شو بيشبهك تحسين للكاتبة جمايكا احمد

15 2٬494
 

شو بيشبهك تحسين للكاتبة جمايكا احمد

شو بيشبهك تحسين للكاتبة جمايكا احمد

شو بيشبهك تحسين للكاتبة جمايكا احمد

شو بيشبهك تحسين للكاتبة جمايكا احمد, معكم صديقة زاكي الشيف الموهوبة ,

الجزء الاول والثاني والثالث الرابع الخامس السادس والسابع………الى نهاية القصة
انتهت القصة

#شو_بيشبهك_تحسين

#للكاتبة_جمايكا_احمد…

.

الجزء الاول ..الثاني..الثالث ..الرابع الخامس السادس السابع …الي نهاية القصة

#امي : تحسين الحقني يامو

#تحسين : شوو في

#امي: اختك حسنية اطلقت ..يخراب بيتك يالطفية ياخرب بيتك ياشماتة نسوان الحارة فيكي ..

#تحسين : امي حاجي اتولولي وينها هي هلاء ..

#امي : بغرفتها عم تلطم على حظها ..

#حسنية : اخي الله يخليك لاتزيدها انت عليه ..

#تحسين : احكيلي شو صار ..بالتفصيل ..

#حسنية : ا ا ا طلقني اللي مابخاف الله ..

#تحسين : مافهمت شي ..حاجي تشخطي متل المعزة المذبوحة احكي بهدوء لاتبكي ..

#حسنية : من اسبوع كنت بالمطبخ بشتغل ومقل عيوني بهروا دمع من تقطيع البصل وماعدت شوف شي ..فات سعد وقلي حسنية خدي وقعي على هالورق . قلت لالو شو هاد يارجال ماني شايفة ..قلي هاد ورق بضاعة بدي جيبها على اسمك ..وانا متل العادة وقعت …اليوم بقلي

#سعد : قومي يالا على اهلك ..

#حسنية : مانو جاي على بالي روح اولادك المرة اللي قبل جننوها لامي ..

#سعد : ورح يصيروا يجننوها كل يوم قومي اذلفي..

#حسنية : يوووه لك يارجال شو صاير معك كمان اليوم ..

#سعد : ولك انتي طالق زهقت من وجه البوووم اللي كل يووم بصبح فيه ..خلص فرجت ورح اجوز وحدة اتهز الارض من تمشي عليها ..

((تمشي بالاربع امين ..ولا اقلك تمشي عليك حيطة مايلة يابووز الاخص ..شفت حالك من بعد مازرعت شعر يا اقرع يا ابن القرعة ..الله لايقيمو الهي وانت جاهي ياسعد يا ابن منيرة …الله يهدو كسرلي قلبي ابن منيرة ..قليلي ياجمايكا من وين ابلش من هالواقع المبرقع ..

#جمايكا : بلشي من وين مابتحبي انا ..هيني قاعدة وبسمعلك ..

#حسنية : ااااوف اووووووف وستين اااااووف ..هاد انا حسنية عمري 32 عندي 6 اولاد..انا واخي تحسين توأم ..يعني من بستان واحد ..بنشبه بعض كتير كان ماحد واحنا صغار يفرق بينا الا من يشلحوني الكلسون الله لايسامحهن ..كانو ينادوي تحسين التاني …اخي تحسين حبيب القلب والروح ببعتلو سلامي من من قروب جمايكا وبهدية اغنية انا واخي سبيس توون .هو الشخص الوحيد اللي كان رفيق عمري ماكان مقصر عليه حتى بتيابو…مشكلتي اني ملامح وجهي كبيرة براطيمي عجلات سيارة منفسة ..وعيوني متل ما انتي شايفة مابدهن وصف وانفي اخ من نفي لحالو اخد نص مساحة وجهي حتى صوتي رجولي شوي…

ماكان عندي رفيقات بنات انعزلت بالبيت مشان اتفادى الاحراج .. …كبرت يا #جمايكا وماحد دق بابنا يخطبني ..كانو يشكو اني رجال بس امي تحلف على المصحف اني بنت والله وتقلهن اذا بدكن بكشف عليها لتتاكدو ..رغم انها امي ماخلت لا فستان ولا كعب ولا اكسسوارت الا تلبسني اياها بس ملامح وجهي ابت انها تطبق معهن ..متل الفزاعة شكلي …ابي الله يرحمو كان عندو ورشة تصدير واستيراد ..كان هو وعمي ابو سعد شركاء ..بس ابي اخر فترة كان حزين عليه ..مشان ماحد اجا يخطبني ..عمي ابو سعد كان راجل طيب الله يرحمو هو كمان ..قبل ليموت ابي اجا خطبني لابنو سعد ..كان عمري 20 وهو 22 ..كنت شفقاني عليه من الصدمة اللي ابووه وقعها على راسو ..كان جاي وهو عيونو مجمرين من كتر ما لطم ونااح على حظو ..سعد شخصية كتير حلو لان امو اصولها استقراطية متل ماكانت تقلي ..عيون زرق واشقراني وطويل …ومن اتزوجنا امي ماخلت لاشعط ولا معط ولا نتف الا عملتو لالي حتى الشعر اللي طالع على كتافي خلعتهن من جذورهن بتذكر يومين وهي عندها شد عضل بايديها من كتر ماتعبت …لحسنت اطلعني نص عرووس ..اتجوزت سعد ..اللي من يوم ماعرفتو حزين ويتحسر على الروحة والرجعة ..بس الراجل الله وكيلك #ياجمايكا لو جرذون قدامو رح يجيب منو اولاد ..وهيني جبت 6 فصاعين ورا بعض ..بس يختم السنة اكون طازة اللي بعدوو…لعند ماعمي ابو سعد الله يرحمو لحقو لابي ومات ..وصارت الشراكة بين اخي تحسين وجوزي سعد ..بلشت الاوضاع تتدهور والمشاكل تزيد بس وصية عمي وابي هي اللي كانت تخليهن يتمسكو ومايخربوا شي ..غير هيك المشاكل اللي كانت بين لطفية ومنيرة اللي كانت منتشرة اكتر من سرعة الضووء ..بس انا والله ماكنت ادخل بشي يادووب حالي واولادي ..

#منيرة : هاي امك الداهية هي السبب ..

#حسنية : مرت عمي وانا شو دخلني روحي احكي معها ..

#منيرة : لابدي احكي ولا بدي اقوول انا بعرف اخليها تعرف انو الله حق… تروح تحكي عن بنتي عند النسوان اي ماشي يالطفية ان ماخليتك تلفي وادوري حولين الكعبة تترجي الله يستر عليكي …

#حسنية : لا حول ولا قوة الا بالله ..

