اه يا قلبي المظلوم قصة من الواقع

87 14٬515

اه يا قلبي المظلوم قصة من الواقع
هذه القصة مقدمة لكم من قسم المنوعات في زاكي
#
اه_ياقلبي_المظلوم

#areej_khaswneh

اه يا قلبي المظلوم قصة من الواقع
اه يا قلبي المظلوم قصة من الواقع

اه يا قلبي المظلوم قصة من الواقع
كانت رغد احلى بنت بالبيت و احلى بنت بالعيله ..
واحلى بنت بالحاره .. وبالمدرسه
وبكل مكان بتروحه بتاخذ الجو
كانت مثل النسمه الناعمه
كانت بنت مافي مثلها عندها جمال بلفت اي حد ..

ناعمه مثل الورد
رقيقه مثل الفراش
كلها حيويه .. مدلله والكل بحبها
مغنجه وبطلعلها تتغنج ..

وكبرت البنوته دخلت الجامعه .. درست صحافه واعلام التخصص الي طول عمرها بتحلم فيه ..

ومثل ما كانت مميزه بالبيت صارت مميزه بالجامعه ..
درست وتفوقت مرت الايام بسرعه وتخرجت ..
تخرجت واحلامها قد الكون ..
ما توقعت تنطفى شمعة عمرها ..
ولا توقعت انه يصير معها الي صار ..

بعد ما تخرجت بدات قصتها ..
بدأت معاناتها ..

بثالث يوم العيد هداك اليوم الي رغد ما بتنساه .. الصبح اجا عمها كالعاده يعايد عليهم ..
مافي شي غريب دائما كل عيد بيجي عمها بس اليوم الغريب انه مرت عمها و ابن عمها باسم جاين مع عمها ..

مرت عمها بالعاده ما بتيجي و باسم مابيجي خاصه انه اله يومين جاي من دبي ..

دخلوا سلموا عايدوا عليهم وقعدوا .. رغد واهلها حسوا الوضع مو طبيعي ..
قامت رغد عملت قهوه وهي حامله الصنيه وراجعه سمعت عمها بحكي ..

ابو باسم : والله احنا جاين بطلب ..

ابو رغد : تكرم بالي بقدر عليه ..

ابو باسم : بتقدر ان شاءالله ..
احنا بدنا رغد عروس لباسم

رغد بس سمعت حست حالها بدو يغمى عليها ..
حطت القهوه عالطاوله ورجعت لورا
لاء مستحيل
باسم .. باسم
اخر واحد ممكن يكون زوجي
اخر واحد فكرت فيه
بس مستحيل بابا يوافق هو بعرف وجهة نظري ..

ابو رغد : اهلا وسهلا باسم ابن عمها ومبروكه عليه ..

رغد سمعت جواب ابوها .. لا مستحيل
ليه بابا اعطى جواب
ليه بابا ما سالني
كيف بتصرف هيك

انا ما بدي اياه
مستحيل الي عم بصير مستحيل ..

ابو باسم : الله يبارك فيك يا خوي ..

ام باسم : مبروك يمه يا باسم
لولولويششششش

ام رغد : مبروك .. مبروك

ام باسم : وين عروستنا ..

ابو رغد : رغد تعالي يابه تعالي ..

رغد واقفه ورا الباب وحاسه الدنيا ضاقت
واقفه وبتشهق ودموعها ما بوقفوا …

ام رغد : وينك يا رغد تعالي ..

رغد رجعت عالمطبخ رجعت القهوه وقعدت عاول كرسي ..قعدت تبكي

ابو رغد : خير يابه مالك ..

رغد : ليش ؟؟ ليش

ابو رغد : شو؟؟

رغد : انا ما بدي باسم ..

ابو رغد : باسم ابن عمك شب محترم
مافي منه .. مهندس بدبي
واختارك من بين كل البنات ..

رغد : بس انت ما اعطتني فرصه اختار !!

ابو رغد : بس انا بعرف مصلحتك ..

رغد : انا ما بدي ..

ابو رغد : انا اعطيت كلمه هذا ابن عمك واحق الناس فيكي ..

رغد : يا بابا والله حرام ..

ابو رغد : مسحي دموعك وتعالي ..

رغد : الله يسامحك يا بابا ..

ابو رغد : انا بعرف مصلحتك ومتاكد انك راح تكوني مبسوطه ..

رجع ابو رغد قعد معهم ..اطلع ع ام رغد وحرك عينه فهمت عليه انه رغد مو موافقه ..

