الرئيسة / منوعات / بين الطنة والرنة ضعت بين الحماية والكنة الحلقة 7

بين الطنة والرنة ضعت بين الحماية والكنة الحلقة 7

/
/
/
4430 مشاهدات

بين الطنة والرنة ضعت بين الحماية والكنة الحلقة 7
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

بين الطنة والرنة ضعت بين الحماية والكنة الحلقة 7
بين الطنة والرنة ضعت بين الحماية والكنة الحلقة 7

#بين_الطنة_والرنة_ضعت_بين_الحماية_والكنة

الحلقة السابعة بعنوان(ولي العهد)

لولاكي لولولو لولاكي لولولولو لولاكي ما حبيت ))))

ولك يا هند افتحي هند
( عمتي الك زمان بتخبطي )
( ولك وطيه شوي لصوت التلفزيون ليش كل هاد عالي)
( عم استنى اعادة حلقة نهاية رجل شجاع واجت الاغنية هاي عليت الصوت شوي خلي الواحد ينبسط شوي )
( طيب خلصيني الحقيني بدي تساعديني شوي)
( يا عمتي ما هو انتي عارفة عمي حلف يمين انا ما اصيب ايشي بشغل البيت )
( والله عمك ما بعرف بشغل النسوان اكتر مني هينا حملنا وخلفنا وكنا من تاني يوم نشتغل بعدين اطمني بديش اشغلك كتير كله وانتي قاعدة )

نزلت لعندها ولا هي بتعطيني كومة جرابات ايشي مخزوقة من قدام وايشي من جنب وخدي قطبيهم يا هند
( عمتي ما في عندك خيط ابيض هدول كلهم بدهم خيط ابيض مش احمر )
( مش مشكلة ما هم مخبيات ما حدا شايف )
( لا وبتحكي عني وعن امي بنعرفش للزوق )
( شو بتحكي يا هند )
( ولا ايشي عمتي بحكي الله يخليلنا اياكي )

قلت لحالي كوني قاعدة بشغل هالتلفزيون احضر المسلسل
( شو هاد الي عم تحضريه )
( هاد مسلسل يا عمتي اسمه نهاية رجل شجاع لايمن زيدان وسوزان نجم الدين بس بجنن )
( قومي حطيلنا صحن بزر مصري خليني احضر معك )
حطيتلها تتسلى بصحن البزر بس طبعا طول الوقت ما خلتني اعرف اتفرج متل العالم وهي نازلة هاد ليش عمل هيك طيب هاي بدها تتزوج مين وانا قعدت اشرح بقصة هالمسلسل
لاول مرة بحياتي بنبسط انه المسلسل خلص
(ها هي سامي اجا فوت اهلا وسهلا)
( اهلا يما يعطيك العافية شو جايب معك بايدك )
( هاي اتاري يما اشتريتها لابني الي بده يجي )
( ولك هو ابنك بده يجي يعرف يلعب اتاري يما اكيد حقها هديك الحسبة )
( لا يما صحتلي مستعملة بخمسطش الليرة )
( طيب عمتي لحتى اولد يعني ويصير يعرف يلعبها احنا بنلعب فيها )
( ليش لتكوني متعودة ببيت ابوكي عالاتاري اسكتي بتصرف كهربا عالفاضي)
( طيب عندي اقتراح تاني شو رأيكم نشغلها ونخليه ولاد الحارة هالمسوية يجو يلعبو فيها والي بده يلعب عكل لعبة شلن )
( بتعرفي اول مرة بشوفك بتفهمي يا كنتي )
سامي ما عجبو الحكي بس انا اقنعته انه احنا رح نسترزق من وراها وبكرة بنجيب لابنا احلى واجدد منها
قعد سامي يركب فيها وانا على جنبه اليسار وعمتي على جنبه اليمين والله وشغلها حاولنا نلعب شوي بس صعبة بدها مخ والله المهم اجا عمي حكا لسامي يلا شيلي اياها هسا ببلش برنامج رافع شاهين بدنا نحضره
وهون تبنج سامي هو صحيح فك التلفزيون وركب الاتاري بس بيعرفش يعمل العكس وراح نادى ورا ابن ابو عدنان الخضرجي بيحكو انه شاطر وفهلوي بيعرف بهالشغلات فات عالبيت وصار يحاول يحط بهالاسلاك
( مش زابطة يا سامي من هون انا بدي اطلع عالسطح احاول اساوي الشبكة وانت وقفلي عالدرج اذا اجت اشارة بتحكيلي )
( خلص توكل عالله )
طلع عدنان عالسطح يحاول يساوي الشبكة وكل شوي الاشارة تيجي وتروح لحتى زبطت بس مو اتاريها زبطناها من عنا وخربناها على دار ابو رفعت
( يييي هاد صوت ابو رفعت خربنا عليهم التلفزيون)
( يييييي يا عمتي هيو طلع عالسطح يشوف عدنان وسامي خليني ازرق شوي على ام رفعت واشوف التلفزيون عندها )
( وانتي شو بفهمك فيه )
( ييييي يا عمتي ما انا هسا شفت سامي كيف عمل )
( طيب طيب روحي بسرعة )