((لعند ما اجا اليوم المنكووس من كنت اسمع اغنية حمادة هلال ديما دمووع..كانت حالتي لايرثى لها من البصل ..دخل عليه سعد وقلي امضي على هالورق ..كنت فكرهن ورق شغل طلعو ورق طلاقي …وورق اتنازل فيه عن كل ممتلكاتي بالميراث تبع ابي بالورشة …ماكنت اعرف والله ..لعب بعقلي واستغل نقطة ضعفي البصلية …انا كان قلبي حاسسني انو وراه شي وخاصة انو اجتمعاتو كترت عند امو ..والضيوف والنساوين اللي طالعة ونازلة عند دار عمي ووتتصل حماتي تقلو وصلو انزلوا ماكنت بعرف شو بصير كانت المية عم تجري تحت رجليه وانا مو حاسة ..كانت بتخطط لالو لجواز تاني مقصوفة العمر ..ومو هيك وبس كان على طول بهالغرفة عم يفسفس ويكنكن حاولت اعرف مع مين ماقدرت …

#تحسين : الله يعدمني حالو ..لك رح يجلطني هاااد ..الووو سعد يا الوصخ رح ردها لاتخااف لك لو على قبري حق اختي رح يرجع ..وتعال خد اولادك ..

#اسعد : خليهن لالكن ..سلام ..

#حسنية : اخي الله يخليك الا اولادي..

#تحسين : اولادك يصطفل فيه هو والحرباية امو ..بدو يفطسك بتربايتهن ويروح يتجوز براحتو ..بعدين هيهم ساكنين قبالنا رح تشوفي اولادك على طول ..

((اولادي يومها بعتهن اخي لعند سعد …وصارت مرت عمي ماتطلعن برا ينطف قلبي وما احسن شوفهم جكارة فيني …

الجزء الثاني ..

#امي : اي قلي شو صار معك ..

#تحسين : ماصار شي يامو ..اختي موقعة برضاها على الورق والمحكمة حكمت لسعد.

#امي : يعني حق اختك راح ..

#تحسين : لا ماراح طول ما اخوها معها مارح يروووح …

#امي : شو رح تعمل ..

#تحسين : الايام رح تخبرك ..حسنية حسنية …

#حسنية : اي لك اجيت ..

#تحسين : على الشبااك متل عادتك يا اختي ياعمري انسي خلص انسي لازم تشوفي حياتك …

#حسنية : حيااة شو ياخوي صار عمري 32 لا جمال ولا حلاة ولا جسم شايف كرشي شلون اخد مركزو ولا الاردااااف اللي شابطة على الشارع .. مين بدو يطلع فيني قلي ..

#تحسين : مية الف شب بكرة بتشوفي ..

#حسنية : حاجي مصخرة اتركوني بحالي زهقان التياب اللي عليه …

#تحسين : طيب قومي يختي اشلحي هالجلابية اللي صرلي من حرب التنك شايفك لابستيها واخدك مشوار يطيرلك عقلك ..

#حسنية : لوووين ليكون عند عبدو تبع الشاورما مانها طيبة وبحط قليل لحم و بكتر سلطة ماني رايحة …

#تحسين : ام كرش انسي الشاورما ..بدي اخدك اصورك ..

#حسنية : شو بدك تصمدني على الحيط ببرواز … شفت مصخرتك هاي رح تعملك سد براسك ..اتقي شر الحليب اذا فااار ..

#تحسين : الحليب اذا فااار …الحق مو عليكي الحق على التيس اللي دفنك بلمطبخ ..البسي خلصيني ..بدي صورك صورة بخلفية بيضة لجواز السفر..

#امي : جواز سفر..

#تحسين : اي امي ..سفر ..بدي اسافر انا واختي ..

#امي : وانا ..

#تحسين : لا امي خليكي هون ..بدي اخد اختي اوصلها لعند اختها صابرين وارجع تاني ..

#امي : لعند صابرين…امانة يامو خدني لعندها اشتقتلها …

#تحسين : يييي ان شاء الله بس مو هلاء خلصتي البستي ..

#حسنية : اي اي البست ..

((اطلعت انا واخي جهزنا امور السفر لعند اختي صابرين الكبيرة ..عايشة بدبي صرلها 20 سنة اتزوجت ابن عمتي وسافرت معو ..:كنت صغيرة شي 12 سنة …من اوصلت لعندها اخدتني بالاحضان بتعرفو غلاوة الاخوة انتو ..وبلشت اشكيلها همي ؟…

#تحسين : خلاااااص لك ماخليتي شي على وجه الارض الا كبيتي اللي ببطنك لالو …خلص انسي طول ما اخوكي بضهرك حقك رح يرجعلك وعلى ايدك صح صابرين ..

#صابرين : والله لنخليه يبوووس ترابك رجليكي بس صبرك ..رولين هاتي ماما صحن اللبن لخالتك ..

#حسنية : لبن ياصابرين لبن قاطعة بلاد لتغذيني لبن ..شو اقول انتي كمان ما انتي بخيلة متلهن ..

#رولين : خالتو حبيبتي ..لازم تاكلي لبن وتتعشي لبن ..لتنحفي وتصيري اميرة ..

#حنسية : حلي عني ولي انتي كمان …صابرين رح تجيبلي غذا متل الخلق ولا اقوووم اكلكن انتو كمان ..

#صابرين : لا مارح نجيب …بدي تتعشي لبن وتتغدي لبن وتمشي على كل شي بدنا نقولوا لالك … بدنا حقك رح يرجعلك رولين هاتي الميزان ياامو ؟…

#رولين : مجهزتوا ولووو ..

#صابرين : قوومي اختي وزنيلي هالجثة ..اللي عليكي ..

#حسنية : لك سمبتيك انا مابدها ميزان …

#صابرين: اذا قومي تتوزني احلى طلبية بيتزا لعيونك ..

#حسنية : اي ماشي اذا هيك ..وهااااا قوولي كم ..

#صابرين : كم يااامو ..

#رولين : مااما الميزان ماعاد يجمع اتخربط وماعاد يثبت على رقم

..

#صابرين : اوووف شو صار

#حسنية : لك هاي الموازين خربانة قال رقمية قال..

#صابرين : ماما انتي من وين جبتية ..

#رولين : ماما اليوم جبتو من ايكيا …نوعية كتير منيحة ليكي شوفي طلع وزني 59..

#صابرين :ليكو اشتغل بعدي اشووف انا اجرب..اي والله 85 ..اطلعي حسنية جربي ..

#حسنية : مع اني ماحابة اقووم مشان تفاهتكن بس كرمال البيتزا اللي جاي على الطريق قايمة هااا قولي كم ..

#رولين : رجع اتخربط من تاني ماعاد يثبت على رقم ..

#تحسين : خالو شيلي شيلي هاد …

#صابرين : ليك شوو جايب قبااااان …

#تحسين : اطلعي حسنية …هاد منيح لالك ..

#حسنية : طول عمري اتوزن على القبان من وين جايبين هالهبل هااد.. ها بشر تحسينووو ..

#تحسين : مبرووك يختي قطعتي 130 …

#حسنية : الله يبارك فيك انردها لالك بالافراح ….