ابتسمت وقامت دخلت عند رغد ..
بس شافت رغد امها ركضت عليها وارتمت بحضنها وكانت تبكي بحرقه ..

ام رغد : مالك با رغد .. مالك

رغد : يا ماما مشان الله ما بدي باسم ما بدي ..

ام رغد : يا عيب العيب .. شو هالحكي ..

رغد : ليش عيب ؟؟
طيب مو حرام الي عمله بابا
حتى رأيي ما سمعتوه

ام رغد : مو وقت هالحكي .. تعالي هلأ ضيفي القهوه .. وبعدين بنشوف ..

رغد : ما بدي

ام رغد : يلا حبيبتي انتي طول عمرك بتسمعي الكلمه ..

رغد : يالله

ام رغد : ادخلي هلأ عند بيت عمك وبعدين بنحكي ..
يلا غسلي وجهك وتعالي ..

رغد : حاضر

راحت رغد غسلت وجهها وحاولت ترسم ابتسامه كذابه
حملت صنية القهوه ودخلت ..
اول ما دخلت زغردت ام باسم
لولولو يششششش

وقفت رغد وهي عيونها كلهم دموع
قربت من عمها ضيفته القهوه
ابو باسم : اهلا بعروستنا

قربت من مرت عمها وضيفتها
ام باسم : هلا بعروستنا و وردة العيله وست البنات ..

قربت من باسم وضيفته من غير ما تطلع عليه ..
اخذ باسم القهوه رفع عينه و اطلع عليها
لفت عطول وراحت اعطت امها وابوها وقعدت جنب امها ..

رفعت عينها وطلعت ع باسم
اول مره بتشوفه منيح
اول مره بتتمعن بشكله
هذا باسم الي عمرها ما توقعت يضمها معه بيت واحد ..
هذا باسم الي ولا مره فكرت فيه

شو هالقدر
شو هالظروف
كيف بدها تتقبل الموضوع
كان قاعد بثقه بس اطلعت عليه ابتسم
نزلت عينها عطول
ما قدرت تضحك معه

يعني شو هالظلم عشان ابن عمي لازم اوافق .. لازم اقبل
الف سؤال براسها
والي مستغربته اكثر موقف امها وابوها ..

عحساب امها كانت ما تحب مرت عمها
ومرت عمها دائما طلع حكي ع امها ..

وابوها وعمها بحكوا مع بعض شهر وبتخانقوا سنه ..
من متى هالمحبه
هلأ صاروا احباب واصحاب ..

(الجزء الثاني )

وهي عم تفكر قطع حبل افكارها عمها ..

ابو باسم : اه يخوي يا ابو رغد باسم جاهز للزواج ..
ان شاءالله شهرين وبدنا نزوجهم ..

ابو رغد : البنت بنتكم
انت فصل واحنا بنلبس ..

ابو باسم : الله يسلمك يخوي ..

ام باسم : عروستنا الحلوه العريس مستعجل ..
بجهز اوراقك وبيجي بنعمل الحفله وبتسافروا ..

ام رغد : الله يسعدهم ويهنيهم ..

باسم : شغلة الاوراق بسيطه .. بخلصهم باسبوعين ..

ابو باسم : شو مستعجل العريس .. شهرين بدنا حتى نجهز امورنا ..

ابو رغد : ههه حبيبي يا عمي استنيت هالفتره اصبر هالشهرين ..

ام رغد : واحنا بدنا نجهز رغوده ..

ام باسم : لا تكثري رغد حبيبتي هناك اللبس احلى ..

رغد بتسمع فيهم وما بترد ..
حاسه حالها بحلم
حلم نفسها تصحى منه .. حلم ولا مره توقعت تحلمه .. اقرب لافلام الرعب ..

ابو باسم : ما سمعنا صوت عروستنا ..

ام رغد : خجلانه رغد ..

ام باسم : لو ما خطبناها لباسم بتكون ما سكتت ..بس لما صار كنتنا خجلت ..

ابو رغد : هههههه والله صح ..

ابو باسم : باسم مسافر كمان اسبوع بتحبوا نرتب امور الخطبه ..

ابو رغد : لا يخوي لشو التكاليف ..
ما هم كمان شهرين بدهم يتزوجو
بنكتب الكتاب والحفله بس يجي باسم ..

ام باسم : والله كلامك صح ..

ام رغد : حفله واحده احلى ..

باسم : مثل ما بدكم ..

ابو باسم : الي بدكوا اياه يخوي ..

