قصة كناين ام لطفي الحلقة 7+8

106 10٬107

قصة كناين ام لطفي الحلقة 7+8
نتركم الليلة في متاابعة الأحداث الشيقة لهذه القصة والتي نقدمها لكم من قسم المنوعات في زاكي, متابعة ممتعة نتمناها لكم أعزاءنا القراء, لو انهيت القراءة اكتب تعليق بكلمة تم ورأيك بالقصة لتصلك قصص أخرى.

قصة كناين ام لطفي الحلقة 7+8

#كناين_ام_لطفي
الحلقة السابعة

دخلت خالتي ام اسماعيل عند هناء وخالتي ام بكر عند سوسو وانا وامي كنا عند هناء بدي اشوف الولد وامي كل شوي تحكيلي شدي يا نجاح
يما ركزي ركزي هناء الي بتولد بس خلص لسانها ماخد على اسمي
ولدت هناء وجابت بنت اتاريها طول الوقت تسف حصرم عالفاضي يلا المهم الخلقة التامة
اما سوسو جابت ولد والي هدا بال هناء انه ابن سوسو طلع اسمر والله العليم طالع لخواله لانه اخوانها لسوسو كلهم سمر نطت هناء وحكت يلا الي بتجيب البنت بتجيب الولد
اجو اخواني ومسكو ولادهم مبسوطين وابوي مسك بنت لطفي واذن بذانها ونقطها عشر ليرات ومسك ابن مصطفى واذن بذانه ونقطه كمان عشر ليرات
وبعد ما صحيو نسوان اخواني اجت خالتي ام اسماعيل وجايبة معها شوربة والدات
ام اسماعيل ( ولك يا نجاح بكفي اكلتي الشوربات )
نجاح ( يا خالتي الله يسامحك انا ما بصدق حدا يولد عشان اكل منها انتي لازم حسبتي حسابي بصحن )
ام اسماعيل( الك علي يا نجاح بس تتزوجي وتخلفي اظل اعملك شوربات )
نجاح ( الله كريم يا خالتي)

اتفقت امي وجارتها باجتماع مغلق انه يكون مباركتهم سوا وويجو جميع الجارات يباركو سوا وخالتي ام بكر حكت لامي تغلي القرفة وهي رح تعمل رز بحليب وانا حكتلها تكتر عليه ماء زهر

التمو الجارات عنا وكل وحدة اجو اهلها يباركولها
خالتي ام اسماعيل نقطت كل واحد خمس ليرات وخالتي ام بكر جابت لكل وحدة قميص نوم وخالتي ام بكر جابت تبان لكل وحدة واحد ازرق وواحد زهر
اما خالتي ام يونس جابت علبتين بلازا لكل وحدة وخالتي ام خضر الي تعرفنا عليها جديد حطت على كل واحد عشر ليرات ما هو الله معطيهم
وفجأة قامت امها لسوسو وحطت على ابن مصطفى قطعة ذهب مكتوب عليها اية الكرسي وهناء صارت تغلي وتفور لانه اهلها نقطوها عشرين ليرة يلا كتر خيرهم الواحد على قد لحافه بمد اجريه
وامي حكتلها تجمع عليهم وتجيب حلق لبنتها مسكينة امي ما بتعرف انه لطفي اول باول بوخدهم 😂😂😂
وانا كنت محوشة خمس ليرات بدي اشتري فيهم خرز واعمل اساور لبنات الحارة وابيع بس يلا برجع بحوش اعطيت لكل وحدة منهم ليرتين ونص
روحو الجارات من عنا وظلت عنا صبوحة وذهب وقعدنا نفكر شو بدنا نسمي ابن مصطفى
اقترحت صبوحة نسمي توفيق عاسم سيدها
نجاح ( وك من عقلك بدنا اسم جديد )
والست ذهب اقترحت وائل بدكو الصراحة حلو وائل
بس مصطفى بالاخير سماه اشرف
اما بنت لطفي ظلينا محتارين باسمها لحتى عملنا قرعة وطلعلها اسمها ليلى وسميناها ليلى
وطول الليل والنهار نسوان اخواني فاضيات مشتغلات بولادهم
على هاد الولد مملوع بدنا نملسه بزيت وهاي البنت مصفرة بدنا نحطلها تومة
وامي تحكيلهم اتركوهم وقومو لا تعودوهم عالحمل بس ابدا ما برود

