قصة جديدة لأحلى شلة أنس على زاكي

158 9٬325

قصة جديدة لأحلى شلة أنس على زاكي
يقدم لكم قسم المنوعات في زاكي هذه القصة المميزة, قراءة ممتعة, وننتظر تعليقاتكم.
#جنون_حماتي
الجزء الأول + الجزء الثاني + الجزء الثالث #انتهت

قصة جديدة لأحلى شلة أنس على زاكي
قصة جديدة لأحلى شلة أنس على زاكي

هالة : امييي يا امييي لا تجوزوني .. انا بدي كفي دراستي ما بدي اتجوز
امي : ليش انا رضيانه عن هالجوازة ؟ بس الله يسامحو ابوكي ما بيرجع عن كلمتو وخلص عطى الجماعة خبر انه موافق
هالة : امي والله انا ما بدي احكيلو لأبي انه لساتني صغيرة عمري 133 مو خرج اتجوز بكييير
امي : يا امي ابوكي عصبي كتير وما بيرجع بكلمتو ابدا خلص ارضي بنصيبك يمكن يكون منيح وتنبسطي بهالجوازة اي امي اضحكي خلي بداية حياتك الجديدة فرح

(عرفكن بحالي .. انا هالة من سوريا عمري 33 سنه .. طلبت من الكاتبة اتنفس هواك توصل صرختي للكل .. لا هي مو صرختي لوحدي هي صرخة اغلب السيدات المتزوجات .. اغلب المتزوجات بيعانوا من كابوس اهل الزوج والأقلية بيمدحوا فيهن وبيحبوهن .. عند الله ما بيضيع حق المظلوم .. تابعوا قصتي وانا رح تابع ارائكن وتعليقاتكن)

تم زواجي من شب اكبر مني ب 10 سنين .. يعني انا كنت عمري 13 وهو كان 23 .. كان كتير حنون وبيحبني وبيدللني

وكانت المشكلة اني سكنت ببيت اهلو يعني كل حركة لألنا انا وزوجي بيعرفوها

اجو اهلي لعنا بعد زواجنا ب 15 يوم وتأخرو بالسهرة عنا

غيث : مرت عمي انا بوصلكن ليكي الوقت كتير تأخر
هالة : اي امي وانا بدي اجي معكن بالسيارة وصلكن طلعت روحي من البيت بدي اطلع اتنفس
امي : خلص ماشي بدنا نعذبكن معنا

حماتي : ليكي شوفي شلون دبقانتو وين ما يروح بتروح معو
نورا : اي اخي طرطور كان لازم يقطعلا راس القط مو يدللا
حماتي : والله رح فرجيها ب ابني بس تجي
نورا : شو رح تعملي؟
نوال(سلفتي) : اي خرجاااا وانتي قدها مرت عمي لا تقصري شوفي شلون اخدت ابنك يلي ربيتيه وتعبتي كرمالو صار الها ويدللها هي ونسيكي
حماتي : اي رح اعمل كتير بتشوفووو

رجعنا عالبيت وكان الشرار عم يطلع من عيون حماتي وسلفتي عم تطلع فيني وتضحك بشماته .. ونورا حسيتا رح تاكلني ع شوي

حماتي : هالة مسكي المكنسة وكنسي بيتنا مع الاسطوح وبيت نوال
غيث : لا امي هاي مرتي ما الها ببيت اخي
حماتي : عم ترد بوشي كرمال مرتك ولااااه
حماي : ولاه لا ترد بوش امك جواب خلص بدا تكنس غصب عنك وعنها
هالة : خلص غيث (غمزتلو) انا بدي كنس ما بتعب لا تخاف

نورا : ليكي شلون خايف على تعبها
حماتي : اي لسا ما بلشت الحرب معها هههههه
نوال : والله بتستااهل

كنت استغرب كتير من علاقة سلفتي بحماتي .. كانو رفقات ومتفقات علي .. بالرغم انه انا وياها تزوجنا بنفس اليوم وكانت هي مرت سلفي الكبير بس كانت كتير متفقة مع حماتي .. يمكن لأنه سلفتي كانت قوية وما تسكت عن حقها وكمان كانت اكبر مني .. كانت تألف حكي على لساني وتحكيه ليكرهوني اكتر ..

