الرئيسة / منوعات / قصة الليلة بعنوان الحرب الباردة بقلم هلا الغرابلي الجزء الأول

قصة الليلة بعنوان الحرب الباردة بقلم هلا الغرابلي الجزء الأول

/
/
/
8748 مشاهدات

قصة الليلة بعنوان الحرب الباردة بقلم هلا الغرابلي الجزء الأول

 

قصة الليلة بعنوان الحرب الباردة بقلم هلا الغرابلي الجزء الأول, هذه القصة تأتيكم من قسم المنوعات في زاكي, اكتب لنا رأيك في التعليقات, لتصلك كامل أجزاء القصة.
قصة الليلة بعنوان الحرب الباردة بقلم هلا الغرابلي الجزء الأول, هذه القصة تأتيكم من قسم المنوعات في زاكي, اكتب لنا رأيك في التعليقات, لتصلك كامل أجزاء القصة.

 

قصة الليلة بعنوان الحرب الباردة بقلم هلا الغرابلي الجزء الأول

قصة الليلة بعنوان الحرب الباردة بقلم هلا الغرابلي الجزء الأول, هذه القصة تأتيكم من قسم المنوعات في زاكي, اكتب لنا رأيك في التعليقات, لتصلك كامل أجزاء القصة.

 

#الحرب_الباردة_بقلم_هلاغرابلي
#الجزء الاول
فادي:حبيبي رهف شو رأيك تروحي تقضي نهار عند اختي فدوى؟
رهف:ما عم حب روح عندا ،كل ما بروح بصدف اولاد جارتا يلي ساكنة تحتا و بصير يزن يعلق معن و انا بصير فك بيناتن و بيجعني راسي
فادي: ولله حرام بتنبسط فيكي و حتى لو الاولاد علقو مع بعضن ما دققو بضلو اولاد،البسي لوصلك انا و رايح على شغلي و انا و راجع بمر بسهر عندا و منرجع عالبيت ،رح اتصل فيا و ردلا خبر
رهف(متململة):طيب
لبست و لبست ابني يزن و نزلنا انا و زوجي ،طلعنا بالسيارة و وصلني على بيت اختو فدوى ،فتت لعندا و سلمت عليا
رهف:لحمدلله اولاد جارتك ما عندك
فدوى:هههههه عملولك عقدة ،ولله ما بعرف ليش هيك بيصدف حظك على حظن ،شو اخبارك انت و فادي؟
رهف:مناح لحمدلله
فدوى:شو صار معكن بقصة الاولاد ،ما اتفقتو على شي؟
رهف:لا انا ما بدي ،ليكبر يزن شوي و يوعى اكتر و تستقر الامور بيناتنا انا و فادي
فدوى:ولله اخي فادي متحسن عن قبل ،لحمدلله الله هداه و صار من شغلو لبيتو
رهف:اي لحمدلله هالفترة صاير اخوكي بجنن و هاي دقينا عالخشب كرمال ما نطرقو عين هههههههه
فدوى:ما بقا عم يدقق عليكي؟
رهف:عم يدقق بس اخف من قبل ،يعني عم يخليني انزل على الحديقة احيانا انا و يزن لحالنا
فدوى :اي منيح ،انا قايمة تبل التبولة ،وقت دقلي فادي و قلي انت جاي كنت عم افرم البقدونس لليالنجي بس غيرت رأيي و قلت بعملا تبولة
رهف:ولله عادي ما تلتزمي فيني ،اعمليا يالنجي و هاتي انا بساعدك ب لفن
فدوى:هيك قولتك ،طيب قايمة تبل الحشوة
قامت فدوى عالمطبخ و انا بقيت قاعدة بغرفة القعدة ،رن الجرس
فدوى:رهف ..افتحي الباب الله يخليكي ايدي وسخين
رهف:اي يلا
قمت فتحت الباب و طلعت بوجهي سهى جارة بنت حمايي فدوى و معاها اولادا
رهف:اهلين سهى تفضلي
سهى: اهلين فيكي، وينا فدوى؟
رهف:جوا بالمطبخ
سهى:فوتو ماما ،قليلا بس تحطلي رائد و قيصر عندا لانو رايحة مشوار شغلة ساعة و نص ،ما بطول ،بدي بدل هالاغراض من السوق مبارح اشتريتن
رهف:اي ماشي تكرمي …فوتو حبيباتي …الله معك
سكرت الباب و اجت فدوى من المطبخ و شافت اولاد سهى،اطلعنا ببعض و ضحكنا
فدوى:عنجد شو هالحظ يلي عليكي
رهف:يلا بسيطة ..جاي ساعدك
فتنا على المطبخ انا و فدوى
فدوى:شفتيا لسهى؟
رهف:ايه
فدوى:شفتي اديش بتحط مكياج على وجها ولله بتطلع متل الفظيعة بالبستان ولا كانها بتكب علبة البارفان على حالا
رهف:اي انتبهت مكياجا اوفر كتير، دخيلك شو بدنا بالعالم ،يعني زوجا ما شايفا !!
فدوى:مين !علاء!ولله ما في منو هالعلاء بكل الحارة ،رجال ادمي و راكز بس بتطلع هيك من وراه هلأ شوفيا بس ترجع ،بختفي كل مكياجا ،بتمسحو قبل ما توصل
رهف:عنجد !!! يا معقول في نسوان هيك!
فدوى:ايه ،الله يهديا احسن الشي و لا يبتلينا
رهف:بس بحسا ما بتهضمني هالسهى بتسلم علي من راس مناخيرا حتى كلمة كيفك ما بتقلي
فدوى:اي هي هيك طبعا
بعد ما تغديت عند بيت حمايي و زادت المشاكل بين يزن و اولاد سهى ،ضجت كتير و لبست علي و قررت ارجع على بيتي
رهف:خلص بدي روح
فدوى:خلص اقعدي شو صرلك ،هلأ بيجي فادي و بترجعي معو
رهف:خلص باخد تكسي و برجع لحالي …يلا يزن
مسكت ايد ابني و فتحت الباب و بوستا لبنت حمايي و الا بطلعة علاء زوجا لسهى
علاء:مسالخير
رهف-فدوى:مسالنور
فدوى:علاء اولادك عندي و مرتك نزلت على السوق
علاء:اه بالله ابعتيلي اياهن ،كيفو فادي؟
رهف:لحمدلله تمام
علاء:سلميلي عليه، الي زمان ما شفتو
رهف:الله يسلمك
فدوى:كان بدو يجي بس مرتو استعجلت و بدا ترجع على بيتا ،خلص فوتي ولله ما حلوة تروحي لحالك ،عتمت الدنيا
قرصتني فدوى من ايدي بمعنى انو خلص اجا ياخد اولادو
رهف:يلا صرت لابسة و ما في مشكلة باخد تكسي
علاء:راجعة على بيتك؟ ،خلص انا بوصلك
رهف:لا شكرا ما تعذب حالك
علاء:ولو ،زوجك خادمنا من قبل كذا خدمة
فدوى:طيب اذا مصرة على الروحة خلي علاء يوصلك احسن ما توقفي بالشارع و تنطري تكسي،بلكي ادايق فادي من رجعتك لحالك
رهف:طيب
علاء:بس وصلا برجع باخد اولادي
نزلت انا و علاء و طلعنا بالسيارة و طول الطريق كنا عم نحكي عن الاولاد و عن فادي و شغلو
رهف:هون عندك علاء يسلم ايديك يارب
علاء:الله يسلمك ،سلمي على فادي
حطيت ايدي على الباب و بدي افتحو و اطلع ،لمحت سيارة فادي مرت من جنبي و جنبو وحدة،جمدت بأرضي ،قلت يمكن تهيألي فتحت الباب و حطيت رجلي على الارض و بدي انزل
علاء:ارجعي فوتي و سكريه بسرعة
رهف:عفوا
شغل السيارة و انا نص جسمي صار برا السيارة ،سحبني من ايدي و شدني لجوا و سكر بالباب بأيدو و لف بالسيارة
رهف:شو صار معك؟
#الجزء التاني :
رهف:لوين رايح؟ ،انا هون بيتي
رجعت جلست قعدتي اطلعت عليه،تغير لون وجهو لعلاء فورا و ضاعت ملامحو و صار يخبط اصابعو على كيدون السيارة بتوتر
علاء(بعصبية):اهدي شوي
مشي بالسيارة و وقف بعد شوي و جمدنا نحن الاتنين قدام المنظر ،كانت قدامنا سيارة زوجي ،صفت على الطريق و نزلت منا سهى مرتو لعلاء ، اشرتلو لزوجي بأيدا هي و عم تبتسم ،تابع زوجي طريقو اما سهى وقفت تكسي و طلعت فيا
رهف:هاي سيارة فادي