#رولين : اوووه 130 ..على 59 ..تقريبا تلات اضعااف ..

#تحسين : ها ياخال شو بتفكري ورك واحد من خالتك حسنية بوزنك …

#حسنية: هاد بلدي انت واياها …شو بتفكروا …شيل القبان شيل …هاتو البيتزا ..

#صابرين : بيتزا شوووو…انتي لازم يحطوكي بأفريقيا يحلبوكي بالمجاعات ..

#حسنية : شو افهم من هالحكي مافي بيتزا ..

#صابرين : لا في لبن ومي وفواكة وجري ورياضة اقل شي 4ساعات يوميا ..

((الله وكيلكن بلشت الحرب اختي صابرين لازم اقدم فيها بلاغ بمحكمة العدل الدولية على المجازر اللي عم تعملها فيني …

#حسنية : اختي ابووس على رجلك حاج ركض بكفيني ..

#صابرين : يالا يالا لاتوقفي بلا تعملي حادث

#حسنية : حادث شووو كلهن دلافين الا عم يركضوو ..

#صابرين : ماهو اذا صار اصتطدام بينك وبين هالدلافين ممكن تصير هزة ارضية وبعدها تسونامي وبعدها نروح بشربة مي …

((بقيت على هالحال ثلاث اشهر وانا قلب كان عم يتقطع على اولادي رجع تحسين وانا بقيت مع اختي وبنتها اللي كانو يهونوا عليه اللي كان بصير معي .لعند ماوزنت وكنت نازلة اكتر من 40 كيلو من وزني خلال تلات شهور …

#صابرين : لك ياتحسين والله قدها وقدود..

#تحسين : اها شو صار معكن ..

#صابرين :اختك وصلت لل 90 ..

#تحسين : تكبير ..

#صابرين : الله واكبر ..يالا رح الاسبوع الجاي اجي انا وامي بس ضلو مستمرين اكتر..

((ووصل اخي وامي كنت فرحانة على الانجاز اللي صار بوزني حسيت انو ارادتي قوية …

#تحسين : اي اي ولايهمك دكتور اكيد شو ماكلفت انا جاهز الله يسعد اي والله ان شاء الله الاسبوع الجاي ..اكيد بس مي تشرب ان شاء الله …مع السلامة ..

#صابرين: اي شو قلك ..عمليتها الاسبوع الجاي بس مالازم تاكل اوتشرب شي ..بس مية قبل لتنام …

#حسنية : عملية شو ..

#تحسين : شفط وقحط وازاحة وتمليس ارضيات ..

#حسنية : شوو هاد يابعدي ..

#صابرين :هههههه اخدنا موعد لنعملك تصغير معدة ..وشفقط دهون وكمان شد ترهلات ….

#حسنية : اوووبا كل هااد ..

#صابرين : لا مو مع بعض اول شي المعدة ورا شهر بس تطلع النتيجة بنبلش بالعمليتين اللي بعدهن…

((وهاد اللي صار من بعد ماعملت عملية ربط معدة بلش ميزاني ينزل اكتر وعملت بعدها العمليتين اللي صاروا لوصل ميزاني 70 ..وجسمي من كل مكان مشدود انا ماكنت متاكدة من حالي ..ماتصورت انو هاي حسنية .وبعدها بفترة فاجئتني اختي انو اخدي موعد مع دكتورة تجميل …

#الدكتورة : ممممم انا رح اعمل اللي بقدر عليه ..الموضوع مانو سهل في كتير شغلات بدها ترتيب بالوجه …بس اللي بقدر عليه راح اعملو بس هالشي رح يكلف كتير …

#صابرين : كم يادكتورة ..

#دكتورة : ليكها الفاتورة شي 10000 دولار …

#صابرين : لحظة اتصل تلفوون …اي تحسين والله ياخي كتير شي 10000..

#تحسين : اووف على شوو قلها خفضي شوي اعطيني احكي معها ..الوووو اي دكتورة مو كتير 10000 لك والله بجيب عروس جديدة على 1000 دولار ..

#دكتوورة : اخي هاد اللي موجود مانها كرتونة بندورة تعملي تنزيلات فيها …

#تحسين : خلص شو ماكلف يكلف …شو نصابين ياهالدكاترة …

#دكتورة : شوقلت ..

#تحسين : قلت شو شاطرين …ماشي بدي شووفها كاسندرا مو حسنية ..فهماني بدي من اشوفها ما اعرفها ركزيلي على الانف كتير حاول قد مافيكي تشليه وركبيلها انف صغير ..او ضلك حكي فيه بالشفرة ليصير الربع …البراطيم صغيرهن يكونوا متل فتحة الخاتم اللي بصبعك …

#الدكتورة : اللي بصبعي ..شو عرفك انو في خاتم باصبعي …

#تحسين : حدسي قوي ..المهم دقنها نعيمه بالمووس ..

#دكتورة : انعمو بالموس ..شو رايك اخدلا وجهين بطلع انعم ..

#تحسين : يوووه خدي واعطي قصدي عن الشعر اللي بدقنها بالليزر اعمليه …وانحتي عضمات وجها يعني طلعيها انثى …

#دكتورة : سلام..اتفضلي احكيه ..

#صابرين : شو اخي ..

#تحسين : شو ليش مابدها تحكيني ..

#صابرين : اخي بنحكي من نرجع على البيت رح تفوت حسنية على غرفة التصوير الاشعاعي ..

((بلشت تجهيزات عمليات التجميل بوجهي…ولفو وجهي بالشاش كنت حاسة انو تمي زاح على اليمين تحت داني …وانفي شبط لحواجبي ..وعيوني مورمين ماعرفاني شو صار فيني ..بعدها اجت التورة اللي سلخت وجهي وفكت الشاش عنو …كان الكل واقف ومجحر عيونو على الاخر ..وانا كنت متوترة اشووف حالي كيف طالعة ..لعند ما اعطتني المرايا ..

#حسنية : خدي خدي مابدي شوووف …شو ساويتي ولي ..وين راح انفي لك صابرين شوو صار..

#رولين : لك خالتو طالعة بتجنني …

#حسنية : يابنات هاي انا ..

#رولين : اي خالتو انتي …لك احلى عروس بالكون صايرة …

#تحسين : ههههههههه سبحانك يارب

#حسنية : ليش بتضحك غليز …

#تحسين : مش قادر اتصور انك صرتي حسنية بحق وحقيق .هلاء بلش الشغل الصح ..يؤبرني جمالك كساندرا …

#حسنية : هههههه بشو عم تفكر اخي..

#تحسين : جهزيلي جمالك نازلين بكرا علي البلد …لانو بلش الشغل المزبووط هلاء ؟..

