أنا بدي أطلق هذا اخر قرار عندي

118 8٬659

أنا بدي أطلق هذا اخر قرار عندي
أين تعيش السعادة بقلم مال الشام بقلم مال الشام

كما عودناكم في قسم المنوعات في زاكي, نقدم لكم مجموعة من المقالات الاجتماعية الهادفة, قراءة ممتعة نتمناها لكم, وننتظر ارؤكم في التعليقات

أنا بدي أطلق هذا اخر قرار عندي
أنا بدي أطلق هذا اخر قرار عندي

#الجزء الأول

ملاك: انا بدي اتطلق…هاد اخر قرار عندي

علي: طلاق!! لك بدك تطلقي يا اختي لهون وصلت معك؟؟

رنا: صلي عالنبي ملاك ما بتوصل الامور لهون هلا بيجي جوزك و بتتصالحو

ملاك: ايه بعرف انو هلا بيجي و منتصالح و منرجع لذات الحياة بس انا مليييت انا مليت عم تفهمو
انا ماني حيط
ماني حيوان بدو ياكل و يشرب و ينام…. انا تعبت منو
انسان بارد… بارد و ناشف… لك شو شايف حالو رئيس وزراء، ليك اخي ازا ما بتتحملني ببيتك عادي بستأجر بيت لحالي والاولاد رح خليهن عندو

علي: رنا انا اعصابي تلفت منها انتي احكي معها انا طالع اخد نفس لان اختتتنقت
وطلع و طرق الباب وراه بقوة
ملاك ضلت تبكي و رنا حست الوضع ما بطمن مسكت الاستغفار و صارت تدعي ما ينخرب بيت اخت جوزها

ملاك: رنا… انتي ست متلي عم تفهمي علي مو؟ انا مو مبسوطة بحياتي حاسه حالي متل اللآلة بفيق اطبخ و نظف البيت و اركض ورا الاولاد و حل مشاكلهن… بكون بحاجتو يرجع يحسسني انو مقدر تعبي… بكون بحاجتو يفوت و بأيدو كيس صغير و يقلي تعي هاد الك.. ممكن يتزكر يجيب شي للاولاد او يجيب شي ضروري للبيت بس ما بتزكر شي بخصني..
يكون ناطرة يفوت يبوسني ع جبيني يقلي اشتقتلك
بشتهي يقلي كيف كان نهارك حبيبتي؟
يحكيلي لا تطبخي اليوم بدي ياكي بس تدللي و ترتاحي
طيب ع الاقل ياخدني مشوار كل فترة لغير نفسيتي، يعتم بالاولاد عني
الوحده منا ازا جوزها ما حس فيها شو بدا تعمل بحياتها شووو شووو فهميني مشان الله

رنا: لا حول ولا قوة الا بالله، لك طيب انتي قليلو بحب الورد… بحب الدلال بدي هيك وهيك… اعملي جو رومنسي و هالقصص

ملاك: والله بعمل هيك اوقات بيطنش و اوقات لما كبر الموضوع بوعدني يتغير الوضع… هيك بعيش يومين حلوين و منرجع لحالتنا، انا خلص تعبت

رنا: لك يا اختي هاد الرجال المشورب هو ذاتو و نفسو الطفل الصغير الي بضل يحلم بلعبه، بضل ييكي لتجبلو ياها امو
و هو ذاتو الي بتشوفيه ماسك هاللعبه و عم يقطعها و يزتها عالدرج بعد فترة و يدير ضهرو و يمشي… ليش متأملة فيه كتير

ملاك: هي اللعبه ما فيها تعمل شي بس انا فيني اعمل و كتير كمان و ما رح اقبل بهل حالة ليكك انتي و اخي ما بكن شي و مرتاحين ليش مكتوب علي الشقا لييييش

رنا: هههههههه

ملاك: ليش عم تضحكي!!

