منسف اردني بدون جميد ملكة الطبخ

28 2٬640
 

منسف اردني بدون جميد ملكة الطبخ

منسف اردني بدون جميد للناس إلي مو متوفر عندهن الجميد ملكة الطبخ

منسف اردني بدون جميد ملكة الطبخ

منسف اردني بدون جميد ملكة الطبخ , معكم صديقة زاكي الشيف الموهوبة ,

المقادير

  • لحم خاروف بعظمو حسب الكمية
  • خمس كاسات رز قصير
  • لبن غنم كيلوين
  • ملح
  • مطيبات للنكهة:
  • ورق غار
  • هيل

الخطوات

بسم الله الرحمن الرحيم

يسعد اوقاتكم يارب طبختنا اليوم المنسف الاردني بدون جميد للناس يلي مو متوفر عندها الجميد رح اعملو بلبن الغنم شغلي بالبيت وان شالله بالايام الجاي رح انزل طريقة عمل اللبن بالبيت

بالاول نبلش بتحضير اللحمة بطنجرة بنحط مي باردة وبنحط قطع اللحم وبنحطها عالنار وبتركها وبس تبلش بدها تغلي منشيل زفرة اللحمة كلها وبنحط عليها ورق الغار والهيل وبنغطيها وبنتركها تستوي

وبنحضر اللبن بنحط اللبن بطنجرة وبنحرك بالمشبك اليدوي منيح او يلي بحب يخلط اللبن بالخلاط كلو نفس النتيجة انا ماضفت لا نشا ولابيض بس لبن لحالو وبحط الطنجرة عالغاز وبستمر بالتحريك وبحط نص ملعقة صغيرة كركم وبحرك شرط اساسي باللبن هوالتحريك المستمر اذا تركنا اللبن بدون تحريك بيفرط معانا عكس الجميد واذا شفنا تكاثف اللبن بنخففو بمية اللحمة

وبنحضر للرز بطنجرة بحط ملعقة سمنة بعد مااكون ناقعة الرز نص ساعة وغاسلتو ومصفيتو وبحطو عالسمنة وبحرك الرز مع السمنة وبعدها بحطلو من مية اللحم وبحط نص ملعقة صغيرة كركم وبتركو على نار عالية لحتا تنرل المي بهدي النار وبغطيه وبنتركو يستوي بعد مايستوي اللحم بنحطووعاللبن وبنتركو يغلي نص ساعة مع اللبن

ان شالله يديم النعم علينا والحمد الله عالصحة والعافية وان شالله صحة وهنا

28 تعليقات
  1. 🌷❤ غزل ❤🌷 :

    يسلمو ايديكي المنسف بشهييي

  2. هيام :

    ماشاءالله الله يسلم دياتك منظرو بشهي صحتين وعافيه

  3. um saleem :

    تبارك الرحمن ما شاء الله عليكي 😍 😍 😍 😍 😍
    صحه وعافيه يارب عليكم

  4. إم مصطفي 😉 :

    ما شاء الله روووووعه صحه وعافيه يارب 😍😘

  5. ام شام :

    ماشاء الله منظرو بشهي يسلم دياتك

  6. ام عبود وحبيب :

    ماشاءالله صحتين وعافية والله فتحتي نفسي
    هاتي صحن بتوحم 🤭

  7. 🌺 القدس عربية 🌺 :

    أم نبيل
    ما شاء الله عنك يعيشوا هالايدين ويعطيكي ألف عافية وصحتين وهنا ع قلوبكم
    أمي أحيانا بتعملوا هيك بلبن الغنم بدون جميد وبصراحه الطعم بشهههي

  8. ام علاء ابو يحيى :

    الله يسلم هالايدين ابدعتي حبيبتي الجميد اصله لبن جامد مركز وناشف واذا ما توفر عندنا بنعمله بالرايب الحامض شوي والشنينه بطلع بشهي

  9. الله الله منظر بياخد العقل انا اعشق المنسف ويلي شو شكلو رهيب يسلمو ايديكي حبيبتي موفقة يارب وع المفضلة والتجريب مباشرة

    1. nawal :

      الله يسلمك حبيبتي بتشكرك عالكلام الحلو ان شالله صحة وهنا ومتأكدة رح يطلع من ايديك غير شكل