((بعد مارتبت اموري وودعتها لاختي ..ارجعت انا واخي من تاني على البلد …حتى امي ماعرفتني ..شكلي تغير ..ووجهي كمان ..6 شهور مرقوا كانو صعبين عليه ..بس طلعت بنتيجة منيحة فيهن ..كنت مشتاقة خيرات الله مشان اشوف اولادي …ومن وصلت جابهن اخي بالاول ماعرفوني بس بنتي الكبيرة ميس اتفهمت كل شي وفهمت اخواتا ..اللي صار ……..شوي شوي صارو ياخدو عليه ..اللي عرفتوا انو سعد اتزوج وحدة تانية وعلى قلتهن مبسووط ..

#تحسين : شوفتي مرتو لسعد ..

#حسنية : اي اخي شفتها …حلوة ..

#تحسين :والله مو احلى منك ..اليوم بتجي على المحل سعد اليوم بالشغل …وبتسألي عني ..جهزي حالك بلش شغلنا ..

((بيوم كنا قاعدين انا واخي وفهمني انو اللي عملو سعد فيني وغدروا مارح يمرقوا لالو وفهمني المخطط كلو اللي تعب اخي فيه ليرجع املاكي من سعد …جهزت حالي والبست احلى تياب عندي واطلعت على الورشة وفتت على المكتب..

#سعد : مرحبا يا انسة فيني اخدمك…

#حسنية : يسلمو تحسين هون ..

#سعد : مين اقلو ..

#تحسين : لك شووووو هاد الجمال اللي ماشي على الارض …

#سعد : اوووبا شو تحسين صادت سنارتك..

#تحسين : استغفر الله ..هاي اختي..

#سعد : اختك ..حاجتك فزلكة ..

#تحسين : حسنية اختي اسبقيني جايلك ..

#سعد : حسنية ..وانا بقول هالصوت مشابهة لحد بعرفوا ..الشكل شايفو قبل هيك بس وين وين …يا نعمة الله حسنية هااي …

((اطلعنا انا واخي بالسيارة وكان سعد واقف على شباك الورشة عم يطلع فيني بحسرة …كانت الخطة الاولى يعرف انو حسنية ماعادت تحسين الثاني …

#تحسين : اختي خدي هالموبايل حديث ..بدي منك تعملي حساب لالك وتعملي نكز لحسابو لسعد ..

#حسنية : بس ياخيي عندي واحد ..

#تحسين : حسابك الفيس القديم احذفية ..هاتي اعملك واحد …شو حابة اسميه ..

#حسنية : اي شي سمية شو بيشبهك تشرين غدار غدار …

#تحسين : شو رايك اجيبلك المغني كمان على حسابك ..بكفي شو بيشبهك تشرين …

((من جهزلي اخي الحساب ..عملت نكز لحساب سعد ..وبنفس اللحظة اجاني حظر …اللي عرفتو من بنتي ميس انو حساب سعد بتفتحو بلوط مرتو لسعد ..انا هيك مسميتها …حربوووقة يخرب عقلها ..من كتر افعالها اللي بتقلي اياها بنتي ماعدت اعرف من وين ابلش معها …

#امي : حسنية يامو افتحي الباب مافيني احيل اقووم ..

#حسنية : تكرمي ..هاد سعد ..

((بالعين الساحرة تبعت الباب شفت سعد جاي لبيتنا ومع ابني الصغير …بسرعة دقيت لتحسين لاخبروا ..

#تحسين : اي اختي عادي افتحي الباب وخدي الولد وسكري الباب بوجهو قوي حالك مابدي كل شي اقلك عليه …

#حسنية : ماشي اخي ..سلام ..

__ماما اشتقتلو حبيبي كيفووو …

#سعد : حسنية

#حسنية : اي اتفضل في شي بدك شي ..

#سعد : انتي اتغيرتي كتير ..

#حسنية : فتلت حالي وقلبت عيوني وصرت رمش متل اللعبة الخربانة ومديت ايدي لعند سعد ….بلووط وراك …

((اخدت ابني بسرعة وطبقت الباب وكنت ناطرة مرت سعد شو رح تعمل من زقتطوا لسعد عم يحكيني هيك ..شدتو من ايدو كانت مرة كاسرة والله …مو متي متل النعجة اللي مطاطية راسها ..وبلش صراخهن يعلى ويزيد ..كنت ناطرة الاف بي اي تبعتي تنقلي اخر التطورات ..

#ميس : ماما بلوت اكلت علقة من ابي ..

#حسنية : ليش ماما ..

#ميس : هي غلطت عليكي وبابا ضربها ..

#حسنية : صاير حمش..فتلت حالي وانسدحت تحت الشباك اللي بطل على شقتو لسعد ..وبلشت اسمع الطبل والزمر..لصار دق على بيتنا بقوة وكانت بلووط ماغيرها ..

#جمانة : اسمعي ولي بعدي عن جوزي من يوم ما ارجعتي وحياتنا انقلبت بسببك ..

#حسنية : بردوووون ..انتي عم تحكي معي ..

#جمانة : اي بحكي معك ..

#حسنية : لحظة خطيبي على الموبايل بدقلي ..الوو اي حبيبي ابو السوس ((على وزن سعد ..مشان احرقها بزيادة …شو حبيبي ..لا لا لاتاكل هم باي ..

((مابعرف شو اللي خلاني استغل الفرصة واحكي هيك …لدرجو حسيت بلووط من الغيرة قلبت بوزها وطعجتو بالاتجاة الغربي …وشوي تصير فوقي متل المنكمش على الفريسة ..وهي عم تشتمني حاولت اني اضربها بس للوهلة حسيت انو سعد نازل …عملت حالي منيحة معها ..

#حسنية : شوفي الله كبير …واللي ظلمني رح يجي الله ويظلمو..

((قفلت الباب ..وانا ناطرة يرجع الصراخ من تاني فجأة نزلت بلوط وحاملة شنتة الحردان تبعها …وهيك صفي الجو لالي ..

الجزء الرابع .

((بعد مرور تلات ايام على اخر الاحداث فتت اقلب بالفيس …لقيت حساب واصلني اضافة منو مكتوب عليه شو بيشبهك تحسين . على وزن حسابي ..وكان وقتها باعتلي رسالة …

#__مرحبا….

((انا للوهلة حسيت انو ورا هالحساب هي بلووط ماغيرها ..من فتت على الاصدقاء شفت انو في اشخاص هي ضايفتن من نفس عائلتها …ما اخدت ولا اعطيت مشان هالحساب بس فضلت مراقبتو كتير ..

#سعد : ممكن احكي معك كلمتين ..

#حسنية : عن اذنك عندي شغل …

#سعد : شغل شوو…

#حسنية : مابهمك كتير .. بس على العموم اخي فتحلي مشروع صغير متل صالون تجميل …

#سعد : حسنية بس كلمتين بدي احكيهن معك واروح …سامحيني

#حسنية : سامحيني ..هههه ضحكتني ..

(((بلشت بوادر الندم تظهر على وجه سعد بس شغلي معو ماخلص بالمرة …اساسا مافي عندي اي مشاعر تجاهو لاني ازعل او اشفق عليه …وبسهرة العشا اجا اتصال لتحسين من سعد …

#سعد : تحسين بعرف اتصالي مانو بوقتو بس ابني الصغير مرضان وحرارتو مرتفعة وماعرفان

شو اعمل ..

