المجد للأقوياء بقلم الكاتبة هلا غرابلي

18 2٬892
 

المجد للأقوياء بقلم الكاتبة هلا غرابلي

المجد- للأقوياء-بقلم الكاتبة-هلا-غرابلي

المجد للأقوياء بقلم الكاتبة هلا غرابلي

المجد للأقوياء بقلم الكاتبة هلا غرابلي, معكم صديقة زاكي الشيف الموهوبة ,

منقولة
الجزء الاول

الحياة صغيرة،قاومي المها،ابكي حتى تنهاري

امض سريعا،اصرخي لا بأس في ذلك

تجاوزيها بكل ما اوتيت من قوة،احتضني الذكريات،احرقيها،اهجري قلبك

و احذري ان تسقطي!….(مقتبس)

لما الكل بيتخلى عنك ،لما الكل بيتناسى انت شو قدمت ،لما الكل بيرميك برا دائرة حياته ، لما بتصير عبأ لا يحتمل على غيرك ،وحده ربك هو يلي بيعطيك القوة لتسند نفسك بنفسك و تبني حالك من جديد ……

سامر: ديمة ….ديمة….وينك!!

ديمة :ليكني هون،بالمطبخ….

سامر: كيفك؟ …

ديمة: لحمدلله مشتاقتلك شو جايبك من شغلك على بكير ؟

سامر:جاي اخد مصاري و اسمعي بدي تنزلي تبيعي دهباتك؟

ديمة: دهباتي؟ليش؟! خير انشالله!!

سامر: اليوم اجا ابوكي و اخوكي عندي على الشغل و رجعو فتحو موضوع الشراكة بالسوبر ماركت ،وانا وافقت و اتفقنا عالربح بالنص ….

ديمة: سامر انت بتعرف رأيي بالموضوع،ولله ما حابة يكون في شراكة بيناتكن ،بكرا اذا صار شي و اختلفتو بتوقع براسي انا ،خلص اصبر شوي ليصير معنا مصاري اكتر ،بتفتح هالمشروع لحالك…

سامر : اي يعني اصبر لسا شي عشر سنين و لا حتى بعشر سنين بقدر افتح هيك مشروع كبير ،خلص اعملي متل ما عم قلك و بكرا شوفي كيف بدو يشتغل هالمشروع و وعد اول ما يصير معي رح رجعلك اياهن ….

ديمة :و شو بدو يضمنلي ترجعلي اياهن؟! ،اكتبلي فين سند امانة….

سامر:عيب عليكي يا مرة،انا بضل زوجك و بعدين المردود راجع عليكي و على بيتك و اولادك و انا اعطيت كلمة لاهلك ،شو بدك يقولو عني تشتوش و ما بحكم على مرتي تعطيني دهباتا، و بعدين يا ديمة يا روحي هاي فرصة لا تعوض ،لا تنسي انا ما رح اقعد بالسوبر ماركت ابدا و لا رح اتعب فيه ،و رح ابقى بشغلي،يعني مدخولين بصير عنا…

ديمة:طيب خلص ،هلا منروح على السوق و منبيعن سوا

اقنعني سامر بكلامه و يلي طمني اكتر انو الشراكة مع اهلي لهيك نزلت على السوق وبعت دهباتي كلن و تركت المحبس بس ،و بعدين وصلني على البيت و هو اخد حقن مع المصاري يلي كنا مجمعينن من شغله و راح لعند ابي و اخي يلي كانو ناطرينو حتى يوقعو عقد المحل و بعد شهر افتتحو السوبر ماركت و عبوها بضاعة من كل شي و اول ما افتتحوها كان دخلها قليل ،بس بعد 5شهور بلش يتحسن و اعطونا متل ما اتفقنا 50بالمية من الربح ….

