قصة الليلة بعنوان عذاب الضمير لحنين طه

قصة الليلة بعنوان عذاب الضمير لحنين طه
هذه القصة تأتيكم من قسم المنوعات في زاكي

تنويه ( القصة واقعية )

#سلسلة_مذكرات_امرأة_بقلم_حنين_طه

#عذاب الضمير

الجزء الاول

( بسرعة بسرعة نادو الدكتور المناوب الصبية ماخدة جرعة كبيرة من الدوا )

الدكتور ( لولا لطف ربنا بنتك بعداد الموتى
اسمحولي هاي محاوووولة انتحار وانا ما بقدر اسكت عنها واتغاطى لازم خبر الشرطة )
ام زينب ( الله يخليك يا دكتور مو ناقصنا فضايح بلاش الشرطة والله رح نصير علكة بتم العالم )
الدكتور يا خالتي والله ما بقدر خبي الموضوع واكتمه كأنه ما صار شي مسؤولية كبيرة علي هي )
ام زينب( بوعدك يا دكتور ما حدا يعرف وما يصير شي )
رق قلب الدكتور على كلام ام زينب ودموعها الي عم يكتو متل حبات المطر من ناح واجبه كانسان ما يخبر الشرطة ومن ناح واجبه كدكتور يخبر عن محاولة الانتحار لكن بعد ترجي ام زينب قرر يترك زينب وما يبلغ عن فعلتها )

_________________________________

هوا كتير وبرد عم يطير الشجر
دخلت على غرفتي شعلت الصوبيا وقعدت مقابيلها اتذكر كيف اجتني الجرأة وحاولت انتحر يمكن الانسان لما بيوصل لاعلى مراتب ومراحل من اليأس بتصير روحه سهلة وما عاد بتعز عليه
تلخبطت الذكريات براسي ( خلص ما بدي اتذكر ما بدي
يا رب بدي انسى بدي انسى )
كل اوجاع الدنيا ممكن تكابري عليها وتقاوميها الا وجعين وجع الضمير والعقل ووجع القلب
وانا كيف بدي ارتاح وانا عم املك الوجعين سوا بنفس وذات الوقت

——————
نرجع للزمن للورا

ام زينب ( الو ايه اهلين ايه والله انا ام محمد تفضلي بشو بخدمك
ايه والله عندي بنتين خرج خطبة وزواج الكبيرة زينب دارسة ادارة اعمال والصغيرة رباب دارسة معلم صف ايه مية اهلا وسهلا بتشرفونا باي ساعة واي وقت )

زينب( شو امي كأنو خطابين )
ام زينب ( ايه خطابين والعريس مهندس وبيشتغل بقطر يعني معبى )
رباب ( ومين يا ترى الي رح تفوت فينا لعنده يعني قصدي مين فينا التي ستفوز بالامير )
ام زينب ( ايه ظلي تمسخري لقلك
هلا المهم انتو التنتين رح تفوتو لعند امه والي بتعجبها الله يسهل عليها ويهنيها )

دخلت انا واختي رباب ننقي شو بدنا نلبس لجية العريس المنتظر صحيح طريقة الخطبة كان فيها ترخيص لالنا بس مو مشكلة المهم كان عندي وعند رباب مين بالاخر الي رح تتزوج قبل وكمان رح تطلع برا البلد
انا كنت طويلة وسمرة وعيوني وساع وجذابة اخترت لحالي طقم بني واخضر وحطيت شوية مكياج وتجهزت
اما اختي رباب كانت بيضة متل الثلج وعيونها خضر وطولها متوسط لبست جينز وقعدت تستنى معي

بعد تلت ساعة سمعنا جرس الباب عم يدق دخلت لعنا مرة مقدرة عمرها مبين بالخمسين ومعها شب طويل واسمر لكن شخصية كتير قعدو وصارت امه تستعرض بابنها من كلام كل الامهات ابني مهندس وحلو وبيشتغل برا وراتبه عالي والف بنت بتتمناه
كان الاتفاق بيني وبين امي فوت انا بالاول قبل اختي ،،، عملت عصير ودخلت لجوا
ام زيد ( ما شاء الله بنتك امورة بس يعني بصراحة اكتر انا الي دلوني عليكم قالولي انه عندك تنتين وحدة رز بعدس ووحدة فاصوليا ورز وبنتك هي يخزي العين عنها امورة وبتجنن والله يبعتلها نصيبها لكن انا بدي لابني صبية بيضة وشقرا ما تواخذوني بس انا بحب الصراحة ما بحب لف ودور ها )
ام زينب ( لا يوووه حقك ولو هلا بنادي لبنتي رباب تيجي )
يا الله ما اقسى الكلام وما اصعبه حسيت بسكاكين بتضرب جوا قلبي والي عز علي اكتر موقف امي ما فرقت معها انا ولا فرق معها جرح قلبي انكسرت عيني وطلعت لبرا شفت اختي واقفة عالباب بتطلع علي من فوق لتحت وكاتمة ضحكتها
كملت طريقي على غرفتي وغيرت تيابي وقعدت عالتخت ناطرة لشوف شو بده يصير
الي فهمته بعد ما اختي دخلت على زيد وامه عجبتهم كتير وطلبت ام زيد من امي موعد ليجو تاني نهار ويجي ابوه لزيد يتقدمولها رسمي
شعلت نار الغيرة بقلبي انه ليش رفضتني انا ما بشكي من شي يمكن لو طلبت اختي ورفضتني بطريقة ارقى من الطريقة الي رفضتني فيها ما كنت زعلت هيك

