لبن رايب بحليب البودره حملة لا للجاهز دوره طبخ

لبن رايب بحليب البودره حملة لا للجاهز دوره طبخ
المقادير
- ٢ ليتر ماء او ١٠ كاسات
- ٢ كاس حليب باودر اي نوع متوفر
- ٤ ملاعق طعام لبن رايب او علبه زبادي صغيره ( روبه )
الخطوات
اول شي بضيف الحليب الباودر للماء وبحركه مزبوط ليتجانس ويذوب الحليب تماما
بعد هيك بغلي الحليب عنار هاديه مشان ما يشيط الحليب وتتغير نكهته
بعد ما يغلي الحليب بطفي تحته وبتركه يبرد شوي
هلا الحراره المناسبه للحليب لازم تكون بس تحطي اصبعك تتحملي الحراره وتستني عشر ثواني
المهم بهالخطوه هو حراره الحليب يعني لا فاتر ولا سخن كثير
بعدين بضيف اللبن الزبادي او الرايب للحليب وبحركه منيح ليختلط
بتغطي الحليب وبتكمريه بحرام هاي كمان خطوه ضروريه لازم يضل دافي اكبر قدر ممكن
بده من ٥ الى ٦ ساعات وبتفقديه رح يكون قالب واحد
&& يفضل هون تنقليه بالثلاجه بدون ما تحركيه او تشيلي منه اشي ولا معلقه مشان يجمد بزياده بالثلاجه ويضل قالب واحد
بده بالثلاجه ساعتين ليجمد منيح اقل شي وبعد هيك بتاكلوه بالصحه والعافيه .
***** حل لمشاكل ممكن تواجهك ونصائح مفيده****
** لبن الغنم الاسود او الماعز ما بجمد كثير الا يضل رخو هو هيك طبيعته
** لبن البقر ولبن الغنم البيضاء بجمد وبصير قالب واحد اذا اتبعتي الخطوات فوق
** اذا روبتي اللبن وبعد ٦ ساعات ما جمد ارجعي سخني مي بطنجره لدرجه الغليان وقعدي دلو الحليب فيها وضيفي معلقتين روبه وتحريكه خفيفه فقط وارجعي اكمريه
** اذا كانت الروبه حامضه من قبل رح يطلع اللبن كمان شبه حامض
*** نقل اللبن ع الثلاجه مباشره بعد ما يجمد بمنع يحمض اللبن لانه كل ما طول بالكمر كل ما زادت حموضته .
بتمنى تجربو هالطريقه وتدعولي بالخير
بحببببببكم كللللللكم ♥️
شرح وافي كافي بلبله… ممتازه
لبن النعاج كمان بطلع زاااكي كثير لما نحطه عليه😋😋😋😋
يعطيش العافيه خيه
ربي يعافي قلبك ام علي
طبعا بطلع بشهي بس هلا مش متوفر 😥
يسلمو ايديكي ماشاء الله عليكي ممتاز👍
ودياتك غزوله
ماشاء الله عليكي بلبله
الله يقويكي يارب ابدعتي👍
حبيبتي ام محمد
روووووعه كفيتي ووفيتي تسلم ايدك حبيبتي هذه الطريقه الصحيحه لعمل اللبن سواء كان مجفف او حليب عادي الله يعطيك العافيه
يسلملي قلبك ام علاء 🌺
تبارك الله عليك تقريبا مثل الرايب عندنا نحضره في رمضان للسحور 😋 بصحتكم
ربي يبارك بعمرك ماما عايده
معلومات قيمه من زمان بدنا زي هيك شرح يسلمو حبيبتي
حبيبتي ام عبدالله
بالخدمه
ماشالله عليكي يا عسل مبدعه يختي وشطوره اسم الله عليكي الله يحفظك لعيلتك يارب
هيني جربت وصفتك ❤️❤️❤️❤️
تجربيها بالسعاده ام يمان
يله بانتظار النتائج 😅
ماشاء الله عليكي حبيبتى ويسلم دياتك
ودياتك يا قلبي
يسلمو اديكي ع الوصفه كنت بدي ارن ع امي اخذ الطريقه بس شرحك كافي 😘
حبيبتي ام محمد
ويحفضلك امك ان شاء الله
يسلمو اديكي حطيتها علمفضلة انشاء الله بجربها
تجربيها بالهنا سلمى ♥️
يسلمو ايدكي
ودياتك سوزي
يا الله الي شهور بدور على الطريقه صحتين وعافيه بس اذا كان حليب غنم كيف بينعمل ؟؟؟
ام يعرب لبن الغنم نفس الطريقه بس لبن الغنم السوداء( الماعز )بضل رخو هيك طبيعته
ولبن الغنم البيضاء( النعاج) بجمد اكثر
اذا لبن غنم سودا زيديه لبن بقر بجمد اكثر
يسلم ايديكي يا رب وانا عملت لبن بالبيت وطريقتي نفس طريقتك ممتازة جدآ هالطريقة ابدعتي يا عسل 😍😍😍
فيه الف عافيه ام حسن
معدله ربي يحميكي
يعطيكي العافيه يا رب طريقه ممتازه
وصحه وعافيه
ع قلبك ام محمد العسل
أم نبيل
ما شاء الله عنك ست بيت معدلة ومزوقه وفنااانه الله يعطيكي الف عافيه ويعيشو هالايدين
بصراحه احنا هلأ بوقت هيك وصفات نعملها بالبيت وضروري كل أم تتعلمها
🌹💕🌹💕🌹💕🌹💕
حبيبتي ام نبيل ان شاء الله ما بنحتاجها الا بالسعاده والهنا للجميع
الله يسلم هالايدين
والله أنا جربتها أربع مرات من قبل والطريقة مرتبة وطعم اللبن مثل اللي بنشتريه ما بيفرق عنه باشي وبالعكس انظف واحسن
اكيد ام علي اطيب وانضف لانه عامليه بايدك
يسلم دياتك وصحه وعافيه
ماشاءالله ..شكلو بشهي…الي اسبوع ماعندي لبن لحتى مبارح سمحو للشعب نجيب اغراض لقدرنا نجيب…عنجد وصفتك بوقتها يسلمو اديكي..بس بدي اسالك يعني لو عندي علبة لبن كبيرة كم احط منها لانو مافي علب صغيرة لما جبنا مبارح كله كبار..واذا بتعرفي طريقة لبن الشنينة تحكيلي عنها الله يجزيكي عنا كل خير.. ….