علاء:…
رهف:و هاي …
سكتت و ما تابعت حكي لانو تذكرت انو زوجا قاعد جنبي ، اطلعت على وجهو ،كان حاطط ايدو بتمو و عم يعض عليها و بعدين صار يصرخ و يضرب الكيدون بأيدو، خاف ابني يزن و طمر راسو بحضني و ضميتو ،كانت ردة فعلي على مشهد خيانة زوجي هادية اكتر من المفروض لانو هاي ما اول مرة بخوني فيها و بعرف هالشي ،بس علاء كانت الصدمة كبيرة عليه بس خفت على حالي من ردة فعلو
رهف:طول بالك بلكي ما في شي متل ما انت مفكر ،يعني هاي انا قاعدة بسيارتك و ما في شي بيناتنا ،ان بعض الظن اثم
مسكني من ايدي و صار يهزني و ياخدني يمين و شمال،شمال و يمين
علاء: زوجك شو عم يعمل مع مرتي ،شفتن طالعين من مدخل بنايتكن ،شو عم يعملو فوق
رهف:شو دخلني انا ….هاي مرتك و هادا زوجي و انا شو دخلني …متلي متلك …(تبكي)زوجي زبالة و وسخ حقير خاين هاي ما اول مرة بشوف بعيني هالشي و مرتك كمان وحدة….عفوا بعتذر
سكتت و فتحت الباب و نزلت انا و عم ابكي و هو عم يسب و يصرخ،طلعت على الرصيف انا و ماسكة ايد ابني يزن و مشيت بعيد عن سيارة علاء،رعدت الدنيا و بلشت تمطر و انا عم اتذكر اكام مرة بعتني لعند اختو و صدفت اولاد سهى عند اختو و فكرت الموضوع مجرد صدفة فقط ،وقفت لاخد تكسي و ارجع على البيت ،شفت سيارة علاء جاي بأتجاهي،نزلت راسي و عملت حالي ما شايفتو،زمرلي بالسيارة و نزل الشباك
علاء:انا بعتذر … اطلعي لوصلك
رهف:برجع لحالي
علاء:اذا بتريدي ما معقول اتركك تحت هالمطر واقفة و ناطرة تكسي…اذا بتريدي
رهف:طيب
رجعت طلعت بالسيارة ،مسك علاء موبايلو و اتصل بحدا
علاء:الو ….انت بالبيت؟….رجع زوجك من الشغل ….لا ولاشي …انا جاي لعندك ….لاجي بحكيلك …ناهد لاجي بحكيلك ما تخبري سهى انو اتصلت فيكي و قلت انو جاي لعندك …ماشي …سلام
سكر الموبايل و وصلني على مدخل بنايتي
علاء:بدي اطلب منك طلب
رهف:تفضل
علاء:ما بدي تحكي لفادي انو انا شفتو مع مرتي او حتى انت تواجهيه انك شفتيه …
رهف:ليش؟بدك تقتلو؟
علاء:لا ، ما بوسخ ايدي فيه و لا حتى فيا قليلة هالشرف ،ممكن تنفذيلي هالطلب؟
رهف:….
علاء:صدقيني كرمالي و كرمالك…
رهف:هاي عم يتصل فيني
علاء:ما تردي ،فصلي بوجهو حتى يعرف انك عالطريق
رهف:بس انا تأخرت كتير عالبيت
علاء:خبريه انو …انو …نزل دولاب سيارتي على الطريق
رهف:طيب
علاء:و انا بخلي اختي ناهد تتواصل معك لتقلك شو تعملي ؟
رهف:شو بدي اعمل يعني؟طلاق ما بقدر اطلق منو ،و خياناتو صرت متقبلتا ،امر مفروغ منو
علاء :طيب ماشي بس انا بدي طلق
رهف:طلق و انا شو دخلني ؟
علاء:بعرف بس انا عم احسب كرمال اولادي ،فهمتي علي؟
رهف:لا ما فهمت ،انا شو بدي اعمل لاولادك كمان ؟
علاء:طيب ،هادا الحكي بدو قعدة ،هاي وصلنا ،متل ما اتفقنا اذا بتريدي ما تخبريه ،صدقيني ما رح تندمي او تخسري شي
رهف:طيب ،يعطيك العافية على التوصيلة
نزلت انا و يزن و طلعنا على البيت ،شفت فادي قاعد عم يتفرج على التلفزيون و ناطرني
رهف:مسالخير
فادي:وينك لهلأ ،كيف بتخليه لعلاء يوصلك بسيارتو ،انا ما قلتلك انا بمر بجيبك
رهف:اي عادي ،علاء شب ادمي و انت بتعرفو و بيناتكن شغل ، شو صار اذا وصلني
فادي:ما بحب مرتي تطلع مع رجال غريب بسيارتو ،يلي بدو يشوفكن شو بدو يحكي
رهف:طيب
فادي:ما بقا بتعيديا فهمانة ؟
رهف:ماشي
هزيت براسي و فتت غيرت تيابي و بعدين فتت على الحمام و بكيت عالساكت من وضعي و من زوجي يلي عم يعمل كل هالوساخة بس متل الملمس على مرتو و بحاسبا على النفس اذا تنفست زيادة ، فتت على غرفتي اطلعت على التخت بقرف و تابعت على غرفة يزن ،و نمت هديك الليلة بغرفتو ،بعد اسبوع بيدق باب بيتي ،رحت فتحت و شفت صبية ما بعرفا
مجهولة:مرحبا ،مدام رهف مو هيك ؟
رهف:اهلين
مجهولة: ،انا ناهد اختو لعلاء ،ممكن فوت
رهف:تفضلي ،اهلا و سهلا
فاتت قعدت و انا لحقتا
رهف:في شبه بينك و بين علاء
اهد:انا شق التوم لعلاء
رهف:ايوا ،اذاا جاي كرمال الحكي يلي قلي اياه علاء،خبريه انو ما حكيت ابدا
ناهد:لا انا ما جاي كرمال هيك بس
الجزء التالت:
رهف:لكن ؟
ناهد :بعد ما وصلك اخي ،اجا لعندي و كان حالتو بتبكي و ما خليتو يرجع على بيتو و نام عندي لانو خفت يعمل فيا شي و ينبلى و سهرت انا و اياه و حكينا كتير بس هو ما نام ابدا و ما غفلتلو عين و هو عم يفكر كيف بدو يتصرف كرمال اولادو حتى شك انو ما يكونو اولادو ،و اول شغلة عملا حلل ال DNA حتى تأكد انو اولادو منو و بعدين فكر و قرر و طلع معو هالحكي يلي بدي قلك اياه هلأ ، وهو ناطر تحت بالسيارة ،ناطر جوابك ؟
رهف:جوابي على شو ؟
ناهد:ماشي رح احكي و يا ريت تسمعيني للاخير و اذا بدك كمان فكري بالموضوع قبل ما تعطيني جوابك النهائي
رهف:تفضلي
حكتلي ناهد كل الحكي يلي اتفقت عليه هي وواخوها علاء و خبرتني اديش علاء تعب و انصدم بس حابب يتصرف بحكمة و ما يتسرع بأي خطوة كرمال اولادو
ناهد:شو رأيك؟
رهف:….جنون هههههه عنجد بعتذر بس هيدا حكي جنون و بلكي ما زبطت
ناهد:ما تخافي بتزبط ،اخي علاء حابك الخطة مزبوط
رهف:انا شو بدي استفيد من كل هاللفة و طلاق ما بقدر اطلق لانو ما عندي بيت اهل ارجع عليه ،عندي اخ و اخت متزوجين برا البلد و اذا بدي الحقن بدي تأشيرة لابني و فادي مستحيل يعطيني اياه ليزن و انا ما بعيش بدونو ،هو نقطة ضعفي
ناهد: طيب اطلقي و ابقي هون لانو هيك رجال ما بينعاش معو ، و بعدين رح يكتبلك البيت بأسمك
رهف: طيب لنفرض البيت صار باسمي ، انا شو بدي سوي بالبيت و انا ما عندي مدخول لاصرف فيه على حالي و على ابني؟
ناهد: انا وعد مني بدبرلك شغل لتعيشي منو انت و ابنك ،انا عندي استديو تصوير و هلأ عم افتح فرع تاني و بدنا موظفات
رهف:طب علاء ليش ما بطلقا و بطالب بحضانة اولادو؟
ناهد:صعب الحضانة للام،و محاكم و قصص طويلة ،لازم يكون معو اثبات انو مرتو غير مؤهلة لتربي الاولاد و ما في غير هالطريقة
رهف:طب بلكي حسو علينا انو كل هالشي مخطط
ناهد:ما بحسو اذا نحنا لعبناها صح و اوثقنا من حالنا و طبقنا كل شي بالحرف الواحد
رهف:طيب انا بدي فكر و بردلك خبر
