الرئيسة / منوعات / بين الطنة والرنة ضعت بين الحماية والكنة الحلقة 15 والأخيرة

بين الطنة والرنة ضعت بين الحماية والكنة الحلقة 15 والأخيرة

/
/
/
6785 مشاهدات

بين الطنة والرنة ضعت بين الحماية والكنة الحلقة 15 والأخيرة
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

بين الطنة والرنة ضعت بين الحماية والكنة الحلقة 15 والأخيرة
بين الطنة والرنة ضعت بين الحماية والكنة الحلقة 15 والأخيرة

 

#بين_الطنة_والرنة_ضعت_بين_الحماية_والكنة

الحلقة الاخيرة بعنوان ( انا وحماتي حبايب )

( وشو ناوية تعملي هسا يا هند )
( يا خالتي ام حسين منيح ما عمي ابو حسين يتزوج عليكي اربعة قد ما بتشمتي بالناس )
( هسا انا هيك يا هند الله يسامحك فوق ما انا جاي ابسطك يلا الحق علي )
( خلص والله ما انتي قايمة اقعدي لساني وبتعرفيه اسمعي يا خالتي طالما عمي صار كاتب كتابه ومخلص وما ظل قدامه الا يجيبها عنا عالبيت معناتو شغلي مع العروس بالبيت الله يوخدها متزوجة واحد قد ابوها بنات هالايام بس بدهم بتزوجو مفكرات الزواج بس بدلة بيضة هسا خلوني ارتب افكاري واجمع قوتي وبنشوف شو بطلع معي )
روحت عالبيت والله محتارة اخبر سامي ولا اخبر عمتي
دخلت عدار عمي كانت عمتي قاعدة بتنقي عدس ما هو بالشتا بنفطر وبنتغدى وبنتعشى عدس
نيمت الاولاد بالغرفة الجوانية ورحت قعدت جنب عمتي
(هاتي عمتي بدي انقي العدسات عنك )
( خير ان شاء الله من متى )
( ول يا عمتي انتي بتعرفي اني ما بدي الا راحتك )
ما قدرت افاتحها بايشي ولا احكيلها لاني بعرفها لسانها اطول من لساني وحكيت لحالي بكرة بدوب التلج وببين الي تحته وبتعرف لحالها بس انا ما كنت اتركها لحالها كنت دايما ملزقة فيها ليوم المسا اجا عمي وجايب معه كستنا وذرة عشان نشويهم بالسهرة وبس خلصا واكلانهم
نادى علينا وحكالنا بده يخبرنا ايشي انا قلبي وقع بين اجري لاني بعرف شو بده يحكي
( انا يا ولاد تعبت كتير عليكم لحتى ربيتكم وكبرتكم وامكم كمان تعبت معي بس يابا امكم ما عادت تقدر عمسؤولاياتي وانا زلمة وبشوف اشكال الوان وقبل فترة الشيخ مصطفى بعد صلاة المغرب لما كانت الدنيا زخ مطر وجمع المغرب مع العشا قعد معنا يحكي وحكالنا عن تعدد الزوجات وهذا من شرع ربنا )
( عمتي : شو قصدك بهالحكي يا ابو سامي)
( انا قررت اتزوج والعروس بعد بكرة رح تيجي وتعيش معنا بهالبيت رح تاخد الغرفة الفاضية بكرة الله يرضى عليكي يا كوثر ويا هند بتنظفولي اياها )
وحمل حاله وراح عغرفته وحماتي الي كان لسانها ما يفوت بتمها ما حكت ولا قدرت تنطق كسر بخاطرها قدام كناينها وولادها
حزنت عليها قديش الوحدة بتتعب وبتربي وبالاخر بصير زوجها يحكي عنها ما عادت تنفع حماتي ما رضيت تحكي مع حدا وفاتت اخدت قميصها النوم القطن الابيض وظلت طالعة معنا عالبيت