رغد حاسه حالها قاعده مع ناس غرب
معقول اهلها باعوها ؟؟
هاي العادات ؟
هاي الاعراف ؟
هيك المجتمع ؟
حتى الحفله ما حدا سالها ..
اول مره بتعرف انو في ظلم كبير بالدنيا ..
اول مره بتحس حالها مهمشه ..

هي مو ولية نفسها ..
قاعده مثل رجل الطاوله المكسوره ..
كل واحد بصلحها بطريقته ..
نفسها تصرخ وتحكي لهم ما بدي ..
نفسها تعلن حرب عليهم ..

لكن صوتها ما عم يطلع
رافض يواجه
رافض يصرخ
في غصه خنقتها
ووجع دبحها ..

واخيرا قاموا يروحوا بيت عمها ..
طلعوا وباسم ودعها بعينه ..
هي مو مرتاحه لباسم
ومو قادره تحبه ..

سكرت الباب وراهم وراحت ع غرفتها ومن غير ما تسبطر ع حالها قعدت تبكي بحرقه .. بوجع .. بالم
قعدت تبكي بصوت عالي

كل شوي يعلى صوت بكاها
تشهق بصوت اعلى ..
سمعوا امها وابوها الصوت ..

راحوا ع غرفتها .. فتحوا الباب .. كانت منهاره .. نايمه ع سريرها متقوقعه ع نفسها ..
منكمشه كتير ع حالها ..
وشعرها مغطي وجهها ..
وجهها احمر كتير ..
عينها مو قادره تفتحهم من كثر البكى ..

ام رغد : رغد مالك .. شو في

ابو رغد : ليش عامله بحالك هيك ؟؟

ام رغد : اول مره بتبكي هيك ..

ابو رغد : شو الي مزعلك ..

رغد : انتو .. انتو !!

ابو رغد : احنا !!

رغد : اه انتو .. انتوا فرضتوا علي شي ما بدي اياه ..

ام رغد : ان شاءالله قصدك عشان موضوع باسم ..

رغد : اه انتوااجبرتوني ..

ابو رغد : احنا بنعرف مصلحتك ..

ام رغد : ابن عمك شب مافي منه ..

رغد : من متى هالحكي ؟؟

ابورغد : شو مالك انتي ..

رغد : طول عمركم انتوا ودار عمي متل الاعداء ..
يوم بتحكوا مع بعض وعشره لاء ..
عدوري صرتوا احباب

ام رغد : عيب هالحكي ..

رغد : وحرام الي عملتوا ..والله حرام

ابو رغد : انتي ما بتعرفي مصلحتك ..احنا بنعرف اكثر منك .

رغد : يا بابا مشان الله ما بدي ..

ام رغد : ولك انتي بترفسي النعمه ..
طلي بنات خالاتك كلهم تزوجوا بالخليج
وبنت عمك احمد تزوجت بامريكا
وبنت جارتنا ام عدنان تزوجت وسافرت ع اوروبا ..
والا بنت صاحبتي ام سند تزوجت وهاجرت مع زوجها ع كتدا ..

ابن عمك مهندس بدبي .. راح تعيشي معه ملكه .. بعدين دبي ..
كل البنات نفسهم بعيشوا هناك ..
بدل ما تنبسطي ..

رغد : يعني هيك حسبتوها ..

ابو رغد : ابن عمك شب ما في منه .. وهو اولى فيكي من الغريب ..

رغد : انا ما بدي لا غريب و لا قريب ..

ام رغد : اذا مافي براسك موال لشو بتعارضي ..

رغد : باسم طول عمره مثل اخوي ..
ولا مره فكرت فيه ..

ابو رغد : شو هالحكي الفاضي .. مش ضروري تفكري فيه ..

ام رغد : من هون وهيك فكري فيه وراح تلاقيه شب بجنن ..

رغد : يالله شو هالحياه ..
في ظلم كبير ..

ام رغد : قومي غسلي وجهك واقعدي فكري بعقل شوي ..
راح تعرفي انه احنا بدنا مصلحتك ..

(الجزء الثالث)

طلعوا امها وابوها من الغرفه وهي حطت راسها تحت المخده ونامت ..

نامت وهي تعيد احداث اليوم ..
حاسه الي صار مثل الحلم ..
نامت وهي تفكر .. نامت والدمع بعيونها ..

صحيت ثاني يوم ع صوت جرس الباب ..
سمعت امها بتحكي اهلا وسهلا واهلا وسهلا ..
بعدين خطوات سريعه عند غرفتها ..
فتحت امها باب غرفتها ..

ام رغد : بعدك نايمه ؟؟ قومي .. يلا قومي ..