رحت كنست وغيث جن جنانو وكل شوي يجي لعندي يقلي هاتي لكمل عنك .. انا ما رضيت مشان ما زيد الطين بله وكبر المشكله

بعد شهر جوزي سافر وبس سافر تحسنت علاقة حماتي فيني شوي

نوال : شفتي شو قالت هالة عنك لأمها بس اجت لعنا من كم يوم
حماتي : شو؟
نوال : سمعتها عم تحكي لو تموت حماتي برتاح انا وجوزي
حماتي : هااااالة وليه هااالة يقصف عمرك تعي .. بدك ياني موت مو؟
هالة : اااخ مرت عمي تركي شعري شوفي شو عم تحكي انتي؟
حماتي : شو عم بحكي موووو روحي كل شغل البيت عليكي من هون ليرجع غيث من السفر
واسحك تخبريه بأني خليتك تشتغلي او اني شديت شعراتك المجعدات متل صوف الخروف ازا خبرتيه بوعدك خليه يطلقك
كانت حماتي كل شوي تهددني تخلي زوجي يطلقني مشان خاف وما اشكيلو منها
وانا كنت مظلومة دايما وانصدم انه سلفتي بتألف الحكي لتبهدلني حماتي وتكرهني

كانت نوال تحكي كلشي مو مزبوط عني وانا كنت ضعيفة كتير ما كنت دافع عن حالي .. هلكتني حماتي بشغل البيت لأسبوعين واجا غيث .. كنت عم بجلي بالمطبخ وما شفت غيث الا قبالي .. انصدمت فيه ووقفت جمدانه بأرضي

غيث : شبك حبي ليش مصدومه؟
هالة : ما حد خبرني انك جاي الحمد لله عالسلامه
غيث : جد ؟ صارلي اسبوع مخبرن اني جاي
هالة : …….
غيث : لك شبك .. هاتي بوسة

حماتي : غيييييث تعال اقعد معنا مو وقت مرتك هلأ

هالة : كرمال الله روح اقعد معهن بالليل بشوفك
غيث : تكرمي حبي

بالليل فتنا غرفة النوم حملني ولف فيني وضمني وقلي اشتقتلك كتير .. سهرنا ليلة بتجنن
تاني يوم فيقوني اهلو الساعة 7 الصبح مشان اعمل فطور
نزلت عملت فطور وكنت لابسة بيجامة النوم وحكولي يلا روحي عند اهلك بدنا نحكي بموضوع مع غيث وما بدنا تسمعيه
ما اعطوني مجال بدل تيابي وركبوني بالسيارة ووصلوني عند اهلي
بس وصلت عند اهلي تحممت وبدلت تيابي
ابي : ليش هيك جاييتنا بالبيجامه ؟ شو عاملة معهن لحتى هيك بعتولنا ياكي؟
هالة : والله ما عملت شي بس هنن بدهن يحكو بموضوع ووصلوني لهون وراحو

اجو بالليل اخدوني ورجعوني عالبيت ..