دق دق دق
( خالتي ام رفعت بلموت لمزطت بدي اياكي بموضوع)
( خير يا هند شو في خوفتيني)
( بس مش تروحي تحكي لعمتي )
( ولك احكي قلبي سقط)
( …………….)
(ولك احكي )
( بصراحة انا مش حامل )
( الله لا يجبرك ولا كيف دار حماكي بيعرفو انك حامل )
( حكيتلهم هيك عشان اخلص من حماتي وبناتها والله يا خالتي موتوني شغل)
( لا اله الا الله ولك يا بنتي ما فكرتي بالعواقب )
( طيب ساعديني)
( اسمعي انتي اصلا وضعك مش طبيعي انك لهسا ما حملتي بكرة بمر عليكي وبحكي لحماتك انه بنت اخته لابو رفعت بتشتغل بالصحية وانا بدي اخدك حتى نطمن عليكي وعلى حملك )
( ايوا هاد احسن حل ربي يخليلي اياكي يا خالتي ام رفعت )
حطيت سلك التلفزيون متل ما سامي عمل ونزلت عالبيت كان التلفزيون زابط وعمي بتفرج على رافع شاهين و
عدنان علمه وفهمه لسامي كيف يحط الاتاري وكيف يغير عالتلفزيون لما بده وسامي طلب من عدنان يخبر كل ولاد الحارة انه احنا ركبنا اتاري واللعبة بشلن
فتت عالمطبخ عملت كاسة شاي ودهنت رغيفين خبز بزيت وزعتر وطلعت عالحوش حمرتهم بالفرن ورجعت لعند دار حماي نكمل السهرة
لحتى خلص البرنامج طلعنا على بيتنا ننام وكالعادة سامي طلب البيجامة الفوشية الي جابتلي اياها خالتي ام تيسير جارة امي تذكرتوها
( هي هي علينا زهقتها يا سامي قد ما لبستها كلح لونها هاتلك خمس ليرات اشتريلي وحدة جديدة زهور بنتها لام تيسير حاكية لامها انه المحل عنده اشكال الوان )
اقنعته لسامي واخدت منه خمس ليرات
ومن الصبح الله يسعدها خالتي ام رفعت اجت لعمتي
( يصبحك بالخير يا ام سامي )
( اهلا يا ام رفعت تفضلي فوتي لسا ما افطرنا )
( دايمة ان شاء الله سبقتكم شو بدي اقول يا ام سامي انا رايحة عالصحية بنت اخته لابو رفعت تعينت فيها شو رأيك اخد هند معي بنتطمن عليها )
( والله زينة العقل وبطريقك بتتأكدلي اذا هالمنكوبة حامل ترا والله ما انا مصدقها )
( وحدي الله يا بنت الحلال لا تخافي هسا بنعرف كل شي)
نادت علي حماتي من الدرجات وانا طبعا كنت لابسة ومحضرة حالي نزلت لعند حماتي وظليت طالعة مع خالتي ام رفعت
مسكينة تعبت معي اكتر من نص ساعة واحنا نستنى بباص لحتى اجا ووصلنا عالسوق وانا حلفت الف يمين عخالتي ام رفعت ما بتدفع وصلنا عالسوق بدنا نلف شوي قبل ما نوصل للصحية
( اشتريلنا يا هند سندويشتين فلافل من هالمطعم )
( مش هسا كنتي تحكي لحماتي انك مفطرة )
( مزبوط افطرت بس ريحة الفلافل شهتني)
( هاد المطعم غالي بياخد عشر قروش حق السندويشة ابو مصطفى الي عنا بالحارة بيوخد شلن حقها بس تكرمي كم ام رفعت عنا
بدك احط فيها كل ايشي )
( اه بدي سلطة بطحينية وخليه يكتر فيها ليمون وشطة )
( حاضر )
رحت جبت سندويشتين فلافل الي وحدة والها وحدة بس ام رفعت طلعت ما بتعرف تبلع الا بقنينة بيبسي
وفتي يا هند مصاري
( طيب هي دكانة تعالي خلينا نشتري الك بشتريلك قنينة بيبسي وانا باخد باكيت عصير دمعة بست قروش ونص )