( يما لا تزعلي منه انتي عارفة ابوي وعقله وما حدا بقدر يوقف بوجهه بس انتي كرامتك بتظل محفوظة )
( لا يما مش زعلانة بس انا رجعة عنده عالبيت مش راجعة بدي اعيش عندك انا ما الي لا اخوان ولا حدا اروح عليه )
( ول يما سدر البيت الك والعتبة النا )
نامت عمتي هديك الليلة وعيونها ما وقفو بكا والصبح صحي سامي عملتله بيض ببندورة افطر وتسهل عشغله
كانت الدنيا كابسة مطر وعمتي قاعدة عسجادة الصلاة وبتدعي قال عشان الدعاء بالمطر مستجاب
( تقبل الله يا عمتي )
( اشمتي فيي يا هند بنت ابتهاج ورحي هسا رني عامك خبريها )
( يعني يا عمتي كل ما باجي اساعدك بتخليني انفر هسا المهم هاي العروس لازم نطفشها ولا تحكي يا عمتي بديش اياه وخليه يتهنى بالعروس هاد تعبك عزا بدك تخلي بنت عشرين توخد شقا عمرك )
( وليه هند انتي شو عرفك انه عمرها بالعشرين )
( اه بدك الصراحة يا عمتي انا عندي خبر بالموضوع من يومين ام حسين جارتها لامي خبرتني )
( وليش ما خبرتيني )
( والله ما طلع الحكي معي هسا عمتي بدي اقوم ارن على حورية ونجاة اخليهم يجو واحكي لهاي الي تحت تيجي بدنا نعمل اجتماع مهم )
( ماشي هسا بخبرهم شفتيه عمك شفتيه بده يفضحني بين الجارات )
( اي جارات ما هم كلهم زواجهم بخزو مين احسن ام بسام الي زوجها مسكوه بحكي مع سوسو عالسطح
ولا ابو هشام الي ما بخلي وحدة من شره خلص يا عمتي خلينا ساكتين )
بعد ساعة اتجمعت عندي حورية ونجاة وكوثر وبلشو بنات حماي يبكو وينوحو
( هسا مش وقت بكا انتي واياها ركزو معي احنا لازم نطفشها اول ايشي بدنا ننزل نظف الغرفة وبعدين بنبلش بالخطط )
حطينا ببالنا شوية خطط نعملها بهالنكبة الي جاييتنا
وقربت على عمتي وشوشتها بدانها ( عمتي بدنا من دوا الاسهال نحط منه للعروس اول ليلة تذكرتيه )
اطلعت فيي وصارت تضحك
نزلنا عالغرفة تحت نظفناها ورتبناها وفكينا السطلايت من تحت وكوثر حكالها سالم بده يجيب تلفزيون عندهم عالغرفة يركبوه عليه
عمي طلب نعمله بامية ورز عالعشا قال العروس الجديدة بتحبها وطبعا توصينا بالطبخة حطينا نص الدوا بالاكل
اجا عمي ومعه هيام وشو هالهيام بتجنن يخرب بيتهم من وين بجيبو الحلاوة حتى سالم وسامي ظلو مبحلقين فيها انا شفت كوثر وهي بتقرص بسالم
حطينالهم العشا وطلعنا عندي عالبيت
( اه يا بنات كيف العروس اكيد بتخزي ضحكت عليه خلته يتزوجها ،،، ولكو مالكم ليش ساكتات احكو
شو يا ولاد احكو كيف العروس )
( والله يما بتجنن شكلها راحت عليكي )
بدكو الصراحة العروس مش بحاجة لا لبيجامة متل بيجامات زهور بنت ام تيسير ولا محتاجة تجيب اواعي متل الي عند كوثر مفعولها قوي بحلاتها

