البروفيترول الرائع سلسلة الوصفات التركية 4

43 3٬702
 

البروفيترول الرائع من سلسلة الوصفات التركية 4

البروفيترول الراااائع من " سلسلة الوصفات التركية" ♡4♡

البروفيترول الرائع من سلسلة الوصفات التركية 4

البروفيترول الرائع من سلسلة الوصفات التركية 4 , معكم صديقة زاكي الشيف الموهوبة , اليوم رح نعمل وصفة حلا عالطريقة التركية سهلة ورائعة وطعما كتير لطيف حلا البروفيترول بينعمل بشكل كرات وبيتقدم بشكل برج سواء صغير أو كبير حسب الطبق اللي رح تقدموه فيه ويلا نقول بسم الله ♡

المقادير

  • لصوص الشوكولاتة:
  • ثلث كوب حليب
  • ثلث كوب كريمة سائلة او منستبدلها بربع كوب حليب وملعقتين كبار قشطة
  • 150 غ قطع شوكولا سادة
  • ممكن تضيفولا ملعقة شوكولا دهن متل نوتيلا وعيلتها او بدون
  • لعجينة البروفيترول:
  • نصف كوب حليب
  • نصف كوب ماء وممكن استبدال الحليب بالماء أيضاً
  • كوب طحين
  • 100 غرام زبدة
  • ملعقة ص سكر
  • نصف ملعقة ص ملح
  • باكيت فانيليا
  • 4 حبات بيض صغيرة او 3 حبات بيض كبيرة
  • لكريمة الحشو
  • لتر حليب = 4 أكواب
  • 3 صفار بيض
  • 3 ملاعق ك طحين
  • 4 ملاعق ك نشا
  • نصف كوب سكر
  • باكيت فانيليا
  • باكيت كريما شانتيه بودرة

الخطوات

بسم الله الرحمن الرحيم

أول شي منحضر صوص الشوكولاتة

منسخن الحليب مع الكريمة السائلة او القشطة ومنقيمهم عن الغاز ومنضيف عليهم قطع الشوكولا ومنحركها لتدوب

بعدين منتركها لتبرد تماما ومنحطها بالبراد لوقت الاستخدام

رح يضل صوص رائع بتستخدموه لأي شي بيحتاج لصلصة شوكولا..

بالنسبة لتحضير عجينة البروفيترول منحط الزبدة والمي والحليب عالغاز ليسخنو ويوصلو لأول مرحلة الغليان منضيف الطحين ومنحرك لحتى تنفصل أطراف العجينة عن الطنجرة

رح نطفي ونتركها دقيقتين لتفتر شوي وتروح السخونة الزايدة منها ورح نضيف الفانيليا والبيض بالتتالي بيضة بيضة يعني مننزل أول وحدة ومنخلطها بالعجينة وبس تختفي مننزل اللي بعدها رح نحصل على عجينة طرية كتير

منحطها بجيب حلواني ومنشكلها كرات صغيرة بهالشكل ومنشويها على درجة حرارة 200 حوالي 15 ل 20 دقيقة حسب الفرن يعني لحتى تتحمر منيح ومنطفي الفرن ومنتركو مسكر وهنن جواتو حوالي عشر دقايق وبعدين منطالعها وبس تبرد منحشيها بالكريمة الخاصة..

لتحضير الكريما منخلط عالبارد الحليب مع الطحين والنشا وصفار البيض والسكر

ومنشغل النار تحتهم مع التحريك المستمر لحتى يسمك المزيج ويتماسك تماما منطفي ومنضيف عليه الزبدة والفانيليا

ومنتركو يبرد تماما

غطو الوعاء اللي رح تتركو الكاسترد فيه لحتى مايصير الو قشرة

سواء بغطا عادي او نايلون يلامس الكاسترد

لما يبرد تقريبا منضيف الكريما البودرة ومنخفقهم مع بعض

رح تحصلو على طعم رائع بهالخليط..

بعدين منحشي حبات العجين بهالكريمة وبعد مانحشي البروفيترول منحط بطبق التقديم من الكريمة ومنحط حبات البروفيترول المحشية عليها ومنرجع نحط طبقة كريما وطبقة كرات وهيك بالتناوب ليصير عنا برج كتكوت ههههه وهيك طريقة تقديمها هون عادة♡

ان شاء الله تجربوها وتحبوها وتضيفوها للمفضلة وتدعولي دعوة حلوة متل قلوبكم

43 تعليقات
  1. الاميره$ :

    شكلها حلو والتقديم حلو بس خطواتها كتير تسلم ايديكي

  2. 🍒أم محمّد🍒 :

    ما شاء الله عليكي نور ..وصفاتك حلوه كتير يسلموو اديكي ..

