img
الرئيسة / كيكات / سلسلة صحتي في غذائي كب كيك خالي من الجلوتين وبنفس الطعم الرائع

سلسلة صحتي في غذائي كب كيك خالي من الجلوتين وبنفس الطعم الرائع

/
/
/
1253 مشاهدات

 

سلسلة صحتي في غذائي كب كيك خالي من الجلوتين وبنفس الطعم الرائع

سلسلة صحتي في غذائي كب كيك خالي من الجلوتين وبنفس الطعم الرائع

سلسلة صحتي في غذائي كب كيك خالي من الجلوتين وبنفس الطعم الرائع

سلسلة صحتي في غذائي كب كيك خالي من الجلوتين وبنفس الطعم الرائع, معكم صديقة زاكي الشيف الموهوبة ,

المقادير

  • 2.5 كوب طحين خالي من الجلوتين
  • كوب سكر
  • كوب حليب سائل
  • كوب زيت ذرة
  • 4 بيض
  • 1 م.ص فانيلا
  • برش برتقالة او ليمونة
  • 2 م.ص بيكينج باودر
  • ربع م.ص كربونة
  • للتزيين
  • صوص الشوكولا بديل نوتيلا
  • الصوص الأبيض

الخطوات

السلام عليكم ورحمة الله وبركاته

حبيت ابدأ معكم سلسلة من الوصفات الخاصة بمرضى حساسية القمح حتى يستفيد منها شريحة يمكن مش كثير ناس بتعرف عنها او حاسه فيها وبمعاناتها ، يمكن مايكون حد بزاكي عنده هاي الحساسية بس ربما يستفيد منها اي عابر سبيل .

بس قبل الوصفة بحب احكي نبذة صغيرة عن حساسية القمح او السلياك وهوه تلف بصيب الامعاء الدقيقة بسبب عدم تحمل الجسم لمادة الجلوتين الموجودة بالقمح والشعير والجاودار وبتدخل بكل شي تقريبا من صلصة البندورة للكاتشب للسكاكر والحلويات والخبز طبعا واي شي بطحين القمح الابيض او الاسمر وبالشيبس والبسكويت والشوكولا والمعجنات وكل شي تقريبا حتى التوابل والبهارات. حتى ادوات المطبخ لازم تتغير لانه بكون فيها اثار من الجلوتين.

ف بهاي السلسلة رح اقدم وصفات ان شاء الله تكون مفيدة . وقطعت على نفسي عهد انه ما ينحرم ابني من اي شيء نفسه فيه واعمل كل جهدي اوفرله كل الاصناف اللي متعود عليها ادعولي بالقوة انه اقدر اعمله كلشي ويزبط معي لانه الشغل بطحينهم صعب شوي.

ملااااااااحظة مهمة جدا

للاشخاص الاصحاء فقط استبدلي الطحين الخالي من الجلوتين بطحين أبيض عادي لتطبيق الوصفة.

أولاً/ خليط الكيك

بنضرب الزيت والسكر كويس وبنضيف البيض بيضة بيضة كل ماتختفي بيضة بنضيف بيضة مع الفانيلا وبرش البرتقال.

—بنضيف الحليب السائل دفعه واحدة وبنخلط

—اخر شي الطحين الخالي من الجلوتين وهو بتكون من طحين رز ونشا وصمغ الزانثان وممكن طحين الذرة او التابيوكا واضافات مختلفة.

—بنخلطه كويس بس مانبالغ بالخلط.

—الخليط جاهز

ثانياً/ الخبز

—بنقسم الخليط قسمين بنوزع قسم على صواني كب كيك وزاد معي شوية خليط صبيته بعلب جبنة فيها ورقة كب كيك وطلعوا روعة.

—النصف الثاني بنضيفله ملعقة كبيرة كاكاو وبنخلطه عالسريع وبنصبه بأي قالب بدنا ياه.

— بنخبزهم في فرن محمي على حرارة 180 لمدة 20 دقيقة تقريبا وبنختبر الاستواء بعود خشبي.

ثالثاً/ التزيين والتقديم

—للكب كيك زينتهم بالصوص الابيض وموجوده طريقته بملفي على زاكي.

