الرئيسة / منوعات / سنة أولى زواج قصة واقعية حلقة 1+2+3

سنة أولى زواج قصة واقعية حلقة 1+2+3

/
/
/
5699 مشاهدات

سنة أولى زواج قصة واقعية حلقة 1+2+3
نرحب بكل قراءنا الأعزاء في زاكي, نقدم لكم اليوم في قسم المنوعات في زاكي هذه القصة المميزة, التي نأمل أن تنال على رضاكم, قراءة ممتعة وجميلة نتمناها لكم, وننتظر رأيكم وتعليقاتكم على القصة.

سنة أولى زواج قصة واقعية حلقة 1+2+3
سنة أولى زواج قصة واقعية حلقة 1+2+3

ج1 وح2 وح3
#قصص_من_الواقع
#سنة_اولى_زواج
#بقلم_لؤلؤةالبحر
الحلقة الاولى

مرحبا رجعتلكم قريتو اعلاني اليوم انا قصي شاب على باب الله مهندس وبشتغل بالخليج ومثل ما حكتلكو نازل بدي ادور على عروس واتجوز وصلت 30 سنة والي سنتين متغرب وحوشتلي قرشين اتجوز فيهم لأنه شرط امي الله يحفظها كل واحد يتجوز من ذراعه…وهيني اليوم وصلت عند اهلي و بدي أرن الجرس عاملهم مفاجأة يلا تعالو معي ..( الجرس برن سامعين )
ابو قصي : مين قصي يا حبيبي يابا تعال بحضن ابوك يا ولد ….
ام قصي( كانت حاملة صينية بتنقي عدس من فرحتها رمتها ) يما ياحبيبي يما …ياحبيبي بس يا ابو قصي خليلي دور …تعال يما ألله يرضى عليك ياحبيبي خلص بكفي بوس الرأس بلاش الايد
قصي : اشتقتلكو يما اشتقتلكو وين اخواني
ابو قصي : جوا يا حبيبي ( تقاطعه ام قصي)
ام قصي : جوا ياحبيبي فوت ليث بتحمم واسعد كان بنشر الغسيلات عالبلكونه فوت يا حبيبي يا اولاد تعالو اخوكو قصي اجا
أسعد : قصي يا حبيبي ياخوي
قصي : ولك طولان وصاير شاب بهالسنتين اشوف وطالعلك لحية ههههه
ام قصي : اه وبشارة عليك بدو يتجوز ابو نص نصيص قال جوزيني عشان تلحقي تشوفي اولادي
قصي : ههههه ولك تتجوز انا أصبر عرزقك
ليث : هلا ..هلا بحبيبي ابو ياسين نورت نورت ….
( باختصار هاي هي عيلتي الكريمة ابوي وامي وليث وآخر العنقود اسعد )
ام قصي : فوت يما تعال يا حبيبي اقعد …أسعد هات كاسة عصير لاخوك. ..ليث فوتلو شنطته عالغرفة واحملها حمل اوعى تحك العجال بالبلاط يا ويلك…فهمت ..
قصي ( يهمس لابوه) هو بعده المعسكر
ابو قصي ( بهمس) قول الله يعينا
(ويضحكو). …
ام قصي : عشو بتضحكو علي ….هات يما حط الكاسة مزبوط لتنكب. .حط….اشرب يما وبل ريقك ..رايحة احط اللحمة عالنار
ليث : لا يما تطبخيش غداكو علي اليوم حلوان رجعة قصي
ابو قصي : الله يحننكو عبعض يابا
ام قصي : لا …ليش المصاريف. ..اللحمه بطنجرة الضغط ساعة الغدا جاهز اقعدو. اقعدو ….
….
( كلهم بقعدو يتفرجو ببعض وام قصي بتروح تطبخ …)
قصي : طمن يابا شفتو لي بنت حلال مثل ما وصيتكو
ابو قصي : والله يابا امك ما خلت دار ما فاتتها ..وبالاخر طلعت بالقرار
قصي : أي قرار احكي
أم قصي(في المطبخ ) : شو بتوشوشو ..علو صوتكم اسمعكم
ليث : يما بحكو عالعروس. ..اي يابا ليش قرصتني
ابو قصي : عشان تفسد ….هس بتترك الطبيخ وبتيجي. .ها اجت شفت
ام قصي : تخافش يما عروستك عندي ولا يهمك نقيتلك ست البنات
قصي : عنجد يما…هاتي ايدك ابوسها ..مين هي ..شو اسمها ..كيف شكلها …شو دارسة ..احكولي ليش ساكتين
ام قصي : تخافش بتعرفها…عروستك هي ميرا بنت خالتك ..