المغرب اجا لطفي لعنا وجايب صحن مسبحة مع كم قرص فلافل محشي عشان ابوي بحبه كتير 😍😍

يا نجاح تعالي يا نجاح شوفي مين عالباب
مين يعني يما هاي خالتي ام اسماعيل والله بحكيلي عقلي اعمللها نسخة عن مفتاح البيت اريحلها
ولك وطي صوتك هسا بتسمعك
اهلا اهلا يا خالتي ام اسماعيل فوتي تفضلي
ترا سمعتك يا نجاح شو كنتي تحكي ردت عليها امي فوتي يا ام اسماعيل هاي نجاح لسانها طويل بس قلبها طيب
دخلت خالتي ام اسماعيل وجاي تعمل مفتول عنا لانه ابنها راشد جاي بعد بكرة من المانيا وقال مشتهي هاي الاكلة وبلشت تفتل بهالمفتولات وتشكي من راشد قال بحب وحدة اجنبية هناك وبده اياها وخالتي ام اسماعيل رافضة الفكرة بدها توخدله بنت اختها صفية
حاولت اقنعها انه يا خالتي الاجنبية بتحسن النسل وبكرة بجيو ولاده شقر وعيونهم خضر بس هي ابدا خلص راسها والف سيف بدها بنت اختها صفية

بعد شوي اجا زاهي ابن الجيران بنادي على خالتي ام اسماعيل قال جاي لعندها بنت حماها اخته لعمي ابواسماعيل زيارة
قامت خالتي ام اسماعيل وحلفت الف يمين على امي تقوم معها قال بتتسلى وبتغير جو وبطريقهم بنادو على خالتي ام بكر
ام اسماعيل ( يا نجاح انا بدي اترك المفتولات هون مش حدا يلعب فيهم هاي اخته لابو اسماعيل زيارتها خطف ساعتين زمن وبتروح وبنرجع نكمل شغل فيهم )
نجاح ( ولا يهمك يا خالتي روحي واطمني)
وبس طلعت اول ما وصلت عالباب رجعت اطلعت فيي
الله يسعدك يا نجاح حطيلي هالمفتولات عمسمع عجنب وبس نرجع بنكمل بديش يخربو
خلص يا خالتي توكلي على الله بالحفظ والصون
طلعت امي وخالتي ام اسماعيل وانا طليت من الشباك ناديت على صبوحة وذهب بتسلى معهم
وبس اجو خبرتهم انه خالتي ام اسماعيل ملحوقة بالشغل وبدنا نفتتلها المفتولات
صبوحة ( بس انا يا نجاح ما بعرف افتل )
نجاح ( انتي ما بتعرفي الا توكلي خلص انا بعلمك )
اعطيت كل وحدة طشط وحكتلهم يلا افتلو
ذهب( يا نجاح شوفي طلعو معجنات )
خلص كبيهم هدول يا ذهب وحطي غيرهم
صبوحة ( شوفي يا نجاح كيف طلعو مكعبلات )
خلص كبيهم وحطي غيرهم
وقصيناها نكب ونحط ونكب ونحط لخلص الكيس وكل وحدة فينا حطت ايدها عخدها تفكر شو بدنا نعمل
روحت صبوحة وذهب مع جية امي وخالتي ام اسماعيل وانا بس شفتهم فتت عالحمام وسكرت عحالي الباب
سمعت صوت خالتي ام اسماعيل من برا بتصرخ وصوتها بيرقع وامي بتهدي فيها
وقعدو التنتين يفكو بحبات المفتول بلكي بصلحو ايشي
وامي كل شوي تيجي لعندي عباب الحمام تتحلفي وتروح )
ما هو قد ما بدي اقعد جوا الحمام هيك هيك اخرتني طالعة
…. يتبع في الحلقة القادمة
#حنين_طه