ناهد:اوك بس لاتنسي انك رح تطلعي من هالحرب الباردة بغنائم و اهما انك تخلصي من هيك واحد خانك على تختك ……،يلا انا لازم انزل ،تأخرت على علاء
اخدنا ارقام بعض و نزلت ناهد من عندي و انا بلشت اجمع و اضرب بالموضوع لاخدت قراري بالقبول ،اتصلت بناهد تاني يوم و خبرتا اني موافقة
ناهد: ماشي ،هلأ علاء هاليومين رح يجيب كلمة المرور لموبايلا و يشتري موبايل جديد و رح ننسق الامور انا و اياه و بخبرك ايمت منبلش
بعد يومين اتصلت فيني ناهد
ناهد:رهف بكرا الصبح انشالله بس يطلع زوجك من الشغل اعمليلنا تعليمة لنطلع
رهف:بدو يطلع علاء معك!!! ،ما بيمشي الحال تطلعي لحالك ،يعني يلي بدو يشوفو نازل من عندي شو بدو يفكر
ناهد:مضطر يطلع ،مين بدو يضربك الكفين و حتى لو حدا شافو نازل من عندك ،ازبط بحال سأل زوجك هيك بيتأكد
رهف:طيب اتكلنا على الله
تاني يوم الصبح فاق فادي لبس تيابو لينزل على الشغل و انا فقت معو و ودعتو من الباب كالعادة
فادي:بدك شي ؟
رهف:لا سلامتك حبيبي
نزل من البيت و انا وقفت على الباب اشرلو بأيدي ،قبل ما يغيب عن نظري
رهف:فادي
فادي:ايه
رهف:نسيت قلك …خود الزبالة بطريقك لانو ريحتا طلعت كتير
فادي:اي هاتيا
اخد الكيس و نزل و انا سكرت الباب وراه ،فتت مسكت موبايلي و اتصلت بناهد
رهف:نزل هلأ ..تعالو يلا
ناهد:نحن تحت ، طالعين بس ليمشي بسيارتو
رهف:طيب اطلعي انت اول و بعدين بيطلع علاء
ناهد:اوك
رن الجرس ،لبست علي الروب و فتحت الباب لناهد
فاتت ناهد و طبقت الباب ،بعد دقيقتين طلع علاء
علاء:صباح الخير
رهف:صباح النور ،انا فايتة انا و ناهد لجوا
ناهد:لحظة قبل …بدنا ناخد الصور هلأ ،علاء اضربا كفين لرهف
علاء:بعتذر سلفا بس مضطر
رهف: بلاها ولو بغطي وجهي بشعري
ناهد:حتى يرجع و يشوف العلامات على وجهك و يصدق انو ضربك
رهف:اممم طيب بس يعني ما تشد ايدك كتير
ناهد:لازم تبين اثار الضرب على وجهك
رهف:طيب
وقف علاء قبالي و ضحكنا
رهف:يلا
ضربني اول كف
ناهد :اخي شد ايدك شوي
علاء :طيب
رجع ضربني على الجهتين
رهف:اخ ..ما رح انساهن بحياتي هالكفين ،تمام هيك ناهد
فرجيتا وجهي
ناهد:منيح ،نحن فايتين جوا و انت علاء اعمل يلي اتفقنا عليه
فتت انا و ناهد على غرفة النوم ، طالعت من جزدانا الحبال ،انا شلحت روبي و تسطحت على التخت بقيمص النوم ،ربطت ناهد ايدي و رجلي و مزعتلي فستاني و نكشت التخت و حطتلي شوية مي على وجهي
ناهد:تمام هيك ؟
رهف:تمام بس لحظة انكشي شعري شوي …يلا بلشي
ناهد:حطي ايديكي على وجهك يعني عيشي الموقف هههه
رهف:ههههههه
بلشت تصورني ناهد و انا نايمة و مربطين ايدي و رجلي ،بعد ما خلصت قمت و رجعت لبست روبي و طلعنا لعند علاء يلي تركناه عم يحضر لمسرح الجريمة ، كان مكسر اكام قطعة ازاز و عامل فوضى بغرفة القعدة و كملت انا و ناهد شوي بغرفة النوم
علاء:انطري نص ساعة و اتصلي فيه
رهف:ماشي بس وين الموبايل يلي اتفقنا عليه تنساه هون
علاء:هو بارض غرفة القعدة عند رجل الصوفاية ،مفروط ،هو بيرجع بلمو و بيفتحو
رهف:ما عليه باسورد ؟
علاء:لا ابدا
رهف:ناهد
قربت لعندا
رهف:امانة برقبتك ديري بالك على الصور ما يوقعو بايد حدا
ناهد:ما تخافي رح حمضن بأيدي و ابعتن بظرف فورا …يلا علاء نمشي
رهف: الله معكن
طلعو ورا بعض و فتت انا لجوا ،وقفت على المراية لزبط حالي اكتر ،كنت متوترة انو ما اقدر مثل الموقف منيح،اتصلت فيه انا و عم ابكي و صرخ
رهف(تبكي):فادي وينك …الحقني
فادي:شبك
رهف:واحد …واحد تهجم علي بالبيت …تعال بسرعة
فادي:شووو ما عم افهم عليكي
رهف:تعااا بسرعة
سكرت الخط بوجهو و قمت حطيت اللمسات الاخيرة و نطرتو ليوصل ،تسطحت بالتخت لفتح الباب و فات ركض هو و عم يناديني ،فات اول الشي على غرفة القعدة و بعدين تابع على غرفة النوم
فادي:شوفي مين فايت على البيت ؟
رهف(تبكي):ما بعرف ما بعرف رن الجرس بعد ما طلعت بعشر دقايق رحت افتح فكرتك انت نسيت مفاتيحك ،و طلع بوجهي ..
فادي:مين …
رهف:شوف شو عمل فيني …ضربني
فادي:مين هادا …مين يلي طلع بوجهك ….احكي
رهف:واحد ما بعرفو اول مرة بشوفو
فادي:شو سرق من البيت؟
رهف:ما سرق شي
فادي:لكن ؟شو عمل
رهف:…
فادي: لك احكي
هف:ربطني و صورني …(تبكي) ..صورني انا و هيك و ضربني و قلي خلي زوجك يطلقك
مسك موبايلو و بدو يتصل بالشرطة
رهف:لاااا ما بدي فضايح بلكي عرف انو خبرنا الشرطة عنو و نشرلي الصور ،يا ربي دخيلك
حسيت عقلو رح يفقدو ،راح لون وجهو ،طلع من الغرفة و رجع فات هو و عم يضرب ايديه ببعضن
فادي:ابن ….ابن …ولله ل…. رهف قرب عليكي شي
رهف:لا لا
فادي:لك مين هادا ابن ال…كيف شكلو ..احكي
رهف:طويل …نحيف …اسمر…ما لحقت شوف شكلو …هجم علي فورا و انا هربت منو و فتت لهون و رجع لحقني بعدين ربطني و ضربني و فك الحبال عني و قلي قليلو لزوجك يطلقك فورا
قمت ركض على الحمام و قفلت الباب و فتحت المي و صرت اسعل
فادي:رهف افتحي …شبك
رهف:اخ يا بطني عم استفرغ …ما بقا قادرة …مين هادا …ليش هيك عمل ..
غسلت وجهي و طلعت من الحمام انا و عم هدي حالي على كتفو لفادي
رهف(تبكي) : ..الله ياخدو
فادي:بدي اتصل بلغ
رهف:لا الله يخليك ما بدي يشوف حدا الشرطة فايتة على بيتنا ..شو بدو يفكر و نفسية يزن …وينو …يزن
فادي:شبك …يزن بالروضة
تسطحت على التخت وحطيت ايدي على بطني و هو قعد و حط ايديه على وجهو و صار يفرك وجهو بعصبية
فادي:مين هيدا يلي متقصدني ،نطر لنزلت لحتى طلع لعندك ،ليش بدو اياني طلقك
رهف: ياربي …فادي انت متورط بشي؟
فادي:لا لا ابدا
رن موبايلو ،فصل بوجه المتصل ،عرفت انو سهى هي يلي عم تتصل فيه ،قام وقف و راح على المطبخ و بعدين على غرفة القعدة ،و بعدين رجع
فادي:رهف …شوفي شو لقيت …هيدا شكلو واقع منو
رهف:موبايلو …افتحو بسرعة
ركب الموبايل على بعضو و شغلو ،و هو عم يشغلو
ادي:الله وقعو ولله لاعمل فيه العمايل ابن هال …
فتح فورا على الاستديو و شافو فاضي ،فتح على جهات الاتصال ،ما كان في غير رقم واحد ، (رقم سهى )
رهف: دقلو بسرعة و اسأل مين بكون
تلبك و توتر
فادي:لحظة لحظة …(بلع ريقو)…
رهف:اتصل يلا

