معجنات بسبانخ ملكة المعجنات
معجنات بسبانخ ملكة المعجنات
المقادير
- خمس كاسات طحين ابيض
- كاستين طحين قمح
- معلقتين كبار خميرة فورية
- معلقة كبيرة بكنغ باودر
- معلقتين كبار سكر
- معلقة كبيرة ممسوحة ملح
- نص كاسة زيت
- ماء دافي للعجن
- للحشوة:
- سبانخ
- سماق
- ليمون
- ملح
- بصل مبشور
- زيت زيتون
- شطة اختياري
الخطوات
السلام عليكم حبيباتي الغاليات اليوم حبيت انزل هالوصفة حتى انو ممكن تغير مزاجي شوي واطلع من الجو الي انا في بصراحة مريت بأزمة صعبة جدآ الحمد لله على كل شي انا انصبت بكورونا وتعبت كتير واثرت فية كتير والحمد لله على كل حال واخوي اجى ولد وتوفى ولا اعتراض على حكمة ربنا ربي يصبر اخوي ومرتو ويجعلهم من الصابرين يا رب ويجعل اطفالهم الي توفو شفعاء الهم يوم القيامة اتمنى تدعولهم ربي يعوضهم ويجبر بخاطرهم يااا رب يا كريم
انا اسفة كل مرة باجي انزل وصفة بوجع راسكم بمشاكلي بس انتو خواتي وبحب اشكيلكم همي عشان تدعولي
هسة بالنسبة للوصفة
انا عن نفسي بحب السبانخ بعجينة الطحين القمح وبحبها بدون اي اضافات متل الحليب والرايب والاشياء هاي هاد ذوقي الشخصي والي متلي تيجي تجرب وصفتي يلااا يا عسولات
اول شي بعجن العجينة كالمعتاد بحط كل النواشف وبنزل بالمي الدافية حتى تتشكل عجينة متماسكة ولاكن دبقة بعدين بنزل عليها الزيت وبعجن حتى يروح التلزيق منها وتتكون عجين ملسة وطرية بغطيها وبتركها تخمر
بالنسبة للسبانخ انا بجهزو من قبل بيوم بنقي وبفرمو وبغسلو ع ثلاث مرات اول مرة بمي لحالها حتى يروح التراب منها وبعدين بمي وخل وملح وبعدين بمي لحالها وبصفيها وبرش علي ملح وبفركو وبعصرو من المي وبعدين بحطو بطبروير وبحطو بالثلاجة ثاني يوم بطلعو بحط علي البصل المبروش والسماق الليمون والملح وزيت الزيتون والشطة وبتبلو وبعدين ببلش اشكلو وبشويهم بالفرن وبقدمهم سخنين مع كاسة شاي ع مرمية او ع زعتر وبالصحة والعافية ع قلبكم
ملاحظة
انا عملت منهم كم حبة بحشوة المرتديلا والجبنة برشتهم مع بعض وحشيتهم وكانو كتييير زاكين
ملاحظة
السبانخ ما حطيت عيار كل وحدة وحسب عيلتها وحسب ذوقها وبالهنا والعافية
لا تنسوني من دعواتكم وادعو لاخوي مرتو وربي يباركلي فيكم وما يحرمني منكم يا رب
الى اللقاء في وصفات اخرى ان شاء الله بس بدي دعواتكم