—كيكة الشوكولا زينتها ببديل النوتيلا وموجود طريقته بملفي برضه.

رابعاً/ الطعم

طعم الكيك رااائع جدا نفس طعم الكيك العادي ولا في اختلاف.

وصحة وهنا

ملااااااااحظة

هاي الوصفة وغيرها من الوصفات كانوا مشاركة لإبني ببازار بالمدرسة فحبيت يكون اله وجود ويشارك بأكله الخاص لانه مابقدر يشتري من المدرسة اي شيء الصور بالاخر كانت مشاركته.

90 تعليقاً

  1. اولاا الله يجزيكي كل خير جوز أختي هيك معو حساسيت قمح كتير بحب اكلات وحلويات وهي ما بتعرف تعمل فأذن محروم منها تنين كتير عجبني الكب كيك بشهي وريتو صحه وهنا يارب على قلب ابنك والله يشغي وتشوفي باعلى المراتب تلات انتي مجهزة كل هاي صفرا الي بلمدرسه والله انك معدله وروعه اسم الله عليكي تبارك الحمن الله يحميكي يارب ويجزيكي الخير على كل شي بتقدمي النا 😘😘😘😘😘

  2. روووعه حبيبتي ام جاسم الله يحفظلك ابنك ويشفيه ويعافيه ويقدرك على عمل كل شي ابنك نفسه فيه ماشاءالله عنك انتي قدها وقدود وما بنخاف عليكي الله يقويكي ويعطيكي الصحه والعافيه 👍😘🌷

  3. حبيبتي ام جاسم الله يجزيكي كل خير يارب ويشفي ابنك وكل مرضى المسلمين يارب
    بس بدي اسألك سؤال هلأ انتي كيف اعرفتي انو ابنك معو تحسس لانو بنتي الها فترة بتضل تحكيلي بطني بوجعني ممكن اعرف الأعراض اخذت بنتي ع الدكتور وعملولها تحاليل بس لسا ما طلعت ممكن اتفيديني

    • واياكي هبوشة
      اعراض الحساسية صعبة التشخيص كل شخص اعراض شكل في ناس وجع بطن مع اسهال اجلكم الله ، في انتفاخ كبير بالبطن ،
      ابني ماكان عنده اعراض خارجيه نهائيا كان فقط دمه دائما ضعيف 9 ووزنه ما بزيد وعملناله فحوصات متعددة تبين انها حساسية قمح.

      بإمكانك تطلبي الفحص من الدكتور انتي وتطمني .

    • والله يا هبوش ولادي التنين هيك ..الهم سنه دايما يحكو بطني بوجع عملنا فحوصات كاترة اطفال وعام وحتى جراحه اذا فتاق ..وصور للبطن ومافيهم شي .

      الله يشافي بنوتك ويشافي اطفالي واطفال ام جاسم وجميع اطفال المسلمين يارب العالمين ⁦❤️⁩

    • حبيبتي ام جاسم ان شاء الله مايكون عندها لانو بنتي وزنها من سنة نفسو ما زاد بالمرة اعملتها فحوصات شاملة كل شي ما طلع شي وحكالنا الدكتور انو انراقب وزنها ٣ شهور اذا ما زاد نعملها حساسية القمح فحص وان شاء الله ما يطلع عندها لانو هي بس تاكل بتضل تحكي بطني بوجعني

    • حبيبتي ام آدم
      امين يا رب العالمين
      بس انا بنتي عمرها ٤ سنوات وزنها ١٣ كيلو ودمها ممتاز بس هي كتير نحيفة مع اني مهتمة كتير بأكلها وبنوعلها كل شي وبعطيها فيتامينات
      أن شاء الله ما يطلع عندها والله اتعبت معها اعملتها كل الفحوصات الي بتخطر ع بالك كبد وحديد وغدة وكل شي وكلو طلع منيح بس هلأ اعملتها عن التحسس لانو الدكتور حكا اذا ما بزيد الوزن بكون في شي واعملنالها وان شاء الله خير

    • ربي يشافي اولادكم وابني يارب ومش غلط والله نعمل فحص الحساسية بتطمني هبوشة.
      وانتي كمان ام ادم والله صايرة منتشرة الحساسية وان شاء الله ما بطلع عندهم.

