المنين بالعجوة رووووعه ناعم و دايب … ملوش حل صراحة, هكذا عبرت صاحبة الوصفة المبدعة Tender Heart عن وصفتها فلنتابع الطريقة.
المقادير:
١٢٠٠ جم دقيق لكل الاغراض ‘ الضحي’/ ٣٠٠ جم سمنة / ٣٠٠ مم زيت/ ٤٠٠ جم ماء/ ١٢ جم ملح / ١٤٠ جم سكر بودره/ ٢٤ جم خميرة
المقادير بالكوب لنص الكمية
٦٠٠ جم دقيق = ٤ كوب دقيق غير مكبوس
١٥٠ مم زيت= نص كوب
١٥٠ جم سمنة= كوب مكبوس سمنة جامدة مش سايحة
١٢جم خميرة = م ك خميرة
ولازم تختبري الخميرة بتاعتك تدوبيها في ميه فاترة وسكر لو نوع الخميرة بتاعك قوي جدا وبتفور بسرعه قللي مقدار الخميرة للنص لان الجو حر وده مش بنخمره زي العيش
٦ جم ملح = م ص
٧٠ جم سكر = تقريبا ٥ م ك
٢٠٠ مم ميه = كوب الا ربع
طبعا كمية المية قابلة للزيادة والنقص بتحبوه ناعم زيي يبقي نقلل السوائل
الحشو:
عجوة نوعيه كويسة … انا جبت الطحان بنقلبها مع م ك زبدة ورشة قرفة وسمسم
وممكن نحشي بملبن
الطريقة :
اول حاجة بدوب الخميرة الفوريه مع م ك سكر وشوية ميه فاترة ونركنها لحد ما تبقي فومي
بنخلط الدقيق والملح والسكر وننزل بالزيت ونبس زي الكحك وبعدين ننزل بالسمنة شويه شويه ونبسه كويس
ولما الخميرة تبقي فومي وتعلي ننزل بيها ع خليط الدقيق وناخد بالنا طالما بدأنا نضيف المية ما نعجنش كتير يا دوب بنلم العجينة ونقلب فقط
ننزل بالمية بالتدريج لحد ما العجينة تلم ويكون قوامها وسط لا طرية زيادة ولا يابسه
نغطيها ونريحها تلت ساعه وبعدين نبتدي نشكل
وبعد التشكيل نريحها تلت ساعه ونلمع بالبيض انا بدوب م نسكافيه مع م ك مية سخنة واربها مع البيض اللي هلمع بيه وممكن تستغنوا عن النسكافيه و تخطي فانيليا
وناخد بالنا اننا مش بنخمرها بعد التشكيل كتير ربع او تلت ساعة فقط
نسخن الفرن كويس ع ١٥٠ / ١٦٠ وندخلها ع الرف الوسطاني لحد ما تاخد لون حلو فوق وتحت
وبس كده.
حابب تحصل على كل وصفات زاكي؟ حمل تطبيق زاكي المجاني للأجهزة الذكية من هنا:
https://goo.gl/ze0y3j
نسعد بمتابعتكم لنا على جروب زاكي لفن الطهي:
المنين بالعجوة رووووعه ناعم و دايب