((خبرني تحسين اني اطلع لعند ابني وسعد رح يطلع من البيت …لوقت ما ابني ترد صحتو ..كانت البيت سئ على الاخر ..ماعاد هاداك البيت اللي كانت ريحتو نضافة كل شي مقلوب ..غرفة اولادي الخزانة مقلوبة وشراشف التخوت ريحتهن طالعة …كنت عارفة كمية الجحيم والقرف اللي كان عايشها سعد من بعدي …هاد هاد افضل عقاب على انو الجمال مو اهم شي …بعد ما ابني نام ورتبت غرف اولادي وجهزتلن الغدا لتاني يوم بالصدفة شفت الكمبيوتر تبع سعد مفتوح ومن فضولي بلشت فتش فيه …وشفت نفس الحساب اللي واصلني منو مسج كان واصل منو لسعد حكي عني سئ …رفعت عني الحظر من حساب سعد وبعتت لالي طلب صداقة ..ونزلت ..خبرت تحسين باللي شفتو على حسابو لسعد …مرقت الايام ورجعت بلووط على لسعد ..وبلش شغل المجاكرات هي ومنيرة امو لسعد لالي …وكانو بتقصدو الصوت العالي ليوصلني ..

#منيرة : كنتي الحلوة …انتي صرتي بأي شهر ..

#جمانة : بالثاني مرت عمي ..

#منيرة : مشتهية شي ..

#جمانة : قلت لحبيبي قلي رح يجبيو لالي بالمساا..

((كانت هالمواويل كل يووم اتصير …

#سعد : حسنية اطلعي اوصلك معي على شغلك ..

#حسنية: لا شكرا ..انا بروح لحالي ..

#سعد : طيب انا بنزل روح معك ..

#حسنية : لو سمحت لاتمشي جنبي ..شو يقولو االناس ..

#سعد : بس انتي ام اولادي ..شو اخبار شغلك ..مانك حابة تكبرية ..

#حسنية : ان شاء الله ..

#سعد : حسنية انا بساعدك شو رايك …

((تركتو لسعد وارجعت على البيت لاحكي مع تحسين اللي مقضي حياتو نوم ..وانا انادي عليه

#تحسين : عين العقل بس هو كداب مارح يصرف ليرة وحدة الهدف مو هون

….انا بدي ترجعي لعندو كمان …يرجع يجوزك ويصرف عليكي الضعف ..يعني يصير الشغل عن قريب ومتل ماعمل فيكي وخلاكي توقعي على ورقة انا رح خلي المأذوون يوقعو على نفس الورقة …

#حسنية : شو الحل يااخي ..

#تحسين : الحل هو انو تجيبيه بحركاتك لالك ..

#حسنية: شلون يعني قلي شو اتصرف …

#تحسين : بلشنا رحلة العذاب من تاني اقووم يعني اقلك شلون ..شوفي اختي الكريمة …

((كان تحسين يتمايل ويترقص بالمشي ليعلمني الحركات المايعة تبعت النسوان وقت وصلني مسج على الفيس من حساب سعد ..

#حسنية : سعد هاد سعد بعتلي رسالة ..

#تحسين: شو كاتبلك ..

#رسالة سعد : حسنية مابعرف شلون صرتي عندي ..بس خيرات الله مبسوط ..بدي قلك الصراحة انا ندمان اني تركتك بس والله مابعرف ليش صرتي احلى مرة بالكون ..معقول كنت اعمى عنك انا …

(العما بقلبو عيونو زايغة حتى عليه ..اي ماشي يا ابو قويق ..بتفكرني حسنية تبعت زمان لا والله الاذية تبعت السنين اللي راحت رح طلعها من تحت جلدك …

#رسالتي : سعد ممكن تهتم ببيتك وتتركني شوف حياتي انا خطبت ومابدي مشاكل ..

#تحسين : برافو عليكي ..

#حسنية : طيب شو رح نعمل من وين رح نجيب عريس تاني …

#تحسين : لاتاكلي هم هالشي ..

#حسنية : تحسين فكرك هالشي رح يعلمو لسعد درس..

#تحسين : اختي اقلك الصراحة ..انا مابدي ترجعي لسعد ..بس فكرة افوت خطيب بالنص مشان هو يستعجل ويجي يرجعك لالو …بس عندي رفيق هو اللي رح يرتب كل هالشي رح انجيب مأذون على الكيف ..ومتل ماخططنا …

#حسنية : وبلووط..

#تحسين : بلوط سيك منها بشطارتك بتقلعيها من حياتك ..انا كرمال اولادك بدي ترجعي ..بس لازم اعمل سعد درس ماينساه بحياتو ..

((ومتل ما اخي قال نفذ..عملنا صيت خطوبة وماخطوبة وبشطارة امي نشرت الخبر مع نسوان الحارة انو حسنية رح تجوز مهندس عزابي ومن عمرها ..لعند ماوصل الخبر لسعد اللي نزل ركض لبيتنا وهو معصب ..

#سعد : افتحووووووو

#امي : شو بدك

#سعد : وين حسنية ..

#امي : طلعت مع خطيبها شو بدك منها ..

#سعد : انا ام اولادي مابتروح لغيري..

#امي : شو حليت بعينك من اجا ابن ناس ومحترم يجوزها ..

#سعد : انا ابن عمها واولى منو وكمان ابو اولادها …بدي مرتي ترجعلي ..

#تحسين : اها شو ردلك عقلك شاايف بدك اختي ترجع رجع حقوقها ومتأخرها القديم ومهر جديد ومتاخر جديد..اذا بدك ..واذا مابدك الله معك

#سعد : شوو ..

الجزء الخامس..

((كنت ناطرة اسمع ردة فعل سعد على كلام اهلي ..بس الغدار بعمروا مابتغير رفض وقتها كلام اخي ..

#حسنية : طيب شو قال..

#تحسين : انصدم من الحكي فكرنا انرجعك لالو ببلاش …بس ماحزر.

#امي: والحل يامو ..

#تحسين : اتركوه بيجي لالو وقتو ..

#حسنية : يعني مازبطت هاي الخطة …

#تحسين : مافي شي بقولوا مابزبط ..

#حسنية : طيب انا هلاء شو اعمل ..

#تحسين : اشتغلي على موضوع الفيس …اقبلي طلب قصي من عندك .

#حسنية : مين هاد قصي..

#تحسين : هاد انا خطيبك يا مغفلة ..

#حسنية : هههههه دخيل خططك انت ..

#تحسين : بس يرجعلك حقك بدك تدفعيلي الخسارة اللي صرفتها على سحنتك ..وكل يوووم تجيبي تشط المي الباردة …وتحطي رجليه فيهن ..وتدلكيهن وتجهزي لالي عشا ومن تشوفيني نايم تغطيني ..