رنا: يا ملاك يا حبيبتي انتي متل اختي الصغيرة… انا كم سنه اكبر منك؟

ملاك: 9 سنين

رنا: ياعمري انا مرق علي قد شعر راسي و تعزبت متلك و مرقت علي اوقات صعبه، استعنت بالله و كملت حياتي…
انا بعد 10 سنوات من زواجي عرفت وفهمت ان كل شي علمتني ياه امي الله يرحمها غلط بغلط، يعني قصة البسيلو تغندري و نظفي بيتك و رتبي ولادك بيقوم جوزك بيدوب بدباديبك مو صحيح ازا ما كنتي شاطرة و اد حالك لو شعلتي اصابيعك العشرة ما رح يعشقك، اديش في نسوان مانشحين و بينهن و بين الفهم متل السما و الارض و بتلائي ازواجهن بيركضو وراهن، ليش يا حزرك؟ لان الشطارة هي تعرفي اسرار و مفاتيح قلب جوزك و شخصبتو، مو تقعدي تتعلمي اكله من الهند و طبخه من السند لتعبي كرشو
عبي قلبو بالاول ياعمري…. ازا القلب فاضي كل شغلك التاني بلا معنى..
ليكي تؤبريني والله الوحده قعدتها مع جوزها يشربو فنجان قهوة رليق بتسوا الدنيا و مافيها و هو عم يحكيلها عن يومو و شغلو..
الزواج مانو بحبك و اشتئتلك و ورد و سهرات و الي بتقلك انا هيك عايشه حطي اصبعك بعينها و قليلها كزابة بقص ايدي ازا ما بس يجي جوزك من شغلو بتركضي و بتجيبي جاط مي و ملح لتنقعي رجليه…
ازا كان جوزك بيحترمك و بيخاف الله فيكي اشكري ربك و اهدي
يا ملاك الزواج حلو لو نحنا بدنا يكون حلو، فهمتيني؟ #مال_الشام

ملاك: حكيك حلو بس انا وصلت لمرحلة يئست.. جربت معو كتير طرق لخلي حياتنا تصير حلوة
جربت كتير طرق لخليه يتعلق فيني و خليه يصير حنون معي متل مابدي بس عبث!! هو وهالحيط واحد

سكتت رنا و حست انو القصه صعبه شوي و ما بتنحل بشوية حكي…
التنتين كانو ساكتين… و بعدا فات لعندهن علي

علي: شو ملوكة روقتي؟

ملاك: ايه… شوي

علي: طيب يلا قومي اخدك لعند جوزك..

ملاك: نننعم!!!!!!!!

علي: جيبي شنتك و يلا… اسمعي كلمتي الله يرضى عليكي..

و طلع علي و ملاك حست حالها حدا ضربها كف ع وشها
هلا بدو يقول ما الها ظهر و مرجوعها لعندي…
لحقت علي لبرا و ندهتلو

ملاك: اخي الله يوفقك خلص برجع ع بيتي بس خليه هو يتصل يرجعني

علي: و ازا ما اتصل؟!

ملاك: بيتصل انا متاكده… بس يومين الله يوفقك انت بهون عليك تنهان كرامتي؟

علي: استغفر الله العظيم…. طيب اختي طيب… رح سايرك
اليوم ما رح احكي معك شي يس بكرة في جوز كلام بدنا نحكيه

ملاك: ليش شو في؟

علي:بكرا بفهمك… انا رايحه لعند وسيم قولي لرنا تجهز العشا ما يتأخر..

ملاك ارتاحت انو اخوها ما يبس راسو يرجعها…

ملاك: ايه الله معك اخي بالسلامه…

فاتت ملاك بدلت عبايتها و لبست قميص بيت… و قامت تعمل عشا تركت رنا ترتاح شوي… و هي عم تشتغل بالمطبخ رن موبايلها… مسكت الموبايل… هاد يوسف عم يتصل!!!
شو اعمل رد عليه ولا لا

ياربي شو اعمل رد و لا لا… خلص رح رد…

#اين_تعيش_السعادة
#مال_الشام

-2-

يوسف: مرحبا
ملاك: اهلين… خير؟
يوسف:هيك العالم بتحكي؟
ملاك:لك قول لحالك
قول لحالك هيك العالم بتعيش؟
هيك العالم بتتجوز؟
هييييك فهمني
يوسف:لك يا مخلوقه انا بعمري خليتك تجوعي
بعمري خليتك تمدي ايدك لحدا
بعمرك لقيتيني مع شي مرا
لك انتي شو بدك اكتر من هيك فهميني…

كانت ملاك بدها ترد، في شي منعها
شي قلها هاد الحكي كلو ما بيفيد…

ملاك: طيب… تعال خدني بكرة انشغل بالي عالاولاد

يوسف: طيب بمر عليكي بعد الشغل…

تركت الاكل وقعدت عم تفكر… شو بدها تعمل…

رنا: ملاك… لك ملاك وين صافنه

ملاك: اه؟ لا مو صافنه

رنا: ايوه واضح

قامت ملاك تخفق البيض… و رنا عم تعمل فول

ملاك: اتصل يوسف رح يجي بكرة ياخدني… هي اخر فرصة لعلاقتنا
ازا ما تغيرت رح اتطلق وخبري علي هاد الكلام لو سمحتي

رنا ما جاوبت

ملاك: شو ماعندك تعليق؟

رنا: عندي.. بس رح تتقبليه؟

ملاك: طبعا انا بحب اسمع رأيك و بهمني قولي

رنا: انتي قلتي ازا ( ما تغير) .. افكارك من الاساس غلط
خلينا نقول ( ازا ما تغيرنا مع بعض)

