img
الرئيسة / سلطات و مقبلات / فلافل محشية بالفرن صحية وطعمها ولا أروع ملكة الإبداع

فلافل محشية بالفرن صحية وطعمها ولا أروع ملكة الإبداع

/
/
/
1855 مشاهدات

 

فلافل محشية بالفرن صحية وطعمها ولا أروع ملكة الإبداع

فلافل محشية بالفرن صحية وطعمها ولا أروع _ملكة الإبداع

فلافل محشية بالفرن صحية وطعمها ولا أروع ملكة الإبداع

فلافل محشية بالفرن صحية وطعمها ولا أروع ملكة الإبداع , معكم صديقة زاكي الشيف الموهوبة , مرحباااااااا يارب يكونو حبايبي بأحسن حال عم اكتبلكن ومستعجلة كتير بدي روح حط فطور وورايي عشرين شغلة بقى كل وحدة تشمر وتجي تستلم مهمة وانتي بالذات أم آدم بدي كلفك بالأشغال الشاقة لحتى تبطلي تناديني نونا المجنونة هههههههههه حولو معي نشوف وصفتنا لليوم وبعدها بتبلش الفزعة هههههه

المقادير

  • نصف كيلو حمص منقوع ليلة كاملة ومغسول ومصفى
  • ثلث باقة بقدونس
  • بصلة متوسطة
  • 5 سن ثوم
  • ملعقة كبيرة سمسم
  • ملعقة صغيرة كربونة + نصف ملعقة صغيرة بيكنغ باودر
  • ربع ملعقة دبس فليفلة حارة (اختياري)
  • البهارات:
  • ملح
  • نصف ملعقة صغيرة بابريكا
  • ملعقة كبيرة كزبرة يابسة
  • نصف ملعقة صغيرة كمون
  • للمزيد من القرمشة فينا نحط وهي سر أغلب الفلافل الجاهزة المقرمشة كتير:
  • ملعقة كبيرة خبز يابس مطحون (اختياري)
  • للحشوة:
  • بندورة مفروم ناعم
  • خيار مفروم ناعم
  • مخلل مفروم ناعم
  • بقدونس مفروم ناعم
  • سمسم
  • سماق

الخطوات

☆بسم الله الرحمن الرحيم☆

♢ أول شي منطحن الحمص مع الخضار عالناااعم على ماكينة الكبة وبعدا منضيف عليهم البهارات والسمسم و(الخبز ودبس الفليفلة لو حبينا) ولو لقينا الخليط ناشف زيادة ممكن نرش عليه شوية مي ونرطبو

♢ أما الكربونة والبيكينغ باودر فمنحطهم قبل القلي أو الشوي بربع ساعة

♢ هلأ بقى اذا حبينا نقلي منسخن الزيت وبعدا منبلش نشكل ونحط بالمقلاية ومنوطي النار للوسط ليستوي ويضل مقرمش من برا (كراش كراش ^_^) هي صوت القرمشة هههههه

♢ أما بالنسبة لوصفتنا اليوم فرح نختار قالب غير لاصق بس أنا ماعندي حجم صغير فحطيت ببايركس عادي..

منحط ملعقة زيت بالجاط ومنفرد طبقة من عجينة الفلافل من تحت وعالجوانب بعدين منخلط مكونات الحشوة ومنحشي فيها

ومنغطيها من فوق بعجينة الفلافل كمان ومندهن الوش بملعقة زيت ومندخلها الفرن لحتى تتشقر شوي من تحت ومن الجوانب ودوقو أطيب فلافل صحية ومحشية وبتاخد وقت أقل بالتشكيل

ملاحظة :

♢ وضع السمسم بقلب العجينة بيعطيها طعم أطيب

♢ لو حبينا منقدر نفرز الخليط بالفريزر بدون الكربونة والبيكينغ باودر وأنا بهالوصفة مشتغلة بعجينة مفرزة لهيك مو مصورة خطوات الطحن بس حبيت شارككم بفكرة الفلافل المشوي وبكل الأحوال مو محتاجين تصوير خطوات

