قصة الليلة بعنوان تحدي الرشاقة بقلم مال الشام

62 10٬585

قصة الليلة بعنوان تحدي الرشاقة بقلم مال الشام

هذه القصة تأتيكم من قسم المنوعات في زاكي, متابعة ممتعة, واترك لنا رأيك في القصة في التعليقات.

قصة الليلة بعنوان تحدي الرشاقة بقلم مال الشام
قصة الليلة بعنوان تحدي الرشاقة بقلم مال الشام

قصة الليلة بعنوان تحدي الرشاقة بقلم مال الشام

#تحدي_الرشاقة_بقلم_مال_الشام
#من_الارشيف… بناء على طلبكن..

 

 

الجزء الأول

 

تجوزت من تلت سنين… كنت كتير نحيفة و جسمي ما بيسمن و لا بيتغير كنت المدلله بما اني البنت الوحيدة على خمس شباب و شايفة حالي مو مسدئة و عاجبني طولي و عرضي دارسة لغة عربية بس جوزي ما خلاني اشتغل… متل اي تنين باول جوازتهن جوزي طاير عقلو فيني و انا حاطيتو جوا عيوني و البي مو مقصر علي شي الحمدلله… عصبي شوي بس قلبو طيب و من النوع الي بحب يشوف حالو بمرتو قدام اهلو… بعد الزواج بشي سنه و نص بلشت اسمن ادايئت شوي بس جوزي كان يقلي لا حليانه وهيك بتاخدي العئل و رفقاتي كل مين يشوفني يئلي يييييه كيف نصحانه توقعنا الكل يسمن الا انتي يا ريم… ما حسيت في تعليقات سلبيه بس الوزن الي كسبتو كان ملحوظ للكل… انا و جوزي اتفقنا نجيب ولد بعد خمس سنين ليكون صار النا بيتنا الخاص لان كنا مستأجرين جنب بيت حماي… حطيت لعلاقاتنا حدود من البدايه ما حبيت اعمل حالي الكنه المرضيه و المعدله كنت احترمهن و حطهن ع راسي بس بحدود و اتبعت هاد الشي من ايام الخطبه و قلت ببالي ازا ما عجبتن يفسخو الخطبة من هلا احسن ما اتشاطر هلا و بس التزم ببيتي بعد الزواج يطلقوني
حبيت حدد قوانين حياتي من البدايه..
فوت لعندهن ضيفه و كل جمعتين نعزمهن سهرة مرتبه لعنا و دللهن و الحمدلله استقرت علاقتنا
كان كل شي هادي و حياتي روتينيه لوقت ما لاحظت انو وزني زااد بشكل كبيييير مابعرف انا ما كنت عم لاحظ و لا الزياده صارت بشكل مفاجئ
تيابي ما عاد فاتو فيني صرت اخجل من زوجي و جيب تياب فضفاضه… طولي كان 164 ووزني 54 بهديك الفترة صار 74
هاد الشي جنني كيف وصلت لهل وزن شو عم يصير…
قررت راجع دكتورة اخدت موعد و فورا رحت… عملت تحاليل و فحوصات روتينيه قالتلي انو ماعندي اي مشاكل بس تغير بالهرمونات و لازم اتبع حمية و اعمل رياضه لنقص وزني…
بتعرفو شو يعني اني حسيت حالي تدمررررت
اكتئبت كتيررررر
نزلت عالسوق جبت تياب جديده و ضبيت تيابي القديمة ..
ووزني يزيد و يزيد… و انا بس عم راقب حالي ع المرايه و اتحسر..
اجت سهرة بيت حماي الي بعمللهن ياها كل جمعتين…
و زتت سلفتي هديك الكلمه… قالتلي و قدام الكل و قدام جوزي
(( لك ريم لتكوني حامل ليش هيك صاير جسمك والله كنتي متل الباربي ما شاء الله سلفي شو بغذيكي)) و ضحكت…
ابتسمت ابتسامة صفرا و فتت عالمطبخ و الكل لاحظ ردت فعلي… لحقني زوجي كنت عم اجلي و دموعي يهرو متل المطر.. قلي لك ليش بتبكي
كنت كتير معصبه و مو منتبهة ع حالي قلتلو ما عم تشوف مرت اخوك شو حكت مو عيب عليا شو ما عندها اخلاق

سامر: وطييييي صوتك ما قصدت شي المخلوقه
ريم: شوووو كيف ما حكت مو عيب تحكيني هيك قدام الكل… لف جوزي حوالين حالوو حط راسو بالارض و سلفتي اجت على صوتي

سلفتي: لك ريم والله مو قصدي شو صارلك

ريم: ما عم نحكي عنك حبيبتي عم بحكي انا و جوزي بموضوع خاص ياريت تطلعي و تتركينا!!