رغد : شو في ؟؟

ام رغد : هادا باسم خطيبك .. حكى عمك مبارح بالليل كنت نايمه انتي .. عشان تروحوا تكتبوا الكتاب بالمحكمه ..

رغد : نعم !!!
كتب كتابي ؟؟!!
وانا اخر من يعلم ..

ام رغد : ولك وطي صوتك .. بعدين مش خطبتوا ؟؟
طبيعي بدكوا تكتبوا الكتاب ..

رغد : بس مو هيك .. ولا بهيك طريقه ..

ام رغد : يلا حبيبتي .. بلا كثرة حكي .. قومي غسلي .. والبسي .. وتعالي ..

رغد : ياااااا ااااالله ..

ام رغد : مالك انتي ..
يلا بسرعه غسلي
بعدين حطي شوية مكياج ع عيونك .. منفخين من البكى ..

رغد : الله يصبرني ..

ام رغد : انا رايحه اعمل قهوه .. لا تتاخري ..

طلعت امها وهي دخلت ع الحمام غسلت وجهها ..
طلعت بالمرايه .. كانت عينها منفخه كثير .. وداخله لجوا ..
حست وجهها كمان منفخ ..
خدودها حمر
وعندها صداع ..
ما عرفت حالها بالمرايه .. يالله شو صار ولشو وصلت لهيك حاله ..

طلعت من الحمام .. رجعت ع غرفتها .. فتحت خزانتها ..
ما عرفت شو تلبس
طلعت بنطلون وقميص لبستهم وهي سارحه ..

رفعت شعرها لفوق .. حطت مرطب شفايف .. طلعت ع عينها لسه منتفخين ..
حطت فيهم كحله .. وحملت شنتتها وطلعت ..

كان باسم قاعد بالصاله بستنى فيها ..
بس شافها وقف وابتسم ..

باسم : صباح الورد ..

رغد : صباح النور ..

باسم : كيفك رغد ..

رغد : حمدالله .. من الله بخير ..

ام رغد اجت بهاللحظه : يلا تفضلوا اشربوا القهوه عشان تطلعوا تلحقوا المحكمه ..

باسم : يلا نشرب القهوه رغد ..

قعدت رغد ع الكرسي الي مقابل باسم .. مسكت فنجان القهوه ..
كانت سامعه حوار بين امها وباسم . ما شاركت بالحوار ..
سامعه كلام وحاسه حالها مو فاهمه شي ..

ماسكه فنجان القهوه والف حكايه حكتها مع الفنجان ..
ما شربت من الفنجان بس بتطلع عالفنجان وعينيها كلها دموع ..

ام رغد : رغد …

باسم : شكلها مو معنا ..

ام رغد : رغد .. شكلك نمتي ..

رغد هزت راسها ورسمت بسمه من وسط دموعها ..
حطت الفنجان عالطاوله ..
الفنجان الي ما شربت منه .. ووقفت ..
وقف باسم وحكى : يلا ..

رغد : يلا انا جاهزه ..

باسم : الهويه معك و و

ام رغد : كل الاوراق معها انا جهزتها ..

باسم : يلا اذا توكلنا ع الله ..

طلعوا من البيت رغد حست حالها ماشيه بجنازه ..
بتحاول تخفي ضعفها ودموعها ..
بتمشي غصبن عنها ..
حاسه بغصه .. وجع والم ..
فتحلها باسم باب السياره .. قعدت .. وهي حاسه الشوراع بتنشق وبدها تبلع كل هالعالم ..

حست كل الناس بطلعوا عليها
وعارفين انها مجبوره على هالزواج ..
تحجروا الدموع بعينها .. وعرفت انه وقع الامر وانه لا مفر منه ..

وصلوا المحكمه .. نزلت .. مشيت بخطوات مهزوزه ..
كتبوا الكتاب .. وصارت تحت اسم رجل تاني ..
رجل هي ما اختارته .. وما حبته .. رجل ما بتعرفه غير شكل ..

طلعوا من المحكمه ..

باسم : رغد شو رايك نروح نشرب عصير بمكان هادي ..

رغد : ما بدي اتاخر ع البيت ..

باسم : ما راح نتاخر .. هلأ بحكي مع عمي وبخبره ..
وعطول رن ع عمه وخبره ..
ابو رغد حكى له خذوا راحتكم .. هي صارت خطيبتك بشكل رسمي ..

باسم : سمعتي عمي ما حكى شي .. خلينا نطلع قبل ما اسافر ..

رغد : اوك ..

