبو الشوكولا وبحبو يجربو معها نكهات مميزة متل البرتقال ان شاء الله رح تعجبكن الوصفة وعلى بساطتها رح تكون مميزة قدام أهل بيتكم وضيوفكم وقدامي لو حبيتو تعزموني

* عيوني عم يزغللو من النعس بس ماحبيت نام قبل ما ابعتلكم هالوصفة ونلحق موسم البرتقال ههههه

بحبكن هالقد يا منعنشات انتو ولا تنسوني من صالح دعائكم

89 تعليقاً

  1. شووووو هاااااض بلهجتنا الاردنيه 😅😅😅
    بسم الله ما شاء الله تبارك الرحمن بتجنن ربي يسعدك
    فعلا بتشهي وبتجنن ومنظرها رااااائع جدا
    ربي يسلم هالانامل وهالعقل المبدع ♥️♥️♥️♥️

  2. يخررررررررررراااااشي شووو هادد نووووووااااارة وك شووووو هااااااد
    شكلهااااا بيااااخد العقل تبارك الله بتجنن ريتوو الف الف الف صحححتييين وهنا يا عمممري ع قلبك ويعطيكي العافية يااارب والله انك فناااانة ومبدعة وبتجنني

  3. ربي يسلم هالديات يا وردة منظرها ولا أطيب ربي يحفظك ويحميكي وتظلك تتحفينا بوصفاتك الروعة متلك حبيبة عمري نونا جد مشتااااااااقة كوميااااات إنو أكنكن انا واياكي يعني نرغي هههههههه كيفك يا قلبي

    بالنسبة للوصفة المنظر خطييييير ومشهي للغاية ربي يحفظك وتظلك تعملي حاجات حلوة متلك

    • والله وانا مشتاقتلك قد الدنيا😢😢
      فاقدة كتير لحكياتك ومشتاقة اتطمن عليكي واعرف اخبارك
      كانت ماما زايرة عندي هالكم يوم مافضيت اعمل شي والله😅
      كيفك انتي طمنيني عنك وكيف أهلك؟؟
      والأطافيل حبايب خالتهم شو اخبارهم😍
      شو عاملة هالأيام؟؟

  4. اللهم بارك رووووووووعة
    شكلها شهيه الله يعطيكي العافية أختي نور
    لوحاتك لاترسمها الريشه بل الأنامل المتقنه الله يسخرلك كل خير ويحقق أمنياتك

    نوااره كيف صحتك أختي وكيف الأهل وكيف أمورك إن شاءالله تمام
    نشتاق لك كثير لكن ما بااليد حيله من حبه بيد غيره مات معلّق
    خليكي تغيبي وتكثري غياب لتصحي بيوم من الأيام وأنا ببابك .

    • انا صحتي الحمد لله عم تتحسن والأهل الحمد لله بفضل من رب العالمين
      كانت ماما زايرة عندي هالكم يوم والله
      اليوم المسويات راحت الله يحفظها وييسر امورها
      صدقا يا اختي ام عمر الله بيعلم بالحال😅
      انتي شو ترتيبك بين اخواتك؟؟

    • وانا مشتاقتلكم اكتر والله
      ربي بيعلم باللي بقلبي
      بس لترجعي تعلقي هون بحكيلك شوي😅
      انا بحبك كتير والله
      وبحس بالتقصير بحقك وتأنيب الضمير شغال جواتي دايما
      سدقيني يوم المنى لما اجتمع فيكي وشوف الإنسانة اللي حبيتها من قلبي وتمنيت التقى فيها بالدنيا وبجنان الخلد ان شاء الله⁦♥️⁩

    • أحبك الله وأكرمك وأعلى مقامك وحقق أمنياتك ببركة هذا اليوم الفضيل إن شاءالله
      وأنا أحبك أختي الرابعه هذا ترتيبك مع أخواتي
      ترتيبي الأصغر في خواتي وبعدي اثنين اولاد وماعاد جابت أمي الله يبارك بعمره وعمر أمك
      طبعا احنا عشره اخوان سته أولاد وأربع بنات وأجهضت أمي 8 اللهم بارك أخذنا صحة أمي المسكينه واليوم كله يوجعها،😔 كل أنواع المرض فيها الله يجزيها الجنه وجميع أمهات المسلمين
      سيجمعنا الله يااأختي وقلبي مطمئن بذالك إن شاءالله وأنتي وأنا بأحسن حال
      فاالمتحابون في الله لهم مواعيد لا يخلفها الله

      مااأعرف سبب مرضك ولكن أشعر بأنك مشتته وتعاني طمنيني عنك أختي فلقد مررت بتجارب كثيره لعلي أساعدك ببعض ما أفهم ولاتترددي فأنا أختك بإذن الله ولن أتركك
      الله يبارك في عمر الوالده كانت زايره عندك المولود الأول دائما هو المحبوب والمستأمن من الأمهات والآباء مثل أختي الكبيره كأنها أمنا جميعا الله يحفظه حنونه وعاقل

      المهم ياقلبي إذا زاد حملك أرمي حملك عليا الأخوان أعوان وإن شاءالله تهون كل الصعاب
      أرجو الله لك التوفيق والسداد في حياتك أختي

