نوجا ومنها رح نطلع حلوى المن والسلوى حلويات ولا اروع سلسلة وصفات التوفير 18

31 8٬009
 

نوجا ومنها رح نطلع حلوى المن والسلوى حلويات ولا اروع سلسلة وصفات التوفير 18

نوجا ومنها رح نطلع المن والسلوى حلويات ولا اروع سلسلة وصفات التوفير

نوجا ومنها رح نطلع حلوى المن والسلوى حلويات ولا اروع سلسلة وصفات التوفير 18

نوجا ومنها رح نطلع حلوى المن والسلوى حلويات ولا اروع سلسلة وصفات التوفير 18 , معكم صديقة زاكي الشيف الموهوبة ,أم جاسم

المقادير

  • 2 كوب سكر
  • ربع كوب ماء
  • ربع م.ص ملح ليمون
  • كوب جلوكوز
  • كوب عسل ممكن استبداله بكوب جلوكوز ثاني
  • بياض بيضتين
  • رشة ملح
  • م.ص فانيلا
  • برش ليمون
  • مكسرات حسب رغبتك محمصة
  • ملعقة سمنة مذابة
  • نشا
  • طحين

الخطوات

السلام عليكم ورحمة الله وبركاته

نزلت قبل هيك المن والسلوى وحكيتلكم انها طلعت طرية شوي وكانت بدون عسل ، هالمرة جربتها بالعسل وطلعت رووووووعة بمعنى الكلمة، هلا سبب نجاحها اكثر هالمرة مش العسل وانما مدة نضج القطر عالغاز المفروض ما تقل عن 17 دقيقة عشان تطلع نوجا متماسكة وممتازة ونفس العجينة هيه بتطلع اصلا نوجا واذا ضفنالها نكهة الهيل المطحون بتصير المن والسلوى.

واخترتلكم كاسات الكل بعرف قياسها عشان النتيجة تطلع وحدة وناجحة بإذن الله.

وقبل ما أبدأ بدي أشير أنه الجلوكوز أنا عملته مسبقاً بتقدروا تشوفوا الوصفة هنا

أولاً/ القطر

بنحط كاستين سكر عليهم ربع كاسة مي وبنحركهم شوي قبل مانحطهم عالغاز.

بنحطهم على الغاز نار متوسطة وبنحسب 17 دقيقة من البداية .

بنجهز مي وفرشاية وبننزل بالفرشاة المبلولة اي سكر عالق على جوانب الطنجرة عشان ما يسكر معنا وبنحط رشة ملح ليمون بين اصابعنا بس لا نزيد بصير حامض او ملعقة عصير ليمون بصير.

— بنضيف كاسة الجلوكوز الان وقبل الغليان

—بنضل نحرك شوي وننزل السكر بالفرشاة لحد مايغلي بنوقف تحريك ومسح.

— بعد الغليان بنضل نتفقدها بعد عشر دقائق بنبلش بالاختبار اللي هوه ناخذ نصف ملعقة صغيرة من القطر وبنزله بمي باردة لازم يتكون عندي قطعه متماسكه مطاطية اذا تركتاها شوي بتجمد وبتنكسر كسر.

—اذا ماتكونت بخليه يغلي وبختبره كل شوي.

— بعد نضوج القطر بضيف كاسة العسل وبخليه يغلي مع بعض كمان 5 دقايق، بالتزامن مع خفق البيض.

ملاااحظة هامة/

اللي مابحب طعم العسل ممكن يستبدله بنفس الكمية من الجلوكوز ، لانه طعم العسل ظاهر ممكن يزعج، وبيعطي لون بيج للعجينة مش ابيض.

يعني بصير كمية الجلوكوز نفس كمية السكر كاستين سكر وكاستين جلوكوز وبدون عسل.

ثانياً/ البيض

عند انتهاء ال 17 دقيقة بنشغل الخفاقه عالبيض مع رشة ملح وفانيلا مدة 5 دقائق اللي هيه مدة غليان العسل عالقطر .

—لازم يتزامن غليان العسل عالقطر مع خفق البيض.

— بعد الخمس دقائق رح يكون نافش البياض ومتماسك لازم نقلب الجرن ما يتحرك البياض منه.

بنجيب القطر وهو سخن مولع بنزله خيط عالبيض والخفاقة شغاله على ثلاث دفعات بنزل دفعه وبنستنى تنخفق شوي وهكذا.

— بعد اكتمال كمية القطر كلها بنترك الخفاقة شغالة لحتى يبرد الجرن تحسيه بايدك يكون حرارته زي حرارة الجسم ممكن تاخد 10— 12 دقيقة خفق.

ثالثاً/ المكسرات والنكهه

العجينة اللي جهزت هيه عجينة مشتركة للنوجا باضافة برش الليمون ، وكمان بتاخدي نصها وبتضيفيله هيل بصير المن والسلوى الفرق بينهم النكهه فقط.

— قبل اضافة النكهه ضيفي باخر عملية الخفق ملعقة سمنة مذابة ولكن مش سخنة بتلم معك العجينة وبتسهل علينا اخراجها من الجرن لانها دبقة.

— بنضيف مكسرات حسب رغبتنا لازم تكون محمصة بتجيبيها نية وبتحمصيها بقلاية ناشفه عنار خفيفة، ممكن لوز ممكن فستق حلبي ممكن بندق ممكن فول سوداني حسب رغبتك بتحطي والكمية كمان حسب الرغبة، ولو ماحطيتي بالمرة مكسرات نكهة العجينة اروع من الروعة.

ملاحظة مهمة/

عند اضافة المكسرات غيري مضرب الشبك بمضرب الكف لانه ممكن ينكسر من المكسرات. او بالملعقة قلبيهم.

رابعاً/ مد المزيج وتبريده

طبعا عندك عجينة مطاطية شو مااحكي مارح اوصفها كثير ناجحة ومتماسكة قسمتها قسمين

— قسم النوجا عملته عشكل رول ودحرجته باللوز المطحون واللف بكون اديكي مدهونين سمنة وعلى سيليكون او ورق زبدة او كيس نايلون مدهون.

—قسم المن والسلوى فردته بعلبة مستطيلة فيها ورقة زبدة وممكن نايلون تغليف كمان عادي لانها بتلزق.

— افرديها بايدك بسرعة واضغطي عليها لحتى تمد معك لانها متماسكة ورائعه وزيديها رشة هيل.

خامساً/التقديم

قطعي النوجا دوائر وغبريها بالنشا .

شكلي المن والسلوى قطعي منها واعمليها كرات غير منتظمة وغبريها بخليط نشا وطحين.

ملاحظة: انا عملت نصف المقدار بالصور

ملاحظة التوفير/
بتقدري تعملي النوجا الشهية بأقل تكاليف برشة لوز بدينار او فول سوداني او بدون مكسرات بالمرة ، وبالنسبة للعسل استبدليه بالجلوكوز وأظن مافي اخف من هيك تكاليف بالنسبة للجاهز.

عرض التعليقات (31)