ملاك: ليش انتي شايفتيني مقصرة يبيتي و زوجي؟

رنا: انا ماني زوجك لاعرف انك مقصره او لا… هاد اغبى سؤال ممكن تسأليني ياه و لا انتي الي بتحكمي انك مقصره او لا ليش مسكرة ادانك و عيونك عن اخطاءك و مفتحيتهن عشرة على عشرة على جوزك
اسألي هو ازا مقصرة مو انا

ملاك: مشان يكبر راسو؟ بعدين كتير سألتو ما لقيت نتيجة منبلش رايقين بتكبر بيناتنا و منتخانئ و محدا بفهم ع التاني

رنا: حلو هالمرة اعملي نفس الشي بس شغلي التسجيل ع موبايلك وبس خلصتو فوتي ع غرفتك و شغليه و ضلك عيديه و جيبي ورقه وقلم و اكتبي النقاط الي قلك عنهن.. وبلشي حليهن وحده وحده

ملاك: والله هاد الي ناقص ،، بعدين شو الهدف من هالشغله؟

رنا: هي الخطوة رح تقلب حياتك، دايما لما تحكي انتي وجوزك بتتطور الامور و بتتخانقو والواحد بكون معصب وماخد وضعية الدفاع عن النفس
ازا قلك انتي مقصرة بتتوتري و بتقليلو انت مقصر اكتر بمليون مره
وعلى هالمنوال بنتهي الحديث بدون فائدة صح؟

ملاك: مزبوط

رنا: لما ترجعي تسمعي التسجيل لحالك و ع رواق رح تركزي وتفهمي جوزك شو بدو وشو مشاكلو
اكتبيهن ع ورقه و حليهن وحده وحده… و في شي مهم

ملاك: شو هو قولي

رنا: اي تغير بحياتك اعطيه الو مبرر مقنع لا تحسسيه انك عم تعملي هاد الشي كرمالو لانو الرجال ما بتجذبهن الانثى المضحية… خلي اسبابك تكون مقنعه ليشوف انك انتي هيك مو انك قاتله حالك لترضيه

ملاك: حكيك حلو… رح اخد بنصيحتك

فات علي عالبيت..

علي: رنا… ملاك
وينكن؟

رنا راحت تشوف جوزها و انا ضليت عم فكر بحكيها و فكرتها عجبتني كتير كتير…. انا عصبيه و وقت نحكي بشي بفور دمي و ما بعود ركز
رح اعملها..

تعشينا و نمنا و رنا خبرت اخي انو بكرا يوسف جاي ياخدني و فرح كتير…

تاني نهار افطرنا و عم نشرب قهوة مع بعض..
علي: رنا ممكن تتركيني انا وملاك شوي خلينا نحكي مع بعض؟
رنا: يوه ليش في شي مخبى عني؟
علي:لا بس في حكي بيني و بينها الله يرضى عليكي

ما عجبها لرنا قلبت وشها و طلعت و ملاك ما كان عم يخطرلها شو بدو يحكي اخوها..

علي: ايه ملاك
ملاك: ايه اخي خير
علي:قبل ما ترجعي ع بيتك بدي قلك هالكلمتين افهميهن و احفظيهن…
ملاك:لحظة لا تحكي
علي:ليش!
ملاك:بدي شغل التسجيل
علي ضحك كتيرررررر: ههههههه هي عادة رنا بس بتعرفي والله بتجيب نتيجة… يلا شغلي
ملاك: ايوه يلا شغلتو احكي
علي: بس بغلاتي لا تسمعيه لرنا…
ملاك: ههههه وعد.. يلا
علي: اختي انتو النسوان مفكرين انو عم تتعبو و تعملو كل شي لترضونا… بس مابتعرفو انو نحنا كمان همنا اكتر منكن بمية مرة
يمكن سألتي الف ست و اخدتي نصايحهن
بس هلا خدي هالنصيحة من رجال بفهم ع جوزك..
كم مرة سكتي عن شغلات بتزعجك من جوزك و قلتي مابدي اخرب بيتي خليني ساكته؟
ملاك: يوووه كتير
علي: ايه يوسف بكون اكتر منك!
فتحت عيونها ملاك و انصدمت

علي: لك ايه متل ما عم قلك… حبيبتي نحنا كمان منداري و منسكت .. كتير تصرفات بتزعجنا و منقول يلا بسيطة ومابدي اخرب بيتي
يلا مابدي اتخانق معها و نرعب الاولاد
كتير مو شوي… غير هم الحياة و الشغل و كيف بدنا نأمن ولادنا بحياة محترمة… هاد الحمل بهد الرجال و انتو مستحيل تفهمو
متل وجع الولاده نحنا مستحيل نقدر نفهم قديش صعب.
هي الملاحظات الصغيرة و التمريقات… و خليني ساكت… ومابدي اعمل مشاكل
بتكبر كتير… و بتصير حمل تقيل ع القلب و بتبلش مشاعرنا تتغير للزوجه لان كانت تصرفات بسيطه بس تجمعت بالقلب و عملت فجوة… بسببها ببلش الجفا و البرود
بعدين مو الكل الرجال بتعبر عن مشاعرها بنفس الطريقه..
في رجال بعبر بالحكي الحلو
باللمسه
بالنظرة
بهديه