كلو عالهرس والمعس وبس ههههههه

يلا أنا رايحة اركض ورا الأشغال وانتو خليكن مستمتعين بالفلافل السخنة يابعدي ههههه

لاتنسوني من دعواتكم الحلوة وبحبكم كتيييير انا

133 تعليقاً

  1. يسعد صباحك يارب ……طريقتك مرتبه واكتر شي عجبني الحشوه اول مره بمر عليه احشي خيار ومخلل بس منك اكيد اكيد زاكي ….بحبو قلي عشان القرشه …..ربي يعطيكي الصحه والعافيه ويديم عليكي نعمو…….

  2. ماشاءالله تبارك الله
    الله يسعد صباحك وعمرك
    وصفة تفتح النفس وتحترم الأذواق والصحة وفيها تغيير ولمسات إبداعية وتطبيقها سهل وعملية باالنسبة للحشوة بنظري مثالية جداً أكلت طعمية من أماكن متعددة والله اهانو تاريخها بحشوات غير مناسبة وتطبيق سيء حتى يأست منه كنت اسويها باالبيت لكن حاليا لا
    بمكان واحد اقتنعت اكل منه فية فرع لشركة أردنية ماشاءالله يظبطوها
    ويبقى شغل البيت مابعدة
    الله يبارك لك بكل شيء تحبية أختي نور الغالية
    وأتمنى وصفاتك ماتنقطع من أي مسابقة لأنها تعلي قيمة المسابقة .

  3. ازكى اشي بالعالم الفلافل الله عليكي يا نور يا نوارة
    المنظر بشهي .. الله
    تسلم دياتك يا شطورة
    ذكرتيني بفلافل الاردن 😢
    شو بشهي يا نور خصوصا الفلافل المحشي بصل وشطة و

  4. الله عليكي يا نور ازكى اشي بالعالم الفلافل ..
    ذكرتيني بفلافل الأردن ما اشهار خصوصا الفلافل المحشي بصل وشطة حمرا الله الله هون بقطر في فلافل بس طعمه مو فلافل ههههه
    .. بتعرفي ذكرتيني كمان بشيف كان ييجي على فتافيت اسمه جيمي اجنبي هو
    عمل مرة فلافل وحطها بسندويشة وحط بندورة وبقدونس وخضار المهم بس خلصها هيك مسكها ورفعها وحكى النعيم داخل خبزة ههههه الترجمه هاي
    وانا مش قادرة أنسى هالجملة ابدا ابدا

    • عنجد انا بعشق الفلافل
      عنا بسوريا الفلافل بتجنن بس مو معروفة غير بشكلها التقليدي
      يعني مافي محشي وهالقصص
      بحياتي ماعرفتا الا قراص مقلية😁
      وهون بتركيا مابيعملو فلافل عدا المطاعم العربية طبعاً وبعض الأتراك صارو يروحو ياكلوها عند العرب😄

      تعي لعندي اعملك اطيب فلافل ونهرش انا وياكي😂

  5. بسم الله ما شاء الله عليكي حبيبتي
    مبدددعه وفكره كتير حلوه وجديده
    هاي كيكه فلافل مو عاديه 😍

    أبدعتي يا ألبي مين ما بحب الفلافل بكل أنواعه عم تعرفي نقطه ضعفنا هههههه
    عنا بغزه عملو الفلافل صفيحه وكمان دللوه بزياده وحطوه جبنه صفرا جربتوها ولا ما وصلكو هالإختراع😄🌷

    وووووبحبببببك أناااااا❤

  6. تسلم ايدك نووووووووووووور زاكي انتي ….يسعد عينه المبدع والمرتب ….دائما افكارك رائعة وجميلة 😘😘😘😘😘😘😘😘🤩😘🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩

  7. يم يم ماشاء الله عليك يا نوارة زاكي على هالوصفة اللي الواحد حتى لو شبعان بيرجع ياكل.. الحشوة أعجبتني كتير جديدة عليي أنا بعرفها بالبصل والشطة بس وتزيين طبقك روعة
    يسلموا إيديك يا قلبي 💖

  8. يسعد قلبك يا نوارتنا الغاليه حتى الفلافل طالع من تحت دياتك غير شكل تبارك الله بتعرفي بكتبلك وانا قاعده بشم ريحة الفلافل سبحان الله بجنبنا محل فلافل بنيمنا على ريحة الفلافل وبصحينا على ريحة الفلافل الله
    ربنا يوفقك حبيبتي ويكرمك ويفرح قلبك قريبا بكل شيء بتتمنيه

    • واياااااكي ياغالية ربي مايحرمني منك
      عيونك الحلوة عطول بتشوف كل شي حلو اللهم بارك 😍
      حزري شو
      انا براس حارتي في مخبز
      ايدك على صحن فلافل تازة لناولك خبز سخن تازة😂
      هي احلى واطيب صفقة بالتاريخ ههههههههههه

    • لك دخيل قلبك الطيب شو بحبو أنا😍
      ربي يباركلي فيكي ومايحرمني هالطلة الحلوة
      انا مالي غنى عنكم أبدا
      انتو عيلتي التانية😍
      الله يجزيكي كل خير ياغالية
      أحبك في الله😘❤

  9. هههههههههههههههههههه 😂😂 والله ما بشتغل الا لاذوق ول جايبه هالطبق الي بيدمر الحال وبيقلب الاحوال وبدكيش تطعميني وكمان اشتغل لاااااااااااااااا هيك كتير ولك هاد فلافل فلاااااااافل مو حيالله يا نونا المجنوووووونه ههههههههه قصدي المزيووووونه

    تسلم ايدك يا قلبي منظر ولا ازكا 🤤🤤🤤بيدووووخ يمممممممممي 😍 عووووووافي والف هنا علي اكل …وعلي شم وما ذاق … وعلي شاف وما اكل 😂😂

  10. يا روح الروح ربي يسلم دياتك يا عمري إنتي المنظى مش قادرة أحكيلك شو عمل فيي دوخت من الجووووووع وقيد التجربة بإذن الله بما انو صحي ومحسوبتك مرووووجمة عاملة رجيم يعني ما باكل غير صحي 😭😭😭😭

    ادعيلي انحف وطمنيني عنك يا عمريتي انتي

    وبحبك قد الدنيا انا

    • 😍😍😍 حبيبة القلب ام عمرو العسلللللل
      دقي كفك لكن😂😂 انا شو خطر عبالي اعملها هيك الا من ورا الافندي الدايت
      كان عبالي فلافل كتير والمقلي مليان سعرات قلت بجربو هيك 😁
      ابقي طمنيني عالنتيجة

      يسعدلي قلبك الحنون اللي بيدعمني وبقدملي الفرحة على طوووووول شو بحبو😍
      ربي مايحرمني منك وممنووووونتك من قلبي على ثقتك ❤

    • نور با عسل انتي لا والله احلى من العسل كمان يخليلي اياكي ويا رب انا واباكي نوصل للوزن الي بدنا ايا😘😘😭😭😭😭😭

      محسوبتك عاملة رجيم ع الفاضي

      ووانتي شو عاملة رجيم احكيلي بلطي استفدنا من بعض🤗🤗🤗🤗

    • وانا كمان عاملة ريجيم عالفاضي
      طلعو ريجيماتنا بيقربو بعض😂😂

      والله ياعمري بعمل فترة وبرجع بفئس
      بس حاليا ماشية عالتخفييييييييف
      باكل من كل شي بس عالخفيف الخفيف
      وبلعب رياضة أحياناً
      صعب الواحد يتقيد بنظام محدد ووجبات معينة سبحان الله😅
      الله يسمع منك وننحف لأنو هالموضوع تاعبني وممللني مع انو كل اللي زايدتن كم كيلو بس خايفة من القادم كرشي وبعرفو😁

