الرئيسة / غير مصنف / قصة مذكرات عروس ادخل وبوعدك تغير جو

قصة مذكرات عروس ادخل وبوعدك تغير جو

/
/
/
15480 مشاهدات

قصة مذكرات عروس ادخل وبوعدك تغير جو 
هذه القصة تأتيكم من قسم المنوعات في زاكي
#
مذكرات_عروس
#صبا_صبااااا
رح انزل اول مذكرة واذا عجبتكم بكمل

قصة مذكرات عروس ادخل وبوعدك تغير جو
قصة مذكرات عروس ادخل وبوعدك تغير جو

قصة مذكرات عروس ادخل وبوعدك تغير جو
قصة مذكرات عروس ادخل وبوعدك تغير جو

يا سلاااام بكرة كتب كتابي😍…من بكرة يعني رح أبدأ مرحلة جديدة بحياتي😍
اخيرا ريم رح تخطب 😍
طبعا انا ريم المذكورة اعلاه عمري 17سنة…..من كثر ما انا عبقرية بالمدرسة أهلي طلعوني من المدرسة خافوا على عقلي ينفجر من كثر الذكا..والعكس صحيح😂

بعدني صفحة بيضا…لا أفقه شيء بالحياة وما الي بحركات البنات ….بعرفش اشي غير امي الي بتظل تبهدلني ع الطالعة وع النازلة بدها إياني اصير حدقة وقد حالي😁…وابوي الحنون واخوي المتجوز ومرته واخواني الاصغر مني…ومسلسل عيلة خمس نجوم😂

وضرب الحظ معي وانخطبت من أحمد وبكرة رايحين نكتب الكتاب و بدي ارجع وانا مرتبطة😍

من صراصير الصبح صبحت قايمة وفتت تحممت ولبست وبقى عندي علبة بودرة هي لمرت أخوي نسيتها تحت عندي…لطيت وجهي فيها ودهنت وجهي وحواجبي وشفايفي صرت مثل الفار الواقع بسطل طحين😝…وقعدت أستنى بأحمد ييجي يوخذنا انا وامي…..
بعد ساعة زمن والا هالسيارة بتزمر…ركضت مثل الملطوشة لبرا كان احمد جاي وحماتي مشخصة جنبه بالسيارة…قاعدة مثل الإمبراطور،👸…رافعة صدرها لفوق ونافشة حالها وحاضنة شنتتها تحت أباطها…ما تقولوا الا رمسيس الثاني قاعد بالسيارة😝
نزل أحمد من السيارة لحتى يحكي معي..بس لما شافني ظله صافن ولسانه انعقد….انا كنت مفكرة انه مش مصدق حاله من الفرحة..بس بعدين اكتشفت انه باقي مصعوق من الشبح الابيض الي واقف قباله😂

ما علينا…..المهم لبست صندلي وقعدت انا وأمي ورا……وكل ما أحاول اختلس النظر لأحمد أشوف حماتي بالمراية صافنة في ولاوقة ثمها ع جنب مع نظرة حادة….يما بتخوف😖…..فأنا أسحب نظرتي شوي شوي وأتفرج على إمي…..ولا البلاش😂😂

وصلنا المحكمة وفتنا لعند المأذون لحتى نكتب الكتاب….وكل اشي تمام وما ظل غير اني أوقع إسمي….من كثر ما كنت متوترة ومستحية لو خلوني أبصم أحسن…لاني معرفتش شو خربشت على العقد….خوف الله اني كتبت اسم إمي بدال إسمي😂😂

