قصة اليوم: كيف بتعنسي؟

109 7٬149

قصة اليوم: كيف بتعنسي؟
مرحبا بكل أعضاء شلة الانس على تطبيق زاكي, وأهلا وسهلا بالجميع
في قسم المنوعات في زاكي, سوف ننقل لكم قصة مميزة لأخذ العبر, وكل القصص تحاكي الواقع الذي نعيشه, أعزاءنا القراء, قراءة ممتعة نتمناها لكم, وننتظر تعليقاتكم واراؤكم في القصة.

قصة اليوم: كيف بتعنسي؟
قصة اليوم: كيف بتعنسي؟

#كيف_بتعنسي ١
بهداك اليوم رنت علي صاحبتي صفاء وعزمتني عندها عالغدا
بس انا سبحان الله قلبي ناقزني ما ارتحت لهلعزومة المفاجئة قلتلها لك شو عدا ما بدا يعني ما الك بالعادة تعزمني هيك عزايم لك ايام الجامعة كان ينقص علي شلن من حق النسكافيه ما تقبلي تدفعيه عني حارتنا ديقة وبنعرف بعض من متى صاير موديلك ابو كرم
– لك الحق مو عليكي الحق على الي عملك قيمة وعزمك عالعموم بابا شاري لامي بوكسة كوسا من سوق الجمعة وصحتلو بسعر رخيص فقلت بعزمك تاكلنا معنا من هالكوسيات وهيك هيك ابن خالتي والي هو اخي بالرضاعة احتمال يجي يتغدى عنا واحنا عم بندورله على عروس ما بتعرفي يمكن ينضرب على عينه ويتزوجك ولا تنسي تلبسي شي متل العالم والناس حاكم بعرفك لو بصحلك بتيجي باواعي الصلاة ما بتأخري
سكرت الخط معها وانا فكر بهالعريس بلكي شالني من هم اهلي فتحت هالخزانة ودور على شي مرتب البسه ما كنت لاقي كله يا صغير يا كبير يا رايحة موضته يا اما كاحت من كتر الغسيل لك شو بدي اعمل شو بدي اعمل فكري يا لبنى شو الحل ،،،،، اه لقيتها احسن شي انزل عند نازك جارتنا زوجها عنده بالة كبيرة واكيد بجبلها اشكال الوان خليني اختار من عندها شي لبسة بيض وجهي فيها قدام العريس لبست عحالي ونزلت عند نازك سلمت عليها وقعدت عندها شوي
– لك نازك الك ولا للذيب عندي مشوار ضروري كتير كتير امانة عيرني شي البسه من عندك انتي زوجك عنده بالة واكيد عندك ملابس حلوين
– قال عندي قال لك عندي اشياء بتطير العقل وخرج صبايا بس لحتى عيرك شي لبسة بدي منك خدمة
– لك انتو شعب ما عندكو شي لله طيب اطلبي
– ابني فهيم بدك تقعدي معه وتدرسيه الاملاء وشوية رياضيات ساعة زمن وبعدها رح اعطيكي ملابس ما بتشوفيها الا عالتلفزيون ترا ابني ذكي بس لو يحط عقله بالدراسة ببدع
شو بدي اعمل امري لالله قعدت مع ابنها فهيم وعينكم ما تشوف هالفهيم شو فهيم لك هاد لازم سموه غشيم مو فهيم ولا اله علاقة بالفهم بروح وبرجع عالمدرسة سياحة وسفر
وما صدقت ايمتا خلصت هالساعة ورحت ركضت عند نازك بدي الملابس رمت بوجهي طقم عليم الله انها مطلعته بجهازها قبل عشر سنين قلتلها هلأ هاد الي ما بشوف متله الا بالتلفزيون اكيد ببرنامج كيف تعيد تدوير ملابسك واستخدامها لتنظيف المنزل
يقطع عمرها بس شو بدي اعمل ما عندي خيار تاني
اول ما صارت الساعة ١ الظهر لبست هالطقم السكني ولفيت عليه شالة فوشي يعني لون فرايحي ورحت عغرفة امي طولت من تحت تختها طقم كاسات ملفوف بورق تجليد ومشيت لعند الباب كانه البيض تحت اجري نتفة نتفة بلا ما حدا بالبيت يشوفني وانا طالعة بهالهيئة ويقلبوني مسخرتهم