يعني بتختلف من شخص لتاني… لا تطلعي ع فيلم هندي و تصيري تبكي و تقولي حياتي بارده
. شو رايك تفاجئيه وانتي تتغيري من باب كسر الروتين.. شوفي ردة فعله ما عجبك ارجعي لطبعك.. فهمتي ؟

ملاك ما حبت تناقش كتير… هزت براسها… و حست حالها مضغوطه ومو عرفانه من وين تبلش لتحافظ ع حياتها…

مرق النهار… و جهزت ملاك حالها قبل ما يجي يوسف ياخدها و كانت ماخده قرار انو هالمرة كل شي رح يتغير
يا رح تفوت ع بيتها و تعملو مملكة
او رح تطلع منو و تتركو للابد…
سمعت صرت زمور للسيارة… اخدت شنتنها و نزلت…

تطلعت بالسيارة مو جايب معو وردة يصالحها… مستحيل يتغير… ضلو ساكتين كل الطريق
نزلت عالبيت… فاتت ع اولادها اطمنت عليهن و عملت حوصه بالبيت لقت كل شي مكركب و بدو ترتيب!!

#اين_تعيش_السعادة_بقلم_مال_الشام

-3-

رتبت ملاك كل شي وهي ساكته و حطتلهن غدا و فاتت ع غرفتها.. و يوسف ضل بالصالة ما حاول يلحقها او يبادر بالحكي…
ضلت تستناه بس مافي نتيجة… بعدين قررت تروح هي تحكي معو… تطلعت من الباب لقتو عم يتفرج عالتلفيزون… شفلت التسجيل ع موبايلها حطتو بجيبتها و طلعت..

ملاك: احم احم…
يوسف: اهلين…
ملاك: مو شايف انو لازم نحكي؟
يوسف: بشو بدنا نحكي؟
ملاك: بحياتنا!!! عاجبتك حياتنا!
يوسف: ايه عاجبتني و ماعندي طاقه اعمل اكتر من هيك… هاد انا
مابعرف فتلك كلام غزل و لا يعرف العب بعقلك بحركات مولدنه شو اعمل… مابكفي انو ما الي بقصص النسوان و لا انتو بس بتحبو الي بيضحك عليكن؟

كانت بدها ترد عليه بس تزكرت انها عم تسجل و مو هاد الي جايه تحكي فيه..

ملاك: ممكن تهدا؟ انا عندي سؤال واحد…
انا بدي تصارحني بكل شي بزعجك فيني اي شي بخطرلك احكيه و بوعدك افهم عليك و حل الامور و انت بالمقابل بدك تسمعني و تحل الي بزعلني

يوسف: قلتلك مية مرة خلص الحكي ما بنفع ومابدي احكي

ملاك: امانه احكي
وضلت تترجاه لاقتنع…

يوسف: ولو انو عارف انو هلا رح نتخانق بس ماشي
اول شي انا بكره الصوت العالي ومافي رجال خلقو الله بتحمل الصوت العالي، مافي داعي تعيطي ع الاولاد بصوت بسد الادنين…
بعدين البيت اغلب الاحيان مكركب انا ما بحب العجقة بحب وقت اتطلع ع بيتي لاقيه بيلمع… لاقي كل شي مرتب و كل غرض بمطرحو امي هيك عودتني
و بحب شوف مرتي دايما مبتسمه و ريحتها عطرة…
بحب يكون في تغير بحياتنا شي جديد و مميز كل يوم بس انا ما عم شوف الا النكد و النق بدك دللك طيب و انتي ليش ما تغيري الشغلات الي ما بحبا…
هاد الفيس و النت الي بتضلك مشغوله عليه لو بلاه و تقعدي تعمليلنا حلو او تقرأي قرآن او تعلمي الاولاد شي شغله مو احسن؟
ما بتفكري الصبح تقومي تفطريني قبل ما اطلع اول سنه كنتي تصحي معي بس بعدين صرت اطلع و ما تسالي…

ملاك: خلصت؟

يوسف: ايه خلصت و ياريت تفكري بالحكي انا ما عم هاجمك انا بدي تصلحي من حالك..

و طلع يوسف من البيت و ملاك قعدت و صارت تبكي وهي مصدومه بحكي جوزها، و عم تفكر العمى هالئد شايفني مو منيحة و قلبو مليان

فاتت ع غرفتها و قفلت الباب و ضلت تبكي…
اتصلت عليها رنا..

رنا: مرحبا يا حلوة… كيفك.. طمنيني اتصالحتو؟

ملاك: لك ما في امل انا جد ما رح اقدر اتحملو او كمل معو. .