بس بعد سنتين قررو ابي و اخي يسكروها لانو انكسرو و تراكم علين ديون كتيرة ،لهيك بلشو يصفو بالبضاعة و عرضو المحل على البيع و خبرونا انو بس ينباع رح يرجعولنا شو دفعنا فيه ……

ـــــــــــــــــــــــــــــــــــــــــــــــــــــــــــــــ

الجزء التاني:

مرت سنة كاملة و نحن ناطرين لينباع المحل و يرجعولنا حقنا اهلي بس للاسف كانو يقلولنا على طول سوق العقارات واقف، و ما ضل مكتب الا حطينا المحل و مواصفاته فيه، بس كل ما يجي حدا من الزباين يشوفو ما يحب موقعه ،لمرة اجا زوجي من شغله معصب

سامر:ديمة….ديمة..قومي ضبي اغراضك و على بيت اهلك يلا ،ما بدي شوف وجهك هون ..

ديمة :شبك ،شوفي ،ليش عم تحكي معي هيك؟..

سامر:ابوكي و اخوكي النصابين ولله لحطن بايدي بالسجن و لرجعك الن مطلقة…

ديمة:شوفي ،شو دخلني انا!!

سامر: ابوكي النصاب بايع المحل من سنة و شاري سوبر ماركت تانية بمنطقة تانية و الو سنة عم يماطل فيني على انكسرنا و مديونين و مفلسين و المحل ما عم ينباع ،و انا متل الاطرش بالزفة طول هالسنة و وقت رحت لحط على عينن،قلولي روح ما الك شي عنا ..

ديمة :انا قلتلك ما بدك هالشراكة بس انت يلي اصريت و بيعتني دهباتي فوق منها ،حسبي الله بس…

هجم علي ضربني و انا قلو لك بعد عني ،شو دخلني انا ،عم تتفشش فيني ،و بعدا حملني و زتني برا البيت و انا بقميص النوم ،صرت ابكي و دق الباب عليه و قلو دخيل الله سامر افتحلي الباب لك وين بدي روح بحالي ،لك شوف شو لابسة ،ولله عيب عليك تعمل بمرتك هيك،قلي انقلعي لبيت ابوكي و خلي الناس كلها تشوفك بهالمنظر ،خلي الناس كلها تبزق على شرفكن و عرضكن،قلتلو سامر انا ام اولادك و محسوبة عليك ما علين ،قلي انقلعي من هون ما عم تسمعي يا عيلة النصابين انتو،ولله لحطن بالسجن لابوكي و اخوكي و ولله لاتركك لا معلقة و لا مطلقة،بكيت و ترجيته كتير يفتحلي الباب حتى ما يشوفني شي حدا طالع او نازل من البناية بهالمنظر بس ما رد علي ابدا ،نزلت عند جارتي يلي ساكنة تحت بيتي و دقيت الباب عليها و انا عم ابكي و خجلانة ،فتحلي زوجها الباب و اطلع فيني من تحت لفوق،قلتلو الله يخليك ناديلي لمرتك رنا ،صفن شوي و قلي تكرمي و بعد شوي اجت رنا و شافتني بهالمنظر ،قلتلا الله يخليكي اعطيني شي البسو من عندك بس لروح فيه عند اهلي و حكتلها شو صار معي و فتت عندا لبست و رحت على بيت اهلي…..

دقيت الباب و فتحتلي مرة ابي و شافتني و قلبت وجهها فورا ،قلتلا وينو ابي و عامر ،قلتلي هلأ على موعد جيتن ،فوتي انطرين بالصالون،و بعد نص ساعة اجو و شافوني بهالمنظر و سالوني شو صاير معك

ديمة: نحن ما اتفقنا هيك ،ليش خبيتو علينا انو بعتو المحل من سنة و اشتريتو محل تاني بمنطقة تانية ….

ابو عامر: اي اعتبرو حالكن مدينينا مصاري و رح نرجعلكن اياهن من ربح السوبر ماركت الجديدة …

ديمة: طيب ليش ما دخلتو زوجي شراكة بالمحل الجديد،هو دافع متلكن متله ….

عامر : اذا بدنا نفوتو عالنص شو بدو يطلعنا مربح ،و بعدين يطالب باالمبلغ يلي هو دفعه ،ما يطالب كمان بحق دهباتك لانو هدول ما ملكه…

ديمة :اي هدول ملك مرته و من حقه يطالب فين….