باسم : لي ما بتحكي كثير ..في شي؟
حاسك مو مبسوطه ..
رغد .. انتي ما بدك هالزواج ؟؟

رغد : لا مو هيك ..

باسم : طيب من مبارح وانتي سارحه ومو عبعضك ..

رغد مو عارفه شو جاوبه .. ومو عارفه كيف ترد ..
صح هي ما بدها اياه .. بس خلص انكتب الكتاب .. هلأ ما بنفع الكلام ..

باسم : رغد شو ؟ ردي علي ..

رغد : لا مافي شي
بس الموضوع صار فجاه ..

باسم : اذا هيك بسيطه .. انتي مو غريبه عني .. انتي بنت عمي ..
وتاكدي انك راح تكوني مبسوطه معي ..

رغد : اه .. اه
ان شاءالله ..

باسم : شكلك خجوله .. انا بذكرك وانتي صغيره ..
كنتي ضلي تيجي تلعبي مع سحر اختي ..
بس ما كنتي هيك خجوله ..
كنتي ضلي تحكي ..

رغد : الصغير بكون ما بعرف كيف بتصرف .. طبيعي بس يكبر الصغير يخجل ..

باسم : بس عارفه ولا مره توقعت انه تكوني زوجتي ..
بس لما اهلي حكولي عنك .. حسيت انه مواصفاتك مثل ما بدي ..

حكى كثير باسم .. شي تسمعه رغد وترد عليه باختصار ..
وشي ما تسمعه …

(الجزء الرابع)
مرت الايام بسرعه… الايام الي ما كانت حابه رغد انهم يمروا ..

كانت ايام صعبه .. ما حست بطعم التجهيز للحفله ..
ما حست بحلاوة هديك اللحظات ..
جهزت امورها وهي تبكي ..
اختارت فستانها من غير لهفه ..
حجزت بالفندق من غير ترتيب ..

بس كان يحكي معها باسم ما كانت تلاقي كلام تحكيه معه ..
كانت لحظات الصمت اكثر بكثير من الكلام ..
كانت مستعمه دائما ..
تعبت وهي تحاول تتأقلم وتتعايش لكن قلبها رافض .. وعقلها مو مستوعب الفكره ..

رضخت لرغبة اهلها ..
و انصاعت لاوامر اشبه بحكم الاعدام عليها ..

طاروا هالشهرين .. وبكرا راجع باسم من دبي ..
راجع يتزوج .. الزواج ثالث يوم بصل من السفر جاي بس اسبوع ..
راح بتزوجوا وياخدها ويسافروا ..

الكل بخطط وبجهز ..
امها طايره من الفرحه ..
حماتها بجهز بكل شي من افخم الاشياء ..
عنها مبسوط اول اولاده راح يتزوج ..
ابوها فرحته قد الكون بنته مأمن عليها مع ابن اخوه ..

وسط هالفرحه هاي ..
رغد كانت تبكي .. الغصه ما فارقتها ..
رغم كل محاولاتها انها تتعايش مع الوضع ..
وهاي اليوم وصل باسم .. وطبعا اخدها عمها معه عالمطار عشان تستقبله ..

استقبلته بضحكه مرسومه .. وقلب مظلوم ..
العريس وصل وكل شي جاهز ..

راحوا ع بيت اهل باسم ..
الكل استقبله بالاحضان ..
تغدوا .. وراح قعد هو ورغد لحالهم ..قعد جنبها .. قرب منها كتير ..

رغد بس حست انه بقرب منها حاولت تبعد ..
بعدت عنه كثير ..
لاحظ انه بعدت عنه ..
قرب منها اكتر وبسرعه حط ايدو فوق ايدها ..

حست نيران الدنيا بايدو ..
ما حبت لمسته .. ما حبت حركات اصابعه فوق ايدها ..
حست حالها بتنخنق وهو عم بشد ع ايدها ..
حاولت تترك ايدو بس كان بشد عليها بقوه ..

يالله شو كرهت هاللحظة ..
يالله شو حست انه في سي غلط عم بصير ..

باسم : رغد انا بحبك ..

رغد ساكته

باسم :رغد بحسك بعيده عني ..

رغد لسه ساكته ..

باسم : رغد حسسني بالحب .. رغد انا متشوق ليوم عرسنا نفسي اضمك بحب ..

رغد لسه ساكته .. بس خجلت ونزلت عينها بالارض ..

باسم : رغد بحبك ومشتاقلك ..
رغد احكي لو كلمه ..

رغد : ما عندي اي رد ..

باسم : اوك .. انامقدر خجلك يعمري ..