وبهيك صرت خطيبة أحمد رسميا😍😍

وسمعني أغنية:يا دبلة الخطوووووووووبة😍😍

بعد ما خلصنا حماتي قالت خلينا نروح نشتري المحابس ….طبعا احمد حاول انه نروح انا وياه لحالنا…بس هالمرة نطت إمي وقالت:إجرنا على إجركم….مش من اولها فياعة….ورحنا على محل من الطراز القديم…لانه حماتي بتشتريش الا من عنده…مصيغة لكل سلفاتي من عنده..جواهرجي العيلة ما شالله😒…كل الذهب الي عنده شبه ذهب ستي بزماناتها….حتى الدبل الي عنده مثل عجل السيارة….انا بوقتها ما كان فارق معي المهم ألبس دبلة واخترنا المحابس وكتبنا أسماءنا عليهن وأحمد قرر يوخذنا نتغدى بالمطعم😍😍
بالفعل وصلنا المطعم وإمي وحماتي قعدن جنب بعض وانا واحمد جنب بعض…وأجى الاكل مشاوي وسلطات وحمص😍😍…يماااا مزكا الريحة….وطبعا انا صرت أقسم الخبزة قد لقمة الزغلول واوكل حمص….عاملة حالي مستحية😒…لو إني بالدار كان شفطت الطاولة بلقمة…بس عاد لزوم البرستيج….
بهاي اللحظة خطيبي شكله حب يتحرش…قصدي يتحركش في لانه من الصبح مش صاحله يحكي معي ع انفراد..راح مد أصابع إجره عشان يلمس إجري من تحت الطاولة😂😂 حسيت في إشي دافئ بتسلل على إجري من ورا…لأني لابسة صندل مفتوح فكرت صرصور والا عنكبوت نفضت حالي ووقفت وصرخت…صرصووور..صرصوووور😖😖
خطيبي صار وجهة قوس قزح وإمي شلحت حفايتها مستعدة لتفعص الصرصور وحماتي مباشرة بلشت تلم الأكل الي ظل لتروحه على الدار😂😂

وبدل ما احمد يروح مبسوط …رجع ع الدار وهو بفكر بالورطة الي ورطتها بخطوبته الي😂😂😂

وبلشت فترة الخطوووبة

#مذكرات_عروس

#جزء٢
اول ما روحنا من المطعم ووصلنا الدار بلشت إمي :
_الله يعدمني إياكي يا غضيبة…ولك فضحتينا ولميتي كل المطعم علينا بدكيش تعقلي عاد؟؟والله بعد هالخزوة الي خزيتينا إياها الإ يبطل عنك احمد…ابقي قابليني اذا طل والا حكى معك …روحي انقبري اعمليلي كاسة شاي أروق أعصابي

انا كنت بتلقى البهدلة من ثم ساكت😵🙊
وعملت لإمي شاي وقعدت بغرفتي أفكر…..معقول نكز قلبه مني؟؟
معقول يفسخ الخطبة؟؟؟….يا ويلللي… معقول أصير مطلقة قبل الدخول؟؟😵😵……..
بعدني بفكر وبتحطم والا إمي فايتة على الغرفة مثل مداهمة مكافحة المخدرات….
قفزت من محلي
_خير يما كاسة الشاي طلعت مرة؟؟😵
_يمرمطوكي إلهي….ولك حماتك اتصلت على التلفون الارضي وقالت انهم المسا جايين هي وخطيبك وبناتها وسلفاتك قومي تزبطي…ونادي على مرت اخوكي تكوي شعراتك…قومي ولازم الليلة ترقعي الي عملتيه بالمطعم….

وعالسريع ناديت مرت اخوي وبلشت حت وتعرية بوجهي….خصوصا حواجبي الي شبه حواجب عبد الرحمن آل رشي😂😂…وفردت شعراتي على طاولة الكوي وبالمكوى رايحة جاية تا وقفن شعراتي مثل الخط المستقيم😂
وشحدت من عندها بلوزتها الحمرا الي لبستها بعرس اخوها والإكسسوار الي لبسته يوم عرسها….وجابتلي علبتها العطر ورشرشت علي من كل النواحي والجوانب….وطلعت من تحت ايديها قمر….قمر….يسعدني محلاني😍😍😍
وجهزنا الضيافة ورتبنا غرفة الضيوف وكل اشي تمام التمام….
المسا وصلوا بيت حماي وخطيبي…حماتي القائد….ولابسة دشداشة مبرقة وبرضو عابطة شنتتها تحت أباطها وماشية مثل الحرس الملكي😂
وبنات حماي الثلاثة وسلفاتي الاربعة ثنتين متجوزات وثنتين خاطبات بعدهن….
طبعا انا مركزة بسلفاتي وناسية خطيبي المسكين…سلمنا على بعض وقعدوا بغرفة الضيوف وخطيبي مش قايم عينه عني…معه حق هالمرة طالعة ملاك مش شبح😂
انا شو معرفني قاعد جنب إمي وملزقة فيها خايف أضيع…واحمد يطلع علي ويغمزني…انه تعالي جنبي وأنا ولا فاهمة إشي أبتسم وانزل راسي لتحت من الخجل مفكرته بغمزني كنوع من انواع اظهار إعجابه في😂…وسلفاتي عين علي وعين على أحمد ووقت مستقطع يطلعن فيه على حماتي ويشوفن تعابير وجهها….بإختصار القعدة بقت عبارة عن حلبة مراقبة😂
المسكين أحمد استسلم للامر الواقع وقعد يدخن سيجارة ورا الثانية…تا حماتي شفقت عليه وقالت:

