فرت من قسورة بقلم جمايكا احمد

37 3٬063
 

فرت من قسورة بقلم جمايكا احمد

فرت من قسورة بقلم جمايكا احمد

فرت من قسورة بقلم جمايكا احمد

فرت من قسورة بقلم جمايكا احمد, معكم صديقة زاكي الشيف الموهوبة ,

الجزء الاول. … الجزء الثاني … الجزء الثالث ..انتهت القصة

لا لا ماتخافو ابدن من وجهي المشوه ، مانو بايدي هالشي صار بس شي مرة صدقوا ، انا قلبي جميل من جوا وطاهر ، بس هني قلوبهم المشوهه ، كنت بيوم من الايام جميلة متلكن ووجهي صافي مابضاهي بجمالي بنت من الحارة ، متعلمة ومثقفة ورزينة وصاحبة ااخلاق عالية ، ابي ضحى بسعادتو هو وامي ليربو بنت حاملة شهادة ، رغم انو نحنا عيلة فقيرة وع البساط البسيط عايشين لا كنت بحلم بغرفة نوم منفردة ببيرو ميك اب وخزانة تياب واحذية ماركة ولا كنت بحلم اكون حاملة جواز سفر عم دور فيه العالم ، كانت هالغرفة الصغيرة عم تحضني انا واخوتي الخمسة ٣ بنات وصبيين صغار ، كنا ننام مرصوصين جنب بعض بالارض ع فرش عربي وحرمات الصوف يلي جدتي غزلتهن ع ايديها ، ووقت الاكل نجتمع ع طبلية صغيرة اكيد مابتعرفوها هي بتشبه الطاولة بس رجليها قصار بننلتف حواليها ونقعد بالارض لنتشارك الاكل يلي من طبق وطبقين والحمد لله ، كان ابي عم يشوف من وجهي النور لنطلع من هالحياة لحياة افضل ، ابي الحمد لله مانو مهندس ولا دكتور ابي رجال بسيط ببيع جرابات ع بسطة ، البسطة يلي اتبهدلت كتير وهي تتنقل من مكان لمكان خوف من هالبلدية تاخدها منا ونصفى بلا قوت يومنا ، ابي كان يدفشها بكل قوتو وهو ماقدران يمشي على رجليه ، قصدي على رجل وحدة ،لان رجلو التانية فيها شلل ولادة ، لا بيوم كل ولا مل ولا قال شي مرة مافي دبرو حالكن ، يقسم اللقمة من تمو ليطعمنا ويقول الحمد لله خير ربنا كثير ، ولا امي الحنونة يلي كانت اداري دمعتها وهي عم ترقع لالي تياب المدرسة ، وتفرح من حد يتسدق علينا بتياب شوي منيحة وتقلنا من باب الله يابنات البسو وانبسطو..زينب اللي هي انا كنت اكبر اخواتي اكتر حد حاسس بألم امي وابي وتعبهن كرمالي وكرمال اخوتي ، الصبح نفيق مع فيقة ابي ..

ابي:- اللي مارح يفيق بسرعة مارح ركبوا ع عربة البسطة ووصلو للمدرسة ..

مابيوم خجلت من هالشي كنت فيق قبل اخوتي وجهز حالي ورتب بسطة ابي واقعد فيها ليوصلني ع المدرسة ، كانو رفيقاتي يلي اهاليهن يوصلوهن بسيارتهن الخاصة او باص المدرسة يتمسخروا ويستهزئو على حالي ..بس ابي ..

ابي :- ولا تزعلي يا زنوبة وعد اوصلك قبلن ع المدرسة ليعرفو انو بيك العاجز اقوى منهن شو رايك ..

زينب :- انا يا بابا مابزعل اساسا انا اكتر حد ابوها بحبها فيهن . كلن بيشكو لبعضن من مشاكلهن وهاي يلي ابوها تركهن وهاي يلي سافر وهاي يلي امها مطلقة وهاي يلي ابوها مشغول .بكفي انك بتكون اول حد باجتماع اولياء الامور موجود ، انا بفتخر فيك وما بزعل الا عليهن ..

ابي :- الله يرضى عليكي يا غالية ..

ومرقت الايام وكبرت فيني السنين ، ورجلين ابي العاجزين خلوني امشي بممرات الجامعة بمنحة اوائل الطلبة ..

امي :- بيك جبلك هالتياب للجامعة جدد والله يا زينب

زينب :- امي ليكون ابي صرف حق دواه

امي :- لا تقلقي الله انعم وفضل علينا الحمد لله واجتو شروة بضاعة منيحة بالسوق وجابلك هادول ..يالا قومي قسيهن لاشوف..

وسنة ورا سنة ، والتفوق محالفني لبيوم اتصادفت بدكتوري بالجامعة ..

دكتورة برهان ..

برهان :- كيفك زينب انا من اشد المعجبين بتفوقك ما شاء الله عليكي وانتي حديث الزملاء بالقسم وبتمنالك التوفيق وتصيري مهندسة قد الكون ، انا عندي طلب ومابدي خجلك انتي قد بنتي والله يرضى عليكي ، اذا تقدملك شاب ابن ناس ومحترم وهو كمان مهندس بتوافقي ..

زينب :- دكتوري الفاضل والنعم منك .. هاد الشي بالاول بيرجع لاهلي ليشوفوا اذا بناسبني او لاء وبعدها نحنا عنا عاداتنا وتقاليدنا اهلي بحبو يحافظو عليها .. والله كريم

برهان :- طبعا طبعا الله يخليلك اهلك اكيد انا بحترم هالشي وبحترم البنت يلي بتحط اهلها بالقائمة الاولى..طيب فيني اطلب رقم تلفون عائلتك ..

زينب :- والله للاسف

برهان :- لا لا تعتذري انا ما بدي تفكري انو الموضوع لالي لان عندي زوجتين لاء ماهيك طلبي لابني كرم الله يحفظك لاهلك وهو شافك بالقسم وطلب مني اتقدملك بس انا مابعرف شي عنكم بعتذر على هالطريقة اللي حكيتك فيها بس هيك التحضر صار ..

زينب :- انا ماقصدت هالشي انا اعتذرتلك لان ابي ما بيحمل تلفون ولا امي هني بشوفوا انو في اشياء كثير اهم من التلفون بحياتنا..بس انا معي هالتلفون البسيط ، انا مابدي ارفض طلبك بس هاد عنوان ابي بيشتغل على بسطة جرابات بسوق الراجي اسمو ابو علي او ابو زينب لان اخواتي الصبيان صغار واسم ابو زينب صرلو عمر ..الكل بيعرفوا فيه..وبيتنا بالمخيم الجنوبي، اول بيت جنب المطافي والطوارئ ..اسال عن ابو زينب الدرويشي ..بساعدوك الناس..

واذا قالو بتسال عن ابو زينب الاعرج قلن اي ..هاد ابي الغالي ..

..

وانتهى حديثي مع دكتور الجامعة واتيسرت على بيتي وخبرت امي باللي صار .. تاني يوم بنسمع دق الباب بموعد غير موعد رجعة ابي من شغلو وكان ابي ..

ابي : خدن طريق يا بنات عنا ضيوف ..اتفضل اتفضل ماتواخذنا بيتنا مو قد المقام بس الحمد لله بنشكر الله ..

كنت عم شوف من باب غرفتنا المكسور الموارب على الصالون شو عم يصير ومين ضيوفنا لان ماخطر ببالي يكون موضوع الدكتور برهان جدي.. ..فرش ابي السجادة الجديدة يلي بنفرشها بالاعياد وفوقها فرشنا الارضي ..كان الدكتور برهان ومعو زوجتو يلي كانت عم مندهشة بنظراتها بمكان عيشتنا يلي جاي تزورو ..ابي طلب منها تشلح جزمتها ..لان السجادة جديد ونحنا من عاداتنا ما بنفوت بالبيت باحذية الشارع ..رفضت بس زوجها الدكتور برهان احترم هالشي وغمزلا وقبلت وقعدت ..

