قصة في تربية الأبناء بالله عليكم تقرؤها

55 4٬119

قصة في تربية الأبناء بالله عليكم تقرؤها
أهلا وسهلا فيكم يا شلتنا الحلوة شلة الأنس, بالله كل وحدة فيكم بتعرف صحبات أو جارات أو أقارب دلها على تطبيق زاكي لتنضم معنا في شلة الانس هي رابط تحميل التطبيق: https://goo.gl/ze0y3j
اليوم في قسم المنوعات في زاكي, راح نقدملكم قصة حقيقة على لسان صاحب القصة, لنتابع أصدقائي, وانتظر رأيكم في التعليقات.

قصة في تربية الأبناء بالله عليكم تقرؤها

وانا فى تالته اعدادى كنت فى مدرسه خاصه وكل العيال معاها تليفونات بكاميرا
وانا كان نفسي فى موبايل زيهم
روحت قولت لابويا انا عايز موبايل..قالي اشتغل وهات لنفسك..انا عليا أعلمك واكبرك ..اي رفاهيات زياده انت محتاجها انزل اشتغل وهاتها لنفسك ..ابويا فعلا كان حاطط كل قرش معاه فى تعليمنا ومقتنع ان ده الاستثمار الحقيقي

المهم عملت مشروع خاص ونزلت اشتريت من اسكندرية مصليات صلاه بتتطبق كانت لسه طالعه جديد ووقفت بعتها فى معرض الكتاب..كان امن المعرض بيجرى ورايا لو شافني واتقبض عليا ٣ مرات واتاخد مني بضاعه كتير واتضربت واتهانت..ومكنتش بقول لامي عشان لو عرفت اني اتضربت من امن المعرض مش هتنزلنى من البيت
وكنت كل ليله اروح اعد الفلوس الي بعت بيها وانا فى غايه الانبساط والفرح

عمرى ما انسى والله وانا واقف قدام مسجد المعرض وبنادى بصوت عالى ..مصلية بتتطبق وتتحط فى الجراب بخمسه جنيه..في السفر والرحلات والمصايف والشغل يا استاذ ب ٥ جنيه ..واول ما ييجي الامن الم الفرشه وانط من علي سور المسجد واجرى

عدى الموسم وطلعت بربح ٧٠٠ ج وكانوا بالنسبالي اول مره امسك مبلغ زى ده فى ايدى .. فكرت اجيب الموبايل ولا لا لحد ماقررت اني مش محتاج موبايل بكاميرا واغاني بالشئ الفلاني كفايه موبايل بيتصل واحوش الفلوس دى واعمل بيها مشروع تاني

السنه الي بعدها طلعت الفلوس الي محوشها وفلوس شغل الصيف فى مصنع الحلويات وكملت الباقي من امي ونزلت جبت كميه ضخمه من المصليات تاني..
ونزلت ابعها فى المعرض تاني..بس المره دى اتعلمت ازاى اهرب من الامن واتفقت مع البياعين الي زيي وبقينا ندل بعض لو الامن قرب

فى اخر المعرض كان معايا ٣٠٠٠ ج وكنت طاير من الفرحه ومش متخيل اني نجحت كده

نزلت جبت الموبايل الي بحلم بيه وروحت اشتريت كتب وروايات كتير من المعرض ودخلت كنتاكي الي عمرى مادخلته وكنت مبسوط اوى وانا باكل من تعبي ووقوفي فى الشمس ١٥ يوم

فى تانيه كليه عملت مشروع كبير دفعت فيه ١٥ الف جنيه وكان مشروع خيري مش هيعود عليا بربح ..الصدمه لما خسرت ١٢ الف جنيه ومتبقاليش غير ٣ الاف جنيه ..افتكر وقتها قفلت علي نفسى القوضه ٣ ايام مبكلمش حد ولا بفتح بقى ..بعيط وباصص في السقف وبس

بعدها مسكت ورقه وقلم وقعدت اكتب كل درس اتعلمته من التجربه دى …١٢٣٤٥٦ نقط كتير اوي مبتخلصش

مفيش سنتين ودخلت مشروع سريع برضو بيع تيشيرتات فى الشارع وفي ظرف شهر الحمد لله ربحه تعدى ال ١٢ الف الي خسرتهم..جبت بيهم الكاميرا الي كنت بحلم بيها وشاركت بالباقي فى مصاريف الكليه

الحمد لله بطلت ابيع فى الشارع خلاص من بعد ما اتخرجت ولبست البالطو الابيض ..وان كان لو عليا فكتير بشتاق للتجاره فى الشارع وببقى عايز اسيب العلاج الطبيعي وانزل ابيع اي حاجه

الى عايز اقوله بس للشباب من جيل اعدادي وثانوى والى حتي فى الكلية
متعتمدش علي وجود اهلك جنبك..انزل تاجر وامسك قرش ولف الدنيا واتعامل مع كل الناس واخسر ميهمكش ..تخسر دلوقتي احسن ماتخسر علي كبر

والساده الاهالى ..
علموا ولادكم يشتغلوا من صغرهم عشان يعرفوا يعتمدوا علي نفسهم لما يكبروا ويصرفوا علي نفسهم من شغلهم وشقاهم وتعبهم ويحسوا بقيمه القرش الي بيطلعوه من جيبهم ويحتكوا بفئه العمال والفقرا ويعرفوا النعمه الي هما فيها..

علموهم يحلوا مشاكلهم لوحدهم ومتتدخلوش واتفرجوا عليهم من بعيد وقوموهم بالعقل ..

بطلوا تساندوهم فى كل قرش محتاجينه..حتى لو رفاهيات ملهاش لازمه..عشان ميجيش عليكم الوقت الي تشوفوا فيه عيالكم متجوزه ومعاهم عيال ولسه بياخدوا مصروف منكم

عرض التعليقات (55)