رنا: شو صايرررر

و فورا ملاك حكتلها كل شي صار بالحرف…

رنا: طيب سجلتي؟

ملاك: بالله؟؟ بعد هالحكي يروح ينفلق ما رح اعمل شي

رنا: قومي توضي و صلي ركعتين و بعدا جيبي ورقه و قلم و اكتبي كل شي حكاه

ملاك: مااابدي ما عاد بدي

رنا: صلي عالنبي… و بعدا دئيلي في كم شغله بدي قلك تعمليهن… يلا قومي صلي

ملاك حست انها كتير ضعيفه و ما ضل عندها حل… قامت عملت متل ما حكت رنا خلصت كل شي و دئتلها…

رنا: صرتي احسن

ملاك: شو بدو يخليني احسن… دمعتي ما عم تنشف، بس هديت شوي لما صليت… شو بدك تقولي؟

رنا: يا حبيبتي يا ملوكه نحنا البشر هيك الله خلقنا ما منشوف عيوبنا و لا النقص الي فينا ليش ما تتقبلي حكيو و تشتغلي عليه وتشوفي في نتيجة لما لا، مو احسن من خراب البيت
ع الاقل مشان ولادك حرام…

ملاك ما ردت…

رنا: ليكي هلا ابعتيلي الحكي الي كتبتيه مشان نلاقي حل مع بعض..

ملاك: رح ابعتلك ياهن ع الواتس فكري فيهن و بكرة الصبح بتقليلي شو اعمل

رنا: ايه و انتي قومي هيك البسي شي فرايحي و العبي مع ولادك خليه يرجع يسمع صوت ضحكتكن

ملاك: مع انو ما الي نفس بس يلا سلام…

قامت ملاك لبست بجامة زهر و رفعت شعرها و طلعت لعند ولادها و صارت تلعب معهن و تحكي معن و يضحكو و هي تضحك و نسيت زعلها بضحكت ولادها… فات يوسف و ضل واقف عند باب الصالة و مو مسدئ حالو
فرك عيونو… و حك راسو
شافتو ملاك كيف شكلو و ضحكت ع صدمتو و انبسطت بقلبها انها فاجئتو بردت فعلها…

ملاك: وسوفه حطلك عشا؟

يوسف: وسوفه؟ … انا يعني؟

الاولاد: يييه ماما لا تقولي لبابا وسوفه عيب تدلعيه

ملاك: لا مامي مين قلكن عيب؟ هاد حبيبي قبل ما يصير ابوكن
مو هيك ابو فراس؟ و غمزتلو

يوسف: اه؟ ايه هيك و نص

ملاك: طيب حبيبي غير تيابك و تعا عالمطبخ حط عشا معي…

ملاك مستغربه من حالها كيف الله اعطاها هالقوة هي… بس هي تشجعت وقت شافت ردت فعل يوسف و كيف متفاجئ فيها و ملامحو مرتاحه..

يوسف: انا اسف كتير ما كان قصدي الي حكيتو… بعتزر

ملاك: لك لا انا بعرف انك كنت معصب… خلص عادي اي تنين بتصير بيناتهن مشاكل بسيطه

كان فرحان يوسف كتير بردت فعلها و انو ما رجع لقى البيت ميت و الاولاد مكتئبين و ملاك قالبة وشها
اثر فيه هاد التصرف لان كان على غير للعاده
و ملاك قررت بقلبها انو كتير شغلات رح تتغير.. و من بكرا رح تبلش بالتغيرات وحده وحده…

#اين_تعيش_السعادة_مال_الشام

-4-

تاني نهار ما بلشت اعمل شي لان مابدي حسسو انو انا كلي اغلاط… تصرفت ع طبيعتي تماما وهو ما كان مسترجي يحكي شي بعد الحكي الي حكاه امبارح… اتصلت على رنا و كنت كتير متحمسه لبلش غير حياتي..

ملاك: الو صباحو مرت اخي
رنا: هلا حبيبتي كيفك؟
ملاك: تمام و انتي
رنا: الحمدلله… كيف صرتي
ملاك: حبابه قليلي بسرعه شو لازم اعمل امانه
رنا: ههههههه طيب هاتي ورقه و قلم.. و اكتبي كل شي رح قلك ياه… و لازم تنفذيه طيب؟
ملاك: ليش عندي حل تاني؟ لنشوف اخرتها مع يوسف بيك… عالاقل هيك بريح ضميري… يلا بلشي حكي

كتبت كل شي حكتلي ياه رنا و كانو شغلات بديهين بس الواحد مو دايما بنتبهلهن… بعدين طلعت الورقه الي كتبت فيا حكي يوسف

1- ما بحب الصوت العالي…
و صرت فكر، طيب الاولاد بجننوني بعدين انا ما بنتبه ع حالي كيف بدي اضبط صوتي! امممم… لازم اتدرب
و كمان لازم عود اولادي انو انا مافيني عيط بصوت عالي…
يييه والله فكرة ليش ما جيب جرس بصوت عصافير و حطو بغرفة الاولاد.. بس بدي ياهن بدق الجرس بيجو لعندي
ههههه حبيت هالفكرة… بعتتلو رساله (( جيب جرس معك يكون صوتو واطي… نغمتو عصافير،، ضروري لا تنسى))
مممم يلا ازا ما جاب رح علم ولادي على اشارة بيناتنا بس سمعوها يردو علي فوراً

2- ما بحب البيت مكركب..

