تشيزنور أروع حلا منعش بعد الصيام ملكة رمضان

61 4٬609
 

تشيزنور أروع حلا منعش بعد الصيام ملكة رمضان

تشيزنور أروع حلا منعش بعد الصيام _ ملكة رمضان

تشيزنور أروع حلا منعش بعد الصيام ملكة رمضان

تشيزنور أروع حلا منعش بعد الصيام ملكة رمضان , معكم صديقة زاكي الشيف الموهوبة , السلااام عليكم بعرف رح تقولولي من وين جبتي هالاسم بس هاد اللي طلع معي ههههه هالوصفة اخترعتها من وحي الجوع والشوق للحلويات وكنت فخورة بهالاختراع البسيط أكتر شي لما حطيت أول لقمة بتمي بصراحة كان الوضع لا يوصف والطعم منعشششش بشكل عجيب
المهم مابدي طول عليكن تعالو معي نشوف المقادير:
أول شي رح نعمل قشطة سائلة فينا نستخدمها بكل حلوياتنا رح تضيف طعم غني ولا أروع حتى المهلبية بتبطل مهلبية عادية ههههه

المقادير

  • مقادير القشطة:
  • نصف لتر حليب (٢ كوب)
  • ثلاث أرباع ملعقة خل
  • للطبقة الأولى منحتاج :
  • كوب بسكويت مطحون (دايجستف أو شبهو)
  • ملعقتين عصير ليمون (أو برتقال) محلى بشوية سكر
  • ملعقتين قشطة
  • للطبقة التانية منحتاج:
  • كوبين وثلاث أرباع حليب
  • ثلث كوب من القشطة اللي حكينا عنها فوق
  • ملعقتين ونصف نشا
  • ملعقة طحين
  • ٣ ملاعق سكر أو حسب الرغبة
  • ظرف فانيليا
  • جوز هند للوجه (اختياري)

الخطوات

“بسم الله الرحمن الرحيم”

* لتحضير القشطة منحط الحليب عالنار وأول ما يبلش يغلي منحط الخل ومنحرك منلاقي الحليب بلش يفرط (من الخل مو من الضحك)

* بس تفصل القشطة عن المصل الشفاف منطفي ومنصفيها ومنخلي ملعقة كبيرة من الماء اللي انفصل من الحليب ومنطحن القشطة معها لتنعم ونستخدمها بباقي الوصفة

* هلأ بقى بدنا نجهز الطبقة الأولى

منطحن البسكويت ومنضيف عليه القشطة وعصير الليمون أو البرتقال ومنخلطهم سوا ومنحطهم بورق الكب كيك أو أي شي بيوفي بالغرض

* للطبقة التانية منخلط كل المكونات عالبارد ومنحطهم عالنار ومنحرك باستمرار ليسمك الخليط ويبلش يغلي

منطفي ومنصب عالبسكويت ومنتركو يبرد بحرارة المطبخ وبعدا منحطو بالبراد حوالي ساعتين بصير جاهز للأكل والانتعااااااش

ملاااااحظة

((بالنسبة للقشطة فيكم تعملو كمية تحتفظو فيها بالفريزر بتضل فترة ما أحلاها))

* وطبعاً الشطورات حزرو لحالن انو زينت بالسبانخ ههههه

* من قلبي بتمنى تجربو هالوصفة وتستمتعو بطعمها المميز وتدعولي وبشوفكم بالحلقة الجاية من وصفات الننوشية رمضانية

عرض التعليقات (61)