 

الجزء الرابع:
فادي: لحظة شوي
قام وقف و بعد عني،قمت وقفت جنبو شفتو فاتح الرسائل الواردة و المبعوتة لسهى
(بيتا للحلوة اي طابق ،اي ساعة بينزل زوجا من الشغل )و كل الرسائل يلي جاية من سهى محتواها معلومات عن موقع بيتي و لون بابي و شكلي و شكل زوجي و لون سيارتو و موعد نزلتو من البيت) ،بعد عني
رهف:شبك
فادي:ولاشي
كنت عارفة انو عم يقرأن من ملامح وجهو ،نزل ركض من البيت و انا عم ناديلو بس ما رد علي غير بكلمة فوتي و قفلي الباب عليكي ،وقفت على الشباك ، شفتو عم يطلع بسيارتو و عم يحكي عالموبايل ،فتت تحممت و غيرت تيابي و حطيت بودرة على وجهي كرمال ما ينتبه ابني يزن على اثار الكفين و اتصلت بناهد
رهف:اي ناهد كل شي ماشي تمام ،هلأ شاف الرسائل و نزل ،شكلو رايح يشوفا بشي محل ليواجها و يعلق معا
ناهد:منيح ،بكرا بيخلصو الصور ،ايمت ابعتن؟
رهف:بعد بكرا لارتاح انا شوي و نشوف ردة فعلو
اتصلت بفادي ،رد علي فورا
رهف:وينك انت؟
فادي:شوفي،صار شي؟
رهف:لا بس نزلت و تركتني بهالحالة بدون ما اعرف لوين رايح ؟
فادي:ليكني جاي بس كنت عم شوف مين صاحب هالرقم
رهف:و عرفت؟
فادي:لا
سكرت الخط و ما رجع للمسا ،فات على البيت هو و معصب و شارد
فادي:كيف صرتي؟
رهف:احسن
رهف:شو صار معك؟
فادي:ولاشي ولاشي ولاشي مية مرة قلتلك ولاشي ،اتركيني بس شوي لفكر
رهف:طب خلينا نتصل بهداك الرقم و نعرف
فادي :انا بعرف بعدين بس ما بقا تفتحي الباب لحدا ما بتعرفيه ماشي
فادي:ماشي
انا التفتت على ابني عشيتو و نمت و هو بقي سهران و قلقان و عم يفكر بسهى يلي اكيد واجها و نكرت مع انو كل الدلائل ضدا ،بعد يومين بعتلا مسج لناهد تبعت الصور المسا على موعد وجود فادي بالبيت،رن جرس بيتنا و انا كنت عم اجلي ،قام فادي فتح الباب و انا لحقتو ،شفتو واقف على الباب و ماسك ظرف
رهف:مين؟
فادي:ما حدا بس شفت هالظرف
قربت لعندو ،فتح الظرف و اطلع بالصور و صار يقلب فين بعصبية
رهف:ياللله شو هادا ….شو بدو مني …ليش هيك عم يعمل…
قلب قفاهن للصورة ليقرأ شو مكتوب
(اذا ما بتطلقا رح انشر هالصور بكل حارتك و اذا بتخبر الشرطة رح انشرن على وسائل التواصل الاجتماعي )
مسك الصور و صار يمزعن و انا حطيت ايدي على تمي و ركضت على غرفة نومي لمثل انو متأثرة و عم ابكي و قفلت الباب ، سمعت صوت طبقة الباب الخارجي ،فتحت الباب و طلعت ما شفتو لفادي برا ،اتصلت فيه و لقيت خطو مشغول متل العادة،كانت علاقتو بسهى عم تدمر على الاخير بعد ما اوهمتو انو هالشخص مبعوت من طرف سهى ،رجع فات على البيت بعد نص ساعة ،كنت قاعدة و صافنة بالارض و ساكتة ،زت موبايلو و قعد ساكت و ضايع بين انو يصدق الشي يلي عم يصير قدامو او يصدق كلام سهى يلي عم تحلفلو انو ما هي وراه هالقصة
رهف:مين هادا …ليش بدو اياني اطلق…(تبكي)..رح ينشر صوري
قرب علي و ضمني لصدرو
فادي:خلص طولي بالك ،رح انزل بلغ عنو
رهف:و بلكي عرف و نشر صوري ،لازم نحكي معو و نتفاوض ،بلكي بدو مصاري
فادي:كيف بدنا نتفاوض معو و نحن ما معنا رقمو
رهف:معنا موبايلو
فادي:ايه و كيف بدنا ندقلو
رهف:يا ربي رح يوقف مخي
بعد الحادثة صار فادي ملازم البيت و ما يطلع ابدا ،حتى كان موبايلو يرن و ما يرد عليه او يحطو صامت ،انا عرفت انو علاقتو مع سهى عم تخلص ،تاني يوم اتصلت بعلاء و قلتلو اجا دورك هلأ
__________________في منزل علاء___________
علاء:شبك ما على بعضك هالايام ،حاسك تعبانة و صاير سواد تحت عيونك
سهى: ولاشي ،تعب عادي
علاء:حتى بالليل عم فيق عليكي عم تصرخي و تحكي
سهى:انا …شو عم احكي هههههه
علاء:عم تهلوسي و تقولي ما انا ولله ما انا و هي و شو بعرفني
سهى:اممم ما بتذكر شي
علاء:طيب انا فايت نام عندي بكرا شغل تصبحي على خير و انت نامي شوفي وجهك كيف صاير من السهر
سهى:ماشي هلأ بلحقك
#الجزء الخامس:
فتت على الغرفة و عملت حالي نايم ،بعد شوي فاتت تنام ،تقلبت كتير ،لحسيت عليها نامت،اخدت موبايلا و طلعت من الغرفة ،فتحت على جهات الاتصال و حذفت رقمي يلي محطوط باسم علاء و دورت على رقم فادي يلي كان محطوط باسم رفيقتا ميادة و حذفتو و رجعت دخلت رقمي باسم ميادة وسكرتو و رجعت نمت ،تاني يوم نزلت على شغلي و بعد ربع ساعة اتصلت فيا ،ردت علي فورا
سهى:فادي و اخيرا …
علاء:مين فادي؟
سهى:..مين معي؟
علاء: سهى …شبك انا علاء
سهى:علااااء
بعدت الموبايل عن ادنا و رجعت حطتو
سهى:اي حياتي
علاء:مين فادي؟
سهى:فادي …ابن اختا لرفيقتي ميادة ،كان عم يتصل من شوي و يتغالظ علي
علاء:ايوا بسيطة ،شو بدي قلك لاتنسي تغسليلي قميصي الابيض و تكويه
سهى:اي ماشي
انا و راجع من شغلي المسا ،صفيت السيارة و طلعت ناهد
ناهد:خود بس بتقلك رهف رجعن بكرا فورا الصبح
علاء:اي ماشي بس انت بكرا لاقيلي تحت بنايتا ،بشلحن بالسيارة و انت طلعيلا اياهن
ناهد:سلام موفق ههههههه
علاء:ليش عم تضحكي؟
ناهد:حاسة حياتي صار فيها اكشن شوي
نزلت ناهد من السيارة و انا تابعت على بيتي ،حطيت التياب بالسيارة و طلعت على بيتي قعدت شوي مع اولادي رائد و قيصر و بعدين تغديت و تفرجت على التلفزيون ،كانت سهى قاعدة جنبي جسد بس ،كان كل عقلا بفادي و كنت كل يوم عم اكرها و اقرف منا اكتر ،تاني يوم الصبح لبست تيابي و نزلت ،فتحت الكيس و طالعت تياب فادي بلوزة خضرا و طاقية جينز و لبستن و رجعت طلعت على بيتي ،فتحت الباب و فتت على غرفة النوم ،كانت واقفة عم ضب التخت ،اول ما شافتني انصدمت
علاء:سهى …شفتيلي موبايلي شي …يالله وين راح
سهى:شو هادا يلي لابسو
علاء:ما فهمت
سهى:من وين هالتياب يلي لابسن
علاء:اي قصدك …بلوزتي الخضرا قصدك
سهى:بلوزتك؟و انت من ايمت عندك بلوزة خضرا؟
علاء:سهى شبك …ولله عم تشغليلي بالي عليكي …خدي موعد عند الدكتور و روحي شوفي شبا صحتك
سهى:علاء ما تتهبل انت ما عندك بلوزة خضرا و ما عندك طاقية جينز ،يعني ايمت اشتريتن؟
علاء:الله يثبت علينا العقل يا رب
سهى:و بعدين هاي ديقة عليك
علاء:من اول ما اشتريناها و انت بتقليلي ديقة عليك و انا حبيتا لانها بودي
تابعت تفتيش على موبايلي و هي واقفة صافنة فيني
علاء:ها لقيتو …يلا سلام
نزلت من البيت و اتصلت بناهد يلي كانت ناطرتني بحارة رهف و رجعتلا التياب و تابعت على شغلي بعد ساعتين اتصلت فيني ناهد عم تضحك
علاء:شو صار؟
ناهد:رجع فادي على البيت يسألا لرهف على بلوزتو الخضرا
علاء:ايه
ناهد :قالتلو ليكا بالغسيل
علاء:ايه
ناهد:قالتلي شافا و نزل من البيت معصب
علاء:تمام خلي تنجن و تجننو
رجعت من شغلي ،و انا لابس تيابي ،اول ما فاتت وقفت اطلعت فيني من تحت لفوق
سهى:عم تروح بتياب و ترجع بتياب شكل
علاء:ما فهمت
سهى:ما رحت اليوم على شغلك ببلوزة خضرا و حاطط طاقية جينز
علاء:نعم ،انا ما عندي بلوزة خضرا و لا طاقية جينز ،على فكرة انت لازمك دكتور بسرعة
سهى:لا اليوم الصبح وقفت سالتك عن البلوزة و قلتلي هاي عندي من زمان ،كنت لابسة بلوزة لون اخضر