سلفتي: ايه لا بقى بكفي هيك حبيبتي جوزك طلب مني نبهك مشان وزنك فعلا يا داخل بين البصلة و قشرتها ما بنوبك غير ريحتها و طلعت و صارتتقول لجوزها يلا خلينا نروح ع بيتنا خيرا تعمل شرا تلقى…

و انا كان فيني عقل و طار اجا سامر بدو يحكي قلي مو هيك القصه والله
قلتلو ولا حرف مابدي اسمع شي.. كان هاد الموقف بداية لحياة جديدة بالنسبه الي و درس ما بنساه طول حياتي

 

#تحدي_الرشاقة_بقلم_مال_الشام

-2-

 

بطبيعة الحال تخانقت انا وجوزي
ضلينا نهارين ما نحكي بعض ابدا… و ما كنت حطلو اكل
تالت نهار رجع من الشغل معصبببب

سامر: كمان اليوم مافي غدا و بعدين مع هالحالة خلصنا بقى

ريم: و فوق غلطك عم تحكي كمان لك انا قصرت بحقك باكل انت قصرت بحقي باحترامي يعني غلطان اكتر!!!

سامر : انا ما طلبت منها تحرجك قلتلها تحكي بينك و بينا و بعرف زينب اقرب شي الك يعني ما حبيت قول لامي و لا لخواتي لانك رح تعتبريها كلمه من بيت احمى قلت زينب بتفتح الموضوع معك برواق شو بعرفني انها رح تعمل فصل ناقص..
ريم: انا مو سالتك؟ كم مرة سالتك ازا حاسسني سمنانه مبسوط بكسرة خاطري هلا!!
و ليك شو انا هاد جسمي ما رح غيرو لان هيك صار و انتهى الموضوع عجبك ليكنا عايشبن ما عجبك برجع ع بيت اهلي…
قعد عالكرسي و هو تعبان

سامر: اعمليلي لقمة اكل ياعمري والله هلكان… و عاجبني لا تضبي شي… مو مسدئة و تضبي يعني…
استعجلي بالاكل

زعلت عليه كيف تعبان من الشغل و فتت عملنا اكل و تغدينا و بلش الجو يرجع لطبيعتو بيناتنا بس انا من جوا ما ارتحت و لا يوم… جسمي بطل يلبقلو اللبس السبور انحرمت من لبس التياب الي بحبها
صرت اتعب بسرعه اكبر و اكلي زاد بدون ما حس ع حالي بس كنت انتبه من تفقيس جوزي علي الي مابعرف هل كان مقصود و لا كان عفوي ومع الوقت تعودت على مزحو و بطلت اتحسس… طلعنا عالسوق نجيب فستان لعرس رفيقتي و انو لاقي شي مناسب لوزني #عبث…
شفت فستان احمر حرير و عليه لولو من عالصدر طار عقل جوزي فيه قلي تعي نجيبو بجن ازا ماشفتو عليكي و فات عالمحل قدامي و انا تكركبت لان عرفانه مستحيييييل يفوت فيني… فتت وراه سال صاحبة المحل قالتلو يلا تكرمو و منراعيكن
بس فتت وراه و شافتني قالتلو عفوا الفستان الها؟ و اشرت علي باصبعها و انا قلب لون وشي
توقعت شو رح تحكي بس هي كانت كتير اكابر قالتلو بتعرف عندنا موديل احلى من هاد و راحت جابت واحد فضفاض

صاحبة المحل: هاد ارخص و انيق

بس جوزي ما كان يفهم و لا يكن… اخر شي قلتلو سامر خلص الفستان ما بيجي علي هاد بدو جسم نحيف و طلعت من المحل و هو لحقني ركبت السيارة و صرت ابكي

سامر: والله ما كان قصدي يشهد علي ربي مابعرف فكرت في مقاسات والله بس اشتهيتو عليكي حسيتو شفق علي….

ريم: ما صار شي انا عم اتحسس كتير هالايام..
سامر: حبيبتي ازا متدايئة ليش ما تنحفي؟
ريم : كيييف شو بدي اعمل يعني والله مخنوقه بس شو طالع بايدي… اعمل عملية شفط دهون؟
ضحك كتير بالاول..