لك انا مكركبه!! انا رح ورجيك…

و قمت عزلت البيت و خليت الاولاد يساعدوني… حاولت ارمي كل شي مو محتاجتو…فضيت البيت تقريبا..
و خليت الاولاد يجمعو العابهن بسلة و يضبوهن..
خليت بكل الغرف بس الشي الاساسي… كنب و طاولات
خليت بس مزهرية ع كل طاولة و رميت كل الزينه
و فعلا انتبهت ان في غيرة بكتير مطارح ما كنت انتبهلهن…

3- بحب مرتي مبتسمه و ريحتها عطره

ايه ايه هي رنا قالتلي انو مو قصدو حط عطر… انو لازم عطر شعري و حط كريمات ولوشن
يعني الريحة تكون طالعه مني مو عطر حطو و يطير فورا
ايه هي محلولة… حمام مغربي على اصولو و علبة مسك و بودرة اطفال بصير متل الفله

4- مابحب الفيس

ايه و هون رح سكر الفيس فترة يعني مسايرة، حاكم هالفيس صاير ضرتو … و اعمل ركن بغرفتي حط فيه مصحف وتوب صلاة
كل يوم قبل ما نام اقعد فيه و اقرأ سورة يس..

مرق الوقت بدون ما حس… اجا يوسف…
كان مبسوط كتير و جابلي الجرس و جاب فواكي و حلو للبيت و قلت لابني بس يجي بابا قلو ماما قالتلنا انها بتحبك كتيررررر

بس سمع هيك يوسف صار يضحك و حسيتو فرح انو اولادو بيعرفو اني بحبو…

قلهن ايه و انا بحبها كتير…
يا الله شو فرحت…

يوسف: ملاك ليش طلبتي الجرس؟
ملاك: بدي حطو بغرفة الاولاد لان عم ينبح صوتي و انا اندهلهن هيك احسن بس رنلهن الجرس بيجو
يوسف: بس صوتو عالي!
ملاك: ايه اضبطو ليصير صوتو واطي..
يوسف: طيب وليش هيك مغيرة ديكور البيت
ملاك: ممممم تغير شكل..
يوسف:يلا انا فايت نام
ملاك: انطرني لاجلي الجليات وفوت نام معك
يوسف: ما الك بالعاده تنامي بهل وقت بتقعدي عالفيس بس نام
ملاك: ييي والله مليت منو كتيرررر و حزفتو بعدين هلكت من الصبح و انا اشتغل تعبانه بدي ارتاح شوي..
يوسف: ماشي بعطيكي العافيه حبيبتي

حسيت كل شي تمام… جليت وفتت نمت و ارتحت و صحيت قبلو عملت قهوة و بسكوت و صحيتو
و ما اندلقت عليه بحبيبي و حياتي و غيرو
خليت حديثي طبيعي و كأنو ما في شي متغير

يوسف: شو حاطه عطر ريحتك طيبه
ملاك: عطر!! لا مو حاطه عطر صرت اتحسس منو اخر فترة بس هاد لوشن للجسم و معطر شعر و بودرة اطفال..
يوسف: كتير طيبه ريحتن ضلك حطي منن
ملاك: طيب اعطيني مصاري معتازتهن..
يوسف: ما معي… اجليها لبعدين

كنت رح قلو ايه بس تزكرت رنا وقت قالتلي اشتري كل شي بنفسك و تزكري ازا جوزك ما صرف مصاريه عليكي رح يصرفهن ع شي تاني و انتي اهم من كل شي..

اصريت عليه كتير و عصب مني قام اعطاني مصاري و قلب وشو فيني.. قلت معليه بس تشوف شو محضرتلك بتغير رأيك..
بالليل قعدت معو كان قاعد عالتلفيزون..

ملاك: يوسف
يوسف:خير
ملاك: ليك بدي تقلي هاد الاسبوع كلو شو بدكن تتغدو رح اكتبهن ع ورقه
يوسف:بالله؟ خلص كل يوم قرري ليش تكتبي لاسبوع؟
ملاك: خلصني يلا
الاحد: كبسه منيح؟ الاتنين شو؟
يوسف: مممم مقلوبة
ملاك: التلاتاء؟
يوسف: لك ما بعرف
ملاك: منيح شاكرية و رز؟
يوسف: ايه والله طيبه و الاربعاء صينية لحمة و الخميس

قاطعتو و قلتلو لا الخميس ما في غدا.. كل اسبوع رح اختار يوم مافي غدا… و كل شهر يوم تاخدني لحالي ع للمطعم بدون الاولاد بس هاد الشهر اخدت منك مصاري ما في ضرورة نروح ع المطعم..