ابي:شو شايفك واقفة لصف زوجك و نسيانة انو نحن اهلك كمان…

ديمة :لا ما نسيانة انكن اهلي ،بس انا زوجي ضربني و قلعني و زتني بقميص النوم برا البيت و قلي اهلك نصابين و رح يطلقني و كلو من تحت راسكن ،الله يخليكن يا بتفوتو شراكة يا اما ارجعو بيعو السوبر ماركت و اعطوه شو دفع لانو ناوي يحبسكن …

عامر:اولا ما انت يلي بتقليلنا شو نتصرف و بعدين روحي قليله انو العقد يلي معه ينقعه و يشرب ميته لانو مزور و صار يضحك

ديمة:شو يعني هالحكي؟يعني انتو فعلا نصبتو علي و على زوجي و اكلتو حق بنتكن قبل صهركن….

هجم علي عامر و بلش يضربني و يقلي وليه احترمي حالك و اعرفي شو عم تحكي مع ابوكي و اخوكي يلي اكبر منك و بعدين مسكني من شعري و فتح الباب و زتني برا البيت و قلي بتروحي بتقليلو لزوجك يلي بعتك لعنا انو ما الو عنا شي و يروح يبلط البحر ،قلتله حسبي الله و نعم الوكيل فيكن انتو اهلي يلي انا من لحمكن و دمكن هيك عملتو فيني ،شو تركتو للغريب ..

ــــــــــــــــــــــــــــــــــــــــــــــــــــــــــــــــــــــــ

الجزء التالت:

ما عرف لوين بدي روح بعد ما تقلعت من بيت زوجي و بيت اهلي ،حسيت حالي ضايعة و ما عندي سند بهالدنيا،و صارت الساعة 10بالليل و انا بعدني عم افتل بالشوارع و حتى يكمل حظي اكتر ،بلشت تمطر و تبللو كل تيابي و حسيت حالي رح موت من البرد ،قلت رح ارجع لعند سامر بلكي بحن قلبو علي و بفوتني ،رجعت دقيت الباب كتير بس ما حدا رد علي ،و نزلت من البناية بدموع عيوني، و رجلي لحالن اخدوني عند رفيقتي سوزان ،سوزان شخصية قوية و جريئة و اجتماعية ،جذابة ،مناصرة للمرأة و محبوبة ،و اكتر شي بتكرهو انو المرة تكون ضعيفة و محكومة للرجال ،ساكنة لحالها ببيت اهلا بعد ما توفا ابوا و اما و ما قبلت تتزوج ابدا لانو كانت معقدة من الزواج و من طريقة معاملة ابوها لاما لهيك حقدت على جنس ادم كله ،كنت دائما شوفها باعجاب المرة المثالية وكتير بنات و انا منن كنا منتمنى نكون متلها لهيك رحت لعندا و دقيت الباب عليها،اجا صوتها الناعم من جوا …مين ؟؟،قلتلا سورزان انا ديمة افتحيلي ،فتحتلي الباب و طلعت فيني مستغربة و قلتلي شو صاير معك ؟فوتي بسرعة كل تيابك مي بتمرضي،فتت لعندا انا و عم ابكي و اعطتني تياب من عندا و غيرتن و حكتلها كل شي صار معي …

سوزان : هدول هنا الرجال بيستقو على المرة الضعيفة يلي ما الها سند ،يا ديمة المرة بمجتمعنا لازم تسند حالا بحالها و تكون قوية و ما تعتمد لا على اهلها و لا على زوجها لانو احتمال باي لحظة يتروكها وحيدة بنص الطريق و ما لازم تسمح لحدا يهينها و ياخدلها حق ،و انت غلطتي وقت اعطيتي دهباتك لزوجك ،هدول حقك بالشرع ،و انت فرطتي فيه،و المرة يلي بتفرط بحقا زوجا بينظرلا على انو ضعيفة و هبلة ،و بيستغلها اكتر و اكتر ،و هلأ شو بدك تعملي ؟