سامر: وليه جدبه ما بدها كل هالقد بس شوية رياضه و نظام غذائي و بترجعي متل اول و انا بساعدك شو قلتي؟

ريم: يا ترى بمشي الحال؟

سامر: انا رفيقي والله كان كتيررررر سمين هيك و عمل متل ما قلتلك و هلا وزنو صار احسن شو رايك اسحبو بالحكي و جبلك الريجيم الي عملو؟؟؟
ريم: ايه امانه بكرة اسالو و احكيلي
سامر: طيب هلا مابدنا نجيب فستان؟
ريم: لك العرس كلو مابدي روحو مابدي شوف حدا اصلا…. خدني عالبيت..
تاني نهار كانت همتي عاليه و قررت التزم بالريجيم الي رح يجيبو جوزي قد ما كان صعب و قررت اعمل رياضه كتيرررر…
والله اجا جوزي قعدنا و فورا سالتو عن الريجيم طلع ورقه من جيبتو و قلي هي كل شي مكتوب هون بس عنجد الله يعينك
قلتلو شو يعني
قلي افتحي بتعرفي
فتحتا و انصدمت بالي مكتوب… كان مكتوب التالي:

#يتبع

 

#تحدي_الرشاقة_بقلم_مال_الشام

الجزء الثالث
-3-

 

المكونات:
– كمية قليلة من الكمون
– كوب من الماء المغلي
– ليمونة مقطعة لشرائح

طريقة الإعداد:

ينقع قليل من الكمون في ماء مغلي مع شرائح الليمون، يترك الخليط طوال الليل ويشرب صباحاً على الريق ( يفصل تسخينه ليصبح دافئ) تساعد هذه الوصفة على التخلص من السمنة.
– وجبة الافطار تعد من الضروريات و لكن يمنع تناول الخبز الابيض او المربى او النشويات و السكريات….
-استبدل في المنزل الخبز الابيض بالخبز الاسمر سوف تعتاد تدريجيا على مذاقه
-يتم ممارسة نشاط المشي #السريع ثلاث ساعات يوميا ساعه ونصف صباحا بعد الافطار و ساعه ونصف مساءا قبل النوم
– يتم التوقف عن الاكل تماما بعد الساعه الخامسه عصرا لان الجسم يبدأ يحول الطعام الي دهون تتجمع في الجسد..
-الغداء سوف يكون لمدة شهر عبارة عن صجن سلطة بدون زيت زيتون + قطعة من الجاج او اللحم و لكن لن يحتوي على اي نشويات ك البطاطة او الخبز او الرز

– اكثري من شرب الماء و العصائر و الفواكه باستثناء الموز…

النتيجة في شهر خسارة 7 كيلو غرام على الاقل…

سكرت الورقه و صفنت بجوزي
ريم: يعني رفيقك بيمزح معنا بالله؟؟ شو بدو ياني موت؟ قلك انا هاد جسمي و خلص بس رح بطل اتعشىو بنحف عالاكيد مافي داعي لكل هاللبكة..
سامر: ايه متل مابدك اعطيني هالورقه…
ريم : لييش؟؟
سامر: مو انتي مابدك ياها بدي ارميها اعطيني

و اخدها و حطها بجيبتو و انا ما رضيت اكول شي و ضليت فكر كيف بدي اتحمل هيك ريجيم!!
بعدين وين بدي امشي هون بالبيت مثلا؟؟
ضليت فكر و فكر و فكرررر و وقت النوم لف جوزي وشو لينام قمت من جنبو سحبت الورقه و طلعت ع الصالون رجعت اقرأها و ضليت عيد فيها بعدين قمت عالمطبخ عملت الليمون قطعتو شرائح نقعتو مع الكمون بمي دافيه و رجعت لنام و حطيت الورقة تحت راسي…

 

#تحدي_الرشاقة_بقلم_مال_الشام

الجزء الرابع
-4-

 