رغد في صوت جواها ..
في صرخه لو طلعت بتدمر الكون ..
في وجع كبير
وجع ما اله دوا .. ولا دكتور بشفيها منه ..

باسم : رغد انا بحبك وبدي تحبني ..

رغد : الحب مو لعبه ..

باسم : شو قصدك ؟

رغد : ما قصدي شي ..

باسم : كلامك اله معنى ؟

رغد : لا ما اله معنى .. لادقق عالكلمه

باسم : المهم اني بحبك ..

رغد : اوك هلأ بدي اروح
وسحبت ايدها بقوه من ايدو .. و وقفت
قام وقف مقابلها .. كان قريب منها كثير ..
قريب منها القرب الي ما بدها اياه ..

لفت وجهها عشان تطلع من الغرفه ..
مسكهامن ايدها و لفها عليه ..

باسم : ليه بتهربي مني ؟؟

رغد : ما بهرب منك ..

باسم : تصرفاتك بتثبت هالشي ..

رغد : انا ما بهرب .. بس مو وقته هالشي ..

باسم : بس انا بحبك ..

رغد : الايام جايه ..
بدي اروح هلأ ..

باسم : طيب يلا خليني اوصلك ..

رغد : لا ارتاح .. انت جاي من السفر ..

باسم : يعني معقول اخليكي تروحي احالك ،؟

طلع باسم مع وغد وصلها وطول الطريق ما حكوا ولا حرف ..
رغد مو قادره تضحك ع حالها وتعيش بجو ما تخيلت حالها فيه ..

وصلت البيت ..وطبعا كان معهاهدايا كثير من باسم ..

ام رغد : وين باسم ..

رغد :روح ..

ام رغد : ليه مادخل يشرب فنجان قهوه ..

رغد : ما قبل ..

ام رغد : شو كل هالهدايا ..

رغد : هدول جابهم باسم ..

ام رغد :خلينا نشوفهم ..

رغد : خذي شوفيهم .. انا ما بدي ..

ام رغد : شو ما بدك ؟؟ انتي مجنونه .. ولك واحده غيرك بتكون طايره من الفرحه ..

رغد : ع شو اطير .. مافي شي بفرح ..

ام رغد : ولك افرحي اسبوع وبتكوني بدبي ..

رغد : يا ماما مو هيك والله ظلمتوني ..

ام رغد : بكرا بس تسافري وتعيشي هناك راح تندمي على هالكلام ..

رغد : ما راح تفهموني ..

ام رغد : اسكتي ولاتكثري حكي .. انبسطي ورتبي امورك حفلتك كمان يومين ..

رغد : حفلتي !!! نفسي احس فيها ..

ام رغد : بس غيري افكارك انتي ..

رغد : امر وانفرض علي .. وبدي اتعايش غصبن عني ..
خليني اشوف شو الايام مخبيتلي ..

(الجزء الخامس)
اليوم يوم الحفله الكل مبسوط .. والكل برقص وبغني ورغد قاعده حابه تحس بالفرحه بس كل شي بيجي بالغصب ما بحس الواحد بحلاوته ..

خلصت مراسيم الحفله واخد العربس عروسته وراحوا عالفندق ..
بالنسبه لرغد كانت ليله عاديه ..

ثاني يوم راحوا عند بيت عمها واجوا اهلها ..
ملامح الحزن لسه مرسومه ع وجهها ..
ضلوا هاليومين يستقبلوا الناس الي بيجوا يباركوا ويودعوا العرسان ..

وهلأ خلص رغد راح تسافر ع دبي ..
راح تستقر هناك ..
طلعوا اهلها معها عالمطار .. ودعتهم بدموع قويه ..
بكيت كتير .. بكيت لدرجة كل الي بالمطار استغربوا من طريقة بكائها ..

بكيت وجع هالشهرين ..
والغصه الي خبتها .. بكيت وفرغت كل الحزن الي جواها ..

صار موعد الطياره ..
مسك ايدها باسم وراحوا ..
راحت رغد .. ودعتهم وراحت ..

وصلت دبي .. وراحت ع بيتها .. البيت كان حلو ودافي ..
مرتب وانيق ..
باسم كان حنون كريم ولطيف معها ..

شوي شوي ومع الايام بدات تتأقلم مع حياتها ..
حست انها ممكن تحب باسم ..
وفعلا بدات مشاعرها تتحرك تجاهه ..

والي خلاها تحبه اكتر يوم حملت باول بيبي وشافت عيونه بترقص فرح ..

