مندي اللحمه عالطريقتي رووعه
مندي اللحمه عالطريقتي رووعه
المقادير
- لحمه قطع بعظمها
- كيلو ارز بسمتي
- بنحتاج لتقلاية الارز واللحمه :
- 2 راس بصل مفرومين
- ورق غار
- قرنفل
- عودين من القرفه
- هيل حب او مطحون
- ملح
- فلفل أسود
- كاري أختياري
- زيت قلي
الخطوات
السلام عليكم ..ويسعد او قاتكم بكل خير
اليوم وصفتنا رااااائعه ولذيذه طعمها روعه
بنصحكم بتجربتها بهالطريقه وما راح تندموو ابدا
طريقتها بسيطه مريحه للعزايم وبتبيض الوجه
يلااا نشوف الطريقه …
& سبق ونزلت عالزاكي طريقة المندي بالدجاج وجدا كان رائع ..واليوم حبيت اقدملكم طريقتي بمندي اللحمه فيها اختلاف عن طريقة مندي الدجاج بس انه نفس المبدأ
ان شاء الله يعجبكم
& اول شي بنجهز اللحمه وبنغسلها وبنصفيها لكي حرية اختيار نوع اللحمه ..
انا استخدمت لحمة خروف الرقبه مع لحمة الظهر
& بنفرم راس بصل وبنقليه بشوية زيت قلي وبنضيفله ورق غار وعود قرفه وشوية هيل مطحون وكاري وفلفل اسود وقرنفل وبقلبهم سوا وبعدين بضيفلهم اللحمه وبقليها معهم مع التقليب كل شوي لما اشوفها اخذت لون بضيفلها مي ساخنه بتغلي عشان اللحمه ما تشد معنا( لازم مي ساخنه اذا كانت اللحمه ساخنه )
مقدار المي يعني يلي يغمر اللحمه شوي واذا ضل منها شي مبين عادي لانه عاملها بطنحرة الضغط فبتستوي اكيد
بعد اضافة المي بسكر الطنجره وبضغطها عالنار عاليه لحتى تصفر بوطي تحتها النار تقريبا بدها من ثلث ساعه لنص ساعه حسب اللحمه ..ولما افتح عليها بضيفلها ملح وشوية فلفل اسود وبخليهم يغلو شوي وبطفي تحتها اذا شفتها مستويه وبنشلها من المي وبخليها عالجنب ..
وطبعا بصفي ميتها لاستخدامها للارز
(أما اذا كانت لسى شاده معك ضيفيلها رشة سكر وارجعي اضغطيها لعشر دقايق )
& الان بننتقل لطريقة الارز ..بقلي بصله مع ورق غار وعود قرفه وهيل مطحون وملح وقرنفل وفلفل اسود ورشة كاري بقليهم سواا (طبعا انا ما استخدمت بهارات كثير لانه المندي
بهاراته قليله ومرات بنطبخ بدون بهارات مثل طريقتي بمندي الدجاج بس انا حبيت اضيف الكاري عشان هيك تلون عندي الارز ..واكيد اضافة البهارات ذوق شخصي والاختيار برجع الكم )
بعد ما يتقلى البصل عندي مزبوط وياخذ لون بضيفله الارز المنقوع والمصفى وبقلبهم سوا عالنار عاليه
& وبعدين بشيله عن النار وبضيفله مية اللحمه المصفيه
بزبط ملحته بعد اضافة المي وبقصدره طبقتين من القصدير وبثقبهم بالسكين وبضيف اللحمه عالقصدير وبرجع اقصدر اللحمه مزبوط وبدخلها الفرن عالنار عاليه لحتى تبلش تغلي بخلي النار عاليه لمدة عشر دقايق تقر يبا وبعدين بوطي تحت الارز للاخر وبخليه من ربع ساعه لثلث ساعه ..انا اخذ معي بالفرن نص ساعه وكان جاهز من اول ما دخلته الفرن
بطلعه من الفرن وبشوف الارز اذا مستوي او لا
(اذا ما كان مستوي معك رجعيه لمدة عشر دقائق
واذا كان ناشف ولسى مو مستوي عشان ما ينحرق ضيفله رشة مي ورجعيه اضمن مع انه ما فيه خوف ابدا من انه ينحرق بس انه ممكن يكون متنشف مزبوط ولسى مو مستوي انا صرت عامله اكثر من مره ويطلع الارز بجنن وكل رزه لحالها)
& بعد استواء الارز بتكون الطبخه جاهزه معنا
واللحمه ممكن تحمريها اذا حبيتي
انا ما حمرتها حبيت تضل طريه ولونها حلو ما كان في داعي لتحميرها ..لكي حرية الاختيار
& بقدمها مع السلطه واللبن والدقوس
الصراااااحه طعم خرااافي ورااائع
وصحه وعافيه مقدما للي حاب يجربها
دمتم بكل الخير