      يخليلي قلبك شو بحبك انا😍😘

  11. يسعدك يا نور ويسعد وصفاتك يا قلبي وله فلافلك طالع بشهي يسلمووووا اديكي وعنيكي يارب حبيبتي نووووور الله يحميكي ويبارك بصحتك دمتي بحفظ الرحمان 😘

    • الله يسعدك
      هي الكيكه اللي بيحطوا فيها كاسات قبل دخولها الفرن يعني بيحطوا خليط الكيك في القالب وبيحطوا كاسات بعدين بيشيلوا الكاسات وبيحطوا صوص مكان الكاسه
      ان شاء الله فهمتيني نور

    • ااااااااه فهمت عليكي وعرفتا حبي ههههههههههه
      تكرم عيونك ياقلبي بتؤمري
      بس مهليني هالفترة الصغنوتة عاملة اتفاق انا وجوزي نوقف الحلو حاليا لأني مبلشة دايت 😆😁
      رح امشي بالاتفاق كم يوم وبعدين اخلف واعملك ياها وعمرو الدايت😂😂😂😂

  12. يخخخخخخخختتتتتيييييي
    ما شاء الله ما شاء الله ولك شوووووو هااااااد حتى الفلافل الو نكهة وجوو غيررر شككل من تحت ايديكي
    ربي يسسسلمهم هالايدددديين لمعدلااااات اللي بخلو للاكل نكهة وشكل غيرررر طبيعية
    ربي يباركلك بمخخخك اللي شغال للاكل هههههههههههههه ويبارك فيكي يا نوارتناااا

  13. ياااااااااا سلاااااام ياااااا عينييييي على الفلافل ابو نفخة الله وكيلك والله والله مبارح طحنة فلافل وكانو بنتي وبنات اختي صايمات وعملتلهم عالفطور ساندويشات فلافل مع مقالي وسلطة طحينة اما شوووووووو ع قد ما أكلنا اندمنا 😷 علمك عاد الفلافل وعلاقتو بفيتامين فاااااء 😂😂😂😂😂😂😂 والله بصراحة بشهههههههههي وبنفس طريقتك بعملو طول ما انا بقلي باكل هههههههههههههههههه وبالنسبة لتسوووو بتستاهل خليها تجلي وتشطف وتنضف ماكينة الفلافل مزبوط وضبها مكانها بعد التنشيف وبس تخلص كل شي ادعميها بسندويشة فيتامين فاء او جاط من الي عملتي والله بتستاهل كل خير تسوم 😂😂😂😂😂😂😂😂😂😂😂 اي عليم الله غير تيجيني هسة مثل الفريرة تجرم فيه 🤣🤣🤣🤣🤣
    وعلى كل حال طمنينا عنك شو صار معك بعد القنبلة الموقوتة الي سفيتيها هههههههههههههههه😂😂😂😂😂😂
    بس عنجد يسلم اديكي يا ام الإختراع والله كل شي من تحت دياتك عسل تسلمي يا عسولة الفرفوشة 😙😙😙😙😍😍💖💖💖💖

  14. ياااا جمااااااااااااااااعة لو سمحتو طمنوني عن ام جاسم حبيبة قلبي زمااااااان ما سفتلها وصفات امانة الي بتعرف عنها شي طمن قلبي الله يطمن قلوبكم

  15. بسم الله وماشاءالله عليكي شوها الزكاوة يانوارتنا الله يسلم ايديكي ياقلبي منظرا بيشهي والحشوة فكرتا حلوة واهم شي انها صحية

  16. بسم الله وماشاءالله عليكي يانوارتنا العسل
    الله يباركلك منظر الفلافل بيشهي 😀😋
    الله يسلم ايديكي 😍
    خلص انا حسمت امري ولازم لازم اجي عاسطنبول ادوق 😉😂
    لكن بس شاطرة تشهينا وماتدوقينا ههههخ
    الف صحةوهنا عقلبكن روحي❤😙