قصي : شووووو
الجميع يضحك بصمت وام قصي تجحرهم
ام قصي : مالكم مش عاجبتكم ميرا بنت اختي ..
ابو قصي : لا والله انا بحبها للبنت عاجبتني بكفي أنها شبه خالتها
ام قصي :شو قصدك قصيرة زيي
ابو قصي : لا قصدي حلوة مثلك …وإلا شو يابا احكولكو كلمة
قصي : بس يما ميرا ..متدلعة وشايفه حالها وصغيرة
ام قصي : ليش متدلعة …خليها تتدلع وحيدة اخوتها. ..ست البنات …ومتعلمة وحلوة …والعرسان كل يوم واحد ناطلهم. ..بكفيك خالتك تكون حماتك. .على الحساب مانت بتموت ع خالتك
قصي : اه يما والله بموت عليها
ام قصي : لعاد موت عبنتها …ميرا يعني ميرا …نقطة سطر جديد ..
رايحة اخلص الغدا …فوت اتحمم وغير وهات اوعيك ع الغسالة ..يلا يما ألله يرضى عليك …أسعد تعال جيبلي اثنين كيلو لبن رايب وقلو خليه حامض شوي …امشي يما رايحة أدق الجميدات صدقوني لتوكلو احلا منسف اليوم يلا …يلا ..
….
( وهيك يا جماعة حكمت وزارة الأوقاف الي هي الوالدة الله يحفظها انه العروس تكون ميرا الاميرة وبعد المناوشات عرفت انها الله وكيلكم لافة على عشرين بنت والي تقول عنها طويلة والي سمرا والي سنانها فرق والي شعرها خشن والي امها قوية …والي
.والي على أساس أنه لا امي ولا خالتي قويات يا حرام وعلى أساس اني منقطع النظير فش زيي الوالدة شايفتني ومش مصدقة …وهيك رحنا خطبنا ميرا والشهادة لله ميرا بنت حلوة صح قصيرة لامي طالعة بس شاطرة وحلوة وناعمة والف مين يتمناها وطلعت انا من الالف…وخطبنا بعد مليون إقناع لخالتي انه بنتك بالحفظ والصون لأنه خالتي ام مهند الثانية لو صحلها تحط ميرا بمرطبان وتخللها ما بتقصر من خوفها عليها)
….
( بعد الخطبة)
ام مهند : مبروك يا حبيبي يا خالتي ترا اعطتيك أغلى ما أملك دير بالك عليها
ام قصي : تخافيش ياختي هاي الغالية بنت الغالية وأخذت سيد الشباب مهندس اسم الله عليه والله ولا بنت قدرت اخليها كنتي إلا بنتك هاظ قصي سيد الشباب …. وهي سعرها بسعر خالتها بالدار …هاتي بوسة ياكنتي هاتي
قصي ( يهمس لابوه ) كملت يابا
ابو قصي : تخافش يابا ميرا فش زيها …
قصي : ميرا تعالي نقعد عالبلكونه شوي
ميرا ( بخجل) : يلا
ام مهند : وين رايحين
قصي : هون يا خالتي هون تخافيش بدي اقعد مع ميرا تخافيش عليها عن اذنكو
( بعد القعدات المعدودة مع حبيبتي ميرا الاميرة اتجوزنا وخالتي طبعا قضتها عياط تقول قاتلينلها قتيل …وجينا نطلع كم يوم شهر عسل …ما رضيت غير تخلينا نروح ع العقبة …قال بتخاف عبنتها …طب يابنت الحلال ما بنتك حتتغرب وتسافر معي ..أبد …ما اقتنعت وهيك بعد مليون بوسة ايد رحنا يومين ع العقبة ورجعنا والشهادة لله كانن أحلى يومين …والله انك تشوف ميرا مرتك غير تشوفها بنت خالتك صح نسخة مصغرة عن امي بالعقل والشكل بس ليش الحكي بتجنن. ..وهيك خليتها هون ورجعت ع الخليج اعملها معاملتها وعشان تلحقني هون ونبلش حياتنا وأول سنه زواج مع بعض الحلوة بكل مقالبها استنوني الحلقة الجاية واستقبلو معي ميرا الاميرة هون في الخليج)
💑💑💑💑💑💑💑💑💑💑💑💑💑💑💑💑💑💑
#قصص_من_الواقع
#سنة_اولى_زواج
#بقلم_لؤلؤةالبحر
الحلقة الثانية