#كناين_ام_لطفي
الحلقة التامنة

نجاح خلص لمتى بدك تظلي زعلانة ومبوزة هيك
نجاح ( ابعدي عني يا سوسو ترا لسا من شوي ماكلة شلعة دان من امي انا شو بعرفني انه رح يخرب المفتول )
طيب خلص خدي اشرف شوي بحضنك حرام ببكي
نجاح ( هاتي هاتي يا حبيبي ما ايد لايد تكبر وتزيد يا حبيبي ما احلاك )
بعد شوي اجت هناء مرت لطفي وجايبة معها صفط برازق مع قنينة كولا شربنا وقعدنا نتفرج عالتلفزيون مع جية ابوي واخواني سهرنا مع بعض بالحوش بس المسا الدنيا بردت والجو تغير فدخلنا لجوا وكل واحد راح حط راسه ونام
وما صحينا الا عصوت خالتي ام اسماعيل بتهاهي وبتزغرد عرفنا انه ابنها راشد وصل بالسلامة بدكو الصراحة بطلعلها تفتخر فيه طلع تغرب ودرس وجاب شهادة بنرفع فيها الراس مش متل اخواني وبقية شباب الحارة يلا اهم ايشي الاخلاق
طلعنا عالبلكونة وامي صارت تزغرد معها وخالتي ام بكر بترش ملبس ناشد وشباب الحارة التمو حملو راشد عكتافهم وصار يدورو فيه
ما شاء الله هالراشد صاير شب 😍😍😍يخزي العين عنه
نجاح ( ما بدنا نروح عند خالتي ام اسماعيل نهنيها بسلامة ابنها )
كانت امي بتنقب خبيزة ( المسا بنروح نسلم عليه هسا بكون مشتاق لامه وابوه )
نجاح ( طيب شو هاد الي بايدك )
ام لطفي (خبيزة يا نجاح والله مشتهيها مع حبة زتون )
نجاح ( يلا نعمة كريم )
قعدت مع امي اتفرج على التلفزيون بعد شوي اجت اغنية ديانا حداد لا والله ماني ماني غير الاسمر عشقاني

ام لطفي( وطي هالصوت شوي يا نجاح كاني سامعة ابو جبر بدور عالخردة بدي ابيعه الفرن القديم الي كان عنا )
طلعت امي تشوف عمي ابو جبر وانا سمعت صوت عدرج البيت روحت اشوف شو في ولا هي هناء داقة بشعر سوسو ليش حاكية لمصطفى انه اخت هناء رح تتطلق
ودخلت بينتاهم انفعست وانمعست وببطني الف ضربة انرفست
حتى قدرت افك بينهم بجية امي بهدلت سوسو عطولة لسانها ونبهت على هناء ما تمد ايدها مرة تانية على سوسو
نجاح ( طيب ليش اختك بدها تتطلق يا هناء)
هناء( اااخ يا نجاح اتركيها على الله كل مرة بتوكل قتلة من زوجها وبتيجي تحرد عند اخواني وبس اخواني يتقاتلو مع زوجها بتحمل حالها وبترجعله )
نجاح ( وال هاد قليل اصل الي بضرب مرته وبعدين هي شو مفكرة الشغلة لعبة بتعلق الزلام ببعض وبعدين بترجع لزوجها اسمعي مني يا هناء المرة الجاي بس تيجي تحرد عندكم خلي واحد من اخوانك يحكيلها ما في عنا بنات تحرد وخليها ترجع لزوجها وبنفس الوقت اتفاهمو معه )
هناء( اااخ ان شاء الله يا نجاح ان شاء الله )

ام لطفي ( يلا يا بنات قومو بدنا نروح نهني ام اسماعيل برجعة راشد ساعة زمن وبنرجع )