ابي :- ام علي البسي وتعي جايينا ضيوف..بنتي جهزي شو في عنا من خير ربنا ضيافة للاوادم

ام علي :- خير من هادول

ابي :- دكتور زينب بالجامعة قابلني بالشغل وجايين يخطبو لابنهم ..

ام علي : والله طلع الموضوع جد..

..

بحديث امي مع ابي ..طلعت ع مطبخنا البسيط لاشوف شو في عنا لاقدر اكرمهن المطبخ فيو شباك بطل ع الصالون يلي قعد فيه الدكتور وزوجتو..سمعت همهمتهن بس ماكنت قدرانة افهم شو بقولوا تركتن يتهامسوا وانشغلت بالمطبخ..

برهان :- افردي وجهك ام كرم الله يسعدك

سلوى :- هاد اخر حظ ابني لهون يجيبني ..

برهان :- سلوى ابنك لحد الان مافي خطيبة بقيت معو لهيك اصمتي هلق بلكي الله رزقنا بزوجة لالو وشكلن دراويش بيقبلو بالعز لبنتهم ..

..

ابي :- اهلا وسهلا فيكن ماتواخذونا الحال ع قدو الحمد لله ام علي زوجتي ..

ام علي :- اهلا وسهلا شرفتونا ..

سلوى :- اهلين فيكي

برهان :- نحنا يلي بنعتذر انو جينا بلا موعد حاولنا نصل لطريقة نتواصل معكن فيها بس الحلول ضعيفة انا الدكتور برهان اختي ام علي دكتور زينب بالجامعة بنتكم ماشاء الله ونعم الترباية ومن البنات المتفوقات عندي وتحسد على الاخلاق والثقافة والادب والعلم يلي فيها ، وكأب اتمنيتها بنتي ورح تكون بنتي باذن الله من بعد موافقتكم انا بدي اطلبها على سنة الله ورسوله لابني كرم مهندس متلها وهو اتخرج من ايام ..

والحمد لله عندو مشروع عمل خاص فيها وامورو بخير وعندو شقة لوحدو عايش فيها وحالتو المادية ممتازة عمرو ٢٥ سنة والشاب بتشوفوه اذا قبلتو ابني الحمد لله وسيم ومرتب وبيعجبكم شو بدي احكي اكتر من هيك ولا شو رايك ام كرم..

سلوى :- اي طبعا يا حظها يلي بكون ابني من نصيبها وابني شاب ادمي ومثقف ومتعلم متل بنتكم وعجبتو بنتكم والحمد لله نحنا مابنطلع ع المستويات والقصص هاي لا والله كل الناس خير وبركة اه..

ومن حديث لحديث.

سلوى :- مارح نشوف العروس

ام علي :- لا شو هالحكي اكيد بس البنت خجلانة شوي يلا رايحة اجيبها..

.

زينب :- طلع الموضوع جدي ماهيك

ام علي :- والله الناس اكابر بس الام مادخلت بحلقي حسيتا متكبرة بس الاب سكره وادمي وحظك يا امي الله يبعتلك الاحسن البسي شي مرتب وتعالي بدها تشوفك امو..

..

وبعد هالاستقبال ..

ابي :- ان شاء الله بنردلكم خبر ع قريب بدنا ناخد راي البنت ونسال متل العادات ..

برهان :- اي طبعا وهاد رقمي ورقم ام كرم اذا رديتو خبر ان شاء الله….

بعد مرور يومين..

ابي :-شو يابنتي مرق يومين وما رديتي خبر للجماعة هني بالانتظار شو بدنا نقلن .

ام علي :- والله يابنتي حظك حلو وابوكي سال وقال مناح وناس بخير

ابي :- يابي القرار بيرجع لالك بالاخير لا انا ولا امك رح نغصبك ع شي..اذا مانك حابة هلق بردلهم خبر مانا موافقين وكل واحد من طريق..المهم تكوني رضيانة انتي..

وككل البنات ولهفتي لاعيش هالفرحة وافقت ، وافقت وانا مطأطأ راسي خجل وحزن على اهلي يلي بدي فارقهم بعد هالتعب يلي تعبوه عليه بدون ما يعود تعبهن عليهن بشي..

ابي :- بنتي لا تفكري اني علمتك شي يوم لاشوفك بتشتغلي وبتصرفي عليه ، لا والله يا بنت قلبي بدي شوفك بنت قد حالها ما بتنطر الصدقة من حد بنت شايله نفسها وكرامتها ..انا سعادتي وقت شوف بنتي سند لنفسها ..لا انا ولا امك دايمين لالك ، ولا تخافي على خواتك واخوتك متل ما شلتك برموشي بشيلهم وبعلمهم متلك..المهم بدي تكوني مبسوطة بقرارك يلي اخدتيه..

ام علي :- الجماعة رح يجيبو ابنهن تشوفيه واذا اعجبك بنعطيهم الموافقة فورا .

ابي :- طبعا اذا ماعجبك لو شغلة سخيفة فيه لازم تحكي ولا تخافي ..متل ماهني بدهم بنت ع الميزان نحنا بدنا صهر على الليبرة..

ام علي : وانا هاد يلي بقولوا

ابي :- ام علي لاتقصري بالبنت كل شي بتطلبو جيبيه واذا نقص مروا عليه بعطيكو..

ام علي :- الله يكثر خيرك وزيادة الحمد لله..

وبيوم استقبال اهلي بكرم بزيارتو الاولى لبيتنا حسيت شي غص قلبي من جوا بس الفرحة يلي شفتا بعيون ابي لاول مرة خلتني انسا هالغصة..كان ابي لابس تياب العيد وامي حاطة كحلى بعيونها وخواتي مجهزين حالهن بتياب العيد فرحانين باستقبال عريس اختن..

..كيف شفت كرم بهاد الاستقبال ، متل كل صبية ناطرة عريسها ، كنت شايفتو اجمل شاب هو وسيم ولاعب حديد ولالو لحية حسيتو مغرور بس مابعرف ليش كان متقبل صبية فقيرة متلي ، يمكن هو بالظاهر مغرور بس جواتو متواضع .. ظنون كثيرة ووظنيت انو شخص مختلف لكن ان بعض الظن اثم..

يتبع

الجزء الثاني #بقلم_جمايكا 😚😚😚😚😚😚😚😚😚😚😶😚😶😶😶😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚😚

.

الجزء الثاني..

كانت تبكي بحرقة كأم فقدت ولدها وتقول: أنا لا أبكي على أحد، بل أبكي على نفسي.. كيف مشيت بهذا الطريق الوعر ولم أترك به أثر؟ أتراهم سيذكرونني بعد هذا الوجه ويبحثوا عني؟ وماذا لو عثروا علي؟ لا شيء سوى الخيبة والهزيمة في أعماقي..

بعد مرور شهر على الخطبة..

ام علي :- بنتي شبك مانك ع بعضك صرلك كم يوم

زينب :- حاسة حالي ماني مرتاحة

ام علي :- صاير معك شي جديد غير يلي صار مثلا

زينب :- ليه هو بصير غيرو

ام علي :- بنتي كل رجال فيو عيب بجوز خطيبك هيك طبعو

زينب :- لك امي هاد كل يوم بحال..يوم بتشوفيه شخص منيح وطيب ومسكين ويوم شخص مجنون فعلا ع اشياء سخيفة بخانقي بقلي اكيد عندك موبايل تاني حديث وعم تظهري هالموديل القديم لتظهري انك ما الك بالقصص هاي..ويوم بقلي اكيد بتطلعي بقصير بغيابي وقدامي محتشمة ..اكيد عند ك رفقات شباب بالجامعة ..تعبني بقلو لاء وماعاد احكي بيرجع يتوسل لالي وبقلي اعذريني بس تعبان ومخنوق وصاير معي وصاير معي بتحجج لالي بقصص سخيفة..