علاء:لا كنت لابس هاي البيضا و قلتيلي غيرا لانو منصحتني
وقفت جامدة و انا فتت على المطبخ ،فتحت الطنجرة
علاء: رز ببازيلا ؟وين البامية !
سهى:بامية ؟
علاء:على اساس تطبخي بامية
سهى:انا …لا
علاء :طيب ، و ين الاولاد؟
سهى :بغرفتن
علاء:انا فايت لعندن
كانت سهى عم تقتنع بتدرج بأنو هي عم تخربط و تهلوس و عم تنسى من كتر تفكيرا بقصة فادي و مشاكلا معو ،تاني يوم و انا راجع من الشغل اتصلت فيا
علاء:الو كيفك حبيبي
سهى:اهلين حياتي وينك؟
علاء:على الطريق بس قلت اسالك بدك لبن الا بيبسي معو ؟
سهى:مع مين
علاء:مع البروستد
سهى:ليش بدك تجيب بروستد انا طابخة
علاء:ما قلتيلي الصبح ما رح تطبخي اليوم و جيب بروستد بطريقك
سهى:انا
علاء:نسيانة !اوووف …طيب طيب سكري لالغي الطلب معناها
سكرت انا و عم اضحك و شغلت السيارة و تابعت على البيت ،بعد ما تغدينا
علاء:سهى انا بدي احجزلك عند دكتور و ما تقولي لا
سهى:دكتور شو ؟انا ما فيني شي
علاء:كيف ما فيكي شي ،عم ضيعي و عم تنسي و عم تفيقي بالليل تحكي و تصرخي و ساعة تضحكي رح تجنيني معك
سهى:…..بروح انا ،بجوز تعب من شغل البيت و الاولاد
علاء:طيب بس ما تهملي صحتك
تاني يوم انا و بالشغل خطرت على بالي فكرة ،فتت على صفحة فادي بالفيس و سحبت صورة من صورو و احتفظت فيا ، و وقت رجعت من شغلي و قبل ما اطلع على بيتي اطلعت لعند فدوى اختو لفادي
علاء:فدوى بدي احكي معك بموضوع مهم ،زوجك مازن جوا؟.
فدوى:اي جوا تفضل
الجزء السادس:
علاء:ما بعرف من وين بدي بلش بس مشغول باالي كتير ،سهى الا فترة ما مزبوطة ،عم بضيع و بتنسى و ساعة بتحكي مع حالا و ساعة بتبكي و ساعة بتضحك ،رح تجنني و تجنن اولادي معا و مبارح شفت بالصدفة دوا بخزن المطبخ ،مأخوذ منو 4حبات بس ،اخدت الدوا و نزلت على الصيدلية و سألت عن الدوا
فدوى:اييه شو طلع ؟
علاء:للهلوسات،شكلا بتاخد منو من زمان و صار بدا عيار اتقل هلأ و عم اقنعا نروح عند دكتور ما عم تقتنع ،يعني انت جارتا و بدي بس ضلي اطلي عليها كل ساعتين زمن انا خايف تكون حالتا فيا خطورة على الاولاد
فدوى:اوووه لهيك يعني …
علاء:خير احكي
فدوى:كانت تنزل بمكياج و تطلع بلا مكياج ،انا فكرت انك انت ما بترضى تخليا تحط على وجها
علاء:انا لاا ابداا
مازن :خلص تكرم ولا يهمك
علاء:الله يخليكي ما تجيبولا سيرة بهالحكي حتى ما تقول زوجي فضحني للعالم و عم يقول عني مجنونة
فدوى:خلص تكرم
اطلعت من عندن و نزلت على بيتي و انا على الدرج بعتلا رسالة لناهد
علاء:حكي رهف تروح هي و الحشرة بكرا يسهرو عند فدوى ،انا هلأ طلعت من عندا
نزلت على بيتي و بنص الليل قمت اخدت موبايلا و بعتت صورة فادي لجهازا و عينتو صورة خلفية للشاشة و نمت ،حتى تفيق تاني يوم و تنصدم وغيرت فراشي الاسنان و المعجون و البشاكير ،فاقت شافتن ،و صفنت و سكتت بدون ما تسألني شي حتى ما ارجع افتح معا سيرة الدكتور ،و بس رجعت المسا مريت ااشتريت نفس عطر فادي و رشيت منو و طلعت على البيت ،شمت ريحة عطري و بقيت ساكتة ما علقت ابدا.
———–في منزل رهف ——-
رهف:الو فادي …ليك حكيت اختك فدوى و قلتلا انو رايحين نسهر عندا لانو يزن صرعني بدو يلعب مع نتالي …ليش ولو ….ساعة زمن ما منطول ….ماشي سلام
رجع فادي من شغلو تغدى و لبسنا و رحنا لعند اختو ،على الطريق
رهف:فادي انت خبرتا لفدوى شو صار معنا من فترة
فادي:لا طبعا و اوعى تكوني خبرتي حدا انت
رهف:لا ابدا شو بدي قول فات علي رجال و انا بقميص النوم و مزعلي تيابي و …
فادي:خلص خلص خلصنا من هالسيرة ،انا تصرفت ،عاد رجع صار معك شي جديد
رهف:لا ابدا لحمدلله بس ما قلتلي شو عملت و ما قلتلي مين هو ؟
فادي:ما مهم ،المهم خلصنا من هالكابوس،انزلي يلا
نزلنا قعدنا عند اختو فدوى و من جملة الحديث
فدوى:صحي نسيت خبركن ،رهف بتعرفيا انت لسهى مو
رهف:اي عرفتا هاي الفظيعة بالبستان ،شبا؟
فدوى:طلعت مريضة يا حرام ،معا انفصام بالشخصية و بتهلوس
رهف:يا حرام ،شو عرفك انت ؟
فدوى:زوجا خبرنا
اطلعت بطرف عيني على فادي يلي كان مركز اكتر مني بالحكي
فدوى:و عم تاخد دوا بس شكلو ما بقا عم يأثر عليها الدوا و خايف زوجا تعمل شي لاولادا ،يعني بنص عقل الله يشفيا ،بس ولله انا ذكية و انتبهت انو فيا شي ما طبيعي
رهف:يا حرام ،الله يشفيا ،بس هالاولاد يا قلبي علين
طلعنا من عند فدوى و بعتلا مسج لناهد بانو مشي الحال و صار فادي معو خبر بحالة سهى ، كنا ناطرين فادي يخبر سهى بالشي يلي عرفو حتى تواجه زوجا و تتورط بالمصدر يلي جابت منو الخبر بس فادي بقي ساكت ،لهيك قررنا نكسب وقت و نرفع مستوى اللعبة و نحط الطابة بملعب فادي ،تاني يوم نزل فادي على شغلو و اجا باص الروضة زمر كتير و ما نزلت يزن حتى مشي الباص ،بعدين قلتلو ليزن ينزل ،كانت ناهد ناطرتو تحت البناية ،و انا وقفت عم اتفرج علين من الشباك ،قربت عليه و حكتو شوي و اخدتو بأيدو و اتصلت فيني
ناهد:رهف يزن صار معي
رهف:ماشي ديري بالك عليه الله يخليكي
ناهد :ولا يهمك رح يلعب مع اولادي
رهف:ماشي ،علاء نزل على شغلو اليوم؟
ناهد:لا بقي بالبيت ليشوف ردة فعل فادي
نطرت ليفوت موعد رجعة يزن من الروضة و اتصلت بالروضة و سألت ليش لهلأ ما رجعولي ابني و خبروني انو ابني ما اجا ابدا اليوم على الروضة ،سكرت و اتصلت بفادي
رهف(تصرخ):فادي الولد رااااح الولد راح الحقني
فادي:شو في؟
رهف:يزن انخطف ،اكيد هداك خطفو ،رح يقتلو للولد (تبكي) …يزن راح ….ما تركنا بحالنا ،قوم بسرعة تعا بدنا ننزل على الشرطة
سكر الخط بوجهي ،رجعت دقتلو لقيتو مشغول ،كان عم يحكي مع سهى المتهمة الاولى بخطف ابني و كل شي وارد تعملو بعد ما عرف بمرضا،كنت اتصل كل شوي بناهد و اطمن على يزن و سكر ، رجعت اتصلت بفادي يلي كنت ناطرتو ليجي و طول كتير ،فصل الخط بوجهي ، بعدين اتصل فيني رقم غريب