دعيت ربي كتير يقويني لاتحمل و ما اضعف لان كتير اوقات كنت جرب اعمل ريجيم و ما قااوم الاكل وحس بالجوع لان جسمي تعود ع كمية اكل معينه… دايما كنت حس باليأس و بعدين قول خلص انا لا اول وحده ولا اخر وحده جسمها هيك… و شو يعني بالله خلص انا تجوزت و جوزي ابن حلال ما رح يزعل…
بس هالمرة غير… قلت وجع ساعه ولا وجع كل ساعه و ازا متجوزه ما بحقلي البس الي بدي ياه ببيتي؟ ما بحقلي حس بثقتي بحالي و ما خلي يجوزي يتطلع ع باقي النسوان؟
شو الاكل اهم من سعادتي و راحة بالي؟ فترة و بتمضى و لازم اتوكل على الله…
صرت اصحى اشرب كاسة كبيرة ليمون و كمون و زيدلهن زنجبيل و طعمتو كانت مو طيبه ابدا سكر انفي و اشربو بسرعه و حس بشوية مغص و قوم اشتغل البيت و حاول اشتغل بسرعه و اتحرك بين الغرف حتى و انا عم اجلي اركض بمكاني قول مشان اكسب وقت الي بشوفني يفكرني جنيت… خلص شغلي و اعمل لحالي فطور
رغيف خبز اسمر و خيارتين و لبنه و كل يوم حاول غير مشان ما مل و بس لاقي حالي فاضيه شغل اغاني و ارقص لحالي هههههه
و قبل ما يجي جوزي اخود دش لان بكون عرقت كتير و جهز لحالي صحن السلطة و قطعة فواكه و اهم شي الخبز الاسمر…
تعزبببت كتيييييير كنت حس رح اقع ع طولي من الجوع اشتهي الاكل بس شم ريحتو يغط ع قلبي ما بتسدئو ازا بئلكن احيانا كنت ابكي!!!
شو هاد ابتلاء ياربي…
جوزي حس وشي متغير و تعبانه

سامر: خلص كلي اكل عادي.. ما عاد بدي تنحفي
ريم: عنجد؟
سامر: ايه بخاف يصيرلك شي!!

انبسطت كتيرررر و قلت خلص ازا القاضي راضي لشو هاللبكة و التعب…
فتت ع غرفتي و مبسوطه كتير انو ارتحت من هالهم و التعب و طاير عئلي انو الحمدلله عندي هيك رجال ابن حلال و بخاف الله فيني… اجت عيني ع تيابي القديمه..
فتحت الصندوق و طلعتهن و صرت اتفرج عليهن…
كان في فستان قصير ابيض
كنت البسو مع كعب فضي و افرد شعري و اتفتل بهل بيت… قمت جربتو لقيت رجلي مترهلين و فخادي مو حلوين شلحتو فورا و انقهرت
و هاد الجينز الازرق لبستو مع كنزة حفر حمرا لما اجو رفقاتي و طار عقلهن… قمت جربهن الجبنز ما فات فيني و الكنزة فاتت بس حسيت ايدي مو حلوين كانو كتير احلى…
طلعت فستان اسود شيفون عليه ورد احمر قمت علقتو ع مرايتي و سكرت باب غرفتي و نمت…
اجا جوزي قلي شبك تعبانه شي؟

ريم يلا بدي نام
سامر : لك شو في تعبتي مو هيك؟ الساعه7 شو تنامي؟
ريم: جوعانه بس مابدي اكول لهيك رح نام .
سامر: خلص بدك تكملي…
قمت شغلت الضو و اشرتلو على الفستان الي معلقتو

ريم: بس يفوت فيني هاد الفستان بوقف الريجيم
و دموعي على وشي..
سامر: طيب حبيبتي ان شاء الله بمشي الحال..
تعي اعمليلنا عصير ليمون و نعنع فرش بلا سكر و كلي تفاحة و منعمل سندويشه صغيرة بالخبز الاسمر..
سامر: لا مابدي
ريم: مابصير خليكي امشي بالتدريج بلا ما يصرلك شي يلا تعي بلا عناد و لا تكبري راس..

مشي اول يوم… و مضيت تاني نهار كمان بصعوبة كتيره كنت اشتهي الحلو و الرز… بعدين اجا اليوم التالت

#يتبع

 

#تحدي_الرشاقه_بقلم_مال_الشام

الجزء الخامس
-5-

 