#حسنية : شو رايك صير اوديك الحمام كمان …

#تحسين : لا بتعب انتي جيبي الحمام لعندي …

#حسنية: ايوووون هيك لكان…طيب علقلي على منشوري …

#تحسين : ماشي وهاد تعليق دخيل عمرك ياروحي الله يقرب فرحنا واعملك فرح باجمل مكان وانجيب احلى اطفال ..واعوضك عن ايام الحرمان اللي شفتيها .

#حسنية : ياويلي …لحق لحق عمل لايك على تعليقك ..

#تحسين : هاد طلع فارش فرشتو بصفحتك ..

#حسنية : اي اي ..استنى اكتبلك ..امين يا اغلي من روحي وسندي واخلى شي شفتو بدنيني….

#رسالة من سعد….مش مسدق انك بعتيني هيك …

#حسنية : لحق بلش يبعت تحسينو ..

#تحسين : اعطيني ارد عليه ..

#رسالة تحسين …انا مابعتك ياخاين يازالم يا اناني..لاخر نفس وانا عم قول بدي اياك ..بس انت بعتني مشان ماترجعلي حقي ياغدار..اهئ اهئ اهئ ..

#سعد : عم تبكي ..

#رسالة تحسين : بحياتي ما بكيت هيك بس انت كبيتي مشان ماني حلوة ماعرفت بايديك تحليني بعيونك …كنت قادر انو تغيرني بس انت تفستني …بس خلص قصي اجا يعوضني رجعلي الجمال اللي جواتي …

#سعد : انتي مانك حاسة فيني انا عم اتعذب وانا عم اسمع انو مرتي الاولى رح تصير لحد تاني …انتي مانك حاسة فيني كرهان حالي ارجعيلي ارجعيلي..

#تحسين : مارح ارجعلك يا اناني يا زالم …

#سعد : واولادك ..

#تحسين: خلي بلوووت تربيهن ..

#سعد : كرمال الله سامحيني ..

#تحسين : سعد

#سعد : عيونو لسعد ..اهربي تعي لعندي اتركي تحسين بدو يدمرلك حياتك …

#تحسين : سعد ختيبي بدقلي بااي ..

#سعد : انطري انطري بس شوي بس شوي حاجتك تحرقيني هيك ..

#تحسين : شو يلي بدك اياه ..

#سعد: ترجعيلي ..

#تحسين : بس انا بحبو لقصي ..

#سعد : بحرقك اذا بتعيديها فهماني …

#تحسين : ماداخلك …يالا حاج تعتلني ..انا بيسي كتير

#سعد : شو يعني بسي

#تحسين : يعني مشغولة يا جاهل باي ..

الجزء السادس

((قضينا الليل نضحك على كلام اخي مع سعد ..كان عم يحرقوا بالبطيئ لطلع علينا الصبح …وقت اللي اسمعنا حد واقف على الباب..وعم ينادي عليه ..وكان سعد اللي بقي طول الليل عم ينطرني لاطلع …

#سعد : صباح الخير مرت عمي ..

#امي : عمى الدبب ..شو جاي بدك ..

#سعد : الله يخليكي مرت عمي انتي الوحيدة اللي قادرة ترجعيلي مرتي ..

#امي : غلطااان انا الوحيدة اللي مابدي رجعلك بنتي احزر ليش ..

#سعد : عجزت ..

#امي : لانها لقت اللي يسعدها روح حط راسك براس علقم تبعتك …

#سعد : مين علقم ..

#امي : اش عرفني علقم بلوط مابعرف ..

#سعد : مرت عمي شو اللي بدكن اياااه قليلي ..

#امي : حق بنتي يا ابن منيرة ..

#منيرة : شو في هوون ..

#امي : ليكها جبنا اسم القط صار ينط اتقولي الحيطات الها اذن لتنادي عليكي..

#منيرة : شوو لطيفة مالك على هالصبح ..

#امي : دق القرفة و لا صباح السلفة …خدي ابنك منيرة وبعديه عن بنتي …بدها تشوووف حياتها ..

#منيرة : اها اللي اسمعنااه في منو ..

#امي : اي يختي في منووو وخطوبتها رح تقرب ..فياريت مابدي مشاكل ..

#منيرة : وبجيلك قلب بنتك تترك 6 اولاد وتروح تشووف حياتها شو هالجيل هااد ..

الجزء السابع

#امي : والله بنتي ..ما اطلقت كرمال تربي اولادكن …ربووهن ولا امك جوزتك ياسعد كرمال بنتي تتبلى بخلفتكن …ولا ماعجبكن بنتي تتغير وتصير للاحسن والدنيا قاتلة حالها عليها …بكفي انو عريسها مخستأ مرستأ

#منيرة : لك حاج تحكي حكي شروي غروي ..شو ابني لوولك حنكك الظاهر ..

#امي : شو بدي يقول بعد ما هلك نعمتها ..ارجيني عرض كتاااافك اشووف

#منيرة : سعد عم تهينك ياامو ..

#امي : ئيي شو صرلك اجتو الجمدة .. تستاهل انت اللي عملت بحالك هيك حشت نشت …

#منيرة : شو هالحكي لطفية ..مانك شايفة شلون طلع من عيونو عامص ..وانطبز

#امي : زحل عقلوو من الصدمة ..انبخع ((خيبة يعني )) ..

#سعد : امي انتي السبب كلو من تحت راسك انتي اللي ضيعتي مرتي مني ..كنت رضيان فتحتي عيوني على الجواز ..

#امي / بأالبحصة تبعتو اخيرا ..

#منيرة : انا شو هالحكي امي ..لاتحملني شي .(بهمس ).نكت الخمير والفطير يافضيحة

#امي : باااضت عليه ..لا حول ولا قوة الا بالله ..

#منيرة : عليي ماعليي ..مابزل عليك ..اني يامو كنت بدي سعاادتك ….ماشفت حالتك شلون كنت ملبصن لبصنة

#امي : شييه ! لعيتولي ألبي ..

#سعد : حاج امي رجعيلي حسنية ..

#امي : روح سعد رووح اتكمكر جنب بلوووط وناام ..

#جمانة : شوفي ام تحسين ..انا شايفة وساكتة ..اذا جوزي انضرب على ألبووو وفتل راسوا ومو عرفان شو بدو انا بعدلو لاتخااافي …

#امي : هالحكي احكيه لسعد ليكو خنس من شاافك اويلي على النسوان شو قووية ..

#جمانة : ماهو من بنتك ..مابعرف شو اللي لحس لالو عقلو ..طول عمرك يا حسنية مجعلكة ..\

#منيرة : اويلي اعطيني على طواحيني ..شاطرة يا كنتي ..

#امي : الحية الت لدودة تضربي على هالآمة المدودة

#تحسين : شو في هوون عرض للردح ..الله الله ..ثواني لا تبلشو بس بدي جيب قهوتي ..وارجيلتي …

#امي :لا يااامو هاد بقلك من قلة تدابيره خلطة الحنطة مع الشعيره ..وان شاء الله توصل طحطح …

#حسنية : شو في صوتكن طالع على الصبح ..