رهف:الو
علاء:معك علاء كيفك ؟
رهف:اهلين لحمدلله كيفك انت
علاء:لحمدلله انا بعتذر اخدت رقمك من ناهد من غير علمك بس قلت التواصل معك هيك اسرع و اسهل
رهف:تفضل
علاء:ليكي فدوى بعتت ورا سهى تنزل لعندا فورا ،فادي عندا ،برأيي تلبسي و تجي لهون حتى تحطي على عينن
رهف:طيب بس بحجة شو بدي روح؟
علاء:بحجة انك تعبانة من التفكير بهالمصيبة لحالك و بدك حدا جنبك
رهف:اممم طيب ماشي
لبست فورا و رحت بوجهي عند فدوى ،دقيت الباب فتحتلي ،اول ما شافتني تلبكت،لفيتا انا و عم ولول
رهف: ابني يا فدوى انخطف و ما بعرف وينو و شو عم يعمل هلأ ،من الصبح ما مبين
كان اصوات فادي و سهى عم يعلقو جوا
رهف:شو صاير عندك كل هالاصوات؟صوت فادي؟
#الجزء السابع:
اجت لتسبقني ،مسكتا من ايدا و سبقتا ،وقفت على مدخل غرفة القعدة لاتسمع على الحكي ،وقفت فدوى جنبي و حاطة ايدا على تما و انا عم اطلع فيا و عاطتيا الوجه االمتفاجئ
فادي:معك ساعة بس لترجعي الولد
سهى:ولله ما انا ،ما انا يلي اخدتو و ما بعرف شي عنو ابدا
فادي:كذابة انت وحدة مجنونة و بشهادة الكل ،رجعيه و الا رح انزل بلغ عنك الشرطة هلأ و قدملن الموبايل يلي لقطت فيه الرسائل بينك و بينو ل يلي بعتيه لمرتي
سهى:فادي صدقني في حدا عم يلعب معنا و يوقع بيناتنا ،شو الي مصلحة اعمل كل هاللفة
فادي:بدك اياني طلق مرتي لاخدك الك ،انا ما باخد وحدة رخيصة متلك خاينة ،خانت زوجا معي و سلمتني حالا ،انت وحدة ما الك امان
فتت بهدوء و اطلعت بفادي يلي كان ماسك سهى من ايدا و عم يعلق فيا
فادي:رهف ..شو جابك لهون
رهف:…شو سمعت بداني ،انت و سهى …
حطيت ايدي على تمي ،قرب علي
فادي:انت فهمانة الموضوع غلط ،هي عم تلاحقني
سهى:انا يا كذاب؟
رهف:بعد عني بعد …كل هاللعبة هي لعبتا كرمال اطلقني ….انا بدي ابني بس ….ما بهمني ما بهمني شي …خديه ..خدو بعض …بس بدي ابني ..رجعيلي ابني و بوعدك اطلق منو بس رجعيلي يزن
سهى(تبكي):ما دخلني انا ما خطفتو واليوم ما طلعت من البيت ابدا و ما بعرفو لهادا يلي تهجم عليكي على بيتك ما دخلني فيه
رهف:انا نازلة على الشرطة رح بلغ عنك و رح افضحكن انتو الاتنين انا بدي ابني
طلعت فورا من بيت فدوى و نزلت على الدرج و لحقني فادي يهديني و يعدل عن قراري كرمال الفضيحة
فادي:رهف ببوس رجلك بلا فضايح ،خلص اهدي هلأ بترجعو
هجمت عليه و صرت اضربو بالبناية
رهف:يا وسخ ضيعتنا من وساختك ،راح الولد هاي وحدة ما مزبوطة يمكن قتلتو للولد اذا صرلو شي للولد بدي اقتلكن انتو الاتنين رح خلي زوجا يقتلك انتو بتستاهلو الدبح
نزلت على الشارع و هو عم يركض وراي ،مسكني من ايدي و طلعني بالسيارة غصب عني ،و رجعنا على البيت
___________في منزل علاء____
طلعت سهى من عند فدوى و وجها اصفر و عيونا حمر منفخين
علاء:شبك ،علقانة مع فدوى؟
سهى:لا ابدا
علاء:لكن ليش عيونك حمر و ليش بعتت وراكي؟
سهى:كان بدا اياني ساعدا بتفريم البصل للكبة
علاء:اممم سهى انا برأيي نروح عند الدكتور و نطمن ،انا قلقان عليكي ،هديك المرة رجعت من الشغل و شفت الباب مفتوح و من قبل الغاز شاعل بس ما حبيت قلك
سهى:طيب طيب
_______في منزل رهف____
فادي:خلص اهدي من هون لساعة اذا ما رجعتو للولد منبلغ الشرطة
فتت على غرفتي و قفلت الباب و بعتت مسج لناهد
مسج رهف: صرت انا و فادي بالبيت ،و استوى على الاخر ،ابعتيه ليزن
بعد نص ساعة رن موبايلو لفادي ،كانت المتصلة ناهد من رقم تاني
ناهد:مرحبا انا رفيقتا لسهى ابنك صار تحت البيت ،استلمو
ركض لعندي و خبط على باب الغرفة
فادي:رهف ،اجا يزن
فتح الباب و نزل و انا طلعت من غرفتي ناطرتو ليطلع ،اول ما شفتو ليزن لفيتو و صرت بوسو و احمد ربي ،بعدين اخدتو و فتنا لجوا
رهف:حدا ضربك ماما؟
يزن:لا لعبت و كيفت كتير ،في العاب كتير عندن
رهف:ما جوعان؟
يزن:لا طعمتنا خالتو بيتزا
رهف:اممم اي منيح
كان واقف فادي و عم يسمع الكلام
فادي:انا ما رح انزل على المحل ما بقا حرزانة
تجاهلت كلامو و فتت حطيت لابني على افلام كرتون و طلعت
رهف:نحن لازم نحكي
فادي:رهف انا…
رهف:فادي ما تكمل ،ما بدي تعتذر مني متل كل مرة ،انا بدي اطلق منك
فادي:وين بدك تروحي بس تطلقي عند اخوكي الا عند اختك ،ما حدا رح يستقبلك ،و انت بتعرفي اذا سافرتي لعندن ما رح اعطيكي يزن
رهف:….اممم ما تعطيني اياه ،خليه عندك و انت ربيه و احمل مسؤوليتو
فادي:اي بربيه و بجيب مين يربيه كمان
رهف:تمام انا فايتة معناتا ضب اغراضي و انت انزل طلق بكرا
فتت على غرفتي و نزلت الشنتاية و بلشت ضب تيابي ،اجا وقف على الباب ،اطلعت فيه و تابعت ترتيب تياب
فادي:رهف كانت نزوة بس ،خلص بقا كبري عقلك
رهف:هاي ما اول مرة و انا تعبت من الموضوع ،تارك الحلال و عم دور على الحرام و انا من حقي عيش و دور على مصلحتي ،معك ما في امان ،رجال غريب تهجم علي و ضربني بسببك و انكشفت عليه بقميص نوم ،انت ما عاد ضل عندك شرف ،و بخاف انطر لسا و يفوت علي و يعتدي علي و انت شو بدك تعمل وقتا ؟ولاشي …بعد هيك من طريقي
فادي:خلص بوعدك اخر مرة ،اعطيني فرصة تانية
رهف: فرصك خلصت عندي
سكرت الشنتاية و شحطتا على غرفة يزن و هو ماشي وراي
فادي:رهف خلص بقا ،شو بدك لاعملك حتى تصدقي انو اخر مرة
رهف:انا لو بنت حرام كنت رحت خبرت زوجا و خليتو يقتلك و يقتلا و تخلص هالبشرية من عالم متلكن و فكرة واردة يعني ..بس تصور لو انا عم خونك مع زوجا ،شو كنت عملت ؟
فادي:كنت دبحتك و دبحتو
رهف: تمام معناها انزل طلق و اعطيني متأخري حتى ما تندبحو
