طريقة عمل الشيش برك بطريقتين ولا ألذ

40 9٬911
 

طريقة عمل الشيش برك بطريقتين ولا ألذ

ششبرك بطريقتين ولا ألذ

طريقة عمل الشيش برك بطريقتين ولا ألذ

طريقة عمل الشيش برك بطريقتين ولا ألذ , معكم صديقة زاكي الشيف الموهوبة , اليوم رح نعمل ششبرك ومين مابحب الششبرك بس يقليييي هههه رح نعملو بطريقتين الأولى باللبن وهية المتعارف عليها والتانية جديدة بس طعمتها لذييييذة رغم بساطتها ويلا نبلش بالمقادير

المقادير

  • عجينة الششبرك عبارة عن:
  • كوب ماء
  • ملعقة صغيرة ملح
  • ملعقتين كبار زيت
  • طحين حسب الحاجة
  • للحشوة:
  • لحمة ناعمة
  • بصل مفروم ناعم
  • ملح
  • فلفل أسود
  • رشة قرفة
  • رشة هيل
  • مقادير صلصة اللبن:
  • كيلو لبن
  • بيضة
  • ملعقتين كبار نشا
  • ملح
  • كزبرة خضرا مفرومة ناعم (طبعا كالعادة مفقودة عنا ههههههه)
  • مقادير صلصة البندورة:
  • دبس بندورة
  • ملح
  • فلفل أسود
  • رشة فليفلة حمرا مجروشة
  • لهون فينا نكتفي وبتطلع لذيذة بس في إضافات رائعة معها للتجديد -انا عملت السادة وانتو الكم حرية الاختيار-:
  • فطر اختياري
  • ذرة اختياري
  • بقدونس او كزبرة اختياري

الخطوات

☆بسم الله الرحمن الرحيم☆

أول شي منجهز الحشوة..

مندبل البصل بشوية زيت ومنضيف عليه اللحمة ومنقلبهم مع البهارات ليستوو ومنلحشهم على جنب ليبردو ههههه

ومنجهز العجينة بس منحط المي والملح والزيت مع بعض ومنضيف عليهم الطحين بالتدريج ومنعجن لنوصل لعجينة متماااسكة.. (انا وعم اعمل العجينة اكتشفت انو الطحين الابيض بح خلص فكملت بالأسمر وتستمر الطبخة بدون منغصات ههههه)

هلأ بقى حان وقت الانطلاق

منشكلهم بالشكل اللي حابينو

غالبا الشكل التقليدي للششبرك هنن هالشكلين

بس بالله عليكم لا تدققو على حجم الحبة لأنو الحجي عندي مابحبها إلا قد راسي ههههه..

بعد ما نشكل حبات الششبرك مندخلهم على فرن حامي ويادوووب قبل ما يبلشو يتشقرو فورا منطالعهم..

هلأ بقى منجهز صوص اللبن منخلط مكوناتو كلا عالبارد وبعدا منشغل تحتهم ومنستمر بالتحريك ليغلي اللبن مننزل حبات الششبرك ومنخليهم يغلو مع بعض ليتسبك كل شي مع بعضو وبالأخير منطفي ومنضيف الكزبرة الخضرا المفقودة ماغيرا ههههه

ياجماعة اللي زارعة كزبرة تصدرلنا شوي يرضى عليكم

انا قبلانتها بدل باقة الورد هههههه

وهيك ششبرك اللبن تبعنا صار جاهز..

اما بالنسبة للتاني منحط المي مع دبس البندورة والبهارات عالغاز واذا حبينا اضافة تانية كمان منحطها

وبس يغلو منحط حبات الششبرك ومنغليهم شوي

وبدي الفت نظركم انو هي مو بتخلوها تكون مرقة سائلة

لا لازم يكون صوص البندورة سميك شوي يعني ماتكترو مي خلوهم على قد الششبرك

من كتر ماكتبت ششبرك حسيت رح يطلعلي شي جني لا سمح الله هههههه

جربوها ونادولي دوق قصدي ودعولي بالبركة حبيباتي ههههه

بحبكم اناااااا وأستودعكم الله♡

عرض التعليقات (40)