حملت بابنها الاول ادم وفرحوا كتير فيه ولدت بدبي .. اهتم فيها باسم كثير ..
كل هالاهتمام خلاها تتعلق بباسم ..
وبعد سنه جابت كمان بنوته مثل القمر
ادم وجود خلوها تحب باسم وتنسى انها اجبرت عليه …

لحد ما اجا اليوم ..
اليوم الي خلاها تعرف انه احساسها ما خانها ..
كان باسم نايم .. وهي كانت تعمل بالغدا ..

رن تلفون باسم ..
كان تلفونه عالصامت .. وناسيه عالسفره ..
طلعت من المطبخ .. شافت تلفونه بضوي وبطفي ..
مسكته شافت رقم بدون اسم ..
في شي خلاها تشك ..
باسم دائما تلفونه مقفل وعليه باسورد ..
ممنوع تمسك تلفونه ودائما عالصامت ..

الرقم لسه برن ..
بسرعه حابت تلفونها وكتبت الرقم ..
خزنته ..
وراحت ع باسم صحته ..

رغد : باسم ..باسم ..

باسم : نعم حبيبتي ..

رغد : في رقم اله ساعه برن عليك ..

باسم : شو ؟؟ رقم
قام باسم وقعد …
وين تلفوني ليش اخدته

رغد : ما اخدته .. انت ناسي تلفونك عالطاوله ..

باسم : اه .. طيب جهز الغدا

رغد : اه شوي وبجهز ..

باسم : بلا حبيبتي جوعان انا ..

رغد : يلا يلا

طلعت رغد .. وقفت ورا الباب .. سمعت باسم رن ع الرقم وحكى :
ليه رنتي علي .. في شي ؟؟
الف مره حكتلك لا ترني انا برن ..
ساعه وبكون عندك .. كثير مشتاقلك يعمري ..

رغد حطيت ايدها ع ثمها وصرخت من جوا صرخه وجع
صرخة خيانه
صرخة الم

رجعت عالمطبخ كملت الغدا .. وجهزت السفره ..
اجا باسم وقعد يتغدا ..
ورغد سارحه بالكلام الي سمعته
الف فكره دارت براسها ..
شو تعمل .. كيف تتصرف .. شو الحل

باسم ؛ تغدي حبيبتي ..

رغد : ما الي نفس ..

باسم : في شي ..

رغد : لا بس شبعانه ..

باسم : طيب انا بدي اطلع .. عندي شغل.. بتحبي اوصلك ع المول ..

رغد : لا ما بدي .. بدي احمم الاولاد وانظف البيت ..

باسم : براحتك حبيبتي ..

قام باسم جهز حاله .. كانت تراقب فيه رغد .. تأنق بلبسه رش عطر كثير ..وطلع …

بس طلع .. راحت رغد عملت بحث عن الرقم الي رن ع باسم ..
وفعلا طلعت واحده
الرقم مسجل تحت اسم سوزان ..

رغد تايهه مو عارفه كيف تتصرف ..
قامت جابت لاب توب باسم فتحته ..فيس باسم فاتح ..دائما فاتح بس ولا مره فكرت تفتش وراه ..
هو بعرف انها مستحيل تفتح لاب توبه ..

فتحت الرسائل .. كان في رسائل بينه وبين سوزان ..
رسائل كتير …
بدها تعرف من متى .. طلعت لفوق كتير ..المسجات كتيره ..بتواريخ قديمه ..

اووف لقيت مسج وهي حامل بريان ..
رجعت طلعت لفوق ..بعرف سوزان من زمان ..

انتهت المسجات ..
بعرف سوزان من وهو خاطب ..
رغد بتقرأ ودموعها بتنزل
رغد مصدومه … ولا حست انه بخونها
ولا مره حسسها بالخيانه ..

سوزان بنت بريطانيه بتشتغل ممرضه .. وعايشه بعلاقه كامله مع باسم ..
باسم شكله بحبها ..
رغد بدوامه ..

قررت تواجهه .. سكرت اللاب توب .. وقعدت رتبت افكارها ..
رجع باسم متاخر ..

باسم : بعدك صاحيه ؟

رغد : اه بدي احكي معك ..

باسم : في شي ؟

رغد : اه في ..

باسم ؛ اهلي فيهم شي .. صاير شي بالبلد ؟؟

رغد : لا لا

باسم : الاولاد ..

رغد : لا لا موضوع بخصنا انا وانت ..اقعد خلينا نحكي ..

باسم : شو في يا رغد ..

رغد : انت بتحبني ؟

باسم : شو هالحكي .. طبعا بحبك

رغد : والي بحب بخون ؟!