صار يترجاني كتير ،نمت بغرفة ابني يزن و هو نام بغرفة النوم ،تاني يوم الصبح فقت بكير و لبست تيابي و فيقتو
فادي:خير لوين من الصبح؟
رهف:على المحكمة
فادي:خلص اهدي بقا،ما رايح لمحل
رهف:طيب انا بروح معناها
قام من التخت و وقف على الباب بوجهي
فادي:ما الك طلعة من هون ،كيف الك قلب تتركي ابنك بهالسهولة
رهف:عادي احسن من عيشة الذل هون معك ،بدي انفد بحالي ،بخاف تنقلي امراض
الجزء التامن
فادي:لاااا الامور ما وصلت لمحل ما راح فكرك
صار يترجاني حتى توصلنا للاتفاقية
رهف:سجلي البيت بأسمي غير هيك ما رح ابقى عندك لانو ما حاسة بالامان
فادي:طيب
رهف:و اليوم كمان؟
فادي:طيب ،رجعي تيابك على الخزانة
رهف:برجعن بس يصير هالبيت بيتي
فيقت يزن و راح وصلو فادي بأيدو على الروضة و تابع يعمل اوراق ملكية البيت ،اتصلت بناهد و خبرتا شو صار معي و سألتا عن وضع علاء وين وصل مع مرتو
ناهد:هاليومين بدو ياخدا عند الدكتور و بع يشرحلو وضعا و يطلب منو يكتبلو تقرير طبي و بعدين يوديا عند اهلا و بعدين يبلش بمعاملة الطلاق
رهف:اممم ،ليكي ناهد انا بدي اتشكرك كتير اولا و تانيا انت بعدك على وعدك كرمال الشغل ؟
ناعد:اي طبعا
رهف:كمان شغلة تانية هلأ انا ما كتير بفهم بالعقود بخاف فادي يكون عم يلعب علي لعبة و يجبلي عقد مزور
ناهد :ما تاكلي هم ،انا عندي صديق زوجي محامي و بخليه يتأكدلك منو ،بس يصير معك العقد اتصلي فيني و انا بمر منك
رهف:كلك ذوق عم عذبك معي
ناهد:ولا يهمك
______في منزل علاء________
رحنا انا و سهى تاني يوم عند الدكتور و شرحتلو وضعا انو عم تهلوس و تنسى و منعزلة على طول و بتشوف شغلات ما موجودة ؟ بعدين فاتت لعندو و قعد حكى معا و سألا كام سؤال بس كانت اجوبتا مخربطة و مشوشة ،حتى الدكتور نفسو اقتنع انو عندا مشكلة واضحة ، قيم حالتا و كتبلنا ادوية و نزلت وصلتا على البيت و طلبت منا اضب تيابا و تياب الاولاد كرمال وصلا عند اهلا و تقعد عندن فترة نقاهة ، و رجعت عند الدكتور طلبت منو يكتبلي تقرير بحالتا النفسية و انو هي غير قادرة نفسيا و عقليا على انو تربي الاولاد ، و بحاجة لحدا يساعدا فين ،بعد ما اخدت التقرير ،رجعت على بيتي و نزلت الشناتي و وصلتا عندا اهلا و بعدين رجعت لبلش بمعاملة الطلاق و بيع بيتي و اشتري بيت تاني .
_______في منزل رهف_____
بعد يومين نزلت مع فادي وقعت عقد الملكية و تاني يوم مرت ناهد اخدتو مني و تاني يوم مرت لعندي و خبرتني انو العقد نظامي
رهف:و هلأ شو الخطوة التانية،كيف بدي قلو انا بدي اطلق منك بعد ما سجلي البيت بأسمي ،خايفة يعملي شي
ناهد: ما تخافي هلأ لازم تغيري قفل الباب و تطلعي من البيت و ترفعي دعوى طلاق
رهف: و لوين بدي روح انا و يزن ؟ ما بعرف حدا هون غير بنت حمايي فدوى و ما خرج روح لعندا
ناهد:تعي لعندي
رهف:لعندك ،مستحيل
ناهد:كلها فترة بس لتبيعي البيت و تشتري بيت تاني
رهف:بقعد بفندق او بستأجر
ناهد :طيب اتمهلي شوي و ما تعملي شي هلأ لبين ما لاقيلك حل ،و هلأ علاء كمان عرض بيتو و عفشو للبيع ،بدو يطلع من البناية
رهف:و شو صار معو مع سهى؟
ناهد:هلأ بعتا عند اهلا بحجة تريح حالا و خبر اهلا عن وضعا الصحي
رهف:و الاولاد مع مين بقيو؟
ناهد :معا ،لفترة بس لبين ما يشتري بيت و يخلص معاملة الطلاق و تحكملو المحكمة بالحضانة و طبعا فدوى رح تشهد على وضعا لسهى
رهف :اممم الله يخترلو الخير ،ما رح يحكي لحدا بالشي يعني يلي عرفو عنا او يخبر مثلا كرمال ما يحطو اللوم عليه بطلاقا
ناهد:طبعا لا ،مستحيل يفضحاا بضل ام اولادو و بهمو اضل سمعتا منيحة كرمال اولادو بس رح يخبرا الها انو هو عرف بكل شي
رهف:كتير منيح نادرا ما تشوفي رجال بفكر بهيك طريقة
ناهد:يلا انا لازم امشي حتى ما اتأخر على شغلي
رهف:الله معك
ناهد:منبقى على تواصل
طلعت ناهد من عندي و انا تمهلت بقرار انفصاالي عن فادي يلي رجع فتح معي موضوع الاولاد و انو حابب يكون ليزن اخ او اخت،بس انا تجاهلت الموضوع ،للوقت يلي اتصلت فيه ناهد تخبرني
ناهد:رهف بدي اقترح عليكي اقتراح
رهف:تفضلي
ناهد:ليكي اخي علاء اشترى بيت من يومين و عم يعفشو
رهف:ايه
ناهد:و انا كنت عم احكيلو عنك انو ما عارفة لوين بدك تروحي لبين ما تبيعي البيت و تشتري غيرو
رهف:ايه
ناهد:اقترح تروحي تقعدي ببيتو
رهف:شووو ؟هيدا اخوكي كيف فكر فيني يعني ليكون بدو ينتقم من زوجي عن طريقي،خبريه انو انا ما متل…
ناهد:طولي بالك فهمتي الموضوغ غلط ،خليني اشرحلك ،انا ما عم قول تقعدي معو ،هو ما رح يقعد بالبيت ،رح تقعدي فيه انت لحالك ،انت و زين بس و رح تستقبلي عندك …
رهف:ايه
ناهد:رائد و قيصر …بس فترة يعني ،حرام ما عارف وين بدو يروح بأولادو و هو عندو شغل و انا عندي شغل و ابنو الصغير من عمر ابنك 4سنين ،يعني مصالح متبادلة بس هالفترة ليستقر وضعك و وضعو
رهف: و هو وين بدو يقعد هالفترة ؟
ناهد :رح يقعد عندي
رهف:حاسستا ما زابطة كانو عم احتل بيتو
ناهد:ما تاكلي همو ،علاء بيطلع من الصبح على شغلو و ما بيرجع للمسا ،يعني ما رح يتلبك بحالو اذا قضى هالفترة عندي بس اولاد بيرجعو من المدرسة عال 12 و ما في حدا يدير بالو علين
رهف: طيب ماشي موافقة ،البيت صار جاهز
ناهد:اي تقريبا ،انا بردلك خبر بهاليومين بس لبين ما يصفي حسابو مع طليقتو و هو كان بدو يحكيكي و يخبرك بس خجل و خاف من ردة فعلك
#الجزء التاسع:
______________في منزل علاء_______\\_
د خلصت معاملة الطلاق رحت عند بيت حمايي و فتت قعدت معن بعدين قلتلا لسهى بدي احكي معك كلمتين على انفراد ،طلعت انا و اياها على البرندا