يوسف: متل ما بدك عادي مناكل اي شي الخميس بس انتي بتعرفي راتبي ما بحتمل مصاريف مطاعم

ملاك: لا مو اي شي الاربعاء بزيد الطبخه ليضل منها و انت بتعمل شي جنبها او بتجيب معك شي مو غالي… و بالنسبه للمطعم لا راتبك بحتمل
ماني طالبه منك مطعم فخم… انا ام ولادك و شريكة حياتك و كل بنت بتشتهي تفوت و تطلع مع جوزها الله يخليلي ياك بعرف انك ما بتحب تخلي شي بنفسي
و انا ازا كنت موفرة مصاري انا بعزمك… بس ما رح اقبل باقل من طلعه كل شهر لك حتى القطط المنزليه اصحابهن بطلعوهن شمة هوا يوه!

يوسف:من وين طلعت براسك هالقصه؟

ملاك: والله ياعمري مافي شي بس ما بطلعلي يوم اجازه يا حبيبي؟ حاسة حالي عم اتعب و بدي شوية راحه و متل ما بهتم فيكن الي حق عليكن تهتمو فيني انت و الاولاد

يوسف: ايه بطلعلك ليش لا

الهدف كان من هالشغله انو يكون عندو علم انو باليوم كزا ما في اكل و مشان ما يقلب وشو فيني بالعكس يكون الامر طبيعي بالنسبه الو لان عندو علم مسبق و مع الوقت رح يتعودو عالنظام … وهيك انا بعرف شو لازمني غراض لكل الاسبوع و بوصيه عليهن مره وحده بالاسبوع
وحطيت بيوم اعمل كيك و يوم اعمل تشيز كيك
و حطيت اشارة ع يوم الخميس انو عطلتي رح ارتاح و اشتغل شغلي ليلة الاربعا مشان تاني نهار ما يكون عندي شغل
و الخميس اخود حمام استرخاء و دلل حالي و اعمل ماسكات بشرة زيت لشعري و ممكن زور رفقاتي … كنت رضيانه عن كل شي..

بعدين لقيت الجو بارد بيناتنا.. قمت لعند الاولاد لنيمهن و كتبت ع ورقه صغيرة (( اشتقتلك)) و قلت لابني الصغير يروح يعطيها لابوه و يبوسو و يقلو تصبح على خير

رجع ابني و يوسف معو و فات قعد مع الاولاد و انا طلعت عملت بوشار و عصير و حطيت اغنية هو بيحبها و انبسطنا كتير و تسلينا و تغير مزاجو..

#اين_تعيش_السعادة_مال_الشام

-5-

صحيت الصبح بكير صليت الفجر و قرأت قرآن بالمكان الي مخصصتو
ما حدا بيتخيل هالشغله شو غيرت فيني و بعيلتي
كنت كل يوم اقعد بس ربع ساعه ولادي و جوزي يسكتو و يهدو و ازا حدا ندهلي يوسف يقلهن ماما بتقرأ قرآن هس
كنت ابتسم و انبسط و ابني الكبير يضل قاعد جنبي و انا اقرأ
حسيت القرآن حط البركه بالييت حتى اولادي طلبو مني انو هن كمان بدهن بغرفتهن كل واحد مصحف و مكان خاص يقرأو فيه قرآن… حتى مرة قلت بدي اقرأ قران قبل ما نام.. اجا يوسف شافني عم اقرأ قران باسني ع راسي و قلي تقبل الله يا نور عيوني
ابتسمت و حسيت روحي من جوا فرحانه

خلصت قرآن و قمت عالسريع عملت صينية خلية النحل بالجبنة و شغلت فيروز و صحيت جوزي
بالاول قلي بكير اتركيني نايم بس اصريت عليه قلتلو بدي احكي معك بموضوع و قام غسل فطرنا و شربتو قهوة عالبرندة و جهزتلو تيابو…
كان كتير مروق قلي شو الموضوع؟
قلتلو الموضوع انو كل كم يوم بدي صحيك هيك اتصبح فيك قبل ما تطلع ع شغلك…
ابتسم و تيسر ع شغلو و دعيتلو كتير و قلتلو رح اشتقلك…

كان حياتي عم تحلى كل يوم اكتر…
كنت اتعزب حتى ما انسى شي و كون صبورة بس مع الوقت كانت النتيجة توضح اكتر و اكتر

فتحت الواتس لقيت رنا باعتلي رسالة فتحتا..