كنت اتكاسل عن الرياضه بس بعدين خفت لان سمعت انو ازا نزل وزني و ما عملت رياضه رح يدبل الجلد و يترهل و لازم اعمل رياضه لينشد جسمي و اي ريجيم بلا رياضه هو محاوله فاشله… كنت حاول ضل عم حوص بالبيت بعدين فضيت شوية غراض صفيتهن ع جنب و شغلت هيك اغنية و صرت روح و اجي و امشي بسرعه لف المطبخ و الصالة و اوضة الضيوف و بعدين اعمل تمرين المعده شي 50 مرة مشان يشد عضلات البطن لان كان طالعلي كرش 😭😭😭
و تعودت على طعمة الخبز الاسمر صرت ما ادايق كتير مع انو بالاول كنت اتعزب كتير و حس حالي ما اكلت و جبت عصير برتقال بدون سكر طعمتو كتير طيبه اطيب من الي مع سكر و خليه يتلج و يصير بارد و استمتع فيه صرت حاول استمتع و ما اقهر حالي كتير و مشان ما ايئس حكيت مع امي بالموضوع و قالتلي رح صير اجي لعندك و نطلع نتمشى انا و انتي المشي منيح الك..
نزلت ع السوق و رحت ع المحل الي جوزي اشتهى يجبلي منو الفستان الاحمر رحت اشتريتو و كان طاير عئلي و متشجعة و جبت كم قطعة و رجعت خبيتهن… لقيت جوزي بالبيت عم بتحمم ركضت لخبيهن ضبيتهن بخزانتي و فجأة رن موبايلو مسكتو و لقيت مكتوب ايمن فكرتو اخي قمت رديت وازا صوت بنت!!!!
ريم: الو مين معي؟
قام سكرت الخط
انا ضليت على جمدتي و جوزي طلع من الغرفه و انا حسيت حالي دخت و ما عاد شايفه قدامي
سامر: شو وين كاينه… ومافي اكل كمان… شو بدي اكول انا ليش ما قلتيلي روح اكول عند امي
ليش ما بتردي…
ريييم وين شاردة اجا وقف قدامي وقلي شو في صاير شييي؟
وقفت…قلتلو مين هي؟

سامر: مين؟
ربم: بتعرف انو انت ما عندك و لا ذرة شرف؟
بتعرف انك ما بتخاف الله؟؟؟
انت تااافه
لك انا متحملتك و متحمله كل شي و انت بتخوووووني لك بتخوني انا بتخوووني!!
قام ضربني كف ما كنت حاسبتلو حساب بهل لحظة بالتحديد..

سامر: انتي جنيتي يعني شو الجوع ماثر عليكي
استفزني اكتر قلتلو لك و عم تتمسخرررر انا عم فكر فيييك و انت عم تعشق و تخووون و رحت عالخزانه طلعت الفستان

ريم: لك جايبتو البسلك يااااه لك جايبتو لانك حبيتووو
جبتلها متلوو؟؟؟ اخدتلها واااحد يا خاييين و صرت قطع الفستان و ابكي اجا مسكني و قلي مشان الله شبك
والله انا كنت بدي قلك بس كيف عرفتتتي
مسكت تليفونو و ضربتو بالحيط

ريم: ايمن اتصل علييييك
اتصلت عليك الحقيرة.. مين هييي مين هييي فهمني ميييين هي

سامر: هي روان…

ريم: مين روان؟
قعد عالتخت و رجع قلي: روان….

ريم: من ايمت رجعتو تحكو مو هي تجوزت كمان لك انا مو من ايام الخطبه قلتلك بدك ياها انا بقنع اهلك يخطبولك ياها و قلتلي انو اقتنعت فيني!!! لك انا مو قلتلك بباركلك اول النااااس انت ما عندك و لا ذرة انسانيه!!

سامر: خليني بس فهمك…
قعدت بارضي و ما كنت قادرة احكي و بعدين بلش يحكي و قال
#يتبع

 

#تحدي_الرشاقة_بقلم_مال_الشام

الجزء السادس

-6-

 

سامر: والله فهمانه غلط هي عم تحاول تحكي معي قال رح تطلق و بدا نرجع لبعض بس انا قلعتها…

ريم: ليش ما حكيتلي؟ مفكرني بنص عقل لسدئك…

قام ليجيب الموبايل لقاه مكسور قلي لو ما كسرتيه كنت بورجيكي محادثات بس كسرتيه كيف اثبتلك!!!

قمت اعطيتو موبايلي

ريم: اتصل عليا قدامي لشوف شو بدا تحكي
سامر: بس انا مو حافظ رقمها!!
طلعت شريحتو و حطيتها بموبايلي