ام علي :- لا حول ولا قوة الا بالله سيبك منو طنشيه امبارح بيك بسألني بقلي ليكون بيعزمك ع مشوار وانتي بترفضي ..

زينب :- مشوار ضحكتيني يا امي ولا مرة قلي تعالي نروح شي مشوار ..

ام علي :- حتى انا استغربت حتى ولا مرة اهداكي شي غير هدية ابوه وامو ع عزيمتهن لعنا ما اهداكي..

زينب :- مابدي شي منو يا امي انا شبعانة الحمد لله

ام علي :- الله يهديه اذا في شي زاعجك خبري بيك وهو بتصرف ولا تحملي بقلبك شي..

ومرقت الاشهر وانا عم احمل بقلبي كثير وماكنت خبر حد لان من اخر مرة خبرت امي حسيتها هي وابي مدايقين كثير على حالي وانهن اتورطو ..وقربت ايام الفرح ..وابي وصى رفقاتو يلي ع البسطات يراعوني بالاسعار وجهزت جهازي متل كل صبية ..وصار وقت توصيل الجهاز وترتيبو ..وبس انتهينا وكان باقي ليلة على الفرح اتصلت حماتي ام كرم..

ام كرم :- وينها امك يا زينب

زينب :- ليكها معك اتفضلي

ام علي :- شبها

زينب :- مابعرف يامو اكيد بدها تقول شي

ام علي :- الو كيفك يا ام كرم ان شاء الله بخير

.

ام كرم :- لاء ماني بخير زوجي دفعلكن مهر منيح لتشترو للعروس جهاز مرتب نشوفها فيه .. شو هالجهاز المبهدل والتياب المشرشحة والنورية ..ماعجبني شي ابدا ولا مكياجها كلو من البسطات ولا قطعة ماركة ..حتى احذيتها مبهدلين كيف بدها تقابل قرايبنا بهيك ملبوس بدن ..شي فعلا بيخزي انا صحيح بسكت بس فعلا ماعاد قلبي حملني وماعدت اسكت اكتر ..صدمتيني والله صدمتيني ..

زينب :- امك شبك ليه بتبكي امي ردي عليه شو عم تقلك..هاتي هاتي لاسمع شو قالت لالك

ام كرم :- الله بعينا سلام

زينب :- الووو..امي قفلت شو كانت عم تقلك ردي عليه

ام علي :- ماقالت شي بس مقهورة ع ابنها شوي

زينب :- امي لا ماهاد الحكي

ام علي :- بلا بتقلي ابني مابدو يعمل متل مابدها ..شغلات تافهه ماعرفت ليه دقت تشكيلي…

زينب :- امي كانك مخبية عليه شي

ام علي :- شو بدي خبي يا بنتي عادي لا تشغلي بالك

زينب :- بدك تقليلي

ام علي :- حبيبتي عنا شغل كتير لا تشغلي بالك بشي وحماتك شو ماقالت طنشيها..

واجا موعد الفرح..كنت حاجزة عند كوافير بس اتصادفت الصبح بحماتي جاي تاخدني لصالون تاني ..ورحت معها لان كانت بدها تجهزني متل ماهي بدا..كنت عم اتقبل الامور انا وعائلتي بدون اعتراض ..ومرقت ساعات الفرح على خير ..

كانت عائلتي مجموعة صغيرة بالفرح ماكان كثير من المدعوين غير عمامي وخالاتي بس لان ام كرم مابدها عجقة كثير بالفرح بس للاسف اتصدفت امو الفرح معجوق قرايبها ..كنت متل الغريبة بفرحي..

ام علي :- شبك بنتي

زينب :- كنت حاطة فقرة لالي مع ابي ليه ماحطوها

ام علي :- مابعرف والله كل شي متغير

ام كرم :- اضحكي شوي العالم انتبهت انك عبوسة كانك مغصوبة ع العرس

ام علي :- ام كرم بنتي كانت حاطة فقرة لابوها ترقص معو هي واخوتها

ام كرم :- والله لغيتها ماحبيتا

زينب :- امي اسمعي اذا ماحطت فقرتي مع ابي لا عاد بدي اتزوج ولا عاد بدي ضل هون..

وبالفعل قمت من مكاني وفتت غرفة الاستراحة ابكي من قهري وكأن قهر السنين طلع بهاي اللحظة..

ام علي :- بنتي خرب كل مكياجك من البكي خلص هلق ببعت ورا ابوكي بس روقي. ..هاي حماتك بدق ع الباب

زينب :- لا تفتحي ولا بدي اطلع

ام علي :- لا حول ولا قوة الا بالله الله يمرق هالليلة ع خير

زينب :- انا ساكتة ساكتة بس هني زودوها ماعاد بدي اتزوج ..

ام علي :- ياربي

كرم :- زينب افتحي هاد انا كرم

ام علي :- هاد كرم رح افتح لالو ..فوت ابني

كرم :- شو في شبها زينب امي بتقلي حردت

ام علي :- ابني زينب كانت حاطة فقرة مشان ترقص مع ابوها امك لاغيتها ليه

.

كرم :- بس مشان هيك زعلت والله اموركم سخيفة ..

ام علي :- ابني انطر بس شوي

زينب :- شفتي

ام علي :- دقيقة وهلق راجعة.

امي بهاي اللحظة قررت تروح تستدعي ابي من حالها وخبرت عمي ابو كرم ..اللي هو نفسو حكى مع الدي جي ليحط الفقرة يلي طلبتها وفات ومعو اعمامي وابي للفرح..اجا ابي للغرفة طالعنا منها بعد ما راقت اعصابي…

وهون كان الوداع الاخير لاهلي قبل لاصبح متزوجة وزوجة المجرم كرم برهان ..

بيوم الدخلة رفضو وجود امي معي ورجعت امي مع ابي ع بيتنا..نطرت كرم ٣ ساعات قبل اذان الفجر اجا وكان شبه سكران وريحتو مشروب انصدمت من هالشي..كان عمي جايبوو..

برهان :- رفقاتو العاطلين مشربينو وكان نايم برا بالحوش ..اتركيه ينام هلق وحديثي معو الصبح..

نمت بالصالون بفستاني الفرح..والصبح اتصادفت بامي ع الباب اتفاجات اني بعدني بالفستان..

ام علي :- زينب صاير معك شي

زينب :- فوتي امي صباح الخير ..لاء ماصار شي كان تعبان ونايم بالجنينة جابو عمي الصبح فات ونام جوا اخجلت اغير تيابي ..

ام علي :- هو بالغرفة

زينب :- اي فوتي امي

ام علي :- طيب خليني ساعدك بنتي ..ماصار شي امبارح

زينب “- لا ابدا..

ام علي :- طيب حبيبتي…

ومرق اسبوع ع هاد الحال ينام برا البيت ووجه الصبح يجيبو حماي..

وبيوم اسمعت صريخهن بالجنينة كان عمي جانن عليه وبيصارخ عليه..واسمعتو وقتا..

برهان:- لك مابدها ايااااك المخلوقة اتزوجت وجابت اولاااد حاجي تعمل بحالك هيك وتعمل ببنات الناس..مرتك جوا ناطرتك ..

وفات كرم ع البيت متل القضا المستعجل ع الغرفة وقفل الباب ع حالو مرق ساعتين وصارت ٢ بالليل اندق تلفونو ..وفتح باب الغرفة وركضت لتحت ..ورجع بعد ٥ دقايق حامل مشروب…كأنو موصي عليه..بس من فات ماكان مقفل الباب بس موارب..ماكان تغمض لالي عين…كنت نام بالصالون..ومابعرف شلون غفت عيوني وفقت ع حد مجنون قاعد جنبي وعم يطبطب ويبكي ..

كرم:- حياتي ليه تركتيني انا قلتلك بضحي بعمري كرمالك..