كوني عصفورة واقفة عـلى غُصن ، بس ما عندها ثقة بـِ الغصن عندها ثقة بجنحاتها
إوثقي_بحالگ …

ههههه ضحكت و بعتلها معك حق و حكيتلها كل شي عم يصير معي…
رجعت نمت و ربطت المنبه بعد ساعتين…
قمت رتبت البيت و اخدت الاولاد لعند رنا و نزلت ع السوق..
اشتريت ليوسف عطر و غلفتو و اشتريت الي فستان كنت مشتهيتو بس كنت قول مو معقوله البس هيك فستان فخم بالبيت هام لشي مناسبه… بس عرفت اني كتير غلطانه و انو مافي مناسبه اهم من ضحكة جوزي
المصاري بتروح و بتجي بس هي الايام مستحيل ترجع لان العمر بيمشي
هالفستان هلا بيلبئلي
بعد فترة ما بعود يناسبني… اشتريتو و انا مبسوطه

استعرت من عند رنا سشوار…
رجعت عالبيت فوتت الاولاد ع غرفتهن و عملت غدا و كنت عارفه شو بدي اعمل لهيك ما تلبكت…

اجا يوسف تغدا و فات ينام… بس حط راسو ع المخده حس في شي تحتها… رفعها لقى علبة العطر مغلفه و كتبتلو ورقه
مبروكة عليك حبيبي اشتهيتلك ياها

كتير فرح بتصرفي و قلي انا اسف لان عصبت عليكي لما طلبتي المصاري… قلتلو لا عادي انا بعرف وضعنا بس كتير اشتهيتلك ياه…
بس صحي جبت تيابو و شغلت المكوايه و كويت قدامو و حسستو قديش مهتمة باواعيه و عم اكويهن و انا مبتسمه… و قلو هاد القميص بجنن عليك
هاد البنطلون بدو قميص ابيض
بتعرف هاد القميص لما تلبسو بتزكرك وقت جيت طلبتني..
هاد الجينز كتير حلو مع البلوزة الي بتلبسها..
و اطويهن باهتمام.. و مسكت قميص و شميتو قلتلو يا الله شو بحب ريحتك
تطلع فيني بنظرة اول مره بشوفها بعيونو….
قلي انتي جد اسم ع مسمى انا محظوظ انك مرتي…
عطرت تيابو و ضبيتهن و انا طايرة من الفرحة…
صار يهتم فيني…
كنت كل يوم ابعتلو رسايل وهو بالشغل… و اتصل عليه بعد نص ساعه من طلعتو من البيت قلو بدي اتطمن عليك انك وصلت و ادعيلو… لما ما اتصل عليه صار هو يتصل و يقلي انا وصلت..
عملت كل شي بهدوء و بدون مبالغه مشان مايفكر الوضع مؤقت.

بالليل نيمت الاولاد و سشورت شعري و عملت تبولة و بيتزا
و مكياج خفيف و لبست الفستان
كانت مفاجئة ما بتنوصف
ضل يتغزل بجمالي و زادت ثقتي بحالي…
قالتلي رنا انو لازم كون مرحه… و خلي جواتي روح الطفوله
قمت بعفوية شفلت الاغاني و رقصت و قلتلو قوم ارقص معي سلو لان بعرسنا ما رقصنا هيك و حاولت ما اتلبك و انحرج… و كان كل شي حلو

سبحان الله… تصرفات صغيرة غيرت حياتي
يمكن جوزي ما صار متل روميو بس صار متل مابدي
حياتنا كان فيها حب و احترام و صار متعلق فيني و ما يهون عليه زعلي بنوب…
وولادي كانو مبسوطين انو شايفين امهن و ابوهن بحبو بعض و مبسوطين سوا…
دايما كنت اسالو

ملاك: يوسف يا ترى وين بتعيش السعاده؟
يوسف: ياشر بايدو ع السما و يقلي فوق بالجنه عند ربنا
ملاك: و الحياة مافيها سعاده؟
يوسف: الحياة مافيها الا التعتير و الشقى

كان جوابو يزعلني و يحبطني… و قررت ما عاد اسالو هالسؤال
كنا سهرانين كلنا انا وياه و الاولاد و عم نتفرج ع مسرحية عادل امام… و كنت مندمجه و عم اضحك انتبهت انو عم يتطلع فيني

ملاك: شبك ليش صافن فيني ؟بدك جبلك شي؟
يوسف: لك ملوكه بتعرفي وين بتعيش السعادة؟
ملاك: ههههه بالجنة حبيبي حفظتها
يوسف: انتي جنتي على الارض… بهل بيت بتعيش السعادة
ضليت عم اتطلع فيه خمس دقايق بدون ولا حرف و كلمتو عم ترن بادني…
من قلبي بتمنى كل ست تعرف تحافظ على سعادتها،، و ما تخسر ضحكتها… لان بقلب كل وحدة منا في سعادة بتعيش على هيئة ( نبضات قلب)

#انتهت

عرض التعليقات (118)