  3. om sham :

    ماشاء الله بتشهي

  4. آلاء محمد :

    يا عيني تسلم ايدك حبيتها وكمان بحب فيكي انك بتصوري كل خطوة وبتنزليها 🖒

  5. qamr :

    فنانه

  6. Om taleb :

    ما شاء الله بتجنن اذا شكلها حلو كيف رح تكون طعمها

  7. ام اصيل :

    ابدددداااااااااع نوووووور النوووواارة مش طبيعية صرت اعرف وصفاتك قبل ما افتحهم 😊

  8. . :

    نور
    حبي ألف صحه وهنا نوووور

  9. ام اس :

    ما شاء الله عنك مبدعة يعطيكي العافية حبيبتي 😘😘
    يسلمووا ايديكي والله المنظر رهيب 👍👍

  10. am Sara :

    تبارك الرحمن بجنن صحه وعافيه يسلم اديكي حبيبتي نور

  11. فاطمة..ام ملك.. :

    ماشاء الله
    حبيبتي نوور يسلمو ايديكي ياقلبي
    شكلها زاكية كثير❤

  12. ام معتز العسل :

    يسلمو ايداكي و يعطيكي العافية حبيبتي نور روعه ماشاء لله عنك الله يحميكي

  13. Ameena qadan :

    والله عرفت انه الوصفة الك
    عنجد ماشاء الله عنك ابدااااااااع وتالق

  14. ههههه. كلام الصبايا صحيح بنعرف انه الوصفه الك قبل ما نفتحها

    ابدااااااع… فن… ذوق… رتابه…. الله يحميك ❤️

  15. رشا رشا :

    ما شاء الله ابدااع متل العاده الله يباركلك يا قلبي
    يسلمو اديكي ويعطيكي الف عافيه حبيبتي نور 😘😍

  16. am Hall :

    ما شاء الله مرتب كتير شكلو بشهي يعطيكي الف عافيه يارب

  17. سوزان فلسطين :

    ماشاء الله نور يسلمو الايادي اشي غير شكل

  18. ام عمرو :

    المنظر لا يقاوم بس يا ريتني قريبة منك طعميني حبة 😭😭

  19. . :

    بانه
    ماشاء الله شيف مبدعه ومتآلقه

  20. 💖نور أحمد💖 :

    يسلمولييييي الحبايب ما احلى قلوبهم وكلامهم😍
    ربي يباركلي فيكم ومايحرمني منكم يا اميرات
    كلكم ذوق والله وبفرح كتير لما نول شغلة وشوفكم حابينها😄
    الاميرة حبيبتي جربيها رح تستمتعي بشغلها كتير
    بجوز لأني بفصل زيادة حسيتيها صعبة😄
    ام عبد الله ربي يكرمك على لطفك انتي وكل الصبايا كلامكم دايما محفور بقلبي❤

  21. 💖نور أحمد💖 :

    ههههه ام عمرو حبيبة قلبي الله كريم بيجمعني فيكي وطعميكي حبات مو حبة😁😙

  22. إم مصطفي 😉 :

    ماشاء الله شكلهااا بجنن 😍
    من أول ما فتت ع الوصفه حكيت من هالعسل إلي عملها روووعه بمعني الكلمه أبدعتي كالعاده❤👍

  23. ام وسام👣 :

    شكلهم زاااكي😍تسلم دياااااتك😍😍

  24. 🍓فيفي🍓 :

    يا عيني يا عيني يا نور
    انا بموت فيه وكثير بعمله وبخفق الكاسترد مع نوتيلا جربيها ورح تصيري متلي 😉

  25. غدير☕☕💖💖 :

    ابداع والله كأنا عم ناكلها صح..احسنت

  26. جزائرية وافتخر :

    ماشاء الله نور كثير عجبتني

  27. جزائرية وافتخر :

    نور قولي كم وزنك مع اكلاتك هذه اكيد رشيقة

  28. ريحانة🌿 :

    بسم الله ما شاء الله لا قوة إلا بالله 🌺🍃
    ربي يحفظك يا صغيرتي💗
    انت بعمر ال٢٥ بطلع معك هذا التألق وهذا الإبداع! بعمر ال٣٥ يا ترى وين رح يكون إسمك؟
    الله يبارك بعمرك ويعطيك الصحة والعافية ويديم عليك هالنعمة🌷
    “ذلك فضل الله يؤتيه من يشاء”

  29. ام العز :