قمت من مكاني مفزوعة ودقات قلبي عم توجعني من المنظر يلي شفتو كان مشفر ايديه بموس وعم يشرو دم..صرت اصرخ وانا عم حاول اهرب منوو…

زينب :- شبك ليش عملت هيك..

كرم :- كرمالك كرمال ما تتركيني

زينب :- بس انا ماتركتك ليكني معك

كرم :- لاء تركتيني يا نيبال رغم اني اترجيتك..

ريحتو كانت مشروب وشخص فاقد عقلو وحامل بايدو موووس وعم يبكي … فتحت الباب ونزلت لبيت حماي يجو يشوفوا ابنن..طلعو يركضو وانا خايفة وواقفة خلفهن..هجم حماي عليه وغطى ايديه ..واخدوه للمشفى..وما حكيت حد ..ماحكيت لحد ع المصيبة يلي انا فيها..

برهان :- خليه ينام ويرتاح وكل ٦ ساعات اعطيه هالدوا رح يريح اعصابو

زينب :- مين نيبال

برهان :- بنتي طيش شباب لا تهتمي

زينب : بس خبرني مين هاي

برهان :- وحدة كان يحبها وتركتو واتزوجت

زينب :- طيب انا شو خصني فيها ليش لتظلموني وهو بحب وحدة تانية

برهان :- عم يقول لان اخلف بوعدو لالها واتزوج… بس فترة وتمر اي بس استمري ع ادويتو..

:- حاولت استوعب الامر لان شي مو سهل عروس بهاي الايام ماصرلا اسبوع وتطلق الحكي رح يكسر اهلي ..اتحملتو واعتنيت فيه ..وكنت شربوا دوواه بوقتو و اغلب وقتو نايم ..واهلو حواليه…لبيوم مرضت من الارهاق والتعب النفسي يلي انا فيه وماقدرت اعطيه دواه .. فقت على صريخو وتكسيروا لاغراض البيت ..

زينب :- الله يستر والله جسمي مكسر…

فتلت الغطا على وجهي واحتميت بقفا الصوفاية مشان مايشوفني او ياذيني ..كنت عايشة حياة مرعبة..فتح الباب ونزل يصرخ لابوه..

كرم :- انت السبب انت يلي ضيعتها من ايدي انت يلي قهرتني..بدك اتزوج ليكني اتزوجت بس ماني مرتاااااااااااااح هاي المخلوقة يلي فوق بكرها ماعم طيقها طالعها من بيتي من بيت نيبال …وقف تجيب نسوان مابدي اياهن انا مابدي الا نيبال..بس نيبال..افهمت ..افهمت..اذا ما طالعتا من البيت رح اقتلها…

😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢😢

الجزء الثالث..

حين أرى الظلم في هذا العالم الكبير، أسلي نفسي دوماً بالتفكير في أن هناك جهنم تنتظر هولاء الظالمين..

ما اتحملت ابقى اسمع هالحكي اكثر ، البست تيابي واطلعت لعند اهلي خيفانة عم ارجف من همي وتعبي ومرضي.

ام علي :- اسم الله شبك امي جاي بهيك وقت وشبك مصفرة صاير معك شي ..

ابو علي :- زينب بنتي فيكي شي …

زينب : تعبانة يا امي غطيني …غطيني لاعاد بدي روح لهونيك ..

ام علي :- يالطيف شو صاير معك

زينب :- عايشة مع مجنون انا ..

ام علي : بنتي اذوكي بشي ضربك شي ..

ابو علي :- وين تلفونك بنتي

ام علي : بجوز بشنتايتها

ابو علي :- انا رح دق وافهم منهن شو صاير..

برهان :- بعرف رح ادقلي انا دقيقتين وبكون عندك لافهمك كل شي لا تستعجل يا ابو علي..

ام علي :- شو قلك

زينب :- امي مابدي روووح لهونيك بدي ابقى هون لا تخلوني روح بترجاكن..

ابو علي :- اعطيني كاسة مي ام علي

زينب :- كذابيين لا تسدقهن بابا

ابو علي :- ع شو ما سدقهن في شي عاملة انتي شي

زينب :- شو بدي اعمل ..

ام علي :- وصل برهان اتفضل كاسة المي

برهان :- السلام عليكم.. كيف ياعمي يازينب بتطلعي من البيت بهيك وقت ماخفتي ع حالك

زينب :- اذا بدي اخاف ع حالي بخاف من ابنك المجنون ..لك ابي عم يهددنني ابنو يقتلني لان ابوه غصبو عليه وزوجو بوحدة غير حبيبتو اللي اسمها نيبال ..

برهان :- اسمعني يا ابو علي متل ما انت بتختار لبنتك ابن الناس انا اتصرفت نفس التصرف واخترت لابني بنت ناس تناسبو ..الله وكيلك كان يحب وحدة لا هي من توبوا ولا هي متلو بنت ملاهي وديسكو متعرف عليها بسهرة ..وعلق سماها حكيتا لهاي نيبال قلتا يا بنت الناس مارح تنقبلي بينا اتركي ابني وروحي بحال سبيلك والمخلوقة دغري قالت ..ما انا رايحة بس ابنك دابق سماي مجنون بعدو عني ..والا ببعتلو حد يقتلو …ويخلصني منوو…والمخلوقة اتزوجت وسافرت وجابت اولاد يعني الله يستر عليها تجي تفهمو مابيفهم خطبتلو مرتين قبل بنتك وع زووقو واللي هو بطلبو ..وهو ماعجبو واتخانق معهن والبنات قررو يتركوا ..الصبي فات بصدمة فترة ..بعدها بلش يستوعب حياتو ويركز ورجع لدراستو ..هو قلي بدو يتزوج خلص وتكون بنت ناس ومحتمشة ومحترمة ..قلتو طلبك عندي تعال شوفها وقصدي ع كنتنا شافها بالجامعة وقلي موافق..

مابعرف يا اخي الصبي كان منيح وامورو تمام فجاة اعصابو تلفت..من يوم العرس لحد الان ..

ام علي :- يالطيف ليكون مسحور

ابو علي :- اذا بنتي حابة ترجع برجعها وتتحمل هالشي ..اذا مابدها خلص كل واحد من طريق حياة بنتي اهم من كل شي .

برهان :- كيف بتفكر هيك يا ابو علي هاي كنتنا وصارت مرت ابنا..

ام علي :- مرت ابنكم ع ورق بنتنا لسه بكر .

ابو علي :- شو هالحكي وليش ماخبرتيني

ام علي :- والله البنت ماقبلت تخليني احكيك

برهان :- طيب خلوني احكيها ولكل حادث حديث

ابو علي :- بشو بدك تحكيها اذا الامور واضحة..

برهان :- خلوني احكيها ..

ابو علي :- اتفضل احكيها ..

دق ع باب الغرفة يلي قاعدة فيها امي طالعت اخوتي منها وتركتني مع حماي لنحكي ..

برهان :- بدي تسمعيني ياعمي وبوعدك مايصير الا يلي برضيكي اتفقنا..

