مخلل مشكل

88 6٬991
 

مخلل مشكل

مخلل مشكل .....😋😋😋😋

مخلل مشكل

مخلل مشكل , معكم صديقة زاكي الشيف الموهوبة ,

المقادير

  • حبتين فليفلة خضرا
  • حبتين جزر
  • حبتين خيار
  • حبتين فليفلة ملونة أحمر أو أصفر
  • فلفل أخضر حار ٢
  • زهرة
  • تومة ٦ حبات متوسطة الحجم
  • ٣ ملاعق طعام كبيرة ملح
  • خل أبيض
  • زيت زيتون ٥ معالق كبار

الخطوات

السلام عليكم جميعا …………

هاي وصفة المخلل المشكل …احكيلكم قصة هالمخلل ….آخ هالمخلل هادا قصته قصة يا جماعة زاكي هادا انا إصحيت الساعة ٤ الفجر مع بنتي الصغيرة وبعدين إستنيت الأذان وصليت الفجر وبعدين إجيت احط راسي وأنام بحكم انه الجو بارد بس الله وكيلكم ما أجاني نوم وبما انه الست بنتي جرجرتني عالمطبخ بحكم انها جوعانة فأنا حملت الصوبة على كتفي متل الرحالة وإنزلت عالمطبخ وماسكة بإيدي التانية إيد بنتي ورايحين نكزدر عالمطبخ وانا يا حبيباتي ماشية متل الدب القطبي ….بحكم إني لابسة نص الأواعي إلي بالخزانة …مهي الدنيا بررررررررررررد …….ما رح أطول عليكم بهالسيرة المهم فتحت التلاجة الا بنتي بدها فليفلة ودغري أجت على بالي هالمخلل…….

طريقة المخل ………

اول شي بشطف كل هاي المكونات الي فوق والجزر بقشره بقشارة البطاطا وبعدين بقطعه قطع متوسطة الحجم بس مش قطع صغيرة لأنه إزا قطعناهم صغار بيهلط(ما بيقرش) وخصوصي ازا طول وكلنا بنحب بالمخللات قرشتهم يعني لما بتاكليه لازم يطلع صوت …متل (خرش..خرش..خرش..خرش) اوعكم تضحكوا ايون انا ما حكيت إشي هادا صوت المخلل …..

المهم بقطع كل المكونات الخيارة بقطعها بخط طولي من النص فقط وببلش اقعها كأنها نص داىرة مش دائرة كاملة المهم والجزر نفس الحكاية بقطع الجزرة بشكل طولي من النص وبتصير عندي الجزرة قسمين وبعدين بقطعها وبتصير على شكل نص دائرة كل فرضة جزر …..

الزهرة كمية قليلة مش كتيرة يعني مقدار كفة الإيد بقطعها قطع صغيرة ……

وبعدين بفرم الثوم ٦ حبات (فص)مش راس كامل انتبهوا وبخلطهم كلهم مع بعضهم وبوزعهم بمطربانات وبرصهم شوي (بضغط عليهم بإيدي وهم بالمطربان )بعدين بحط ٣ كاسات مي كبيرة بجاط وبحط عليهم ٣ معالق كبيرة ملح بس ما تكون المعالق معبية كتير كتير ولا تكون ممسوحة مسح يعني ٣ معالق معبية بس مش كتير ….

أو ممكن تعملو على عيار فنجان القهوة لكل فنجان قهوة ملح بحط مقابله ١١ فنجان مي ……

أو عشان تكونوا مطمئنين أكتر انا بصراحة بدوق المي قبل ما أحطها على المخلل يعني بملح المي وبدوقها ولازم تطلع المي مالحة بس لما أدوقها ما يكش بدنك منها يعني بتملحيها لازم تكون مالحة مالحة لكن لما تدوقيها ما تقرصك ملحتها يعني مش اول ما تحطيها بتمك تكشري منها بتمنى أكون وصلتلكم هاي المعلومة وقدرت أفهمكم ياها بصراحة مش عارفة أعبر

وبعدين بحط على الملح والمي مقدار الخل وهو عبارة عن ٤ معالق كبيرة خل وبعدين بحط المي في المطربانات وما بعبيهم عالآخر عشان بدي أحط عليهم زيت الزيتون ….وبسكر هالمطربانات وبحطهم لمدة اسبوع أو لما تشوفي انه إستوى ……وريته الف صحة وعافية يا رب ….

بدكم الصراحة انا ما كنت بدي انزلها ……..بس كرمالك إم مصطفى انتي بتموني ….

وكرمال هالأم وردات الي سمتني ابن بطوطة لأدبك بكرشها ……

بتمنى انكم تستفيدو ….وتجربوها وتعجبكم ……….سلامي للجميع ……

عرض التعليقات (88)