  10. بدي اسالك نوال بعد ما تغلي اللحمة مع اللبن بنشيلها وبنحطها فوق الرز بس اللحمة ولا مع اللبن بتمنى تشرحيلي لاني رح اطبخها نحنا ما عنا جميد وانبسطت ع طريقتك بللبن
    ويسلمو ايديكي

    1. nawal :

      الله يسلمك حبيبتي بنحط اللحمة لحالها بدون اللبن بعد مانكون غليناها باللبن مدة نص ساعة منشان اللحمة تشرب مية اللبن منيح وصحة وهنا مسبقا

  11. حبيبتي كرمال الله لا تواخذيني رح اسالك كتير اللبن كمان شغلك اللهم صل على سيدنا محمد ماشاء الله كلو دسم ها اللبن ربي يباركلك
    والسمنة العربي كمان بتمنى تساعديني وتعطيني طريقة اللبن والسمنة وبكون ممنونتك يا غالية
    والله يديم عزك يا رب العالمين

    1. nawal :

      عادي سألي شو مابدك مية اهلا وسهلا اللبن كثير سهل بنجيب حليب غنم يعني هي الكمية يلي حطيتها بالصور 5كيلو بعد مانصفي الحليب بنحط الطنجرة عالغاز بس تسخن الطنجرة بنزل الحليب وهذا سر يلي بخلي وجه اللبن اصفر وسميك بعد مايغلي الحليب بنتركو مدة ربع ساعة يغلي وبنصبو بوعاء ناشف وبنتركو يبرد شوي يعني تكون درجة حرارتو 40 درجة منخق ملعقتين لبن وبصب عليها ملعقتين حليب ونحركهن مع بعض وبنصبو عالحليب بهدوء منشان مايخرب وجه الحليب بنغطي منيح وبنتركو 5 ساعات وبس يجمد الحليب ويصير لبن بنحطو نص بدرجة حرارة المطبخ وبعدها بندخلو عالثلاجة ويفضل نتركو 24 ساعة اما طريقة السمنة فهي صعبة شوي وان شالله بالايام بصورها وبنزلها لانو بدها خطوات وشرح دقيق منشان ماتخرب

  12. الله يسلم ايديكي ع الشرح تسلمي لقلبي شو انك مزوءة وبنت اصول بتشكرك من كل قلبي
    ولاتنسي شي يوم اشرحينا طريقة السمنة بارك الله فيكي وببيتك وعيلتك

    1. nawal :

      بتشكرك حبيبتي ان شالله بس يصير موسم الزبدة العربية رح اصورها واشرح الخطوات بالتفصيل وكمان رح انزل طريقة الجبنة بكل خطواتها كمان وان شالله افيدكو بخبراتي واستفيد من خبراتكو

  13. تبارك الله عليك كيشهي 😍 بالصحة و الراحة

  14. 🍒أم محمّد🍒 :

    ما شاء الله شكله بشههي يسلم ديااتك يا رب

  15. الله يسلم ايديك يا قلبي
    المنظر دماررر شامل
    😋😋😋

  16. ياسمين الشام :

    ماشاءالله تبارك الرحمن ست بيت معدلة الله يحميكي لعيلتك يارب

  17. خواطر :

    يعطيكي الف عافيه بتشهييي،😋

  18. ريحانة🌿 :

    اللهم بارك
    ألف عافية عليكم🌹

  19. أية 🌹 :

    ماشاء الله تبارك الرحمان بيشهي يسلم دياتك وصحى وهنا

  20. رذاذ المطر 💦💦 :

    يشهي المنسف من تحت دياتك

  21. 💖نور💖أحمد💖 :

    بسم الله ماشاء الله عنجد منظر فاخر وبشهيييي
    ربي يعطيكي ألف عافية 😍

  22. om faisal :

    ماشالله عليكي حبيبتي رووعه

  23. 🌹 ايمان 🌹 :

    ما شاء الله تبارك الله
    منظر خرافي

  24. […] لنا ذنوبنا ويجعلنا من عتقائه بأذن الله اليوم فطورنا منسف الاردني باللحم وسبق اني نزلت طريقتو بالتفصيل موجو… بملفي الله يديم النعمه علينا ويحفظها من […]

اترك رد

لن يتم نشر عنوان بريدك الإلكتروني.