اسمعيني ابني مرق بصدمة نفسية وان شاء الله رح عالجو منها..فترة وتعدي ويرجع احسن من قبل ابني وبعرفوا حنون وطيب وراح تحبيه ويحبك وتجيبو اولاد صغار وتعيشو حياة منيحة …

مشكلتو وحدة غلط كان متعرف عليها والحمد لله راحت بحال سبيلها ..هو مقهور ليش هي اضحكت عليه ، ولا تفكري انو بحبها هلق لاء هو مقهور وبدو اياها ليرد لالها اللي عملتو فيه..بس لما يتعود عليكي وع حنانك ماعاد لالو مجال يتذكر الماضي.. الحياة بدها تضحيات و إلا لسان الناس مابيرحم وانتي صبية متعلمة ومثقفة وابوكى رجل درويش وغلبان ومابهون عليكي ينكسر ضهروا من ورا حكي العالم شو يقولو ماصرلا اسبوعين واطلقت.. اكيد فيها غلط اكيد هالبنت معيوبة..انتي مارح يهون عليكي صح ولا لاء..وكيف بدك تثبتي للعالم انو هاالحكي مانو صحيح اكيد صعبة ورح اضلك بوجه امك وابوكي العمر وبجوز اذا اتقدملك حد يا يكون كبير بالعمر يا مطلق وعندو كوم اولاد..ومابتعرفي مصير خواتك ابوكي ماخرج يعيش العمر كلو يشيل فيهن لسمح الله لو اتشوهت سمعتكم مو منا لا والله بس الناس ياعمي الناس..وابني شاب مانو معيوب الناس مابتحكي عليه ..قومي الله يرضى عليكي غسلي وجهك والبسي خلينا نرجع ع البيت وانزلو عيشو عندي تحت انتي وزوجك وهيك بضل تحت نظر امو واخوتو ..وماعاد تخافي منو كلنا رح نعتني فيه ..وان شاء الله بقوم من هالازمة انتي بنت فهمانة صح واكيد رح تطلعي من هالقصة انتي وزوجك مرتاحين قومي يالا..انا ناطرك برا…

….

فاتت امي لعندي تسالني شو قلك ..ماقدرت احكي شي تحسرت علي نصيبي و حياتي وحياة اهلي وخواتي لو صار يلي بقولو عمي برهان..غسلت وجهي وبوست ايدين امي وابي وطلعت مع عمي برهان..بهاد اليوم نمت تحت بغرفة بنات حماي .. وتاني يوم عمي نقل لالي غرفة النوم تحت بغرفة زوجي القديمة ..كنت خاف فوت نام فيها …طول الوقت هو تحت تأثير الادوية يا مسطح يا نايم يا ع التلفزيون كنت حاسة انو اعصابو مرتخية كتير وكانو مخدر..عمي كان يطلب مني اطعميه انا ..او اغيرلو تيابو ليحس بوجودي جنبو..

كان يصفن فيني كرم نظرات مخيفة ولسان حاله بقول ((((لاشك في أنّك أغبى الناس إذا كنت تبحثين عن الحب في قلب يكرهك))

.كنت اتحمل النظرات..كرمال اتجاوز هالمحنة يلي وعدني فيها عمي برهان انها رح تنتهي…

ومرقت الايام على هاد الحال والطبيب طلب انو انخفف الادوية لان وضعو اصبح يستقر وخاصة انو صار يروح ع شغلو مع حماي ويرجع يتغدى بشكل طبيعي وينام..

بيوم اجا على البيت حامل هدية ومبتسم…

كرم :- فوتي شوفيها جوا اذا بتحبي ..

اخدت الهدية وفتت ع الغرفة ..وكان فيها تياب نوم ..ورسالة ..

#ملاحظة

انا اسفة اني بقلكن هالحكي بس انا عم انقلكن شو صار معي بالتفصيل ..

الرسالة..

عزيزتي زوجتي زينب اعتذر عما صدر مني ومضى ،يعلم الله اني كنت بعذاب نفسي لا ينتهي ولكن الحمد لله انه انتهى ، اليوم اطلب منك ان تبدا حياتنا معا ونعيش من جديد حياة جديدة وكأنه اليوم الاول هل تسمحين لي باللقاء الاول ..زوجك المحب ..

التوقيع

كرم ..

مابعرف اذا هالشعور كان حقيقي او وهم رغم الابتسامة اللي زرعها ع تمي الا اني من جواتي كنت بشعر بشي مخيف …

اتقبلتو يومها واتقبلت اللقاء الاول وكأن كنت معتقده انو فعلا بدأت حياتي وانتهى العذاب النفسي..

مرت الايام واصبحت زوجتو بشكل طبيعي كان ايام مايكون ع طبيعتو وايام شخص عادي وايام تهور وايام مريض نفسي وايام متوتر وايام مرتبك وايام ضايج وايام عصبي لعند ما جبت ابني الاول برهان….سنة ونص وانا عم اتقبل الشي يلي عم يصير معي واللي مهون عليه كل هاد وجودي مع بيت حماتي ..

لعند ماحماتي قررت نرجع لشقتنا وانو ابنها صار منيح..

انتقلنا من تاني لشقتنا اول ايام شوي معجوقين بنقل الغرفة ..وجهزت غرفة ابني ..كنت شوفوا بيصفن بقلب البيت بطريقة غريبة..

ومرة كنت قاعدة انا وهو وابني وعم نشرب شاي متل اي حياة طبيعية ..وعم لاعب ابني ..كانت بيني وبينو شي مترين ..هو كان مقابيلي بالجهة التانية للغرفة..

رفعت اصبعتو باتجاهي فجاة وقلي ..

كرم :- موتك على ايدي ان شاء الله يا نيبال..

وسكت..انا سكتت كمان وقلبي من جوا بيرجف من الخوف معقول في شي بالبيت مخليه يتوتر بهاي الطريقة ويتذكر نيبال.. تاني يوم زرت امي وخبرتها باللي صار ..

ام علي :- رح جيب الشيخة ام زاهر تقرأ بالبيت يمكن فيو سحر او بشوف شي

..

ووافقت على هالشي واجت ام زاهر يلي بلشت تقرا وتحسس بقلب البيت مع يلي معها من اطياف وجن . على كلامها مسلم..

ام زاهر :- بيتكم فيه طاقة سلبية كتير فتحي الشبابيك واشطفي بملح لا في سحر ولا شي ..

ام علي :- بجوز ممسوس يا ام زاهر

ام زاهر :- الله العالم ..مافيني احكم الا لما اشوفوا..

ام علي :- كيف بدنا نشوفوا بنتي اتصلي عليه ليجي

زينب :- مممم هو هلق بشغلو ما اعتقد يجي ..

ام علي :- جربي بنتي..

( بعدني مادقيت على كرم الا حماتي بالباب عم ادق..بدون ما افتح لالها فتحت الباب..

ام كرم : شو هاي الريحة ومين هاي يا زينب..

( قصدها ع ام زاهر..

ام علي :- جارتنا اجت تزور زينب ..

ام كرم :- افتحي الشبابيك الريحة بتقتل ..شو يلي بايدك انتي

ام زاهر :- عم نقرا قرءان بالبيت ونبخروا..

ام كرم :- من وقت ماشفتك طالعة ع الدرج قلت امرك مريب ..ليه عم تبخري وتعملي هالخزعبلات ببيت ابني .

ام علي :- مشان يرتاحو ويبعد الله عنهم الشر

ام كرم :- شر شو هاي القصص هي بتجيب الاشرار لبيتنا ..شو هالجهل والتخلف هاد طفي طفي..

اخدت الاغراض من ام زاهر ………وامي كرمال ماتصير مشكلة اخدت الشيخة وراحت ..بس حماتي ماتركتلي مجال اشرحلا شي ..صارت تصارخ ودقت على ابنها..اللي رجع متل المجنون ع البيت..

كرم :- انتي جنيتي تجيبي سحرة على بيتي

زينب :- والله المخلوقة بس عم تقرا قرءان وبخرت..

وع صوت صريخ امو وهو وكلامهم المشؤووم عن اهلي وجهلن..ادخل حماي..

برهان :- صوتكن طالع لبرا شو القصة..

ام كرم :- تعال شوف كنتك يلي كنت سايق علينا علمها وثقافتها شو بتعمل ..جايبة امها وودجالة يعملو تبخير وسحور في بيت ابني وانا يلي كنت مفكرتا متعلمة الظاهر جهل اهلا بدها تنقلو لهون..

زينب : اذا سمحتي لا تحكي هيك عن اهلي

كرم :- اخرسي لا تردي بوجه امي

زينب :- مانك سامعها شو عم تحكي

كرم :- امي تقول يلي تقولوا

زينب : بس لا تحكي عن اهلي هيك ..