طلعت من البيت وعم بنزل بالدراجات لقيت بوجهي زوجها لنازك وظل صافن فيني ومبحلق هيك ????? كنت بدي احلفله انه والله الطقم ماخدته من مرتك استعارة بس هو ابدا ظل صفن ومو ناطق
وصلت عند بيت رفقيتي صفاء ودخلت عندهم وقعدت بكل ادب واحترام كانت امها مخلصة الطبيخات وعم تعمل بالسلطة وكانت عندها وحدة اسمها ام رفيق ما بعرف شو بتقربلها هي جارتها هي اختها الله اعلم انا المهم عندي العريس
وقبل الغدا بثواني روحت ام رفيق من عندهم وحطو اهلها الغدا على هالطاولة وقعدنا نتغدى وانا كل شوي دق برفيقتي وينه العريس
تهمسلي مع ضحكة صغيرة ما بعرف شكله صار عنده ظرف وما قدر يجي ،،، يعدمني اياها وانا الي لبست وااتبهدلت وقعدت ساعة مع غشيم قصدي فهيم عالفاضي
وفجأة قام ابوها عن الطاولة ونفض الاكل بايده وصار يصرخ شو هاد شو هاد من وين هاي الشعرة اجت بالاكل
مسكينة امها لصفاء وجهها صار اشارة مرور قدامي وقالتله بتصير يا رجال يمكن بالغلط نزلت من شعري بس هو مصر انه هاي مو من شعرات الحجة وحكالها انا الي متزوجك ٣٠ سنين بحياتي ما شفتلك شعرة بالاكل بعدين بدك تعرفيني بشعراتك بعرفهم اكتر من حالي ويا زلمة يهديك يرضيك وهو ابدا مصر انه هاي مو من شعرات ام صفاء
اطلع فيي هديك النظرة وقلي عم لتكوني انتي ساعدتيهم بالطبيخات
– انا لا والله عمو ابدا انا بيبتنا ما بساعد بالاكل بدي اساعد هون
وبعد شوي وهالنقاش شغال شفتلكم شب شو شب يا عيني فات عالبيت وحمدت الله بعقلي الف مرة الي ما سمعني وانا عم بقول اني ما بشتغل شي بالبيت بس لو انه اخر جيته شوي لحتى اخلص اكل هلا كيف بدي اكل براحتي قدامه ضروري هلا ابوها لصفاء يعمل موشح النظافة اخ يا بطني عم اطلع عالكوسيات وقلبي يعتصر الما بس برضه برجع بطلع بالعريس بقول يلا كل شي بهون كرماله واجت ببالي فكرة لازم بين لهشب اني صاحبة امانة وبحكي الصدق والي شفته بعيوني وبعد صمت طويل من المل وابوها لحاله بسال وبجاول وبصرخ قلتله عمو انا بعرف هاي الشعرة لمين هي لوحدة كانت عند خالته ام صفاء اسمها ام رفيق ما كانت لابسة عراسها وهي عم تطبخ اطلعت بصفاء لقيتها عم تزورني من فوق ومن تحت ومن جنب وانا مفكرتها مبسوطة عالامانة تبعتي هي بس لو عضتلي عشفتها كنت فهمت انه بدها اياني اسكت
قلتله عمو هات لشوفها هي لون الشعرة احمر وام رفيق صابغة شعرها احمر
وقف ابوها على حيله وقال لام صفاء علي الطلاق لتلحقي بام رفيق

قربت عند صفاء وقلتلها كيفني معك وين بدها امك تلحق ام رفيق
– سلامة خيرك ام رفيق مطلقة وامها لحقتها
– ييييي والله ما كان قصدي اسفة يا صفاء زعلت من قلبي بس انا من جواتي مو فارقة معي تنباع بالعزا هي وامها المهم العريس
– ومين هاد الشب الي هون العريس صح
– اه صح هاد رفيق ابن خالتي ام رفيق الي كانت هون الصبح حتى تشوفك واذا عاجبتيها تروح وتبعت ابنها رفيق
وابو صفاء قام بده يروح عغرفته كنت بدي اناديه واقوله ام رفيق شعراتها سود هي من شعراتي بس ما لحقت هو وصل باب غرفته وامها لصفاء لبستني طقم الكاسات الي جبته معي براسي ووصلتني فيه عالمستشفى وطول الطريق وانا احكي فيق رفيق صديق وما حدا فاهم علي وطار الغدا وطارت صاحبتي وطار رفيق
#حنين_طه

عرض التعليقات (109)