( مرحبا عمي بدي قنينة بيبسي وباكيت عصير دمعة )
( اذا بدك توخدي قنينة بيبسي بدك تدفعي عربون شلن بدل القنينة لحتى ترجعيها )
( يا عمي كلها قنينة مش محرزة )
( يا عمي والله تبعون الشركة بدفعوني حقها )
( طيب امري لالله اعطيني وخلي عندك الشلن عبين ما تخلص هينا احنا قاعدين هون عباب المحل )
اكلنا هالسندويشتين وشربنا البيبسي والعصير ورحت رجعت القنينة
ورحنا على الصحية ويا لطيييييف قديش في دور قبلي بس كونه انا معي واسطة بنت بنت حماها لام رفعت ما طولنا
( هاي يا سهيلة بتكون كنت جارتي صرلها فترة متزوجة ولهسا ما حملت)
هالسهيلة شايفة حالها وما بتتحاكى بس للامانة حبيتها لما حكتلي انتي حامل وبالشهر التاني كمان كيف لهسا مش حاسة
والله كنت بدي ابوسها من بين عيونها وهجمت عخالتي ام رفعت حضتنها وصرت ابكي سلمنا على سهيلة وروحنا عالبيت
( شفتي يا هند كيف ربنا يسرها وما رضي يفضحك خلص اهدي ولا تظلي تعملي مشاكل مع حماتك)
( يا خالتي هي الي بتعملي مشاكل مش انا هسا المهم بدي اميل على محل اواعي هون بالدخلة بدي اشتري بيجامة بحكو عنده اشياء بتجنن وكله بليرة )
اشتريت بيجامة ستان بس لونها ازرق حلوة كتير واحلى كمان من تبعة ام تيسير وروحنا عالبيت كانت حماتي قاعدة وبتستنى فينا
( اه يا ام رفعت خبري مش حامل صح )
( مبروك يا ام سامي حامل وبالشهر التاني )
( يلا مبروك )
( الله يبارك فيكي يا عمتي بتعرفي شو جاي عبالي هسا نفسي بسدر كنافة )
( يااااا كشيلي يا كشيلي)
( عمتي مالك خير )
( ولك بتتوحمي عحلو بتعرفي شو يعني الي بتتوحم عحلو بتجيب بنت والي بتتوحم عحوامض بتجيب ولد يا حبيبي يما نازل تدلل فيها وبدها تجبلك بنت )
( لا انا متاكدة انه ولد هيك حاسة)
( شو بفهمك انتي اكبر منك بيوم افهم منك بسنة )

انشفى غليلها مني قعدت عباب الدار تستنى فيه لسامي حتى تخبروه اني حامل ببنت لو انقطع لساني قبل ما احكي بدي كنافة
واول ما وصل سامي وعمي بلشت تنزل بهالدموع
( اااخ يما ببكي عحظك مو مرتك حامل ببنت)
( قولي وغيري يا ام سامي انتي شو عرفك )
( ول يا زلمة هو انا صغيرة )
( معلش يابا معلش الي بتجيب البنت بتجيب الولدولا تزعل حالك )
( وشوف يما يا سامي عشان ما تزعل ولا احنا نزعل هاي البنت بدها تتسمى على اسمي انشراح )
( ابشري يما ولو )

( هيييي هالحية بدها اياني اسمي بنتي انشراح وك انا بحلم باسم علموضة من تبعون هالايام هبه ، دعاء ، اماني
ايشي حلو هيك )
طلع عندي سامي عامل فيها زعلان
( معلش يا هند لا تزعلي ابوي هسا حكالي انه مش شرط اذا جبتي بنت رح تظلي تجيبي بنات الي بتجيب البنت بتجيب الاولاد )
( انا مش زعلانة انا تعبانة بتعرف الحمل والتعب عكلن تعال احكيلك اشتريتلك اليوم بيجامة غير شكل لونها ازرق بجنن )
( قبل البيجامة بتعرفي انه امي قررت تسمي البنت على اسمها )
( يييييي وماله هو في احلى من اسم حماتي اذا ما سمينا احنا على اسمها مين بده يسمي )
( الله يرضى عليكي يا هند هسا قومي البسيلنا الازرق )

قال انا اسمي انشراح لو بدي اسمي اسم قديم عالاقل بسمي ابتهاج عاسم امي اسم حلو مش انشراح
حطينا راسنا ونمنا هديك الليلة

( بسم الله بسم الله )
( هند مالك بسم الله عليكي خدي خدي اشربي مي )
( حلم حلم يا سامي )
( حلم شو )
( اضوي هالضو وتعال اقعد جنبي احكيلك )
( اجاني واحد هسا بالحلم لابس ابيض بابيض بدو يوصيني
حكالي اسمعي يا هند انتي رح تجيبي بنت حلوة متل حماتك بس لازم تسميها الاء
وانا خايفة يا سامي منه )
( ليش خايفة )
( شو ليش خايفة بزمناتها بنتها لام حسين كانت حامل ببنت وحلمت انه لازم تسميها ثروت بس هي طنشت واصرت تسميها رقية وهاد الي اجاها بالحلم كان وحي ليخبرها ولانها ما ردت عليه صارت كل خلفتها بنات )
( شو خلفتها بنات توكلي على الله يا هند بكرة انا بالشغل بخبر ابوي وهو يخبر امي وبنسميها الاسم الي حكى عليه الوحي
الاء اساسا هالاسم موجود بالقران نامي يا ام الاء وارتاحي )

هو فعلا تيجي من حماي ولا منا اساسا ما حدا بقدر عليها غيره
……. يتبع في الحلقة القادمة
#حنين_طه

121 تعليقاً

اترك تعليقاً

لن يتم نشر عنوان بريدك الإلكتروني.