    • الله يسعدك حبيبتي نهلة والله بفرح كل ماقريت تعليق الك
      سبحان الله ما ألطفك😍
      ممنونتك من قلبي ياعسل وانا بحب حاكيكن هيك لأنكن فعلا قريبات من قلبي متل أخواتي😘❤

    • الله يسلمك ويسعدك متل مابتسعديني ياقلبي فنونك الأروع😄
      ومشان الخضار لا أبدا هية مابتنطبخ أصلا ولا بتلحق تفرز سوائل وهي حلاوة الموضوع😁
      لما تاكليها رح تلاحظي انها محافظة عالقرشة اللذيذة
      جربيها وحكيلي😀

  17. ❁═¤❁🌴❁¤═❁

    سنة مهجورة:

    (الدعاء عند ضيق الرزق)

    “أصابَ النَّبيُّ ﷺ ضيفًا فأرسلَ إلى أزواجِهِ يبتَغي عندَهُنَّ طعامًا فلَم يجِدْ عندَ واحدةٍ منهنَّ فقالَ:

    اللَّهمَّ إنِّي أسألُكَ مِن فضلِكَ ورحمتِكَ ؛ فإنَّهُ لا يملِكُهُا إلَّا أنتَ
    فأُهْديَت لهُ شاةٌ مَصليَّةٌ فقالَ هذِهِ مِن فضلِ اللَّهِ ونحنُ ننتَظرُ الرَّحمةَ.

    الراوي: عبدالله بن مسعود
    المحدث: الألباني
    المصدر: السلسلة الصحيحة : 4/57

    اللَّهمَّ إنِّي أسألُكَ مِن فضلِكَ ورحمتِكَ ؛ فإنَّهُ لا يملِكُهُا إلَّا أنتَ.

    ❁═¤❁🌴❁¤═❁

  18. 🕜ساعة استجابة ..
    تحروها🕟

    من السنن المتروكة الدعاء بين الصلاتين (المقصود بهما الظهر والعصر) يوم الأربعاء:

    🍋عَنْ ‏جَابِرِ بْنِ عَبْدِ اللَّهِ رَضِيَ الله عَنْهُ،‏ أَنَّ النَّبِيَّ ‏ ‏صَلَّى اللَّهُ عَلَيْهِ وَسَلَّمَ ‏ ‏دَعَا فِي مَسْجِدِ الْفَتْحِ ثَلاثًا يَوْمَ ‏ ‏الاثْنَيْنِ وَيَوْمَ الثُّلاثَاءِ وَيَوْمَ الأربعاء فَاسْتُجِيبَ لَهُ يَوْمَ الأربعاء بَيْنَ الصّلاتَيْنِ فَعُرِفَ الْبِشْرُ فِي وَجْهِهِ، ‏ قَالَ ‏ ‏جَابِرٌ: ‏ “‏فَلَمْ يَنْزِلْ بِي أَمْرٌ مُهِمٌّ غَلِيظٌ إِلا ‏ ‏تَوَخَّيْتُ ‏ ‏تِلْكَ السَّاعَةَ ‏ ‏فَأَدْعُو فِيهَا فَأَعْرِفُ الإجابة. “)
    📒رواه البخاري في الأدب المفرد وأحمد والبزار وغيرهم.
    .
    🌴🌴🌴

    ‏واعْلم أنَّ الله سبحانه يرى تقلُّب وجهك في السَّماء ويسمعُ أزيز صدرك ونشيج حاجتك فلا تفارِقنَّ رحاب الدُّعاء وأبشر

  19. تبارك الرحمن ..
    جمال ما شفته من قبل ولا عمري توقعت أشوف الفلافل بهالأناقة والسهولة
    اللهم بارك ..
    جزاك الله خير يا غالية على مشاركتنا إبداعاتك وأفكارك الأكثر من رائعة
    تسلم الأيادي الناعمة وبورك فيها
    استمري بعطائك وأبهرينا بجمالك

اترك تعليقاً

لن يتم نشر عنوان بريدك الإلكتروني.