( مرحبا رجعتلكم واليوم جاي حبيبتي ميرا واليوم حنبدأ حياتنا الزوجية بعيدا عن وزارة الأوقاف وهيئة الأمم قصدي بعيد عن امي وخالتي )
قصي : الحمد لله على سلامتك يا قلبي ..كيف أن شاءالله ما تغلبتي
ميرا : الله يسلمك حبيبي لا والله كلو تمام …
قصي : الحمد لله …أمانة شو عملت خالتي …متخيلها لحقتك لباب الطيارة
ميرا : هههه يييي يا ويلي عليها والله قطعت حالها …والله لولاك غالي عليها ما رضيت
قصي : أي بس عليها غالي ….
ميرا : هههه لا عالكل ….شو وصلنا البيت
قصي : اه يا روحي وصلنا انزلي ..انزلي …
فوتي نورت ..نورت ..إن شاءالله الدار تعجبك …ترى كل العفش جديد مش تقولي جبت اشي مستعمل …فوتي ارتاحي هي شغلتلك المكيف واصل للمطعم اجيب عشا وجاي مش حتاخر ماشي ..نورت ..أميرتي نورت
( ورحت يا جماعة اجيب الغدا وارجع ركاض عريس واليوم الوحيد الي سمحتلي فيه الشركة إجازة يعني ثاني يوم مداوم وعلى علمكم دوام الخليج أقل شي 8 ساعات بتروح تزحف زحف …مالكم بطولة السيرة جبت الغدا وصاروخ عالدار بفتح الباب ..)
قصي : ميرا …أميرتي …مرمورتي
ميرا : هون ..هون حبيبي تعال
قصي : هون وين ..وينك ..يا ويلي شو مطلعك فوق المجلى شو بتساوي
ميرا : بنظف حبيبي بنظف ..احسن دق الحديد وهو حامي ..عبيلك سطل مي وناولني اغسل هالحيطان عبي ..عبي …
قصي : ميرا حبيبتي شو عبي ..ومي …اليوم جيتي ..مالك …من عقلك ..وين الدلع وين النعومة…ولك حتوقعي الخزانة بتتحملش. .يا …ميرا ….لا والله ام قصي رقم 2 عندي بالدار الظاهر زبطت معي
ميرا : بتحكي شي حبيبي ..
قصي : لا حبيبتي بدك مي خذي خذي
ميرا : قصي شوف وين بترش عبيتني مي
قصي : تواخذنيش بطلت اشوف …ليفي ليفي …شدي كمان شدي …الله يسامحك يما ..
( وهيك قضينا اول ليلة نليف بالمطبخ ونرتب بالدار لنهديت ونمت )
ميرا : صباح الخير حبيبي …قوم جهزتلك الفطور
قصي : يسعد صباحك يا احلى ميرا بالدنيا ….يا عيني فطور معقول …
أخيرا حد جهزلي فطور ..ومش حروح أفطر بالشغل …
ميرا : ولو عيب تفطر بره وانا موجودة ..يلا غسل وتعال وهي القهوة عالنار …
قصي : أمم ريحة القهوة ياعمي محلا الجيزة تصبح عريحة قهوة وعالفطور..صح وين الفطور ….
ميرا ( مستغربة ): هيو قدامك
قصي ( متعجب) : وينه …قصدك كاسة الحليب والكعكه
ميرا : اه حبيبي …هيك انا بفطر
قصي : حبيبتي هاظ اكل اطفال …انا بدي اكل ..أكل ..خبز جبنة بيض ….انا عبيتلك الثلاجة فتحتيها شكلك ما شفتيش
ميرا : لا شفت …بس انا بفطر حليب