_عزا انحرقت اعصاب الولد…روحي يا ريم خذي خطيبك واقعدوا لحالكم على البرندة…

فجاة أحمد لمعن عيونه وانبسط الحزين….
بس انا بالاول تطلعت على إمي عشان تعطيني الاوكي….ووافقت على مضض…

طلعنا انا واحمد على البرندة وهو ما صدق ويشوفنا لحالنا وعالسريع مسك ايدي وقال:
_شو هالجمال….أتاريكي بتجنني …نيالي والله😍😍

وأنا هيك😳😳
تجمدت لا من ثمي ولا من كمي….وهو يحكي ويتغزل وانا صافنة….لحتى رن تلفونه وبوقتها كان الي معه موبايل يعتبر من الأغنياء خصوصا النوكيا ،😂
بساعيتها قررت اخرج عن صمتي وأتلحلح …وكل الي سالته إياه:
_تلفونك بصور؟؟ فيه كاميرا؟؟
🙈🙈….قال:_اه بصور اشتريلك واحد؟؟
بكل غباء جاوبت:_لا شو بدي فيه عنا تلفون أرضي😂😂
وهو ما صدق واقول هيك ومكررش السؤال اساسا 😂
بعد ربع ساعة حماتي نادت على أحمد وفتنا جوا وقعدوا أحمد وابوي وحماتي وأمي لحالهم لحتى يقرروا موعد العرس…وبعد انتهاء الاجتماع تقرر العرس عالسريع لانه فش داعي للتأخير..كل اشي جاهز…وبعد اسبوعين العرس….وبلشت أجهز للعرس😁

#مذكرات_عروس٣

#جزء٣

طبعا لانه العرس قريب كثير بعد اسبوعين أمي كثفت جهودها باول اسبوع تعطيني تعليمات:
_اسمعي ترى لازم تصير قد حالك ومش تخلي دار حماكي يضحكوا عليكي؟؟
بتديري بالك على جوزك ودارك وخصوصي نظافتك ونظافة بيتك..ومش تخلي الجلي مكوم بالمجلى تا يعفن…وما تظلي نايمة للعصر يا حزينة…بتقومي بدري تخلصي شغل دارك وبتنزلي عند حماتك تساعديها وتطبخي معها….

ومجلدات من هالحكي وامي تحكي وانا بفكر بالبدلة والتسريحة
امي_واسمعي ترى حماتك مش قليلة…بس نروح نشتري الذهب والكسوة بتختاري الي بعجبك ولا تنسي شغل النوم..من بيجامات عرايسية وقمصان النوم…واذا حماتك احتجت على اشي اغمزي خطيبك هو بشتريه غصبن عن امه…..

بهاللحظة نطت مرت اخوي وقالت:_وليش يامرت عمي لما اخترت الطقم الابيض احتجيتي ورجعتيه ومخليتش ابنك يدفع حقه؟؟والا حرام علي وحلال على بنتك…
وقلبت طوشة بين امي ومرت اخوي 😂😂

المهم إجى اليوم الي لازم نروح نختار فستان العرس ورحت انا واحمد وريا وسكينة قصدي امي وحماتي😂😂
انا وقفت وامي تختار عني وحماتي ميعجباش وترجع تختارلي وحدة..انا كنت عبارة عن مليكان للقياس بس…واحمد مش عاجبه كل شغل هالنسوان مسك سيجارته وطلع لبرا…لحد ما استقرن على بدلة مهفهفة مرفرفة كلها نفانيف وورود وخرز😂😂
وجهزنا كل اشي وطلعنا من كل هالجولات بالقليل من المناوشات والمناقرات…بس الحمد لله كل شي تمام وأجى يوم العرس🙈

الله لا يجبرها هالكوافيرة عملتني مثل لوحة إعلانية ما خلت لون ما جربته علي…غير عن طبقات البودرة الي لو حدا ينفخ علي بطلع من وجهي مثل ما بيطلع من محاية الطباشير بس تنكت😭
حتى أحمد اول ما شافني بدل ما يقول :ما شاء الله…
قال:أعوذ بالله😭
وخلص العرس على خير وسلامة والكل روح على بيته وانا تشعبطت بإمي وظليت أعيط تا ساحوا كل الالوان الي على وجهي وصرت بشبه قناة عمان قبل ما تفتح😭😭