ام كرم :- ليكون غلطت ياهانم ماصرلك يومين فايتة الشقة وبلشتي تعملي هيك الله عالم شو كنتي تعملي في بيتنا تحت..

زينب :- عمي برهان والله العظيم انو فاهميني غلط..خليني اشرحلك ع جنب..

ام كرم :- وليه ع جنب ليه مو قدامنا ولا متل العادة بتلعبي بحركاتك ع عمك وتعملي حالك مسكينة وتحكي كلمتين تسكتيه لاء هالمرة ماراح اسمحلك..

زينب :- عمي الله يخليك اسمعني

برهان :- احكي بنتي هون قدامنا مو شو خايفة

زينب :- اول امبارح كرم بالليل ونحنا قاعدين حرك اصبعتو باتجاهي وقلي رح اقتلك يا نبيال

ام كرم :- ليك بدها تتهتم ابني وترجع تمرضو مارح نخلص من قصص النساوين الله ينتقم منكن ..

برهان :- كرم صار هالشي

كرم :- هاد طلعت انا ماني مجنون طلعت هي المجنونة

زينب :- انا رايحة لعند امي

ام كرم :- بكون احسن ناقصني انا … منيح اني جيت وشفت كان الله اعلم شو عملو بابني فوق مابدهن يعملو بددهن يتبلوه.

حملت ابني وانا نازلة وقفني كرم..

كرم :- لوين اخده الصبي بدك تروحي روحي لحالك بدونو..

اخد كرم مني ابني وفات وقفل الباب وتركتني برا ..انقهرت ماقدرت اتحرك ميل واحد بعيد عن الباب من خوفي على ابني ليعملو شي لان متاكده انو رجع مريض انا لا بهلوس ولا بتوهم متاكده …

بعد ساعة من صريخهن بالشقة طلع حماي لقاني بالباب..

برهان :- فوتي عند ابنك وماعاد تعملي مشاكل ماناقصنا يرجع تعبان

حكاني بطريقة كلها جمود شخص تاني وكأن بان على حقيقتو ..فتت على البيت ونزلت حماتي هي وابنها ..واخدو ابني معهم

زينب :- اتركلي الصبي

كرم :- ليرجعلك عقلك برجعو ليكو تحت عند امي و خواتي….

تركني ليل نهار عم ابكي عل ابني واترجاهن يرجعوه..مرق ٣ ايام عم شوف ابني من بعيد وماقدرانة المسوو..الله لايسامحهن..

الساعة ١ بالليل فيقني متل المجنون.

كرم :- انتي بتفكري اني ساكت هالسنتين من فراغ..انا صابر صابر انا بعرف يا نيبال كل شي..كنتي هربانة مني ماهيك ليكني جبتك وحبستك في بيتي انتي وابنك يلي من زوجك..ومارح تشوفيه لتعرفي انو الله حق ..لتعملي فيني هيك..

زينب :- لك انا ماني نبيال انا زينب زينب قوووم هيك…

كرم:- عاملة تجميل ماهيك هلق بظهر وجهك البشع يا بشعة لتعرفي تكذبي عليه مرة تانية عاملة حالك مسكينة وبنت فقيرة ومغيرة وجهك بالتجميل يا حقيرة.

ونزل فيني ضرب متل المجنون ..نزلت اصرخ والدم بشر من وجهي لبيت حماي ..وهو لاحقني حامل بايدو سكين..

كرم :- رح اقتلك يا نيبال رح اقتلك..

زينب :- سدقتو سدقتو ..وين ابني وين ابني .بعدو هيك اتحملت كتير انا متزوجة مجنون وصابرة…

ام كرم :- ابني حبيبي هات السكين انا رح اقتلها لهاي نيبال اعطيني اعطيني لا تلوث ايديك ياعمري بدمها النجس هات هات..

برهان :- ابني استهدي بالرحمن..

كرم :- انت لا تدخل انت السبب ..شفتي امي شفتي اللي بقلك اياه هو الصح..

ام كرم :- طيب ابني اعطيني السكين هات هات..

..اخدت منو امو السكين …وقعد ع الدرج يبكي ..

كرم :- انا مابعرف شو بصير معي انا تعبان..

حماي اعطاه دوواه وفوتو البيت ليرتاح شوي ونام..وانا ماحكيت حرف اخدت ابني لفوق بدون مايحكو شي جهزت شنتايتي وشنتاية ابني وهني مشغولين اطلعت ..وتركتلن كل شي….

#بقلم_جمايكا

كان امان لالي ابقى انا وابني عند اهلي خبرتن بكل شي صار ..وطلبت منو انو بدي اطلق خلص ماعاد بدي ارجع..

ابي :- بنتي طبعا مافي الا هالحل ماحد بريد لبنتو الطلاق بس اكيد مارح ابقى واقف ناطر شايف بنتي بضيع من ايدي او يقتلها واحد مجنون..انتي وابنك ع راسي من فوق..ومتل ما ربيتك وربيت اخواتك بربي ابنك..

امي :- ابو علي

ابي :- خلص ام علي حاجة انضل نتنازل البنت رح اضيع من بين ادينا انا ما شقيت عمري اشحط رجلي ع بسطة لاشوف بنتي مقتولة او عامل لالها عاهة ..خلص ماعاد في نقاش بالموضوع نهائي

امي :- واذا طلبو منا تكاليف ومصاريف..

ابي :- الله بعين وقتها

زينب :- انا ما اخدت ذهب ولا شي

ابي :- ذهبهم ع حالهم مشان مايفكرو انو نحنا جوعانين الله يعوضك عن يلي راح من عمرك يابي..حسبي الله ونعم الوكيل..

..

اتصالات عمي ومرتو وزياراتهن لالنا ما انتهت ابي كان اخد قرار وكان مانع يحكو معي ع انفراد كرمال ما يأثرو فيني..

ابي :- انتو بدكن خدامة لابنكن تعيونو ..ابنك لازم يفوت مصح اذا بتتركوه هيك رح ياذيكم

ام كرم :- لا تحكي عن ابني هيك

ابي :- انا بحكي اللي لازم ينقال

برهان :- والصبي

ابي :- الصبي بحضانة امو مافيني احرمها منو ..

ام كرم :- هاد الطفل ابنا

ابي :- اذا بيطلع لالكن بالمحاكم خدوه .

وبقينا انا وابي عم نروح للمحاكم وعلى كبار العيلة ليقدرو يوقفوا معنا..بس كرم كان حاطط اقوى محامي ..وكنا خايفين انو يكسب حضانة الطفل..وخاصة وقت اجت جمعية حماية الطفل ووجدت انو بيتنا مافيو مكان ليعيش فيه طفل..

زينب :- خايفة اخسر ابني

ابي :- بنتي اذا هني معهن العبد ..نحنا معنا الله طيب..

قبل بيوم مانمت ولا غفيت وانا عم ابكي لربنا ليكون ابني بحضانتي وما يضيع مني لان كانت كل الاحتمالات بتشير انو ٩٠% حضانة ابني مو لالي..

بهاد اليوم ابي استقبل ضيوف ماعرفت مين هني وتاني يوم انطلقت انا وابي على المحكمة..( ومن سالتو من هادول ..طلعو اهل البنات يلي كان خاطبهن كرم ورفضو يشهدو انو مجنون

ام كرم :- لو بتجيبي كل عيلتك مارح تحسني تاخدي حفيدي مني وتحرمي ابوه منو..

ابي :- الله كريم خلص اقعدي ام كرم وخلي بنتي بحالها..

برهان :- ماكان العشم فيك ابو علي توصل حال الولدين للطلاق واتشرد طفل…

ابي :- هاد احسن شي لبنتي ..والله يعوضكو ويعوضنا..