قصي : وانا شو حكولك مفطوم جديد …خلص تزعليش ..تزعليش مالو الحليب والله بجنن …ها هيني شربتو واكلت الكعكة ها شوفي ….بس بنعوضها بالغدا ماشي …
ميرا : اممم …ماشي …متل ما بدك مع انه امك حكت تتمصرفوش. .بس يلا …خد هي القهوة ..
قصي : أحلى قهوة بذوقها بحياتي …ليش مرة …فش سكر ….شكلك مندليتيش عالسكر حبيبتي
ميرا : لا شفته بس انا بحبها سادة ..
قصي : يا حبيبي. …تسلم ايدك ام قصي ..قصدي ميرا …حبيبتي
( وهيك يا جماعة جمطتها ولبست وطلعت عالشغل وبقنع حالي بهمش عروس وبتدلل وكمان بنت خالتي عليم الله لو زعلتها لا ألقى خالتي طالعتلي من التلفون …طلعت وحلمي كبير اروح الاقي غدا معتبر …اكيد طالعة شاطرة لامها وامي ..خلصت دوامي وروحت )
قصي : حبيبتي وينك الي ساعة بدق
ميرا : والله حبيبي ما سمعت من صوت المكيف والتفزيون والجوال فاضية بطاريتو عالشاحن. .فوت يعطيك العافية يا قلبي ….
قصي : يعافي عمرك يا عمري …شو مالك ليش بتدوري بأيدي. .هاي شنطة اللابتوب. …
ميرا : شايفتها حبيبي بس وينه
قصي: شو هووو الي وينه حبيبتي
ميرا : الغدا حبيبي مش حكيت رح نعوضها بالغدا …وأنا على لحم بطني من الفطور
قصي: ليش ما طبختي ….( مصدوم)
ميرا: لا ..مش حكيت بدك تجيب معك ..حتى بالإمارة حكتلك خالتي حكت تتمصرفوش وامسكو ايوكم
قصي: متى حكيت …يعني هسا فش اكل وانا معشم حالي على سفرة معتبرة بعد كاسة الحليب ..
ميرا 🙁 صافنة )
قصي : أمري لا الله اقليلي بيض وحطيلي جبنه….لافوت اغير
….
ميرا : قصي
قصي: عيونه …عملتي حبيبتي. ..
ميرا : خايفة انحرق تعال اقلي انت
( هون يا جماعة اتأكدت انه شو متدلعة لا هاي قليلة جنب خوفها انه تنحرق….مسكت أعصابي وقفت معها وقلينا هالبيض وعلى علمي حكتلها حطيلي اوكل عالارض قبال التلفزيون. ..بعرفش أنها متعودة حد يحطلها كمان…راحت حطت …اكلنا وفتت اغسل واعمل كاستين شاي حكيت لحالي بهمش ياولد دلعها واتدلع وهي حكت حتشيل الاكل رجعت وجهها بتفسرش وبتعيط
قصي : خير حبيبتي مالك مين زعلك شو فيه
ميرا ( بتبكي) : القلاية مش راضية تطلع عن المشمع ..ملزقة
قصي: ليش انتي مش حاطة العازل تحتها …
ميرا : لا نسيت …
( وهيك يا جماعة رفعت القلايةو شالت معها المشمع و السجادة الجديدة…الله وكيلكو حسيت هالحرق الي بالسجادة بقلبي ..دم قلبي دفعتو فيها وكانت هاي اول مقلب بوخدو من ميرا الاميرة دلوعة قلبي وحبيبة روحي
💑💑💑💑💑💑💑💑💑💑💑💑💑💑💑💑💑💑
#قصص_من_الواقع
#سنة_اولى_زواج
#بقلم_لؤلؤةالبحر
الحلقة الثالثة