ام عبود حطي لكل كيلو حليب معلقتين لبن او ٣ حسب الجو اذا بارد بده روبه اكثر
والشنينه يا ستي بعد ما يصير عندك لبن رايب طلعيه بالليل برا الثلاجه مشان يحمض شوي
الشنينه طيبه حامضه
وبتزيدي كل كيلو لبن كيلو ماء وبتخضيه بالخضاضه واذا ما عندك خضاضه اخلطيه ع المولينكس ليطلع اللبن رغوه
بتحطي بالخلاط مكعبين ثلاث ثلج رح يبلش يجمع معك زبده ع الوجه من دسم اللبن بتجميعها بايدك وعصريها
بس اذا الرايب معمول بحليب بودره ما رح يطلع زبده لانه ما في دسم
وان شاء الله تستفيدي ٠♥️♥️♥️
احسنتي مثل طريقتي الله يوفقك
حبيبتي سناء واياكم يا رب
يسلمو طريقه جميله وسهلا انا ما كنت اغلي الحليب بس كنت اسخنو
لا طبعا ام علي لازم تغليه مشان تقتلي المايكروبات والفايروسات والبكتيريا فيهم
هيك صحي اكثر
يعطيك العافية شرح وافي ما شاء الله عليك 👍👍
يعافي قلبك ايوش 🥰🥰🥰
سلمت يمينك….ريت فيها الهنا والعافيه
ودياتك ام البنات🌺
ماشاءالله تحفة والشكل اكثر من رائع
انتي الاروع ام حسنين
يسلمو حبيبتي انا بسأل عن المقادير اذا كان حليب غنم
ام يعرب اذا اللبن غنم عادي حطي معلقتين روبه لكل كيلو حليب
بس الغنم السوداء لبنها بضل رخو افهمتي علي
يسلمو اديكي حبيبتي الله يعطيكي العافيه
ربي يعافيكي ام حمزه الغاليه
يسلم اديكي يا رب والله يجزيكي كل خير احنا فعلا بحاجة لهيك وصفات
قلبي ام عمر انا بالخدمه ♥️♥️♥️
لك يسعددددددها العسسسل ربي يسلم ديادك ويبارك فيهم يارب😍
نفس طريقتي وكتير ناجحه وزاكيه طالعه معدله إلي صح😅
صحه وألف عوافي ع قلوبكم حبيبتي 🌷
الي الشرف تطلع معدله مثلك ام مصطفى
حبيبه قلبي ♥️♥️♥️
يا عمري ربي يسسسعدك أنتي الأصل خيتا😘🌷
ماشاءالله تبارك الله
أبدعتي وفصلتي
الله يعطيك العافيه ست بيت مميزه
تقريبا نفس طريقتك أسوي .
ربي يعافيكي ام عمر
يا عمي معدله يسلموووو الأيادي يا قلبي صحتين وهنا
ع قلبك خطوره 😍😍
رائع تسلم ايدك ويعطيكي الف عافية يا رب
ع قلبك ام لمى ربي يسعدك
تسلم ايديكي تؤمي الله يبارك بعمرك يارب ويعطيكي العافيه نفس طريقتي 😍😍😍
ربي يعافيكي ويشافيمي يا احلى توئم بالكون كله
ويسلم دياتك يا معدله انتي 🥰
يسلم اديكي وعينيكي حبيبتي😘
ودياتك ام جود الغاليه
ماشاء الله عنك يا معدلة
تسلم ايديكي والله يهني اهل بيتك فيكي وبحرصك انك ماتحرميهم من شي 😘
حبيبتي نواره ربي يحفظك ويسلمك
يسلم اديكي وعينيكي حبيبتي😘
حبيبتي ام امير يسلملي قلبك 🥰
يعطيكي العافيه ازا ماكان عنا لبن روبه في بديل
للاسف ما في بديل للروبه
اما رايب او زبادي
يسلمواديكي معلش اسالك اعملتها نفس مقاديرك وطلع البن خفيف شوي شو السبب
ممكن بده وقت شوي ليروب او نوع الحليب مش جيد
لانه جربته بنفس الطريقه ع انواع من الحليب البودره غير نيدو وحليبنا ما راب منيح بضل رخو شوي
افضل حليب باودر للرايب حليبنا والنيدو