#سعد : حسنية لا تهتمي لالهن ..شو مابقولوا لاتسمعي ..

#امي : شووفي امي من الاخر ..عاشقك خدية ومطلقك لاتردية …

#جمانة : يلي جاي بلا عزيمة ياقليل القيمة ..

#حسنية : شو قصدك بلوووط …ناوية على خراب عشك شكلك..

#جمانة : بلوووط بعينك يا ناقصة ..

#حسنية : انا ناااقصة يا شرنة يا شرشووحة يا ام صنة ..

#تحسين : هههههههههه اعطيها ام مدحت اعطيها ..

#جمانة : ماحد غيرك شرشووح يا مجعلكة . قال.البرغوت قال للبقة يضرب الشرشوح اذا اترقى..

#حسنية : هيك لكاااان اساسا انا قلبي مليان من زمان وصار وقت اورجيكي مين حسنية ..يا بنت بياعة بطاطين العسكر ..وهااا وهااا وهاااا

#جماانة : شعري ااااخ شعري ياااسعد ..

#منيرة : ينكبك سيبي المرة بحالها ..متل الغولة هجمتي عليها ..

#حسنية : اذا انا غولة ..الله يحرسلك ام رجل مسلوووخة …اتفيي ..

((بعد العلقة اللي اكلتها بلووط وطلعت تزحف زحف على الدرج …متل يلي شي كان على قلبي وانفش ..مو عارفة شلون حسيت ببرود وتلج نزل على قلبي ..بس السطل سعد مااتحرك ساكن ..وتحسين كان نازل ضحك ..وعم يلهي سعد ..وامي ماتركت مسبة او مثل او كلمة اللي قالتها تخزين العمر كلو طلعتو …بعد مامرق اسبوع كامل على الحرب اللي صارت وكمية السكينة والهدوء اللي صار من بعدها بس هالوضع ما عجبني لا انا ولا تحسين …لان مو الهدف هيك ..اضطرينا نعمل طبل وزمر بالبيت وعزمنا شوية من رفقات امي كرمال اختي صابرين جاي لعنا ..بس استغليني جيتها باغنية يادبلة الخطووبة …اخي تحسين ماقصر جاب مسجلة وستريوا ((مكبرات صوت))والاغاني وصلت لاخر الحارة …يومها اجا سعد ركض لعنا على البيت خايف وعم يرجف …

#سعد : شو اللي بدكن ايااااه بس طفوووو هالاغاني ..

#حسنية : بدي حقي ..

#سعد : برجعلك اياه بس بشرط ترجعيلي ..

#حسنية : خليني اسال بس ..ليجي تحسين رح يجيب الماذووون

((من بعد كلام سعد اللي قالو كرمال انرد عليه بنفس اللحظة قبل ليجي المأذووون المجهوول …حكيتو لتحسين ..وجا ركض جايب معو الورق اللي ضروري يمضي عليه سعد ..

#تحسين : وقع هوون ..

#سعد : شوو هاد ؟

#تحسين : حقها لاختي ..

#سعد : بس بدي مرتي ترجعلي مقابل هالشي ..

#تحسين : اي من يرجع لالها حقها اكيد بسير حكي بالموضوع …

(وقع سعد على الورق بتم ساكت ..كان اخي وامي طايرين من الفرح ..بس انا بعدني ماخلص حسابي ..وقفنا الطبل والزمر على جيت اختي صابرين لعنا من دبي …جهزت حالي بالمسا لانو كان جاي الماذون ليكتب كتابي على سعد ..وهاد اللي صار ..رجع طليقي خطبني ..وبلش دوري هلاء اول شي طلبتو بيت لحالي ..بس سعد قلي بدو فترة ليجهز لالي بيت …

#حسنية : بس انا مابعيش مع ضرة بنفس البيت ..

#تحسين : مممممم اختي وعدك جوزك انو رح تصير كل وحدة في بيت خلص وافقي ..

((لحظتها غمزلي تحسين …وافهمت شو مقصدو ..بعد ما طلع سعد من عنا ليجهزلي غرفة بنفس البيت …

#تحسين : اختي معلش انتي بحاجة هاي الفترة فرصتك لتكرهيها حالها ..

#حسنية / بس ما اعتقد انو رح تطلق او يطلقها لانها حامل ..

#تحسين : مين قلك هالحكي ..

#حسنية : اسمعتهن ..

#تحسين : مافي منو هالحكي قالو هيك كرمال يغيظوكي …

#حسنية : اهاا الملعوونات ..بس هالفترة رح يصير فيها تكسير روووس كتير شاايف ..

#تحسين / بشطارتك ….رجعي جوزك لالك .

(( ارجعت لبيتي اللي كان هالمرة نضيف ..كان سعد مهلووك بتنضيفو .. هالمرة ماشفت بلووط ..شكلها حردانة كمان ..قضيت اول اسبوع لحالي مع اولادي شعرت انو حياتي بلشت ترجع لطبيعتها بس بصورة افضل …سعد كان هالمرة غير قبل …ملهووف عليه وبخااف من الهوا الطاير ..كنت من ازعل قبل يكون مبسووط بس هلاء لا غير …مابهون عليه قال….

#سعد : حبيبي افتحي الباب مشغول انا ..

#حسنية: اي حاضر ياعمري .. بلووط ..

#جمانة : بعدي هيك ..سعد سعد …

#سعد : شو جمانة ..

#جمانة : انا بدي بيت لحالي ..

#سعد : اي بس لارتب اموري انتي بتاخدي هاد البيت و حبيبتي بتاخد البيت الكبير اللي تحت

#جمانة : حبيبتك والبيت الكبير ..

#حسنية / اي مانو عاجبك ست بلووط ..

#جمانة : بسيطة ما اكون جمانة اذا ما كرهتك اليوم اللي ارجعتي فيه ..

((ضحكت ضحكة خبيثة ..مع وجه برئ ..لاني كنت انا اللي مجهزتلا خطط توديها ابو زعبل ..اول ايام من وجودها …صارت تعمل حالها تعباني وماتقبل تقوم من فراشها ..الا من يجي سعد من شغلو …وانا كنت اتحمل كرمال ارتب للتخطيط الجديد ..

#سعد : كيفو حبيبي ..شو عاملة لالنا غداا ..

#حسنية : يبرأ كرمال عيونك ..

#سعد : دخيل عيونك كل هاد عملتيه لحالك وينها جمانة ما ساعدتك ..

#حسنية : كانت مرضاني وانا قلتها بلا تعملي حرام خطي …

#سعد : شو حنونة يا مرتي ..

((كتير حاولت ابين قدام سعد اني الطرف المسكين البرئ ..اللي مابطلع مني الغلط …لبيوم فقت كان البيت شرن على الاخر..مع اني كنت طول الليل انضف فيه …انا على طول عرفت انو بلووط ورا هالحركات..