( هيك ياجماعة الخير امتصيت اول صدمة ونزلت عالسوق اشتريت قطعة سجاد صغيرة وحطيتها فوق الحرق على أساس أنها ديكور لأنه الحرق جاي بنص السجادة ..كان لازم اتفرج عالتلفزيون ..مالو الاكل ع الواقف. ..ومضيت الموضوع كلو فدا عيون ميرا الاميرة يا جماعة ..ولازم انبسط انا عريس شو يعني سجادة وقلاية ايه فداها…قعدت معها بدي افهم شو بتعرف بالطبخ وشو ما بتعرف …المهم يا جماعة طلعت بعرف أكثر منها ….مش طلعت مفكرة انه حنقضيها مطاعم. ..اه مانا بالخليج ومصاري زي الرز مثل ما قالت …وبرضو قلت بهمش ياولد هاي بنت خالتك ودلوعتك ميرا الاميرة فرحت طلعتلها دفتر كانت كاتبته الوالدة الله يحفظها فيه كم طبخة عشان اسلك حالي فيهن …الله وكيلكو ما دخل مخها من الدفتر إلا طبخة واحدة شو هي يا حزركم…..بلاش تحزروش مش صعبة المجدرة…اه الي هي رز وعدس….عرفتوها…قالت اه بتحبها وبدها تعملها …قلت ماشي مجدرة ..مجدرة )
قصي (اول يوم): مسا الخير حبيبتي كيفك كيف قضيتي يومك
ميرا ( بدلع) : تمام يا عمري روح غير أما عاملتلك شو مجدرة بتوكل اصابعك وراها
قصي : يلا جاي ..جاي ..صح مرمورتي مش تحطي من غير العازل انتبهي
ميرا : ولا يهمك حبيبي اكيد ول هو انا غبيه
( حطت الاكل يا جماعة والأمانة لقيتها حاطة العازل حتى تحت الصحون الفاضية ماخذة حذرها وحطتلي صحن وقالتلي…
ميرا : اتفضل حبيبي مطرح ما يسري يمري
اكلت اول لقمة العدس بنفعصش الحبة قاسية ..اتكسرن سناني انا من غير اشي سناني بوجعني …
ميرا: مالك حبيبي مش عاجبك
قصي: لا عاجبني بس كيف طبختيه
ميرا :مثل ما كاتبة خالتي كاسة عدس كاسة رز مع كاستين مي عالنار مع ملح وفلفل. ..شو مكثرة فلفل ..استنى أذوق …
قصي : مالك ماعجبك. ..
ميرا : ليش العدس قاسي هاد شكلو مغشوش ..فش زي الي ببلدنا المفروض جبنا معنا
قصي : اممم مغشوش والا ما سلقتيه قبل لتطبخيه
ميرا: ليش بنسلق مش مكتوب يا حبيبي خالتي كاتبة كاستين وكاستين مي …طب كل سلطة
قصي : طب وين البصل الي عوجهو.والا مش مكتوب
ميرا : لا مكتوب بس بحبوش. …
( وهيك يا جماعة بلعت الصحن بلع من قهري وجوعي وهي المسكينة حست بغلطتها …فسكتت وثاني يوم لقيتها عاملة كمان مرة مجدرة بس هالمرة ولله الحمد سالقة العدس ..صح الملح زايد كان بس احسن من الي قبلو. ..وهيك قضينا 4 ايام تعمل مجدرة لزبطتها…وراحت لطبخة غيرها بعد ما العبد الفقير لله كره المجدرة وبطل يقدر يتصورها
…..
المهم يا جماعة الخير بيوم صحيت الصبح ..لقيتها بتلعب بنغمات جوالي ..
قصي : صباح الخير حبيبتي ليش صبحتي صاحية شكلك ما نمتي..شو بتعملي بجوالي
ميرا: صباحو حبيبي بدي اغيرلك النغمة …مبارح سجلتلك نغمة غير شكل
قصي: شو هي حبيبتي سمعيني
( سمعت وياريتني ماسمعت …طلعت حبيبتي مرمورتي مسجلة صوتي وانا بشخر بالليل ..وهي مش عارفة تنام مني ….كمان يا جماعة لازم أكون صامت بالليل …وهات ألحق وراها عشان اوخد الجوال وامسح صوت هالقطار الي طالع …والله الصراحة معها حق بس مش انه تسجلي اياه وتحطو رنه. ..عشان أصدق اني بشخر …..وهيك يا جماعة ضليت وراها لاخدته وهي زي الفأرة بتنط من مكان لمكان ..بس ليش الحكي والله بتجنن وكل يوم بحبها أكثر وبحب عفويتها. …الحب لا يعرف المستحيل مثل ما ابوي حب امي وأبو ميرا حب خالتي ..مساكين ..وانا جمعوني معهم
حبيباتي بكرا بنكمل بإذن الله

59 تعليقاً

اترك تعليقاً

لن يتم نشر عنوان بريدك الإلكتروني.