( ولك هند يا هند تعالي جنبي )
( ايوا يا عمتي )
( حطيتي من الدوا وكترتي )
( تخافيش يا عمتي الليلة رح ينامو بالحمام )
تاني يوم كاين عمي يشكي لسامي انه هو وهيام ظلو رايحين جايين عالحمام حتى سامي مسكين مستغرب وحكى لعمي انه انا وكوثر ليلة العروس قضيناها بالحمام كمان
نزلت تحت عالبيت وحلفت الف يمين عهيام ما تصيب شغلة من شغل البيت
وكوثر طلعت تساعدني
انا فتت عغرفتها انظفها ورشتلها كل اواعيها ببخاخ اعطتني اياه سوسن بنت جيرانا قال هاي بتخلي الواحد يظل يحك
رتبنا البيت شوي وطلعنا ومسكينة هي لا عارفة تنام ولا تقعد وهي تحكحك متل الي صايبه جرب
وصارت شاكة فيي انا وكوثر انه سبب الي بصير فيها
لهيك رنيت على حورية وخبرتها تحكي لزوجها انه بدها تيجي تنام عنا كم يوم
اجت حورية هي وولادها وقعدو لهيام عقلبها وعمي انجن ما هو بده يصفاله الجو بس حورية حكت لابوها انه زوجها غار منه وطردها من البيت
( اسمع ولا يوسف علي شايف الحبل هاد بتربطه على اجر الكرسي وبتربط اجر هيام معه عشان لما تقوم تظل قالبة عوجهها
خلاها يوسف قاعدة وربط الكرسي باجر هيام وهي ولا حاسة وهسا بتقوم وكمان شوي بتقوم ولا مبسوطة قاعدة بتتسلى مع عمي حاطين جاط هالفواكه قدامهم ومش سائلين
بعد شوي وقفت بدها تروح عغرفتها ولسا مشت اول خطوة ولا هي قالبة ووجها بنص جاط الفواكه صارت هيام بالتفاح
عمي صار يصرخ عرلاد حورية بس انا فهمت حورية شو ما عمي بهدلك وشو ما حكالك لا تزعلي ولا توخدي عبالك تمسحي وظلك قاعدة عقلبهم
هيام شاكية لعمي منا وقال شو بدها تطلع عبيت لحالها ووعمي بلش يفكر بالموضوع شكله خطرله يطلعنا من البيت ويحطها مكانا