ديمة:ما بعرف ،انا ما عندي حدا روح لعنده غيرك ،رح نام عندك الليلة و ارجع تاني يوم…

سوزان:لوين بدك ترجعي تاني يوم ؟لتترجي زوجك يفوتك على البيت ،اسمحيلي قلك انو زوجك بلا شرف ،يلي بيقلع مرته بقميص النوم و ترجته كتير و ما فتحلا الباب و هو بيعرف انو رح تنزلي هيك قدام الناس و يشوفوكي بهالمنظر ،و ما حسب انو ممكن حدا يتعرضلك لما يشوفك هيك،شو بتستني منه ،هادا ما الو امان تعيشي معه،بكرا على تاني مشكلة بقلعك مرة تانية ..

ديمة:شو بدي اعمل لكن ،ما عندي اي خيار تاني ؟

سوزان :لا عندك ،بس انت ما حابة تشوفي الا خيار واحد ،فوتي نامي هلأ لانك اكيد بتكوني تعبانة و بكرا الصبح انشالله منشرب القهوة الصبح قبل ما روح على شغلي…..

فتت نمت و انا عم ادعي و اتحسبن على زوجي و على ابي و اخي ،و فيقتني تاني يوم سوزان و كانت محضرة القهوة و قلتلي قومي يلا ،انا سابقتك على البرندة ،رح تشربي قهوة بحياتك ما شربتي متلا،طلعت على البرندة يلي كان اهتمام سوزان واضح فيا و شربت اطيب قهوة بحياتي مع ريحة الياسمين و الفل

سوزان:اذا انت بدك ترجعي لزوجك ،ارجعي بس بكرامتك ،ما انت يلي بتروحي بتترجيه ليرجعك لانو انت ما غلطتي ابدا ،هو يلي غلط و هو يلي لازم يجي يبوس الايدين لتقبلي ترجعي معه…

ديمة :مفكرة الامور بهالبساطة…

سوزان: الامور ابسط من ما بتتخيلي ،انا بشتغل بمنظمة حقوق المراة و كتير حالات بتجينا متلك و نحن منحتويها و منحاول نحلها بالطرق الصحيحة…

ديمة :و اولادي اغيد و ليث ،ما بتخيل يمر يوم علي و ما شوفن….

سوزان :و مين قلك انو ما رح تشوفين،بتروحي على روضة ليث و مدرسة اغيد و بتشرحيلن لمديرة المدرسة و الروضة وضعك و هن ببعتو بجبولك اياهن من صفوفن لتشوفين ،و بعدين لازم تكوني قوية ، يعني شو بكون صار بنفسية اولادك ،وقت شافو ابون عم يضرب امن و يقلعا…

ديمة :صح معك حق ،بس يعني انا بدي ابقى عندك هون ،ولله ما بدي تقل عليكي …

سوزان:اي ابقي هون و انا رح دبرلك شغل من معارفي لبين ما تطلعي من هالمشكلة شو رايك؟؟

ديمة :اي يا ريت ولله ،هيك برتاح اكتر ،لحمدلله الله ما بيقطع حدا…

بقيت اسبوع نايمة عند سوزان و ما حاولت ابدا اتواصل مع زوجي او اهلي خلالن و رحت شفت اولادي مرتين بس و نبهت على اغيد انو ما يقول انو جيت على مدرسته و شفته و حتى اذا اخوه ليث حكى لابوه ،يحاول يكذبه و ينكر هالشي و بعدا جبتلي سوزان شغل بالميتم عند رفيقتها علا ،و رحت انا و اياها على الميتم لتعرفني على مدام علا و طبيعة شغلي الجديد….