وصلنا نسلم على راسد وشفنا هناك صبوحة وخالتي ام بكر وذهب وخالتي ام يونس
وهالام اسماعيل ما سكتت وهي تمدح وتشطح براشد وكل شوي نحكيلها الله يخليلك اياه
وهاي ذهب جنبي كل شوي تسبل وتذبل لراشد شكله عجبها 🤔
نجاح( طيب يا خالتي ام اسماعيل بهالمناسبة ما بدك تحلينا )
ام اسماعيل ( ول يا نجاح احلى حلوان قومي الله يرضى عليكي انتي والبنات جيبو الكنافة والكولا من المطبخ )
نجاح ( استنو ما حدا يقدم ايشي هسا برجع )
ام اسماعيل ( لوين رايحة يا نجاح )
نجاح ( بدي اجيب خالتي ام خضر هسا بتكون قاعدة لحالها حرام بتتسلى وبتوكل كنافة )
رحت جبت خالتي ام خضر مسكينة قديش فرحت لاني اجيت اخدها وتذكرتها بس انا حكتلها انه النسوان الكبار هم الي طلبو مني اجيبها
اكلنا كنافة وقمنا ضبينا وذهب بعدها بتسبل وتذبل وتميل رقبتها حتى التوحت
وبعد هيك روحنا عالبيت ميتة جوع
وك يا نجاح ما انتي اكلتي نص صفط الكنافة
متبعتيلي يا هناء ،،،، ما انا ما تغديت منيح الخبيزة ما بشبع منها خلص هسا بعمل مفركة بطاطا وبتعشى
عملت العشا وكلنا تعشينا ومبسوطين الا امي وجهها ما بتفسر والضحكة مش طالعة من قلبها
ما صدقت متى نخلص عشا واقوم اشوفها هي صحيح بتبهدلني كتير بس بتظل الغالية ام لطفي

-بعدك صاحية لهسا يا ام لطفي
-ولك استحي انا امك
-اي ان شو حكيت ام لطفي ما انتي اسمك ام لطفي
-اااخ يا نجاح بفكر اخوكي مصطفى طول ما هو هون قاعد عنا المشاكل رح تظل شغالة بين مرته وبين مرت لطفي لازم اخلي ابوكي يعمرله غرفتين ومنافعهم على ظهر البيت
-ومن وين بدك تجيبي حق البنا والعمار
-بفرجها الله
حسني قلبي انه خلص اجت الساعة الحاسمة حتى امي تبيع سنسالها الحلبي ما غيره
وتاني يوم من الصبح طلعت هي وخالتي ام بكر مفاصلته وبايعته ورجعت عالبيت متل الي مفارقة حدا من ولادها
وخبرت ابوي واخواني انها بدها تعمر لمصطفى عل سطح البيت
بعد يومين كنا قاعدين انا وامي بحكيلها نكت تضحك بس ما ضحكت ولا على اي وحدة لما اجا مصطفى ولطفى ونسوانهم
وقام لطفي قدم لامي كيس
-شو هاد
لطفي( افتحيه وشوفيه )
لما فتحت امي الكيس كان لطفي ومصطفى بايعين ذهب نسوانهم وشارين فيهم سنسال امي
ام لطفي( ييييي ما باخذه ولك انا لبست ذهب بزماني لشبعت وهدول بعدهم صبايا حرام من حقهم يلبسو )
هناء( شو فايدة الذهب يا عمتي اذا انتي زعلانة )
سوسو( اصلا انا من عندك من هون مش طالعة بدي اظل عندك وعند نجاح واظل اتقاتل مع هناء بتظل متل اختي الكبيرة )
هناء( كل الي بيني وبينك شهرين من وين عملتيني الكبيرة )
نجاح ( يا رب تسكتو انتو التنتين
طيب انا عندي اقترح بما انه رجعلك سنسالك الذهب ومعنا مصاري شو رايكم نشتري سيارة وهيك بنصير نطلع ونروح ونيجي وبناجر السيارة كمان )
الجميع ( موافقين
الله عليكي يا نجاح يا ام الاقتراحات )

….يتبع في الحلقة القادمة

 

عرض التعليقات (106)