(عمتي : والله يا هند ما انتي قليلة )
( ولو يا عمتي هسا اجا دور اسامة ابن حورية اخد علبة الدبابيس وشكهم كلهم بتخت عمي ومرته ليلتهم انس يا عمتي )
اسامة فات عالغرفة وانا بلهي بهيام ورفع غطا الفرشة وشك كل الدبابيس بالفرشة
وطلع لعنا
المسا فات العرسان ينامو
( ابو سامي مش حاسس في ايشي بغز )
( اه والله حاسس ايشي بقرص فيي )
رفعو الشرشف وشافو الدابيس وبلش عمي يصرخ
الله ريتك تموتي يا حورية انتي وامك وهند بيوم واحد

وطلع لعنا معه حورية وولادها
( اسمع علي يا سامي هاي اختك وولادها خليهم يحردو عندك ومرتك ممنوع تنزل تحت وصدقت امك لما كانت تحكي الله لا يوفقك يا هند بنت ابتهاج )
طرق الباب ونزل وما ظللنا حدا بالبيت غير كوثر صارت تحطلهم ملح بالشاي او تحطلهم سكر بالطبيخ حتى عمي مسك كوثر وسالم وطردهم لعنا )
وصارو كل العيلة عندي بالبيت طلعت كوثر السطلايت فوق وشبكناه
الرجال بدهم يحضرو برنامج ( جار القمر ) ما هو كله نسوان
والولاد بدهم يحضرو ماوكلي وعدنان ولينا
واحنا النسوان بدنا نتفرج عالكواسر
بس زلامنا من ورا عاميلنا السودة خافو منا وتركونا نتفرج على الي بدنا اياه بس قد ما في برامج حلوة وقد ما هالسطلايت بجيب شغلات ما بنتخلى عن فكر واربح وعن رافع شاهين تقعد عليه مع كاسة سحلب بالشتوية
تاني يوم طلعت هيام لعنا قال بدها اياني انزل لتحت بدها تحكي معي بموضوع
والله انا الفار لعب بعبي وخفت تعملي ايشي بس الفضول بقتلني لازم اعرف شو بدها
نزلت لعندها وقعدت انا واياها وعملتلي كاسة شاي مع شوية برازق وبلشت تبكي
( يا بنت الحلال مالك ليش بتبكي اذا عشان الي عملناه فيكي انتي الي جبتيه لحالك ولا شو بخلي وحدة حلوة متلك باول عمرها تتزوج واحد قد ابوها )
( مفكرة اني مبسوطة يا هند انا ما بدي اياه لابو سامي انا بدي اتزوج ابن جيرانا بس ابوي مش قابل قال لانه اخته مطلقة )
( تزعليش مني تزعليش مني ابوكي غبي هو في حدا حاطط عراسه خيمة وشو يعني مطلقة )
( هسا انا مش عارفة شو اعمل )
( اطلقي من عمي ابو سامي وهيك بتصيري انتي مطلقة وابوكي بزوجك لابن جيرانكم )
( وكيف بده يطلقني )
( نكدي عليه عيشته وظلك اجتمعي فينا بخاف عروحه وبطلقك )
والله هالهيام عملت متل ما قلتلها بالزبط صارت يروح عمي يلاقي شعرها منكوش وطول الوقت منكدة ولما صار يشوف طلباتها الكثيرة ومكياجات واشياء بحياته ما سمع عنها ومصاريف طالعة نازلة صفته عالحديدة خاصة انها صارت كل شوي تحكيله انها ما بدها اياه طلقها ودفعلها نص المهر
صفي البيت على عمي لحاله وصار يحاول كل شوي يجي لعنا عشان يشوف حماتي بس حماتي بتدلل
سامي وسالم حاولو يقنعو عمتي بكل الطرق حتى قبلت بس شرطت على عمي شرط انه نطلع كلنا برحلة عالعقبة وعحسابه ولا بس معه يروح يتزوج
حجزلنا سامي بالباصات وكالعادة جهزنا عدة الرحلة
حورية عملت كيك ونجاة عملت قراص
وانا وكوثر نزلنا عالدكانة اشترينا كوكو عاشور وتوتو وكم باكيت شيبس ساندي على كم باكيت رينغو
وحلينا عصير بقناني واخدناهم وعملنا براد قهوة سادة
وطول الطريق واحنا نغني
يسعد رب الشباب عابو هواهم متل النعنع بالشاي يباي ما ازكاهم
ويسعد رب البنات عابو هواهم متل السمك بالمي نلحق وراهم

وغنينا كمان امه يا امه يخليه امه سابع كناين تعبر عامه
جابولي بطيخ ما باكل بطيخ وحتى عالمريخ لحقتني امه
( هسا الاغنية هاي ملهاش دخل بالطلعة بس غنيناها )
وصلنا العقبة والجو فيها كان بجنن ومن اول ما وصلنا حطيت نافع وخليل عن ابوهم ونزلت عالسوق مع كوثر وعمتي وحورية ونجاة وما خلينا ايشي ما اشترينا منه
وبعد الظهر رحنا عالشط وسامي جنني وهو يحكيلي انه سبيح واول ما نزل غرق بشبر مي انا الي بعمري ما شفت المي غير لما اتحمم بالطشط الاحمر وكيلة السمنة بعرف اسبح اكتر منه
وما شفت حالي الا واقعة بهالمي وصرت اصرخ وانادي والتمو علي الناس حتى يطلعوني
اتاريها عمتي وازة ابن حورية يدزني بالمي هالعمتي متل الي فيه سوسة ما بغيرها
وقال شو بتمزح معي بس للامانة هي معاملتها متحسنة معي
روحنا عالبيت وعمتي صارت تبيع نسوان الحارة من هالشراشف الي حابتهم معها
وكوثر طلعت حامل وانا كل يوم بلبس بيجامة شكل جبتهم معي من العقبة احلى من البيجامات الي دلتنا عليهم زهور بنت ان تيسير وبليرة ونص مع اني مش فاضية احك راسي من ورا ولادي
وسلامة تسلمكم

#انتهت
#حنين_طه

صبايا انتهت قصة هند رافقتكم تقريبا لمدة اسبوعين انا عشت احداثها معكم
بتمنى تعجبكم وتحكولي رأيكم بالقصة

320 تعليقاً

  1. بتجننننننننن القصة..الله يبسطك زي ما أبسطينا ودخلتي الفرح بقلوبنا😂😍 بتمنى انكم تستمروا بهيك شي بصراحة ما بدي القصة تخلص لانها ممتعة للغاية وجمييلة …انتي رووووعة👍👌👏👏❤

اترك تعليقاً

لن يتم نشر عنوان بريدك الإلكتروني.