بعد يومين اجو اهلي يسلمو على جوزي لأنه رجع من السفر
ابي : يابي الله يرضى عليكي بدي كاسة مي
حماتي : ليش هي بنتك بتتحرك من مكانها؟ كسولة وما بتعمل شي
ابي : اي وجوزها شو رأيو فيهااا؟
حماتي : ولا عاجبة غيث ولا عاجبتنا

ابي عصب كتير وصار حماي يقلو خلص يمكن لأنه البنت صغيرة بتتعلم مع الوقت
كان بس ابي يعصب بيت حماي يرتعبو

الجزء الثاني

وبعد ما راحو اهلي صارت حماتي تحكيلي ممنوع تشوفي اهلك او تحاكيهن ابدا .. وصارت تسبهن وتحكي انهن ما بيستحو ليردو بوشها جواب

اخدني جوزي ودخلنا على غرفتنا ضمني وصار يقلي لا تخافي امي عم تحكي هيك لأنها معصبة وبكرا كل شي بيروق وبيرجع الوضع بيهدى بيناتهن
____________________________________________

بعد فترة صرت اطبخ الأكل فجأة يصير مالح او يتغير لون اللحمة يصير لون غريب .. وبيوم كنا عازمين خوات غيث المتزوجات ورحت طبخت وتغير لون اللحمة ..
حماي : ليش هيك لون اللحمه؟
بنت حماي : يمكن حاطتلنا فيها سم لأنه من ساعة يلي جينا لهون وهي مو طايقتنا
نورا : اي اول مرة شوف لحمة لونها هيك انا من زمان بحسها بدها تخلص منا
حماتي : اي ونوال سمعتها عم تحكي لو تموت حماتي برتاح
هالة : شبكن والله ما حطيت شي والله انا ماعملت شي ومابعرف ليه هيك لونها والله ما عملت شي
حماي : يلا قعدي كلي اللحمه كلها مشان تعرفي تغدري فينا

صرت اكل اكل اكل وقلهن شفتو مافي شي خلص والله شبعت مو قدرانه اكل شي تعبت وما صدقو الا لأكلت اللحمة كلها

بعد كم يوم …

حماتي : هالة اعملي قهوة
هالة : حاضر

قمت عملت القهوة ورجعت وانا عم صب القهوة صار لونها اخضر

حماتي : يعدمني ياكي شو حاطتيلنا بالقهوة
حماي : هالبنت ناوية تخلص منا اكيد
هالة : والله ما حطيت شي
حماتي : اي لكن اشربيها كلها قدامنا

خلتني حماتي اشرب القهوة كلها قدماهن لتتأكد اني ما حطيت شي فيها .. بس الغريب انه عنجد شو هالأحداث الغريبة ؟ شلون بيتغير لون اللحمة وشلون بيتغير طعم الطبخ وشلون بيتغير لون القهوة؟؟

___________________________________________

هالة : نوال ممكن انصحك نصيحة؟
نوال : هههههه هاتي لنشوف شو رح يطلع منك
هالة : انا عم لاحظ عليكي كتير بتمزحي مع سلافي وبتختلطي فيهن هالشي غلط
نوال : وانتي مين لتعرفيني مصلحتي ؟ انا اكبر منك وبعرف مصلحتي ولا بقى تدخلي فيني ابدا

انا كنت لاحظ انها عم تتمادى معهن بالمزح وكنت لاحظ نظرتهن الها مو شريفة
وما كانت تصدقني بس انصحها الا بيوم فتت عليها عم تبكي وتصرخ
وفهمت من حديثها انه سلفي تحرش فيها .. وبعد هيك صدقتني وبعدت عنهم

بهالفترة انا كنت لاحظ على حماتي تصرفات غريبة كتير
وكنت بس مر من جنب غرفتا اسمعها بتحكي حكي مو مفهوم ومرات شم ريحة غريبة وما افهم شي وما استرجي اسألها ابدا

____________________________________________

كانت حماتي تغار مني كتير وتكره تشوف ابنها بيحكي معي وبيغازلني
ومرة خلصت شغلي عبكير

هالة : مرت عمي بدك شي بدي فوت نام
حماتي : ليش من متى بتخلصي شغلك دايما بتتركي الشغل مشان تفوتي تنامي بحضن غيث مو هامك شي الا النوم