  4. ما شاء الله عنك ام جاسم يسلم دياتك ،,,الله يشفيلك ابنك ويديم عليه صحتو وعافيتو 💋💋💋💋 لا ابنك ،،،شو اسمو ابنك عشان نبعتلو بوسات كتير 🤗

  5. تبارك الرحمن ،، الله يشفيلك ابنك ياام جاسم ويحميلكياه هو واخوانه ويبارك فيهم ويباركلهم فيكي ،،، مباشرة نسخة الطريقة لأختي مع انها بتعمل كلشي لبنتها بس مش غلط تستفيد اكثر من ابداعات ماشاء الله عنك الله يعطيكي العافية ام جاسم ❤

  6. ما شاء الله تبارك الله 😍😍 فكرتك بتجننن لعمل هالطاولة لتبيني للاصدقاء طفلك عن مفهوم الحساسيه من القمح …ربي يشافيه ويعافيه ويردلو صحتك يارب العالمين⁦❤️⁩

    ويسلم دياتك ويخليك لابنك ويقدرك يارب العالمين⁦❤️⁩

  7. والله انك اروع ام يا ام جاسم والله
    يحميلك جواد وتشوفيه بأعلى المراتب والله زاد اعجابي واحترامي وتقديري الك لأنك انسانه رائعه وام اروع وشكرا من قلبي ع كلشي بتقدميلنا اياه

  8. بيم الله ما شاء الله تبارك
    الرحمان شي فاخر الله يسلم هالديات ويحفظك لاولاد حبيبتي ويحفظهم الك ويشافي ابنك ويعافيه وتشوفيه دكتور كبير ذكرني ببنت صاحبتي كان معها تخسس من القمح في البدايه تغلبو شوي وبعدين تعودت على نظام معين من الاكل وهيها طبيبة اسنان وام لطفلين عقبال عند ابنك زيها يا رب ويحفظها لاولادها

  9. ما شاء الله تبارك الرحمن ابدااع وتميز بلا حدوود
    اللهم بارك
    يسلمو اديكي شيف ام جاسم الله يقدرك ويكون معك ويشفيلك ابنك يا رب انتي ان شاء الله قدها وقدود الله يخليكي لعيلتك ويباركلهم بلمساتك الذهبيه 😍😘😍

  10. الله يقويكي ويقدرك على تلبية كل اشي ابنك نفسه فيه ويشفيلك اياه واتشوفيه في أحسن المراتب أن شاء الله.
    وابدعتي في الوصفات

  11. ما شاء الله اللهم بارك ابدعتي بكل اتقان صدقا ما في كلام بوصف ابداعك 👏👏👏👏😇😇😇😇
    اللهم بارك حبيبتي الله يحميكي لعيلتك ❤
    ويشفيلك ابنك يا رب بشهر الفضيل وما يشوف شر 💖
    يسلم ايديكي وصحة وهنا 😘

  12. ماشاء الله اللهم بارك كل وصفة أروع والذ من التانية وفعلاً شكلهم بشهي😍
    أول شي ربي يعافيلك الأمير جواد وتشوفيه من زينة الشباب يارب
    تاني شي الك مني كل الاحترام والتقدير لهمتك العالية وتعبك لحتى ماتحرمي ابنك من شي
    الله يقويكي ويهني اهل بيتك بأم رائعة ومخلصة متلك ياقلبي والك منا كل التشجيع🌹
    الله يجزيكي كل خير على مشاركتنا بهالسفرة الرائعة وأعتقد في كتيرين رح يستفيدو منها
    بميزان حسناتك ان شاء الله😘
    أحبك في الله عزيزتي❤

  13. لولو

    ماشاءالله كلو ابداع بشهي
    تسلم ايديكي حبيبتي ام جاسم
    الله يحفظك لاولادك ويحفظهم الك
    رينا يشافي ابنك ويعافيه ويقويكي ويقدرك على ان تعملي كل شي بناسب صحتو
    وان شاءالله أجر وثواب الك ولأبنك

اترك تعليقاً

لن يتم نشر عنوان بريدك الإلكتروني.