وبهيك بلشت اول يوم الي بالحياة الزوجية🙈🙊

#مذكرات_عروس٤

#جزء٤

اول ما فتنا انا واحمد على غرفتنا عالسريع احمد حكالي_
_يرضى عليكي روحي عالحمام إغسلي هالالوان الي على وجهك
فتت انا تحممت ولانه كل أواعيي بعدهن بالشنتات طلعت من الشنتة اول إشي أجى بإيدي…بجامة بنطلون وبلوزة كم…لونها احمر بأحمر جابتلي إياها مرت خالي هدية قبل ما اتجوز😁😁
قلت بعقلي لونها احمر🙈هاي مليحة الليلة😂
لبستها وطلعت لعند احمد…
_بسم الله الرحمن الرحيم 😳مالك لابسة مثل بدلة الإعدام !!!
طبعا انا كنت مفكرة انه رح ينبهر بس يشوفني…بس لما قال هيك ضربت بوز وقلبتها نكد عليه من اول ليلة…وتلفلفت بالحرام وخبطتها نومة😂😂
ثاني يوم الصبح صحيت وتركت احمد نايم وركاض نزلت عند حماتي لقيتها بالمطبخ بدها تشطفه…شمرت عن إجري وبدي اعمل حالي المعدلة النظايفية من اول يوم..وأخذت عنا المكنسة وطبعا هي ما عارضت ابدا😂…ودلقت المي وبلشت اشطف….
والا جرس الباب بيدق….يا حزركم مييين؟؟؟
إمي ونسوان عمامي جايبات النا فطور العرسان…جاج محشي هيك العادة عنا😁
طلت عليهن حماتي واستقبلتهن….إمي سالت عني..حماتي حكتلها:الله يرضى عليها ريم صبحت بالمطبخ…

بقى في عقل براس إمي وطار🙈
أجت لعندي عالمطبخ مثل القضا المستعجل ولما شافتني مشمرة وبشطف فتحت الموشح:
_الله يقبرني إياكي يا بعيدة….ريتني حردت ليلتها وما حبلت فيكي….ولك لو اني خلفت سحلية مش أحسن ما خلفتك؟؟😡
على الاقل السحلية كل راس مالها شبشب وبخلص منها…بس انتي بدك ستين شبشب يتقطعن على جنابك😡…شو صبحتي بتعملي؟؟بتشطفي بصباحية عرسك يا معدلة؟؟😡
ولك انت عروووس لازم بعدك نايمة

_بس انتي الي قلتيلي هيك يا يما؟؟مش حكيتيلي اصير انزل عند حماتي وأساعدها!!!

امي_ييي …..يييييي….ييييي…ريتك ملح وتذوبي ولك هس صرتي بتطبقي الي بقوله بحذافيره!!
على الأقل اصبري تا نقش الحنا يروح عن ايدك😡…ركاض اطلعي البسي إشي عرايسي ولا تنسي تلبسي ذهباتك….ولطي سحنتك بشوية إحمر وإخضر……مش تفضحيني قدام نسوان عمامك….ترى ما بصدقن هس ويشوفن إشي يحكن فيه
رميت المكنسة وطلعت فوق لبست فستان طويل ابيض وعليه ذهبي ولبست ذهباتي وحطيت شوية مكياج…مع صحوة أحمد…هو شافني هيك…وإنهبل😍😍

شو هااااااااظ😍😍….مش حرام عليكي بالليل لابسة كبة خنق وهس لابسة للنسوان هيك؟؟؟…..قربي شوي علي😍….تعالي اقعدي جنبي😍
تعالي احكيلك سر بذانك😁😁😍

لويت بوزي وعملت حركة براسي انه بديش وظليت نازلة تحت…..وتركت أحمد بخبط راسه بالحيط من هالحظ الي اله😁😁😁

#مذكرات_عروس٥

#جزء٥

نزلت لعند امي ونسوان عمامي لابسة هالكعب الابيض …امي بس شافتني انبسطت ع الاخر…وبلشت عاد تسميع حكي
_اسم الله حولك وحواليك….خمسة وخميسة…..ما شالله ريحة العرايس بتفحفح منك….
(نسيت انها قبل شوي شحوطتني شحوطة ومسحت في الارض بالمطبخ😝)….
وحماتي كمان بدها تفرجيهم انه ابنها بستحق وحدة حلوة…قعدت تقول
_ما شالله ابني احمد بستاهل كل خير…ما شالله شب طول وعرض ما بده الا وحدة تستاهله 😒
قعدن بعدها شوي وروحن….وحماتي قالتلي طلعي جاجة محشية الك ولجوزك…والباقي خليني أغدي سلافك منهم..يالا يكفو😒