مدام علا كانت مديرة الميتم و كان عمرها 58سنة ،انسانة راقية جدا بالتعامل مع موظفين الميتم ،قدمتني سوزان الها و مدحت فيني كتير و بصفاتي و حكتلها عن الظرف يلي عم مر فيه ،و بعدين تركتني سوزان و راحت على شغلها و انا بقيت مع مدام علا يلي اخدتني جولة بالميتم …

مدام علا: سوزان انسانة غالية علي كتير و مثال للمراة الناجحة و المناضلة ،و ما بقدر ارفضلها اي طلب ،بتحبي تكوني مقيمة بالميتم ،يعني تقضي كل نهارك فيه و تنامي كمان؟

ديمة : اي يا ريت ،انا ما حابة ابقى عند سوزان و الزمها فيني و قيدلا حريتا ببيتا …

مدام علا: ماشي معناتا ،هلا رح خلي فاتن تفرجيكي غرفتك و بالنسبة لطبيعة شغلك عنا متل ما شايفة عنا اطفال كتير بكل الاعمار ،و حتى عنا اطفال بعمر الشهور ،رح حطك متل المشرفة على الاطفال يلي اعمارن ٦و ٧سنين و هيدي مهمة صعبة انشالله تكوني قدها و اهم شي تكوني حنونة مع الاولاد لانو هدول ايتام بالنهاية و النا اجر و ثواب فين …

ديمة :اانا عندي ولدين بهالعمر،لهيك انشالله ما رح خليكي تندمي ابدا انو كلفتيني بهالمهمة بس بدي تشرحيلي اكتر عن مهمة الاشراف…

مدام علا: يعني لازم تنتبهي علين و هن عم يلعبو حتى ما يؤذو حالن ،و تنتبهي على طريقة اكلن و سلوكياتن و تتقربي منن و تخلين يحبو بعض وتشرفي على نظافتن الشخصية و تصححي اي شي غلط بتشوفيه علين و اذا لاحظتي على اي طفل عندو مشكلة لازم تخبريني فورا حتى اتصرف ،يعني باختصار تستلمين من الساعة 7الصبح للساعة 9المسا لوقت ينامو ، هاي هي مهمتك اليومية….

رجعت سوزان عندي بعد شغلها و خبرتا بطبيعة شغلي و اني رح ابقى بالميتم و باركتلي بالوظيفة و قلتلي اطمني ما ناسيتك رح اعطيكي تياب من عندي لتمشي حالك فين ،لبين ما تقبضي اول راتب و تشتري ملبوس الك بس بدك طعميني حلوان…..

ــــــــــــــــــــــــــــــــــــــــــــــــــــــــــــ

الجزء الرابع

بلشت شغل تاني يوم فقت من ال7 الصبح لبست تيابي ورحت على قسم اطفال ال6 و7 سنين وضربت الجرس وفيقتن…

يلا يا جيل المستقبل انا رفيقتكن الجديده اسمي ديمة رح نقضي ايام حلوة كتير مع بعض ونلعب احلى الالعاب بس بشرط لازم تسمعو كلامي يلا يا حلوين هلا بدنا نغسل وجهنا ونفرش اسنانا ونلبس تيابنا يلا بسرعه لشوف مين الشاطر يلي بدو يخلص بكير بعد ما خلصو لبس نزلنا نزلنا على قاعة الاكل واشرفت على فطورن وبعدين فاتو الاولاد على مقاعدن الدراسية وانا رحت اشرب قهوتي مع باقي المشرفين واتعرف علين ورجعت استلمتن مرة تانيه خلال فترات الاستراحه بين الحصص لاشرف على طريقة لعبن مع بعض حتى ما يؤذوا بعض وبس خلصو من مدرستن اخدتن على قاعة الاكل لنتغدى وبعدين دخلتن على المكتبه ليدرسو ويرسمو وبعدين نزلنا على حديقة الميتم وقضينا فيها فترة العصر وبعدين طلعنا على قاعة الاكل لموعد العشا وبعدا اخدتن على قسمن لينام كل واحد بتخته وهيك بكون خلص نهاري هيدا كان الروتين اليومي لشغلي كان متعب كتير بس كنت مبسوطه وحتى ما ضل عندي وقت لفكر بزوجي واهلي وشو عملو فيني وبالنسبه لاولادي بقيت شوفن 3 ايام بالاسبوع …

