مليحي ملكة اكلات الشتاء

75 11٬788
 

مليحي ملكة اكلات الشتاء

مليحي ملكة اكلات الشتاء

مليحي ملكة اكلات الشتاء

مليحي ملكة اكلات الشتاء, معكم صديقة زاكي الشيف الموهوبة ,

المقادير

  • ٢ كوب برغل
  • ٢ مكعب ماجي
  • ملح
  • فلفل
  • بهارات ناعمه
  • ٣ ملاعق سمن بلدي او عادي
  • المرق :
  • كيلو لبن حامض او يستبدل بالجميد
  • ملعقتين طحين او نشأ
  • لسلق الدجاج:
  • دجاج
  • ملح
  • فلفل
  • زيت
  • بالإضافة إلى بهارات خشنه:
  • هيل
  • قرفه
  • لومي
  • قرنفل
  • ورق غار
  • بصله

الخطوات

السلام عليكم ورحمه الله وبركاته حبيبات قلبي صبايا زاكي بصراحة ما كنت بدي شارك بهل مسابقه لأنو مالقيت شي يلي يناسبها بس لعيون ام علي وعيون تمورة وكل الصبايا اكيد

نزلت هل وصفه وهي الوصفه هي الاكله التراثيه بأرض حوران يمكن المكونات ماتعجبكن وتحسوها مو طيبه بس يلي حيجربها حيلزق فيها ههههه

بنقدمها بالعزايم بكثره واكيد امهاتنا بيعرفو يعملوها بإتقان اكتر منا نحن الصغار الجدد ع المطبخ وخاصه أنهم كانو يعملوها بالجميد الناشف يلي كانو يعملو بالبيت مونه لكل السنه خصوصي لهل اكله وكنا نسمي (كثي )ههه

وبلا طول سيره خلينا نبلش حبة حبة ٠

اول ;شي بنسلق الدجاج او اللحم القطع انا هون عاملو بجاج طبعاً كلنا بنعرف كيف بنسلق الدجاج بنضيفلو البهارات الخشنه والملح والفلفل والزيت والبصله والمي بس بنكتر المي شوي لأنو حنستعملها

ثاني ;شي بناخذ بطنجرة الضغط أو طنجره عادية الافضل طنجرة الضغط بس انا استخدمت الطنجرة العاديه لأنو ماعندي ضغط وبخاف منها ههههه

بنحط لكل كاسة برغل ٣كاسات مرق دجاج او مي عاديه مع ملح وفلفل ومكعبات الماجي وبنضيف البرغل المغسول وبنخفف النار اقل شي حتى يستوي ويذوب البرغل بنطفي تحتو بدو شي نص ساعة أو اكتر يعني حتى ينشف المي وتستوي الحبه وتذوب بس شوي بعدين بنضيف السمنه وبندعك بملعقه الطبخ الكبيره البرغل حتى ينهرس سوي البرغل وبنضيف كمان السمنه حندعك وهو سخن وهيك بكون جاهز البرغل

ثالث :المرق زي مرق المنسف الاردني

بنخفق اللبن والملح والفلفل والبهارات بس ما تكترو مشان يضل ع بياض وملعقتين سمنه بلدي وملعقتين طحين وبنخفف اللبن بمرق الجاج حتى يصير خفيف وبنخلطهم كويس وبنحطهم ع النار مع استمرار التحريك حتى يغلي وهيك بكون جاهز في ناس بتبرش كم حبه بندورة وبتطبخها مع فلفل وملح وشويه زيت حتى يستوي وبنضاف للبن وبيغلي معو

صار وقت السكب بنسكب البرغل بنمسح وشو بالمرق وبنصف الجاج بعد ما نحمرو بنغطو بالمرق وبنصب المرق ع الوجه صحيح الاكله مبينه ملبكة بس ع العكس كتير سهله أن شالله تعجبكم وتجربوها ومايروح تعبي ع الفاضي

لا تنسوني بالدعاء بالفرج وتيسير الامور

بحبكن كتير

ام علي بدي رأيك واكيد رأي الادمونه تمورة

برعايه الله

عرض التعليقات (75)