علاء:انا ما بحياتي قصرت معك و لا مع الاولاد،شو كنت تطلبي كان يحضرلك ،كنت تتهميني كتير باني انسان بخيل بمشاعري اتجاهك و انسان بارد بس انا هيك طبعي و هيك بعبر للمرة يلي بحبا ،بعبر بالافعال اكتر من الاقوال و انت كافئتيني على هالمحبة بأنك ما صنتي بيتك و زوجك
سهى:علاء…
علاء:خليني كمل حكيي ،انا عرفت كل شي ما تسأليني كيف عرفت بس عرفت ،و انا ما بدي خبر اهلك بشو عرفت و ما فيكي تنكري معي اثباتات كتيرة و مصورة كمان ،و ما بدي افضحك لحدا لانك بضلي ام اولادي ،لهيك حبيت نطلع بهدوء ،و ما نسمع حدا فينا ،و انت خبري اهلك انو انت يلي طلبتي الطلاق مني
سهى:علاء انت فهمان غلط ؟
علاء: سهى انت طالق طالق طالق
الاولاد رح تبقى حضانتن معي لانو ما بأمن هيك مرة تربي اولادي ،و رح جبلك اياهن يومين بالاسبوع تشوفين و صورتك قدامن ما رح شوها و بتمنى منك تعملي نفس الشي ،رح اتركن عندك يومين لكون زبطت اموري و انت بتكوني هيئتين نفسيا ليتقبلو المرحلة القادمة من حياتنا
______________في منزل رهف________________
بعد يومين بعتتلي مسج المسا
ناهد:مسالخير رهف جهزي حالك بكرا و ضبي اغراضك و انا على الساعة 1الضهر بمر باخدك و منغير قفل بيتك
تاني يوم نزل فادي على شغلو متل العادة ،على الساعة 1كنت ضابة اغراضي انا و يزن ،كنت قاعدة و ناطرة ناهد و انا متوترة كتير و عم احسب ردة فعل فادي ،طلعت ناهد لعندي و معا الشاب يلي غير قفل الباب و اعطاني نسختين و نزلنا ،وصلتني ناهد على بيتو لعلاء الجديد يلي كان بيبعد كتير عن بيتو القديم ،كان 3غرف نوم و صالون كبير و حمامين ،،فتت انا و ناهد و فوتت شنتايتي
رهف:حاسة حالي خجلانة كتير ،قاعدة ببيت ما الي ،انشالله ما طول الامور
ناهد:انشالله لا بس اعتبري البيت بيتك
رهف:وينن قيصر و رائد
ناهد:عند امن هلأ ،بكرا رح يجيبن
رهف:طيب ناهد انا هلأ شو لازم اعمل ،معلش
عم اسألك كل خطوة بخطوتا لانو متلبكة و خايفة
ناهد:هلأ انطريه ليصل على البيت و يتفاجأ و يدقلك ،وقت خبريه انك بدك تطلقي و غيرتي مفتاح البيت
رهف:خايفة يعملي شي ؟
ناهد:ما تخافي ما رح يعرف مطرحك و ابنك يزن خليه بحضنك و ما تبعتيه لمحل لبين ما يتقبل الصدمة و بعدين منخلي المحامي وفيق يتصل فيه و يتفاوض اذا بتعملو مخالعة
رهف:ماشي
ناهد:ماشي انا رح امشي ، البيت نظيف و مرتب د،اجت مبارح الشغالة و رتبتو على الاخر و اذا نقصك شي احكي
رهف:لا سلامتك
نزلت ناهد من عندي و انا بقيت بالبيت ،تفتلت فيه و ضبيت تيابي بالخزانة و فتت على المطبخ ، فتحت الخزن و المطبخ ،لقيتن معباين ،على الساعة سبعة ،اتصل فيني فادي ،نشف ريقي ،رديت عليه
فادي:وينك انت ؟ليش الباب ما عم يفتح؟
رهف:لانو غيرت قفلو
فادي:شو هو ؟ليش؟
رهف:هيك ،هيدا بيتي و انا حرة فيه
فادي:رهف افتحي الباب بقا
رهف:انا ما بالبيت ،و البيت عرضو على البيع و بدي قلك شغلة كمان ….طلقني
سكرت الخط بوجهو ،رجع اتصل فيني و ما رديت عليه ،بعتلي مسجات
فادي:ردي فورا احسن ما اخرب الدنيا على راسك ….
ضحكتي علي و قشطيني البيت …
.انا لحمي مر ما بيتاكل ….
رح لاقيكي و اقتلك يا غدارة ….
قفلت موبايلي حتى ما بقا اقرأ مسجاتو و خاف اكتر ،ما طلعت من البيت حتى رن الجرس ،رحت اطلعت من العين،كان علاءو اولادو ،فتحت الباب
رهف:اهلين علاء
علاء:كيفك انشالله بخير
رهف:لحمدلله ،انا بعتذر ما رح اقدر قلك تفضل على بيتك
علاء:ما في مشكلة ،جبتلك الاولاد
رهف؛اي اهلا و سهلا فوتو حبيباتي
علاء:يلا بابا …اسمعو كلمة خالتو و ما تعذبوا ….هاي اغراضن
رائد:بابا ايمت رح تجي تاخدنا من هون ؟
علاء:بس ارجع من الشغل بجي باخدكن
رهف:علاء خلص اتركن عندي و خلين ينامو هون هالفترة و بس ترجع من شغلك مر شوفن
علاء:طيب ماشي
نزل من عندي علاءو انا انتبهت للكلمة يلي قلتلو اياها،كيف بدو يجي يشوفن و انا لحالي بالبيت ،فاتو رائد و قيصر لجوا و بس شافن يزن طار عقلو ،صارو يلعبو مع بعض بعدين تقاتلو و انا قعدت فك بيناتن ،رن موبايبلي كان اخي سامح عم يتصل فيني
رهف:الو
سامح :وينك انت ؟ .
رهف:انا …انا عند رفيقتي
سامح:ليش تاركة بيتك و طالبة الطلاق؟
رهف:سامح انت بتعرف منيح ليش ؟
سامح :طيب اقطعي تكت و تعي لهون .
رهف:و ابني؟
؛
سامح:من غير ابنك
رهف:ما بطلع بدونو
سامح :معناها ارجعي لزوجك
رهف:ما رح ارجعلو ،ما حدا عايش محلي و عم يتحمل يلي انا عم اتحملو ، بدي اطلق منو و ما طلبت مساعدة منكن لا مادياو لا معنويا ،رح اتوظف و اصرف على حالي
سامح :ولله نحن ما عنا اخت مطلقة تقعد لحالا
رهف:انزل اقعد معي
سامح:رهف ما تتهبلي علي ،بدك تطلقي بتتركيلو ابنو و بتطلعي لعنا ،غير هيك ارجعي لزوجك و حتى لو اعطاكي اياه انا ما مستعد ربيه
رهف:طيب منحكي لسا ،يزن ما بعرف وين راح ،سلام
سكرت الخط انا و معصبة ،بعد شوي دقلي علاء
علاء:ابعتيلي الاولاد انا تحت ،رح اخدن مشوار بالسيارة و رجعن و ابعتي يزن معن كمان بيتسلى ،اكيد ما عم طلعيه من البيت
رهف:اي الو يومين ما طلع ،رح ابعتو بس الله يخليك دير بالك عليه ،حدا يشوفو معك او يمد راسو من الشباك
علاء:اكيد ،رح خليه يقعد بالنص بين قيصر و رائد

37 تعليقاً

  1. القصه حلوه كتير و مشوقه ما اعتقد انه علاءرح يضرها ل رهف لانه هو يلي عمل الخطط وكشف كلشي، وعندي احساس رح، يحبو بعض ويتزوجو

  2. رووووووووووووووووووووووووووووووووووووووووووووووووووووووووووووووعععععععععععععععععععععععععععععععععععععععععههههههههههههههههههه بجنن

  3. قصهه في قمةة الرووعهه😍 وعلاء شخص ذكي ورااقي انو ما فضح زوجتو مع انها بتستاهل الفضيحه وشكلو رح يحب رهف ويتزوجو 😍😍
    بدنااا الكمالهه مااا طووولوو عليناااا 💚

اترك تعليقاً

لن يتم نشر عنوان بريدك الإلكتروني.