مركز الكركدية ملكة تحضيرات رمضان

21 495
 

مركز الكركدية ملكة تحضيرات رمضان

مركز الكركدية ملكة تحظيرات رمضان

مركز الكركدية ملكة تحضيرات رمضان

مركز الكركدية ملكة تحظيرات رمضان , معكم صديقة زاكي الشيف الموهوبة ,

المقادير

  • ٦ اكواب سكر
  • ٤ اكواب ماء
  • كوبين كركدية
  • ربع معلقة صغيرة ملح ليمون
  • للنكهة :
  • اصنص جلاب
  • اصنص عطرية
  • او اذا ما تواجد عندك المنكهات هذه ممكن استخدام :
  • ماء الورد
  • ماء الزهر

الخطوات

السلام عليكم صديقاتي بمناسبة شهر رمضان مع دخول فصل الصيف اكيد بنحتاج عصائر كتير ويمكن تكوني مستعجلة ما تلحقي تعملي عصير سريع بسسسسسس اوعك تلجأي للعصائر الصناعية جبتلك طريقة الكركدية المركز رووووووعة انا بعملو بإستمرار بالصيف وبضل طول الشهر بحل منو وبنشربو منعش جدآ وللي ما بحب نكهة الكركدية بحب احكيلك مع المنكهات رح تحبي ورح يحبو الاطفال كمان ويلا يا ام حسن بلا رغي كثير حمستينا هاتي الطريقة بسرعة هههههههههههههههههه حسيت حالي متحمسة معكم ههههههه

اول شي بحط السكر والمي وبذوبهم مع بعض وبعدين بكون غاسلة الكركدية مزبوط من الاتربة والشوائب وبعدين بحطو مع السكر والمي وبحطو على الغاز حتى يغلي وبس يغلي بحطلو الملح ليمون وبخلي يغلي على نار هادية لمدة عشر دقايق لربع ساعة وبعدين بطفي وبتركو يهدا شوي وبجيب مصفى واسعة شوي وبصفي في المركز وبعدين بشيل الي طلع وبرجعو على الطنجرة وبحطلو لتر ونص مي وبغلي غلوة وبصفي وهاد بكون جاهز للشرب بنفس الوقت بكون محلى جاهز بس ضيفيلو المنكهات وخلي يبرد وتلذذي بالطعم

وهسة برجع للمركز بس برد شوي بصفي بمصفى ناعمة وبحطلو نص معلقة صغيرة من اصنص الجلاب ونص معلقة صغيرة من اصنص العطرية او ماء ورد وماء الزهر كمان كتير زاكي مع الكركدية وبحركهم منيح وبحطهم بقنينة نضيفة وما فيها اثر مي عشان يقعد معك اطول مدة لحتى يخلص وهو مثل ماهو ما بتغير طعمو ولا قوامو ولا بيخرب ابدآ وبحطو بالثلاجة لحين الاستخدام وهو يعني الفكرة متل مبدآ القطر الثقيل والقطر بتعرفي بقعد معك طول رمضان وما بصيرلو اشي وهاد نفس الفكرة

عند الاستخدام بحط ربع الكوب مركز وبزيد باقي الكوب ماء بارد واذا بتحبي حلو بتحطي ثلث الكوب مركز والثلثين ماء بارد وبالصحة والهنا على قلوبكم

ولا تنسوني من صالح دعواتكم بالأيام الفضيلة

ملاحظة:

هاي الكمية بتعملك لتر ونص مركز ولتر ونص من بقايا الكركدية للشرب للشرب بوقتو

وانا عايرت الكمية بمج الحجم الكبير وبهيك طلعت معي هالكمية يعني اذا استخدمتي اكواب اصغر رح يطلع الكمية اقل واذا استخدمتي الكوب اكبر بطلع معك الكمية اكتر وبس ان شاء الفكرة تعجبكم وتدعولي

21 تعليقات
  1. رذاذ المطر 💦💦 :

    يمممم مع اني ما احب الكركديه بس ان شاء الله راح اجربها بطريقتك يسلم هاليدين وصحتين وهنا

  2. 🦋ام سليم 🦋 :

    وعليكم السلام ورحمة الله وبركاته

    يمي يمي 😋 😋 😋
    تسلم الأيادي يا مبدعه
    ان شاء الله نجربها 🤗

  3. سماهر :

    الكركديه كتير زاكي بس اذا بدك فوائد الكركديه ما لازم تغليه بس انقعيه نقع وصفيه….لانو مع الغلي يفقد كتير من خصائصه العلاجيه المهمه وبتحول لعصير عادي.

  4. أم صبحي :

    ماشاء الله عليك يا أم حسن وعلى مشروباتك اللي كلها فخامة بنكهاتها المنوعة أممم يسلموا إيديك حبيبتي
    صحة وهنا 💞💞🌹

  5. هيام :

    ماشاءالله كتير طيب الكركديه الله يسلم دياتك ويعطيك العافيه

  6. تبارك الله عليك 😍😍 وصفاتك مفيدة جدا

  7. 🍒أم محمّد🍒 :

    يسلم ديااتك طريقه مفيده وراءعه وبالاخص
    برمضان صحه وعافيه يا رب

  8. فوفه🥀🥀 :

    يسلمو اديكِ.. رح اجربها ان شاء الله لانه ضغطي مرتفع هالايام

    1. الاء محمد :

      سلامة قلبك ام علي من كل شر

    2. ام همام :

      سلامتك يا عمري

    3. أم صبحي :

      حبيبتي من غير شر يصيب قلبك 🌹🌹

    4. 🍒أم محمّد🍒 :

      سلاامتك ام علي

    5. 🦋ام سليم 🦋 :

      سلامات ام علوش 😘

  9. nawal :

    بعشق العصائر بكل أنواعها بالأخص بشهر رمضان الله يعطيكي العافية ان شالله صحة وهنا😍🥰🌹

  10. الاء محمد :

    يسلم دياتك وصفتك رائعة و مفيدة كمان و بتختصر علينا في الوقت ان شاء الله رح اعملها و ادعيلك

  11. ام همام :

    يسلم ايديكي حبيبتي
    رح اجربها ان شاء الله
    جوزي وحماتي بحبو الكركديه رح اعمللهم اياه عطريقتك ان شاء الله
    😘😘😘

  12. 💖نور💖أحمد💖 :

    ياسلام عليكي يا أم حسن
    دايما بتنعشينا بهالوصفات اللذيذة😋
    الله يباركلك ويسلم ايديكي ياقلبي شكلو بشهي

  13. ريحانة🌿 :

    وعليكم السلام ورحمة الله
    تسلم ايدك حبيبتي
    وصحتين وهنا 🌹

  14. ام علاء ابو يحيى :

    تبارك الله من اطيب المشروبات الرمضانيه عدا عن فوائده الرائعه ربي يسقيك شربة ماء يا ام حسن من ايد سيدنا المصطفى لا تظمئي بعدها ابدا انتي وانا وكل من قرأ هذا التعليق وجميع الاخوات بزاكي وخارج زاكي

    1. 🍒أم محمّد🍒 :

      اللهم آمين 🌸

    2. 🦋ام سليم 🦋 :

      آمين يارب العالمين واياكي يا وردة 😚❤️

اترك رد

لن يتم نشر عنوان بريدك الإلكتروني.