الميتم كان فيه اهتمام كبير من المدام علا باللبس وبنوعية الاكل للاطفال على الفطور البيض والجبنة والحليب دائما موجودين اما الغدا بيكون نوع واحد من اللحوم مع الرز المطبوخ والخضار والعشا بيكون زيتون وشوربه ونوعين فواكه وكان معمول صندوق بقاعة الاكل بيكتب كل طفل فيه على ورقة شو الاكلات يلي مشتهي ياكلها وبيزتها بالصندوق والبنات يلي مهمتن تحضير الاكل بيفتحو الصندوق مرة وحده كل اسبوع وبسجلو قائمة الاكلات يلي بدن يطبخوها هالاسبوع مع مراعاة نوعية الاكل وفوائده يعني كان في سخاء كتير من قبل مدام علا خلاني اسال رفيقتي المشرفة حنين انو مين يلي بيصرف على الميتم الاكل واللبس وحتى الالعاب يلي فيه من احسن ما يكون وكانو مدرسة خاصة وكانو هالاطفال بيدفعو للميتم من مالن وبعدين الدولة ما عندا هالامكانية ضحكت وقلتلي مدام علا محبوبة كتير وغنية كتير وهي ما متوظفه هون كرمال الراتب لانه حق جاكيتا يلي لابستو هلا براتبي وراتبك بس هي عم تعمل هالشي كرمال الاجر والثواب من عند ربها ويا قلبي هي متزوجة بس الله ما طعمها اولاد لهيك لهيك بتشوفيا بتعامل اولاد الميتم متل اولادا بالضبط وهي بتمول الميتم بجزء بسيط والباقي من معارفها يلي اغنى منها يعني عندك مثلا ابو الحسن هيدا كل شهر بيجي بيتبرع للميتم بشيك بمبلغ انا وياكي ما منعرف نقرأه من كتر ال0000000 يلي جنبه وعندك ابو مؤيد عندو وكالة البسة والها فروع بكل محافظات البلد وبخصص كمية لأطفال الميتم كنوع من الصدقة وناس كتير كمان قلتلا معقول في ناس منيحه وبتعمل لوجه الله لهلأ قلتلي الدنيا لو خليت لخربت وهدول العالم الله بضاعف رزقتن وبباركلن بمالن لانو بطلعو صدقات كتير ولا تنسي الصدقة ما بتنقص من مالا شيئا قلتلا الحمدلله ربك كريم ما بينسى حدا من فضله …..

بقيت اشتغل بالميتم وانا عم حاول اجتهد بشغلي واثبت لمدام علا انو انا قد المهمه يلي كلفتني اياها وكانت دائما تثني علي وعلى ذكائي وقبضت اول راتب الي وحسيت بسعادة ما حسيتها من قبل نزلت على السوق اشتريت تياب الي وشو لازمني اغراض واشتريت لاغيد وليث لعبتين ورحت زرتن بمدرستن واعطيتن اياهن بس بزيارتي التانيه لاغيد وقت طلعت من عندو وانا ماشيه بطريقي وراجعه على الميتم مسكني واحد من ايدي ودخلني بشارع ضيق جيت بدي صرخ

ما تصرخي انا سامر ….

ديمة : هيدا انت ؟ شو لاحقني كانو ؟

سامر : اي لاحقك لانو عرفت انك عم تشوفي الاولاد من الالعاب يلي جايبيتن ومن اول كف على اغيد حكالي فورا رحت لعند اهلك لشوفك قلي الندل اخوكي انو شحطك برا البيت

ديمة : على اساس انت ازبط يعني شو نسيت شو عملت فيني ؟!

سامر : وين كنتي غايبه كل هالشهر ؟ وين عم تنامي ؟

ديمة : هالشي ما بخصك …

سامر : لا بخصني شو نسيانه يا مدام انك مرتي …

ديمة : اي نسيانه يا زوجي متل ما انت نسيت اني مرتك وام اولادك وقت قلعتني بتياب البيت برا وترجيتك كتير وما رضيت دخلني

سامر : انا وقتا كنت معصب كتير وقلت بتروحي عند اهلك وبلكي بحسو شوي يالشي يلي عملوه معي