وهي عم تحكي اجا غيث
حماتي بس لمحت غيث صارت تقلي اي خلص يا بنتي فوتي لعند جوزك زبطي حالك وانبسطو سوا وبخلي نوال تكفي الشغل عنك

اجا غيث من ورا ومسكني من خاصرتي وضمني وحكالها مرتي خلصت كل الشغل ما في داعي حد يخلص شغل بعدها

شفت الشرار عم يطلع من عيون حماتي .. وهون تأكد غيث انه امو بتغار كتير
وصارت تهلكني بشغل البيت مشان ما اسهر مع جوزي بس خلص شغل فوت نام فورا وما اقدر اعطي جوزي حقو
ولاحظ جوزي هالشي وخالف اوامر حماتي وحكالي :

غيث : البسي بدي اخدك لعند اهلك لأني مسافر وما بيهون علي اتركك هون وانا شايف شو اهلي بيعملو فيكي هيك وانا موجود كيف بس اسافر؟؟
هالة : بس بخاف مرت عمي تزعل ما بدها اتواصل مع اهلي ابدا وبخاف تزعل
غيث : ما حد بيطلعلو يمنعك تزوري اهلك او تحكي معهن
رحت لعند اهلي قضيت 33 شهور وبعدها طالعني عندو عالكويت وعشت معو احلا ايام حياتي .. بقيت عندو بالكويت 6 شهور .. وصار اول حمل الي بأبني الأول فرحة عمري الأولى

غيث : حبيبتي بس شهر وبترجعي لعندي لا تبكي
هالة : خايفة يبعدونا عن بعض انا خاااايفة
غيث : لا تخافي ياعمري ما في شي بيبعدنا عن بعض انتي روح قلبي وعمري وما بتركك ابدا

رجعت على سوريا وكنت حامل بالشهر الخامس بس ما كان مبين علي
حماتي : لك حاج تكذبي انتي مو حامل نحنا بناتنا بس يحملو ببين بطنهن بالشهر الرابع
هالة : ازا مو مصدقتيني خديني عالدكتورة افحصيني

رحنا عالدكتورة وفحصتني واكدتلها اني حامل بالشهر الخامس وانه يلي ببطني صبي
وبس رجعنا عالبيت
حماتي : عملتي اللي براسك وخليتي ابني يتغرب وحرمتيني منو
صارت تسمعني حكي ودقت لغيث مشان يبعتلها زيارة وسافرت لعندو
وتركتلي مسؤولية دير بالي عليهن كلهن بغيابها كان حماي و33 بنات حمى نورا ونور وأنوار وسلافي الشباب 4 .. كنت اشتغل الهن كلهن وما حد يساعدني بشي .. كان عمري لسا صغير وكنت حامل وجسمي ما بيتحمل كل هالشغل وما حد كان يهتم
وبس بدي فوت نام ما يخلوني سكر الباب مشان ازا احتاجو شي نفذلهن ياه فورا
____________________________________________

كان جوزي يدق بدو يحكي معي وما يخلوني احكي معو ولا اتواصل معو

الجزء الثالث

بعد كم يوم رحت لعند اهلي بقيت ساعتين ورجعت وما حد حكى شي .. نمت وبعد ساعتين فيقني سلفي
بقلو شو في شبك قلي جوزك بدو يحكي معك
كان صارلي شي شهرين ما حكيت مع جوزي وفقت وبقيت استناه ليرجع يدق

رجع دق ومن لما فتحت خط صار يسبني ويبهدلني .. بعد طول غياب ما سمعت صوتو الا ليسبني ويعصب علي
وانا ما ركزت معو شو حكى من القهر والظلم يلي انا عايشتو .. حسيت اني بدنيا تانية .. دنيا كلها وحوش عم تاكلني

بعد كم يوم اجو عمامي وولاد عمامي لحتى يعملو صلح بين ابي وحماي …

وحماي حكالي احكيلهن ما بدك اهلك وما بدك تشوفيهن .. رحت سجلت شريط بصوتي وخبرت ابي عن كلشي ونزلت لعند عمامي وولادهن واتأكدت انه حماي وسلفي ملتهيين وعطيت الشريط لأبن عمي وقلتلو بترجاك اعطي هالشريط لأبي … واتصل غيث وطلب يحكي معي ….