    شكله بشهيييييييي 😥

  30. 💖نور أحمد💖 :

    حبيبتي ام مصطفى ربي يخليلي ياكي من بعض ماعندكم يا ملكة😄
    ام وسام حبيبتي تسلميلي😘
    فدااااء ياغالية اشتقتلك كتير ليش مابقى طليتي علينا؟؟ طمنيني عنك ياقلبي
    ماتخافي على كروشتي مجربتا وبموت عليها هههههه بس حبيت قدمها متل مابيعملوها الاتراك ولتخفيف المكونات
    بما انو النوتيلا زيادة 😄
    غديييير حبيبتي ان شاء الله بترجعي لتركيا وبتاكليها عن حق وحقيق😀
    جزائرية حبيبتي كلك زوق والله ورأيك بفرحني😙
    وزني حاليا بحدود 65😁 طبعا الحلويات كالعادة مخربتلي كل الريجيم هههههه
    ام العز الله يسعدك كلك زوق😙

  31. 💖نور أحمد💖 :

    اما انتي يا ام عبود ياريحانتي الغالية ف بدي قلك اني بعمر ال35 بتمنى وبدعي لربي كون متلك بس❤
    ربي يكرمك ويرزقك سعادة الدارين متل مابتسعديني بمشاعرك الرقيقة وكلماتك الطيبة😘

  32. اولادي سعادتي :

    بتششششهي كتييير تشبه حلو الكروكمبوش 😍😍😍 تسلم ايدك ما شاء الله تبارك الله عنك روووووعه ياعسل العسولات😘😘😘

  33. ام علاء ابو يحيى :

    بسم الله ما شاء الله تبارك الله استودعتك لله انت وكل المبدعات في كل مكان الله يحميك حبيبتي بتشهي الوصفه ربنا يرفع قدرك ويبارك بعمرك

  34. لين :

    نور النواره وهل يخفى القمر وصفاتك الها جاذبيه بتنعرف مباشره تبارك الله ماشاءالله عنك فنانه ومبدعه كالعاده😘💝🌺

  35. 💖نور أحمد💖 :

    تسوووو يا قمرة اشتقتلك
    كيفك حبيبتي؟ انتي العسل والقشطة والله ههههه😙 اي بتشبها ياعيني عليكي
    ام علااااء حبيبة القلب واياكي ياحنونة
    ربي مايحرمني منك 😘
    لين ياقمرة خجلتيني والله وشهادة مبدعة متلك بفتخر فيها ياقلبي
    كلك زوق حبيبتي 😘

  36. غير معروف :

    نور فينا نضيف البيضة او بيضتين كاملة بالحشوة
    تسلم ايدك

  37. داليا-الحربي :

    بسم الله ما شاء الله فنااااانه بكل معنى الكلمة ارحمينااا يا نور روجيم السنه هاي فرط 😂😂

  38. عطر 💖 :

    أسأل الله يحفظك ع الإبداع اللي بتقدميه وان شالله كل وصفه بميزان حسناتك يارب

  39. القدس عربية :

    بسم الله ماشاءالله عنك فنانه الله يسعدك يارب ويزيدك علم ونور

  40. 💖نور أحمد💖 :

    الاخت بدون اسم اذا حبيتي تضيفي بيض كامل حطي وحدة بس
    اساسها تكون بصفار البيض ومشان مايطلع زنخة
    انتي يوم اللي بدك تعمليها استغلي بياض البيض بأكلة معجنات مثلا
    انا دايما هيك بعمل
    باخد بياض البيض للعجين لما اعمل اكلة حلو بدها بس صفار😅
    خبريني شو بصير معك حبيبتي

  41. 💖نور أحمد💖 :

    القدس عربية وعطر تسلمولي يارائعات كلكم زوق حبيباتي😘😘
    داليا يا عسولة يسعد هالطلة شو اشتقتلها😄
    بعض ماعندكم يامبدعتنا الحلوة😙
    ريجيمي انا اللي فارط وهربان مني😅

  42. أم جنى :

    الحمد لله أن صحلي شوف الوصفات لأن تأخرت بسبب ظروف النيت .ماشاء الله الله لا يحرمنا من ابداعاتك ويعطيكي الف عافية ع ما تقدميه النا. ع المفضلة مباشرة

  43. 💖نور أحمد💖 :

    الله يعافيكي ويخليلي ياكي يا اختي الحلوة😙
    مو مشكلة ياقلبي مو بيناتنا ومكانك بالقلب دايما محفوظ ❤

اترك رد

لن يتم نشر عنوان بريدك الإلكتروني.