ديمة : اي وكل ما تعصب انا بتوقع منك تقلعني بهالطريقة شو بدك مني هلأ؟

سامر : بدي اياكي ترجعي معي على البيت وبالنسبة لابوكي واخوكي …

ديمة : اسمع لقلك لا انت ولا ابوي ولا اخوي بتهموني كلكن متل بعض واطلعو من حياتي بقا انا وقفت جنبك كتير بحياتي وحوشتلك الليره فوق الليره كنت المرة المثالية والمضحيه على حساب حالي وبالاخير شو كافئتني بيعتني ذهبي يلي هو حقي وضربتني وقلعتني وفضحتني قدام الناس هلأ خلص ديمة القديمة انا دفنتا بايدي وهلا انا وحده جديده انسانة قوية ومعتمده على حالي ومكتفية بحالي لا بحاجتك ولا بحاجة حدا تاني …

سامر : والله هيك الحكي صار هلأ ماشي ويبقى اولادك انسين

ديمة : اسمع يا عيني انا اولادي بحقلي شوفن واذا انت منعتني في قانون يجبرك تجبلي اياهن وبالزمان والمكان يلي بناسبني لهيك ما تفكر حالك عم تهددني او تمسكني من نقطة ضعفي لانو بحب قلك انا ما عاد عندي نقط ضعف بالحياة بعد البهدله يلي بهدلتوني اياها ويلا لشوف بعد هيك من طريقي يا حبوب …

صار يناديلي ديمة …. لك ديمة …. خلينا نحكي ونتفاهم … تركتو وتابعت طريقي وانا عم اضحك ومستغربه من وين اجا كل هالحكي هاي اول مرة بحياتي بحكي بهالطريقة وبهالثقة حسيت حالي فعلا قوية ومكتفيه بحالي رجعت على الميتم وانا متأكده تماما انو سامر لحقني ليعرف وين عم اشتغل ونام وهالشي ما كان بهمني لانو حسيت حالي لأول مره عامله انجاز وشي مهم بحياتي وما رح اتراجع ابدا عنه ….

تابعت شغلي بالميتم وضل سامر كل فترة يلاحقني ويترجاني لأرجع على البيت وانا اتركه يحكي وتابع طريقي وبعد 5 شهور اجا قلي اذا ما رح ترجعي معي على البيت انا بدي اتزوج عليكي قلتلو تزوج بس طلقني قبل وقت شافني ما سئلانه غير نبرة حكيه معي وبلش يقلي انا بحبك وندمان قلتلو ماشي رح اعطيك فرصة بس عندي شرط قلي اشرطي يلي بدك قلتلو انا شغلي بالميتم ما رح اتركو ابدا وبدي حكي مديرة الميتم لشوف اذا بتوافق تخفضلي ساعات الشغل قلي طيب ماشي …

حكيت المدام علا ووافقت تعملي دوامي من ال8 الصبح ل4 العصر ورجعت على بيتي ولزوجي ولاولادي اما زوجي رفع دعوى على اهلي واتهمن بالنصب والتزوير قدم العقد المزور مع شهود وبقيت القصة سنه وكانت كل القضيه عم تمشي لصالح زوجي لهيك ابي واخي عامر خافو راحو لعند زوجي على شغله وقلولو يسحب الدعوى ورح يدخلوه لزوجي شراكه بس زوجي ما قبل وقلن بدي المصاري يلي دفعتن كاش…

رجعولنا المصاري اهلي وقلتلو لسامر اعطيني حق دهباتي حاول كتير يتهرب ويقنعني انو نفتح مشروع صغير على قدنا بس انا ما قبلت وقلتله اذا بدك تقتح مشروع افتحو من جيبتك اما هدول ما نفكر فين ابدا ونزلت وفتحت حساب الي بالبنك وحطيتن فيه وكل ما اقبض من راتبي حط قسم من راتبي فيه والقسم التاني اصرفو ع حالي حاول كتير سامر يجبرني خصص قسم من راتبي على مصروف البيت بس انا ما قبلت قلتلو انت يلي مجبور تصرف على البيت وانا اذا قصرت شي نهار ببيتي الك حق تحاسبني …

بعد سنه دقلي رقم غريب رديت عليه …

ديمة : الو

…. الو ديمة انا اخوكي عامر

ديمة : خير ان شاء الله شو ذكرك فيني بعد سنتين ….