طلعت هالجاجة معي لعند أحمد وجهزت طاولة الاكل رحت لعند احمد لحتى أناديه لقيته مش بالغرفة….😱😱

عزااااا ليكون هج الزلمة…بعدو عريس وين بده يروح؟؟….مسكت فستاني الابيض ورفعته ونزلت دحرجة عن الدرج لعند حماتي
_مرت عمي….مرت عمي…..احمد وينه؟؟
_بسم الله عليك😳مالك هيك ؟؟وين بده يروح يعني اكيد زهق وهو لحاله فوق نزل يتمشى….

هون دخل احمد كاين نازل يشتري دخان…وبوزه شبرين….حماتي قلبها وغوشها…ونادت علينا انا وياه وقعدنا بالصالون….
_مالك يا حبيبي احمد وجهك مخطوف!!!
عاد انت عريس ولازم وجهك بضوي ضوي
…..هس اطلع فوق تغدى وقوي حالك بدنا تشد حيلك وتجبلنا ولد صغير شبهك…

وقف إحمد وقال بكل حسرة:
_من وين بدي أجيبه هالولد…من وراء الأسوار؟؟والا من ورا بدلة الإعدام؟؟
وحمل حاله وطلع فوق..جيت ألحقه. مسكتني حماتي من ذاني ورجعتني لورا وقال:
_اقعدي هون لأشوف😡….خير يا طير؟؟شو عاملة للصبي!!!وشو قصة بدلة الاعدام هاي؟؟
لا تبقي ملبستيلوش من قمصان النوم الي جهزتهين؟؟؟والا لشو اشتريناهن؟؟مصاريف عالفاضي يختي؟؟؟….
اطلعي عالسريع زبطي الولد..خليه يحس بفرحة عرسه….ترى احمد طيب وحنون وصبور بس اذا فقعت معه ببطل يشوف قدامه……مالت علي وعلى حظه هالقاروط😡

محكيتش ولا حرف سحبت حالي ولحقت بأحمد…شفته بعده واقف عند باب الشقة…جيت أستعجل لحتى أفوت معه….بس الكعب الي لابسته غدرني…وتفركشت إجري ودحدلت عن الدرج😭…هو شافني ونزل ركاض ليلحقني ويوقف دحرجتي…وأنا مثل البرميل الي واقع عن تلة….أتدحدل واحمد لاحق وحماتي طلعت على الصوت…وصارت تصيح:يا كشيل امك يا حزنوووط…راحت عروستك…ملحقتش تتهنى يا حبيبي😭

(شوفوا انا وين وهي وين😔)…
والحمد لله مخليتش درجة تعتب علي..كلهن دحدلت عنهن واستقريت بالقاع….وما صارلي إشي…بس إنكسرت إيدي وإلتوى كاحل إجري
😂😂😂😂يا فرحتك يا احمد🙈🙈🙈

…….
#مذكرات_عروس٦

#جزء٦

روحت من المستشفى وإيدي مجبصنة وإجري ملفوفة….وحملني إحمد على الدرج ..مسكين بدل ما يحمل عروسته ويفرح فيها..حملها وهي مكرسحة😂😂
وورانا كانت إمي وحماتي …..حماتي ماسكة محرمة وبتلولح فيها مثل إم كلثوم😂وقاعدة بتتشحتف على بخت ابنها ….
حطني احمد على التخت ومباشرة حماتي قالت:

_ روح يا حبيبي يا احمد اشتريلها كبدة وحليب ولبن او حتى اشتريلك بقرة وحطها جنبها خليها تشفى بسرعة….
مهو عرس إخوانك قررب….واحنا الي جوزناك قبلهم لانك اكبر منهم…عشان تلحق تجيب ولد ..بس على هالحالة شكلهم رح يتجوزوا ويجيبوا عر ولاد…وانت يا كشيلي قاعد تطبب وتداوي😒

طبعا امي ساكتة مش مستجرية تحكي عارفة بنتها الحمقاء😂
بس قالت:

__. يييييي عاد بعدهم صغار ملحقين على الخلفة خليهم يستمتعوا بشبابهم شوي وهم عرسان

رمقها أحمد بنظرة خارقة حارقة….بما معنى:اي استمتاع هاظ الي بتقولي عنه!!!!😂😂😡
بعد ما نزلوا امي وحماتي…قرب علي أحمد وقال:
_ هاي عملة تعمليها في يا روحي؟؟😔
بهون عليكي تحرقي اعصابي !!!…يلا شدي حيلك وإشفي بسرعة…بدي عروستي انا….😔