غيث : الو
هالة : اهلين
غيث : ليكي هالة ما رح كتر حكي معك بدك تختاري يا انا يا اهلك
هالة : انا بدي ياكن انتو ال2
غيث : لا بدك تختاري ورح طلقك بلا تردد
هالة : بدي روح عند اهلي كل 10 ايام وما بدي تتركني
غيث : اي لكن انتي طالق

وقعت السماعة من ايدي وجمدت بأرضي .. صرت ابكي بحرقة
طلعت لعند عمامي قلتلهن خلص ما في داعي للصلح غيث طلقني
راحو عمامي كلهن وبقي واحد ينطرني لأضب تيابي .. ضبيت تيابي ورحنا لعند اهلي وخبرتن يلي صار .. طلع ابي من البيت وهو معصب ومعو مسدس .. طلعو معو عمامي ورجعو للبيت وصار يسألني ازا حد اذاني بشي قلتلو لا بس اخدو مني جواز السفر
راح ابي وعمامي وتخانقو مع بيت حماي واخدو منهن جواز السفر ورجعولي ياه
____________________________________________
اتطلقت وكنت حامل بالشهر التامن وعمري 15 سنة و 4 شهور ….

بعد ولادتي تراجعت صحتي كتير .. وكان ابي على طول ياخدني على دكاترة ومستشفيات ويحكو مافيني شي .. اقترح عمي على ابي يجيبلي شيخ يقرأ علي وبس قرأ علي الشيخ قال لأبي بنتك مسحورة
وبس قال هيك تذكرت بس خلوني اكل اللحمه بس تغير لونها واشرب القهوة الخضرا .. خبرت الشيخ بكلشي وحكالي هاد هو السحر والله اعلم ..

بس صار عمر ابني 8 شهور انخطبت لأبن عمي .. وصار غيث بدو يرجعني بس ابي رفض وحكالو ما الك عنا غير هالصبي .. واعطاه ابنو ولحد اليوم انا ما بعرف عنو شي .. ابني وما بعرف كيف شكلو وكيف صحتو .. والله ما بعرف اذا عايش او لا .. بس بتمنى الله يجمعني فيه لأنه قطعة من روحي وحبيب قلبي

__________________________________________

هالة : اتنفس هواك .. انا بتمنى لو اني كنت اقوى من هيك وقدرت وقف بوش الدنيا كلها لأكون مع ابني
اتنفس هواك : يعني انتي ندمانه ؟ لأنك تزوجتي ابن عمك وتركتي ابنك
هالة : انا ما تركت ابني .. ولا تزوجت ابن عمي بإرادتي .. اول مرة زوجني ابي لأنه عطاهم كلمه للجماعة وما بيرجع بكلمتو … وتاني مرة نفس الشي
اتنفس هواك : يعني انتي ضحية كلمة ؟ كلمة دمرتلك حياتك مرتين !!
هالة : للأسف .. انا بدي توصلي صرختي لكل الصبايا .. كونو اقوى من يلي حواليكن .. لو اول زواج الي كنت قوية ما كان قدرو اهلو يفرقو بيننا .. ولو كنت قوية كان ابني بحضني هلأ
اتنفس هواك : فعلا .. المرأة القوية لا تهزم

(صبايا .. هالة اسم مزيف واي تشابه بين اسم هالة واسماء عضوات معنا بالجروب .. فهو مجرد تشابه فقط .. وبتمنى التعليقات تكون حلوة متلكن لأنه بطلة القصة عم تقرأ تعليقاتكن … يارب تكون القصة عجبتكن 💖😘)

#انتهت

عرض التعليقات (158)