وبلشت المحكمة والجمعية قدمت تقاريرها وانا ماعندي ولا دليل على صحة كلامي انو مجنون..حكمت لالي المحكمة بالطلاق مقابل اتنازل عن كل حقوقي الشرعية ..وما اطالب فيها..اما ابني فكان القرار انو يبقى اسبوع عندي واسبوع عندهم.. حرقوا قلبي اضعاف بس اتحملت …مرق الاسبوع الاول عندي والاسبوع التاني كوووا قلبي بالنار مانامت عيني ولا غفت ..كنت روح حوالين بيتهن لاتاكد انو بخير واسال هون وهون ..وع كلام ستو عم تعتني فيه ..بنات حماكي عم يعتنو فيه..لا تقلقي مابتركوه لحالو مع ابوه..

واجا موعد رجعتو لعندي رفضو يرجعوه..كان باقي فيني عقل وماعاد بقي صرت اصرخ ع باب بيتهن ليعطوني ابني ورفضوا…

صرنا نركض انا وابي ع جمعيات حماية الطفل يلي كانت صامتة ومدعومة من اهلو ..ماكان عنا الا الشرطة..اسبوعين كاملين وانا مابقدر شوف ابني..النيابة رفعت محكمة تانية مشان الطفل والحمد لله ابن ناس ساعدنا وقتا..

ارتفعت المحكمة ورفضو يحضروا..المحكمة ارسلت شرطة تحضر الطفل بالقوة ..واعطوني اياه لوقت ماتصير الجلسة التانية..

مرق اسبوع وارسلو لالي جمعية حماية الطفل لياخدوه لاهلو ابي رفض وقلن في قرار من المحكمة الطفل رح يبقى عند امو …

ماشفنا الا ٢ همج ضخام فاتو البيت بالقوة واخدو ابني غصب عني ..ابي دق ع الشرطة وراحو يدورو ع ابني مالقوه بالبيت وكذبوا وقالو ما اخدوه لولا شهادة الجيران انهن شافوه اخدوه حرقوا قلبي على ابني..لعند ماجابتو الشرطة ببلاغ من حد بيعرفهن بلغ عن مكان الطفل كان عند بنت اخت حماتي المتزوجة واللي بلغ بنت حماها ..

يوم الجلسة التانية رفضو يحضروا خوف من تقرير النيابة الجديد بخطف الطفل..

حكمت المحكمة غيابي انو الطفل لالي وبحضانتى وفيو يشوف ابنو كل يوم جمعة بالمحكمة ..

هاد القرار جننهن كلن مو بس كرم..بس الحمد لله حكمت رب العباد كانت فوق كل شي..ابني بامان عند امي..ومرقت ٦ اشهر على حال الحال.

بيوم اتقدملي شاب من قرايب طليقي من بعيد بس عائلة محترمة وما الهن علاقة فيهم مطلق وعندو بنت…

انا ماوافقت ولا قبلت لان كنت بعرف وقت زواجي بتنتقل الحضانة لامي و بسن معين بعدها بياخدوه اهلو …

مابعرف شو صار بس خبرهن قلن بنتي مابدها تتزوج ..

وصل الخبر لاهل كرم.. اني رح اتزوج..

ام علي :- زينب تلفونك بدق

زينب :- لمين هالرقم ..الووو

ام كرم :- حتى لو حاظرة رقمي بدقلك لك يا بنت ال………….. ركضتي لتزوجي من بعد ابني ..قولي من الاول انو عينك ع حد تاني ..روحي اصطفلي بجهنم الحمرا بس ابنا رح يرجع لالنا ولا رح يربى بالخم يلي عايشة فيه ولا رح يربى بعيشة الشحادين فهمانة ولا مفكرة كنتي تربية عن قرايبنا ماحزرتي اساسا هاد كان فخ لاكد لابني انك مابتستاهليه..

قفلت بوجها وخبرت ابي باللي صار..اتصل على قرايبو يلي اتقدمو ليخطبوني وسالهن انكروا وحلفو يمين انو لا هو فخ ولا من هالحكي وام كرم واصلها كلام مو اكثر..واعتذروا من ابي..

زينب :- مارح اخلص مارح اخلص..

ابي :-يوم اسود يوم يلي اتعرفت عليهن..

منذ سنة …

تعرضت لحادث كاد أن يؤدي بحياتي ولكني فقدتها حين فقدت وجهي ..

ومن وقتها وأنا أسكن جدران غرفتي أنظر إلى المرآه بنص عين فالاخرى تدلت ذائبة فوق خدي

اقوم محاولة لانشط ذاكرتي لاخبركم ماذا حدث بذالك اليوم ربما اصاب عقلي التشوه مثل وجهي..

تخيلت حياتي صفحة بيضاء وكل معاناتي أقلام ملونة

وأني سأرسم على الصفحة صورتي

بلا اقطاب تحت عيني أو شفتين مغلقتين أو غصة تسكن حلقي

سأرسمني كاملاً ..

تملأ قلبي رغبة بالعودة للحياة مرة اخرى ..ثم اهديها له وحين يتقبلها يبتسم ويهبني حياتي القديمة قبل معرفته من جديد..بلا حروب وبلا فقد وبلا ألم ..

حياة ابدية تخلو من زيارة المشفيات والتودد لاصحاب الكرامات حياة تخلو من الوقوف فوق المقابر والبكاء والعويل على سند قد فقدته …

حياة يختارها كل شخص كما يريد دون ان يكون عاجز او فقير او يمشي على رجل واحدة..

ام علي :- بنتي زينب امي حاجي اضلك حابسة حالك بالغرفة..

زينب :- ………… ..

ام علي :- تعي نروح ع السوق انا وانتي

زينب :- ………………

ام علي :- بنتي اذا مافتحت البسطة ماعاد نلاقي اكل ناكل..

زينب :- ………………..

ام علي :- اه ياربي حسبي الله ونعم الوكيل..

قبل عام..

ابي :- زينب انا اليوم حكاني رفيق لالي بالسوق مشان يابي تكفي دراستك هو رح يحكي مع مجلس الطلبة بالجامعة..

زينب :- وابني

ابي :- لا تقلقي دوامك الصبح وامك بدير بالها ع ابنك فترة اخوتك بالمدرسة ..

زينب :- والتكاليف

ابي :- لا تقلقي يابي انتي عندك منحة والباقي الله كريم فيه..

رجعت من تاني لدراستي لقيت صعوبة بقبولي بالجامعة بسبب ابوه لكرم ونفوذو فيها..ابي شاف لالي جامعة تانية ونقلت عليها ونقلت المواد يلي درستها…

وماعاد لالهن سيطرة ..رغم انو حتى بالجامعة التانية كان في دكاترة معرفة بابو كرم ومعاملتن الشبة سيئة لالي الا اني كنت اتجاوز هالمحن بتوفقي الحمد لله..

لعند ما اجا اليوم المشؤؤوم ..كنت طالعة بباص الجامعة لان اوفر من ناحية المصاريف من التكاسي..ومن عادتي بقعد اول كرسي جنب الشوفير عمي رباح ..اللي اغلب الايام ماكان ياخد مني ايجار الباص..

انفتح الباب لينزلو صبايا منو وصلو لمكانهن ..وقف الباص سيارة بنص الطريق وقتا..

زينب :- عمي رباح لاتفتح الباب دخيلك..

مالحقت كمل الجملة وكان كرم واقف مقابيلي..

ماعرفت شو رش على وجهي صرت اصرخ ماني شايفة مع الم وشي عم المسو ويطلع بقايا بايدي..صارو البنات يصرخوا وانا اصرخ نزلت بالشارع كنت مفكرة نار وهبت بوجهي …بدي طفيها بالرمل ..عمي رباح صار يدلق ع وجهي مي..قد ما اوصفلك شعور الالم مارح احسن ..اغميت وفقت من الالم بسرعة وانا بالارض والبنات حواليه وعمي رباح ..

رباح : لا تحطي ايدك ع وجهك لك عمي وين الاسعاااف الله ينتقم منك شوهت البنت..

وصوت البنات..