(طبعا أنا تأثرت بهاللحظة وصرت بدي أعيط…حكيتله قرب شوي لأضمك…..هو ما صدق وقرب علي يضمني صرت أصرخ:

__. أحمااااااااااااااد…..آأاااااي بووووجع😭😭

أحمد_. 😳😳شو هو الي بوجع؟؟؟

_إجري…إجري….انت ضاغط على إجري

فز أحمد من مكانه وطلع يقاتل بذبان وجهه…وطرق الباب وقال:
_ ملعون أبوها من جيزة😂😂….
المسا أجو بنات حماي وسلفاتي يطلوا علي …
وسلفاتي يتغامزن ويتهامسن…وطلعت بعد شوي حماتي..بعدها مش حاطة قفاها على الكنباية بلشت بشغلها:
_ اسمعي انت واياها (الحكي موجه لسلفاتي الخاطبات)….بتعرفن تمشين بالكعب والا مش متعودات عليه؟؟؟…ترى مش ناقصنا كرسحة..الي ما بتعرف تمشي بالكعب لا تلبسه..😒
وهن عملن حالهن عارضات ازياء ما شالله😒😒,

_لااا مرت عمي شو هالحكي….احنا الي بنمشي صح😌

ومر أسبوعين ونص وإجى عرس سلافي😍😍😍

#مذكرات_عروس٧

#الجزء_الاخير

اليوم عرس سلافي الثنين مع بعض….وأنا إجري صارت مليحة وبمشي عليها وكمان بدي اروح أفك الجبص عن إيدي….أخذني أحمد على المستشفى…وبالطريق قال:
😍شكله اليوم عرسنا انا واخواني مع بعض…صح ريمووو!!!😍

🙈🙈
اكتفيت بنظرات خجل وفكيت الجبص عن إيدي وبلشت أجهز حالي للعرس…كنت مصممة أطلع احلى من سلفاتي لانهن تمسخرن علي😠
ولبست فستان لون مشمشي وطبعا اهم اشي اتدندش بالذهبات والا امي بتقص رقبتي😂
ومكياج خفيف وصرت على سنغة عشرة….
إجى أحمد ليوصلني على العرس وبس شافني…طبعا أنهبل …مهو فش وراه الا ينبهر المسكين وبالآخر بطلع على فاشوش😝
احمد_ لازم نروح على العرس؟؟؟😍…شو رأيك نظل بالبيت وما نروح😍😍😍

_ لاااااا والله حماتي بتزعل مني..من مبارح وهي تعكيني تعليمات…بدها تفرجي نسوان الحارة كنتها العروس…يلا احمد وصلني لا نتأخر….
احمد _ 😠😠😠….
ووصلنا العرس…وبلشت الحفلة….وإمي مكيفة علي. … ما خلت وحدة بالصالة ما حكتلها :أم المشمشي بنتي…😂😂

وطبعا انا ظليت ارقص وأهز لحتى أوجي سلفاتي كيف الرقص الي على اصوله بالكعب…..خليهن يطقن هالكرنيبات😠
وأنا بعز الاندماج على أغنية (يا ام العريس الله يتم عليكي..يا مسعدة والسعد بان عليكي)….شحطتني حماتي لعند شلة نسوان بدها تعرفهم علي….بعد السلامات والابتسامات …وحدة قالت_شو يا ام امجد (حماتي يعني)….كنتك مش محوشتلنا اشي ببطنها؟؟
(😠😠😠😠مثقل دمها شو خصني فيها تا أحوشلها!!😝)…

لوقت حماتي ثمها على جنب وتطلعت علي
:_ شو يا ريم معقول محوشة اشي وانا ما بعرف!!!
(يعني الي بدري بدري والا ما بدري يقول كف عدس😂)…

وخلص العرس والكل روح على داره…كانت الدنيا برد شوي..فتت تحممت…ولبست بجامتي الحمرا…دافية مخصنيش😂
اجى احمد وشافني …فجاة سكر باب الغرفة بعصبية…وقال:
_.. كماااان مرة؟؟؟؟😠😠

هالمرة حكمتي على حالك بالموووت…
دقت ساااااعة العمل…..💪💪

النهاااااااااااااية😂😂
الى اللقاء في #مذكرات_أم

222 تعليقاً

اترك تعليقاً

لن يتم نشر عنوان بريدك الإلكتروني.