#حسنية : بلوووط يا زفته شووهاد اللي عاملتيه هوون ..

#جمانة : والله لقيتك فاضية قلت اخليكي تنشغلي شوي ..

#حسنية : مافشرتي لحالك رح تنضفيه …

#جمانة : سوري اليوم بيبي سعد عازمني بمناسبة عيد زواجنا ويادوبي الحق روح على الكوافير ..بعدي هيك فايتة . اخد دوووش…

((تعرفوا شعور من تاكل شطة ..ويتشلفط عيونك وشفافك انا هاد الشعور حسيتو بكل فتحتات وجهي ..صارت الحمم البركانية تطلع من كل مكان ..حركة المياااعة وانها تميل على جنب قهرتني قهر ..ماعرفت شو اللي خلاني اتصرف وفووت على المطبخ واخد قلن الزيت وفوت غرفتها وما اترك تياب اللي سقيتهن زيت …وبعدها اطلعت على السقف وطفيت المي السخنة على البيت …من حرقة الدم ولعت معي …صارت بلوووط تصرخ حدا يفتحلا المي السخنة اي ما فشرتييا نعجة النعجااات ..طلعت تخووي من البرد لبرااا …وياحسرة ما كملت فرحتها كل لبسة كانت تلبسها كانت تطلع مبقعة …انا انشغلت بترتيب البيت لوقت ما اجا سعد مشان ياخدها ..شافها حالتها بالويل ..

#سعد : جماانة شووو صرلك ليش هيك حالتك ..

#جمانة : لك بكرهك من يووم ما اخدتك وانا ماني مرتااحة ..

#سعد : شو هالحكي …مو عيب ..اليوم عيد زواجنا ..

#جمانة : لا رح يكووون يووم طلااقنا رايحة احتفل فيه عند اهلي …اصطفل انت وتحسين اللي عندك ..

#سعد : عيب هالحكي اللي بتقوليه هاي حسنية ما اذتك بشي …ودايما حنونة معك ..

#جمانة : اي صح هاي شيطان ..مو عرفان شلون كنت متقبل وحدة بشعة متلها عندك ..يا انا ياهيه هوون ..يا بطلقها يا بطلقني

#سعد : لا خلص مارح اسمحلك هاي البشعة بقيت صاينة عشرتي عمر ..رغم اني ولا بيوم حسستها انها مرتي …او اهتميت فيها متل ما انا هلاء بهتم فيكي ..ورغم كل هيك كسرتها …والله مشان يعاقبني جملها وصارت احلا صبية لانها مظلوومة ..اللي بدك اياه اعمليه ..انا مرتي مارح اتركها…اذا حابة تبقي اهلا وسهلا مانك حابة الله معك ..

#جمانة : هيك لكان …اي الله معي سلام ..

(عند الباب كنت واقفة عم اسمع اطراف الحديث اللي انتهي بخراب بيتها لبلووط والله جاجة حفرت على راسها عفرت

#حسنية : طريق الوداود بلوووط رح نشتقلك ..الباب بفوووت جمل وبلوووط ..

#جمانة : حقيرة اشبعي بالاقرع ..

#حسنية : اكيد رح اشبع هههههه الله معك حاولي ارجعي لعنا ..

#جمانة : على مماتك ان شاء الله ..

#حسنية : بفرح امك …

((طبقت الباب وانا من الفرحة اللي خاطر اتحزم وانزل على الدقة ونص بس اجا سعد وعملت حالي حزينة ..على فراق الضرة اللعينة …ووبلشت احط بزق دمعات على عيووني ..

#سعد : حبيبتي لاتزيديها انتي كمان عليه ..ليه بتبكي ….

#حسنية : بعرف حالي بشعة بس هيك الله خلقني ..

#سعد : ياريت هالجمال اللي بالكون متل جمال روحك …بكفيني انك قدرتي ترجعيني للوجه الحلو هاد ..تعي اعطيني عبووطة …

#حسنية : انت بتحبني ..

#سعد : اي كتير بس عندي سؤال رح مووت واعرفوا ..

#حسنية : اسال سعودتي

#سعد :انتي شلون ماعدتي تشبهي تحسين ..

((#جمايكا شو اقلو والله ماني عرفاني ..خجلاني اصارحو وينصدم من تاني ويصيبو اسهال ليلي ويبهدلني …هو عندو فكرة انوالمرة من تطلق بتحلى …بس الموضوع انو تحسين حبيبي الله لايوطرزلوا دفع دم قلبو ليقلب سحنتي ..وهيني صرلي سنتين ونحنا كل ليلة لازم يسالني هالسؤال ..شلون ماعدت اشبه تحسين …يابنات دخيل رووحكن اعطوني سبب مقنع احكيه لابن المبرقعة … لان الموضوع بلش يتأزم وهاد هو السبب اللي خلاني اجي اسرد قصتي …بسرعة بدي سبب مابيخطر على بال الجن الازرق ..

#انتهت …

صباياا رايك

15 تعليقات
  1. ام همام :

    😂😂😂😂😂😂😂رووووووعه الله يفرح قلبك كريمة بتنزلي هالقصص بتغيريلنا جو النكد والملل
    يعطيكي العافيه حبيبتي

    1. كريمة جزائرية :

      الله يعافيكي يا رب

  2. 😂 😂 😂 😂 😂 😂 😂
    كتيييييييييير حلوة وبتستاهل الزوجة التانيه
    الله لا يقيمها

  3. ام يزيد :

    ههههه ضحكت والله من كل قلبي🤩🤩🤩
    سبحان الله ربنا بياخذ حق المظلوم ولو بعد حين 🥰
    يسعد قلبك حبيبتي بتفرحي قلوبنا على طول ♥️♥️

  4. ميس الريم :

    كثير حلوه ضحكت من قلبي يسعد قلبك على هالقصه 😍😍

  5. B :

    هههههه كتير حلوه

  6. 😋 :

    ممتعه.خلص بس احكيلو بدك العنب ولا تكاتل الناطور.وازا عرف الحقيقه مارح يخبرك مره تانيه. 😀

  7. 😋 :

    غلط.بدل يخبرك.يخسرك

  8. نهر الشرق :

    ياريت انحف ١٠ او ١٥ كيلو.. واشد وجهي شوية

  9. 🌹 ايمان 🌹 :

    تم الله يسعدك يا احلى واجمل كريمه 😍
    دايماا نزل هيك قصص

  10. ام محمد wwww :

    هههههههه حلوه القصه 😘

  11. آية :

    هههههههه حلوة حبيت كتير الله يسلم ايديكي

  12. أم الليث :

    قصة جميلة ورائعة ومضحكة حبيتها كثير🤣🤣🤣

  13. قصة طريفة جدا اسمتعت وضحكت كتير شكرا لكى

  14. ام عمر :

    كتير حلوة القصة يسلمو ايديكي 😍❤🌹

اترك رد

لن يتم نشر عنوان بريدك الإلكتروني.