عامر : ابوكي تعبان كتير وبدو يشوفك….

ديمة : وابوك هلأ تذكر انو عندو بنت بدو يشوفا ما اتذكر اني بنتو وقت زتتوني بالشارع اصلا انا من زمان كان لازم انساكن من بعد ما ماتت امي الله يرحمها وبعد الام احفر وطم…

عامر : نحنا غلطنا والمسامح الكريم وبعدين سيبك مني انا هيدا بضلو ابوكي يلي رباكي وتعب عليكي وهو هلأ على فراش الموت ولا ما سئلانه على رضاه ….

سكرت الخط مع عامر وانا محتاره انو روح شوفو الا لا صح لهلأ حاقدة علين كتير بس كان بهمني ارضي ربي قبل كل شي لهيك رحت لعنده واول ما شافني بلش يبكي كان المرض والموت واضحين على ملامح وجهه قلي سامحيني يا بنتي الطمع ضر ما نفع قلتلو مسامحتك …. مسامحتك قلي الي سنتين ما شفتك رح انسى شكلك بس معك حق ما تيجي قلتلو خلص ما تحكي وتعب حالك انا نسيت كل شي ….

قضيت عند اهلي نص نهار وقبل ما روح على بيتي ابي توفى وبكيت كتير عليه واجا عامر حضني وصار يبكي معي قلي كان بدو يشوفك بس قبل ما يموت وبعد ما شافك مات ….

بعد سنه من وفاة ابي تزوج اخي عامر وانا ترقيت بشغلي وسلمتني المديره علا ادارة الميتم بعد ما قدمت استقالتها وخبرتني انو انا الوحيدة يلي بتوثق فيني وبقدر احمل هالامانه وحافظ على مستوى الميتم وانو انا بستحق هالمنصب بجدارة لانو انا اكتر وحده بين المشرفين يلي مريت بظروف صعبه وقدرت بنفس الوقت اثبت حالي واخيرا عسى ان تكرهو شيئا وهو خير لكم …

انتهت.

18 تعليقات
  1. Amera Alkurdy :

    قصه بغايه الروعه

  2. ام السوس :

    👍👍👍

  3. ام عبد الله :

    روعة استمري💙💙

  4. ام همام :

    رووووووعة كثريلنا من هيك قصص بنتسلى وبنفس الوقت بناخد عبر وخبرات

  5. ام محمد :

    رائعه استمري بهيك قصص الها معني شكرا الك

  6. منال :

    كتير حلوة حبيييت😍😍

  7. ام لورانس :

    يسلموا كتيررر.. قصة بتجنن وفيها عبر..

  8. لميس :

    الصراحه ما في حدا رح يسعدك ويساندك بالحياة متلك انتي كوني قويه

  9. ام تالا :

    قصه روعه وبتجنن
    فعلا ما فيه بعد المرأه القويه

  10. رزان :

    يسلمو كتير القصه بتجنن وعنجد لازم المراه تكون قويه وقد حالها

  11. 🌹 ايمان 🌹 :

    ايوا هيك ارجعي النا في القصص تم تم حلوه كتيررر

  12. ميس الريم :

    يالله شو اشتقت للقصص زمان والله مااستمتعت لا توقفي ضلك نزلي قصص😍😍😍

  13. لينا :

    رائعة ومؤثرة يا ريت المرأة تنتبه على حالها وما تكون عرضة الاستغلال من اي احد

  14. lubna :

    في قمة الروعة

  15. بتول الزيتاوي :

    سلمت يمناك

  16. ام أحمد :

    والله شرحتي خطرنا به القصه صحه في تعب ان الواحده اهلها يجفونها عشان الفلوس

  17. تهاني :

    كتتير حلوة ورائعه القصه

  18. ام ساره :

    مؤثره القصه عنجد حلوة

اترك رد

لن يتم نشر عنوان بريدك الإلكتروني.