رش على وجها اسيد الله ينتقم منو..

ياويلي ماقدرانة اشووف ياربي ياربي ..الله يعينها..

انتقلت على المشفى وانا ماعم استوعب الالم كنت متمنية روحي تطلع وما ابقي اتألم ..فجاة ماعدت اصرخ ..استوعبت انو الجحيم بدا..

ومافقت الا ع صريخ امي بتبكي..انكسر ضهري يانااااس انكسر ضهرررري ياريت ماطلعتي يا امي من البيت ..شو بدي اتحمل لاتحمل بنتي يلي وجهها مغطيه شاش ولا زوجي يلي صار بثلاجة الموتى..

كان البنج ماعم يخليني فيق منيح لاصرخ صرخة الموت على ابي..

ابي يلي ما اتحمل يشوف يلي صار فيني وصابتو سكتة قلبيه بالسوق وقت سمع الخبر ..

خبروه انو متت وهو ما اتحمل ومات على بسطتو فوق الجرابااات مات ابي مقهور على حالي ..مات قبل ليشوف الوجه يلي بحبو شو صار فيه. مات وتركني بلا سند ..

بقيت بالمشفى اشهرو ابني كل ما يشوفني يخاف ويصرخ كانت امي ترفض تجيبو معها وتتركوا عن خالتي هو واخوتي..

اما كرم..

فطلع من هالجريمة لمصح نفسي وما تحاكم لان مجنون..

اثبت بالمحاكم انو مجنون وبعاني من انفصام وهوس واضطراب ثنائي القطب باشد درجاته..هاد اللي قدر ابوه يعملو لالو ليخفف عليه حكم السجن ..لان البقاء للاقوى..

مرت الاشهر وانا حبيسة هالغرفة مابحسن احضن ابني الا هو نايم مشان مايخاف ويصرخ..واحيانا بتقبلني وبعتبرني الغول..وبقلي عو …

لان بلاعبو مشان اخفف عليه..كنت قلو ماما..

انا ماما

يقلي لاء ماما عوو..

كنت يادوب احسن شوفوا ..

..لان حتى اكل مابحسن اكل ..بس عن طريق بفتحة من نصف حلقي لان التشوه طال شفافي واتلزقوا ببعضن …لحسن الحظ..بقدر اكتب لان ايدي ما احترقوا كلن….وبحسن شوف بنص عين شو كتبت..كتر خيرو كرم تركلي شي احسن منو شوف بصمتو على وجهي …

اه يا وجع القلب…خلص الحكي هون ..

انتهت…

37 تعليقات
  1. سماح :

    حسبي الله ونعم الوكيل

  2. ام حسام :

    حسبي الله ونعم الوكيل على كل واحد ما بيخاف الله الله يشافيكي ويعافيكي وترجعي متل قبل واحسن وتربي ابنك وتفرحي فيه

  3. ام أحمد :

    حسبي الله عل كل ظالم يستخدم نفوذه ومايخاف من ربي

  4. 🌹 ايمان 🌹 :

    حسبي الله ونعم الوكيل في كل ظالم

  5. ام همام :

    حسبي الله ونعم الوكيل
    شو هالظلم💔💔

  6. بتول الزيتاوي :

    😢😢

  7. ام تالا :

    حسبي الله ونعم الوكيل

  8. ميس الريم :

    حزينه القصه 😢😢
    يقول عمر بن الخطاب: لو كان الفقر رجلا لقتلته

  9. فوفه🥀🥀 :

    الله يبعد وجع القلوب عن الجميع

  10. أم الليث :

    حسبي الله ونعم الوكيل على كل ظالم ☝️🥺🥺

  11. alzoubi :

    حسبي الله ونعم الوكيل الله يعافيكي ويمهل ولا يهمل ما تخافي الا بيوم من الايام رح تشوفي صار عندو مصيبه مثل م صار معك واكثر والله يجازيه ع كل عمل مو مليح

  12. ام ساره :

    لا حول ولا قوة الا بالله العلي العظيم

  13. ام ساره :

    حسبي الله ونعم الوكيل

  14. ammar mmm :

    حسبي الله ونعم الوكيل حرقة قلبي

  15. ام عمر🍩🍬 :

    حسبنا الله ونعم الوكيل 😢الله المنتقم

  16. بلبله :

    لا حول ولا قوه الا بالله العلي العظيم
    طيب ليش هالقصص الكئيبه يا كريمه 😭
    نزللينا اشي في شويه تفائل والله مهو ناقصنة هموم 🤦‍♀️🤦‍♀️

  17. أم صبحي :

    حسبي الله ونعم الوكيل على كل ظالم
    الله القوي 🌼🌼

  18. ام لورانس :

    حسبي الله ونعم الوكيل على كل ظالم.. الله ياخد حقها من اللي ظلموها

  19. احلام الصالحي :

    الله يسامحك ياكريمه على القصه حسيت حالي مرضت بعدها …الله المستعان والله الدنيا كلامه قصص حزينه فيها ظلم لا يعلمه إلا الله ربي يفرج هم كل مهموم ويوم الدين…يكون الحساب
    ربنا ديان..
    صلوا على النبي محمد عليه افضل الصلاه والسلام.

  20. ام ورد :

    حسبي الله ونعم الوكيل الواحد صار قلبو يوجعو من المأسي اللي بشوفها. وبسمعها كل يوم قرأت قبل يومين خبر بشبه هالقصه للعراقيه حنين الزبيدي اللي حرقها زوجها وهي حامل الله يرحم الجميع.

  21. كريمة جزائرية :

    شكرا على تعليقاتكم يا بنات لكن يجب ان يكون فيه تنويع في القصص مو لازم دائما نفس نوع القصص مرة جيبلكم قصص حزينة مرة مفرحة مرة مضحكة مرة رعب مرة رومنسية كل مرة شكل جديد

  22. رزان :

    لا حول ولا قوة الا بالله العلي العظيم كل ما كبرنا منسمع قصص بتشيب شعر الرأس الله يكون معك والاب ما بيتعوض الله يرحمون 😭😭😭

  23. ام اسلام :

    ما بعرف شو صاير بالناس نفسي مره حدا يحكي عن شي مفرح صار معه ما يطلع غير المأسي زي ما فيه حزن بحياتنا فيه فرح

    1. كريمة جزائرية :

      ليش لكان كملتي قرايتها هي مبينة من أولها انو حزينة

  24. أريج :

    حسبي الله ونعم الوكيل على كل ظالم قصه مؤلمه 😢

  25. أريج :

    القصه حقيقيه؟

  26. كريمة جزائرية :

    شكرا على تعليقاتكم و القصة مابعرف حقيقية او خيالية واللي ماعجبتهم القصة بعتذر منكم بس كل واحد وذوقو انتم بلكي ماعجبتكم وتعجب ناس ثانيين وهيك راح انشر كل انواع القصص لارضي كل الاذواق

  27. 🌷 أم نبيل 🌷 :

    القصة حزينه ووجعت قلبي
    استمري كريمة وكمان نوعي بالقصص
    حلو كتير ويسلمو هالايدين 💞

  28. ام محمد ولاء :

    قصه جميله وفيها واقع

  29. نانا :

    لاحوله وﻻقوه اﻻ بالله العلي العظيم قصه مؤلمه جدا

  30. lubna :

    😭😭😭😭😭

  31. لينا :

    لا حول ولا قوة الا بالله العلي العظيم 😭😭😭

  32. نوال :

    حسبي الله ونعمى الوكيل فيهم

  33. نوال :

    والله اني اتاثرت كتير فيه هيك ناس ظالمه

  34. نوال :

    حسبي الله ونعمى الوكيل والله قصه مؤلمه

  35. ام عمر :

    حسبي الله ونعم الوكيل فيهم الله عالظالم 😭😭

  36. لولو :

    والله وجعني قلبي 😭

اترك رد

لن يتم نشر عنوان بريدك الإلكتروني.