باسم : طبعا لا

رغد : وسوزان ؟؟

باسم تلبك شوي بعدين وقف : مين سوزان ؟؟

رغد : سوزان الي بتحبها والي بتعرفها من زمان والي ..

قاطعها باسم : رغد عيب هالحكي ما في منه .. انا متزوج وعندي اولاد وبحبك ..

رغد : انت ما بتحبني انت كذاب خدعتني طول هالسنين .. بتحكيرغد وبتبكي وصوتها عالي ..

باسم : رغد هالحكي عيب هلأ بحكي مع عمي وبخبره عنك .. انا شخص شريف ومحترم وما بتصرف هيك ..

رغد : انا شفت كل شي ..

باسم : بتهيالك .. خلص ما بدي اسمع هالحكي ..

رغد مصدومه من وقاحته وجراته ..
قامت جابت باكيت دخانه واخدت سبجاره وقعدت دخن وهو براقب فيها كان ساكت ..

قام يحضنها .. رفضته ودخلت نامت ..
نامت وهي تبكي ..
صحيت الصبح كان طالع ع شغله ..
قررت تصور مسجاته قامت فتحت اللاب توب ..
لكن الفيس كان مسكر ؟!!
قررت ترن ع رقم سوزان .. رنت .. اووف الرقم مفصول ؟؟!!

باسم بدو يجننها .. غير كل شي ..
رجع من الشغل .. كان طبيعي وبتصرف معها عادي ..
ما حكت معه بالموضوع وهو ما حكى ..
بس حست انها بعيده كثير عنه..
ضلت تراقب فيه لحتى عرفت باسورد تلفونه ..

بيوم دخل عالحمام اخدت تلفونه بسرعه وفتحته كان في مسجات كتير بينه وبين سوزان عالواتس ..

بحبها وبروح عندها ..
ما لحقت تصور طلع باسم وشاف التلفون بايدها ..
ما حكى اخد التلفون وهو ساكت وهي ما حكت ..

ماعرفت ليه ضلت ساكته .. مالقيت كلام تحكيه وهو مبرئ نفسه من كل شي ..
راحت قعدت بعرفه ثانيه ..
سكرت الباب وضلت تبكي
بكيت كتير كتير ..

بعد ساعه دق الباب عليها ..

باسم : رغد افتحي ..
ما ردت رغد ..

باسم : رغدافتحي خلينا نحكي ..

رغد : روح مشان الله روح ما بدي احكي ..

باسم : شو مالك عيشي الدور انا ما عملت شي ..
لا تصدقي انك مظلومه ..

قامت فتحت الباب وقفت قدامه .. وقفت وهي تبكي .. حكت له :
انا ظالمه مثلا وانت مظلوم .. انت هيك بتحكي ..
انا الي خونت .. انا الي بعت ..
انا طول عمري ساكته .. خطبتني واهلي ما اخدوا رايي وقبلت وقعدت فتره طويله لحتى قدرت اتأقلم معك ..
وانت بتطلع عاشق وبتحب من زمان ..

باسم : اخرسي .. وهالحكي ما بدي اسمعه .. ما بدك اياني هذا الباب اطلعي ..

رغد : بطلع بس بدي اولادي ..

باسم : فشرتي .. الاولاد الي .. بدك الاولاد بضلي هون ..

رغد : حسبي الله عالظلم ..

باسم : لا تكثري حكي .. انا رجل والرجال حر ..

رغد : راح اقبل اضل معك لكن انت غريب عني .. راح اسكت وما افضحك عشان الاولاد ..
لكن اعرف انك مظهر قدام الناس بس ..
انا بكرهك .. بكرهك

طلع باسم ..وهي بكيت كثير .. بكيت على حياتها الي ما عاشتها متل ما بدها ..

باسم ضل مع سوزان
رغد عاشت بصمت .. حطت ايدها ع جرحها وسكتت ..
سرها ما حد بعرفه .. عاشت ببسمه ع وجهها .. و وجع بقلبها ..
عاشت عشان اولادها ..
ما اتخذت اي خطوه ضد باسم ..
ولسه بتشوف مسجاته ورقم سوزان .. بس الموضوع صار عندها عادي ..
هي ما بتحبه وما بدها اياه وما بهمها اي شي بعمله لانها باعت ..
هو زوج بالاسم .،

رغد زوجه موجوده ببيوت كثيره
الزوجه الصامته .. الي الوجع والظلم جواها..
#اه_يا_قلبي_المظلوم
#areejkhaswne

عرض التعليقات (87)