  5. ماشاء الله اللهم بارك منظر مغري جدا و طبيعي هذا شي لانها وصفتك أكيد ستكون متميزة و ناجحة و لذيذة و كل حاجة فيها رائعة مثلك الله يحفظك من كل شر يارب و شكرا على وصفاتك الناجحة جربت وصفات الشوفان و كانت رائعة 😍 كلها حتى لي بالسبانخ رائعة و مذاقها ممتاز كأنها محضرة بفاكهة و لي بالموز جربتها لإبني عجبتو بزاف بعد ما ذاق معي نفس الوصفة بالتفاح في الاول ،الكرات لي ما جربت لانها فيها زبدة و بسكوي ان شاء الله نكمل فترة الريجيم و نتشافى بإذن الله و اجربها لأني متاكدة انها مميزة ايضا كباقي وصفاتك جزاكي الله خيرا ❤❤

    • غاليتي ماما عايدة مابتتخيلي قديه كلامك وتعليقاتك بتأثر فيني لدرجة دايما بورجيهن لماما وبتفرح كتييير والله وبتدعيلك
      ربي يكرمك ويجزيكي عني كل خير صدقا انا ممنونة من قلبي لمحبتك وثقتك وبشكر رب العالمين انو كرمني بمعرفة انسانة متلك بأخلاقك الراقية ⁦♥️⁩

    • انا كتير سعيدة انك جربتي هالوصفات وحبيتيهم وشرف الي شيف رائعة متلك تحب وصفاتي😘
      هنا وعوافي الك ولابنك ولكل مين بحبك ياغالية
      وكمان بهنيكي على شجاعتك بتجربة الوصفات اللي فيها سبانخ😁
      البنات يبدو ماتشجعولهن مع انو كان نفسي يحبوهن مشان يحصلو الفائدة هنن واطفالهن الله يحميهم⁦♥️⁩

    • حبيبتي ربي يحفظك كلامك كثيير عليا.
      صحيح غريبة الوصفات لكن ثقتي في وصفاتك كانت أكبر و كنت متأكدة من النتيجة 99% و كانت فعلا النتيجة غير متوقعة و عجبتني ❤ أتمنى الكل يتشجع و يجربها 😋 مفيدة و لذيذة

  6. زهرة البيلسان

    إلى صاحبة التميّز والأفكار التي تحمل الفكاهة وبصمة المشتاق.. أزكى التحايا وأجملها وأنداها وأطيبها.. أرسلها لك بكل ودّ وإخلاص
    انت سكره محليه محطوطه على كريما
    ❤❤❤❤❤❤❤❤❤❤❤

  7. صباح الورد والفل والياسمين الله يحفظك شو بتعطي تفاؤل وبتنحبي من القلب الله يبارك لعيلتك فيكي ما أخف دمك 🌹شرحك الوصفة يخليها قمة الروعة وع المفضلة تلقائيا 😘😘😘يسعد البك مبسوطة اسمي زي اسمك😉

  8. يختي وين هالوصفة متخبية ….معقول في الك وصفة نازلة وما تدخل عندي على المفضلة ….هزلت هزلت كل وصفاتك عالمفضلة دون استثناء اعملتيلي ازمة بالمفضلة 😘😘😘😘😘
    تسلم ايدك يختي انتقلتي من الشوفان للكيك انا متأكدة انك حاطة ام لمى براسك بدك توصليني ١٠٠ كيلوا ما علينا المشكلة انه وصفاتك ووصفات كتير من الصبايا عنجد روووعة وبتفتح النفس والمشكلة الأكبر عندي اني لما بفتح وصفاتكم بيكون ما عندي وقت اعملهم وتخيلي وانا قاعدة بتفرج عالوصفة ومعدتي تصرخ وتصرخ طلبا للوصفة …شو اعمل بحالي ساعتها فهميني ……😭😭😭😭😭😭😭😭😭😭😭
    رووووووووووووووووعة متلك ومتل طيبة قلبك وشعورك …ودائما بحكيلك كلمة انه الحروف بتعجز انها توفيكي حقك صدقيني ما بجاملك …..انتي انسانة رائعة جداجدا ومهما وصفت وحكيت عنك ما رح اقدر اعطيكي جزء من الصورة الي ببالي عنك ….راسمة صورة لنور بعقلي مش بالشكل لأ ..صورة نور الإنسانة الي كلها طاقة وحيوية وامل وتفاؤل ولسة عندي كلام كتير مش عارفة اعبر لأنه الإلهام لسة ما زارني 😁😁..بس قدرت اعطيكي جزء من فكرتي عنك ……تسلم ايدك ويعطيكي الف عافية ……سيدة شوفانة المبدعة ………..
    وصفة من الآخر 😘😘😘😘😘😘😘😘😘😘😘😘😘😘😘😘😘😘😘😘😘😘😘😘😘😘😘
    ربي يبعد عنكم المرض والفقر والحسد ويردكم لبلادكم سالمين ….سلميلنا على الوالدة …….والله يعطيها الصحة والعافية وتضل منورة بيتك بوجودها حواليكي …….

اترك تعليقاً

لن يتم نشر عنوان بريدك الإلكتروني.