ريم: هلا هيك الرقم بينزل على جهازي

سامر: يا لطيف ما اقواكي عقولكن ما بتشتغل الا بهل قصص

ما اعطيتو اي ردت فعل فلتلو يلا اتصل… اخد الجوال و رنلها…

روان: الو
سامر: الو
روان: ردت علي وحده معقول مرتك لتكون زعلت هههههه
سامر: انتي شو بدك؟
روان: بدي ياك صعبه هي؟
سامر: طيب انا شو قلتلك
روان: قلتلي كل واحد تجوز و راح بطريقو و ما النا نصيب بس انا متاكده انك خايف من مرتك ليك خليها ع زمتك و منتجوز بالسر شو قلت..؟
اخدت الجوال منو
ريم: حبيبتي ليش بالسر والله الي ساعه بقنعو قلتلو حرام اتجوزا شكلها مو ملاقيه رجال بس عم يقلي قال ما ببدل غزلانو بقرود!
قام سكرت الخط بوشي
سامر: خلص مشي الحال؟
ريم: لا…
قاطعتو لاسبوع بس كنت عم اتدلل دلال لان تاكدت انو مو ذنبو و كان خايف يواجهني… و بالاخير رحت تحركشتو

ريم: بدي حق الفستان الي قطعتو بسببك …
سامر: بسيطة بس هيك؟
ريم: لا….موضوع انك خبيت علي ما رح سامحك عليه و غدا مافي اليوم و انا بدي غراض لاكلي مشان الريجيم كتبتهن على ورقه..
طلبت منو لبن خالي الدسم و حليب منزوع الدسم و عسل طبيعي وخبز توست مشان الافطار و بسكويت خاص للريجيم…
و كملت الريجيم و قاومت كتير رغبات وكتير شغلات كانت بنفسي
كتير كنت بالليل حس معدتي بتوجعني و ابكي و نام… و ايام قول معقول انو انحف مستاهل هالعزاب لوقت مرقو 45 يوووم بالزببببببط طلعت عالميزان و شفت هاك الرقم 😍😍😍😍😍😍

يتبع

 

#تحدي_الرشاقة_بقلم_مال_الشام

الجزء السابع

-7-

كنت نازله 9 كيلو و ما تفاجئت لان كان باين على جسمي التغير… فرحت قد الدنيه والله… و قلت بدي كمل انزل كمان لوصل لوزن 60 ووقف و بس شفت النتيجة فرق معي الوضع كتير كتير و تحمست و نفسيتي انقلبت قلب و ما عاد ادايقت من الريجيم لان شفت النتيجة بعيوني و بلشت حب جسمي و اهم شي بالموضوع كان الرياضه… السر كان الرياضه و المي و #الارادة

كملت كمان شهر يعني التزمت بهاد الريجيم 55 يوم بالضبط…. رجعت جبت تياب متل ما بحب حتى بين علي انو صغرت كتيرررر لان السمنه بتكبر الوحده و بتظلمها… حسيت وشي تعب بس قلت مو مشكله بهتم فيه و كان من نظامي انو لازم ضل اكول عسل كل يوم ملعقه و ركزت على فواكه و عملت ماسكات لبشرتي لان طبيعي تتعب ع خسارة الوزن…
هلا نفسيتي تغيرت و جوزي مبسوط كتير علي و شايفني ومو مسدئ و بلبس الي بدي ياه و اهلي مبسوطين ع فرق نفسيتي ما عم قصر ع حالي باللبس بس عطول بخاف ارجع اسمن لهيك ما باكول كل شي بدي
يلا عادي
اصلا السكر بيعمل سكري و الملح بيعمل ضغط و الدسم بيعمل كولسترول 😂😂😂
بس عم اعمل رياضه ساعه بالنهار و هلا ناويه بيع اسوارة و جيب جهاز مشي اريحلي و ببطل خاف و شو فايدتني الاسوارة ازا نفسيتي او صحتي تراجعت..
عم حاول وازن بين رغباتي ووزني و الحمدلله الموضوع صار بسيط و عالتعويد ما بعود يزعج ابدا…بيني وبينكن ما عاد بدي ولاد لان سمعت عالحمل بدي ريجيم تاني و انا ما خلصت من الاولاني😂😂😂
نصيحة لا تحرمي حالك من الصحة و الراحه النفسيه واجهي الصعوبات و تحملي لان مافي شي بيجي ببساطه و النتيجة بتستاهل التعب و انتي اقوى من انك تستلمي لوزنك من حقك تلبسي الي بتشتهيه و من حقك تحسي بعمرك الطبيعي … من حقك تعيشي عمرك بارتياح و رضى..
انا بلشت… و وصلت
وانتي شو بعدك ناطرة؟ 😉

سامر: ريييييييييم

ريم: شووو ليش عم تعيط؟؟

سامر: انتي اكلتي دلو البوظا الي كان بالتلااااااجه!!!

ريم: اه 😰… دلو البوظا ☺… ييييي 🙈🙈🙈

#تمت

عرض التعليقات (62)