كيكة بقشطة الليمون

107 6٬285
 

كيكة بقشطة الليمون

كيكة بقشطة الليمون

كيكة بقشطة الليمون

كيكة بقشطة الليمون, معكم صديقة زاكي الشيف الموهوبة ,

المقادير

  • خليط كيك شوكولا
  • لقشطة الليمون
  • 3 كوب حليب سائل
  • 3 م.ك طحين
  • 3 م.ك نشا
  • 6 م.ك سكر
  • برش ليمونتين اصفر
  • للتزيين
  • الصوص الأبيض اللي عملته الاسبوع الماضي

الخطوات

السلام عليكم ورحمة الله وبركاته

انواع الكيك لاحصر لها وزي ماتعودنا بنحب نجرب كل جديد ومختلف ونخرج عن المألوف شوي وكيكتي لليوم فيها حيله بسيطة انه بتحطي طبقتين مختلفتين بالفرن بشكل بيطلعوا بشكل ثاني بعد الخبز، بلاش اطول عليكم خلينا نشوف الطريقة

أولاً/ خليط الكيك

بنعمل خليط كيك شوكولا معتمد عندك

انا بستعمل 4 بيضات بخفقهم مع فانيلا وم.ك خل ابيض وكاسة ونص سكر لحتى يبيض ّ البيض وينفش شوي بضيف كاسة زيت ذرة وبخفق واخر شي كاسة حليب بالتناوب مع كاستين طحين منخول و نص كاسة كاكاو و رشة ملح وملعقة كبيرة بيكينج باودر .

—خليط الكيك جاهز بنصبه في صينية مرتفعة الحواف.

ثانياً/ خليط القشطة

بنحضر 3 كوب حليب سائل وعليهم 3 م.ك طحين و3م.ك نشا و6 م.ك سكر وبرش ليمونتين وبنحركهم بشكل ممتاز عالبارد. بنحاول نطلع خلاصة قشر الليمون كلها واحنا بنحرك وبفضل تكون هالحركة عالصفاية زي الصورة.

— بنحطهم عنار متوسطة مع التحريك المستمر لحتى يتخن معك . بتطفي الغاز.

— بتغطي القشطة بنايلون لحتى يهدا شوي مش يبرد تماما ،انتي بهالاثناء جهزي خليط الكيك،

— بتحركيه وبتضيفيه على خليط الكيك بنص الصينية بنص خليط الكيك لازم مايلمس الحواف.

ثالثاً/الخبز

بتخبزي الكيكة عادي كالمعتاد بفرن محمي على 180 لمدة ساعة كاملة.

—هاي الكيكة اختبار نضجها صعب شوي لانه من جوا فيها سائل القشطة فمارح يبين معك الاختبار بس هيه عيارها ساعة وبتكون استوت عالاكيد. ممكن تتأكدي بإنه تغرزي عود الخشب بالطبقة الخارجية للكيك من فوق بدون ما تتعمقي بالعود وتصلي للقشطة، واذا كانت لسا رطبة وطلع العود مش نظيف خليها كمان عشر دقائق.

— بنتركها بعد الاستواء بصينيتها تبرد تماااما واذا خليتيها بالثلاجة لثاني يوم احسن.

رابعاً/ وين الحلو بالموضوع؟

الحلو انه رح تستوي الكيكة وتبين كيكة شوكولا عادية بس تقطعيها رح يطلع داخلها حشوة القشطة متماسكة ومرتبة وطيبة كثير.

خامساً/التقديم

بتتزين على ذوقك انا زينتها بإنه صبيت شوية صوص شوكولا بالفراغ اللي فوق الكيكة وفوقه الصوص الأبيض اللي نزلت طريقته وزينت فيها وهي باردة والكيكة باردة ورشة فستق حلبي مطحون وخرز السكر اختياري.

حلو تتقطع الكيكة قدام ضيوفك او قدام عيلتك لانه بتبين من برا عادية وبس تقطعي قطعه بطلع مفاجأة.

ملاااااحظة

ممكن تنعمل معكوسة الالوان يعني الكيكة عفانيلا والقشطة على كاكاو بتبدلي الثلاث ملاعق طحين بثلاث ملاعق كاكاو.

عرض التعليقات (107)