تمت خطبة اختي على زيد كان طاير عقلها فيه شافته وما صدقت وانا كل ما شوفهم مبسوطين سوا غص بدموعي واسكت خاصة لما كانت اختي تظل تقاهرني وتعايرني بلي صار

زينب ( لك رباب الساعة صارت 2 بعد نص ليل اطفي الضو بدي انام انا او اذا بدك تحكي مع خطيبك اطلعي احكي برا بالصالة )
رباب ( اموت واعرف انتي ليش مكيدوة ومقهورة ولا لانه رفضوكي وزتوكي وبده اياني انا )
زينب ( انتي وحدة مريضة على فكرة الله يشفيكي )
رباب ( خلص لا تزعلي بكرة بيجيكي شقفة موظف منتوف بشي شركة ههههههههههههه)
هاد الموشح كنت اسمعه كل يوم تقريبا من رباب
اذا جبلها زيد هدية تركض لعندي تفرجيني اياها وتقلي ييييي حرام انتي ما عندك حدا يجبلك هيك هدايا
كنت حاول قدر الامكان طنشها وما اسمعلها
واكتر الاوقات روح اشكي لرفقيتي نادين

زينب ( رح جن رح طق يا نادين لك حياتي صارت مقرفة )
نادين ( ييييي شو في )
زينب ( اختي ما عاد استحت كل شوي نفس الموال والله تعبت انا ما بتسكت بتظل تعايرني انه هي خطبت وانا لا
بتظل تذكرني بالموقف الي صار وانه امه لزيد رفضتني واعجبت فيها الها)
نادين ( حل مشكلتك عندي )
زينب ( يا سلام شلون بقا )
نادين ( يعني مو عندي بالمعنى الحرفي عند جارتنا ام صفوان هي الها شغلها بالجن
بتفرق وبتجمع بتحبب وبتكره بتزوج وبتطلق شو قلتي )
زينب ( ييييييي عليكي بدك اياني اعمل لاختي عمل )
نادين ( ايه اعمليلها عمل اختك بتستاهل العما ما شفت احقر منها )
زينب ( يييي لا لا بخاف ما بدي )
نادين ( شوفي فكري بالموضوع ورديلي خبر بكرة )
زينب ( طيب تمام )

رجعت عالبيت عم دور وقلب الفكرة براسي هلا مو هاينلي باختي بس بدي ربيها كمان على كلامها الي بسم البدن
فتت سلمت على امي ودخلت عالغرفة كانت اختي عم تحط مناكير
رباب ( اهلا وين هالغيبة )
زينب ( كنت عند رفقيتي في مانع )
رباب ( لا ما في مانع روحي حرام بتتسلي حاكم انتي ما عندك لا حبيب ولا خطيب يسليكي )
زينب ( اللهم طولك يا روح )
رباب ( لك شو حكينا هلا المهم قليلي مرت عمي الله يخليلي اياها عم تقول عني اني احلى وحدة بكناين العيلة
بيضة وشقرا والباقين شحبار
هههههههههه ضحكتني لما قالت هيك عنهم )
زينب ( الله يشفيكي )

تركت اختي بضحكاتها المستفزة ورحت دقيت لنادين وخبرتها انه انا موافقة روح عند جارتهم
ونمت هديك الليلة وانا مرتاح ضميري انه رح اخلص من جنون اختي ومن شوفة حالها )

زينب ( صباحو هالله هالله شو هالفطورات الطيبة هي )
ام زينب ( ايه تعي افطري شو لوين العزم ان شاء الله )
زينب ( مواعدة نادين بدي روح لعندها )
ام زينب ( هو كل يوم نادين خلص امي فكك منها )
زينب ( ييييي امي بتسلى خلص بوعدك ما طول يلا بخاطركم )

كل الطريق كان قلبي عم يخفق خفق وعم اتصبب عرق ما عم بعرف رجلي لوين ماخديني لمكان صح او خطا طول الوقت اطلع عالساعة وامسح وجهي
نادين ( ليش هيك مغطية عوجهك وليش تاخرتي هيك )
زينب ( لك اسكتي خايفة حدا يشوفني ويعرفني مشي خلصيني )

دخلت عند ام صفوان وقلتلها قصتي وطلبت منها تبعد اختي عن خطيبها ووعدتني واكدتلي انه خلال اسبوع رح يكون خطيب اختي تاركها
دفعتلها مبلغ وقدره لام صفوان تقدير مسبق لتعبها وطلعت
اول ما وصلت كان صوت اختي طالع وعم تبكي عم تتخانق مع زيد لانه بده يسافر ورح يتزوجو بس يرجع
فرحت حسيت قلبي عم يرقص جوا ضلوعي وسرحت بافكاري ( معقول بلش شغل ام صفوان )
بس متل ما بقولوها انقلب السحر عالساحر اتصل زيد برباب يصالحها وارضاءا لالها حددو موعد العرس بعد اسبوع
ضحكت ضحكة طويلة على غبائي الي وداني عند وحدة دجالة وعفلوسي الي حطيتهم عالفاضي وضحكت عخيبتي وعالمعايرة ال رح تيجيني هلا من رباب
هي وخاطبة ما كنت اخلص من نقها كيف هلا بعد ما تتزوج
صارت رباب كل يوم تنزل عالسوق وتجهز لحالها وتشتري اغلى وافخم الماركات وطبعا اول ما توصل تيجي تفرجيني كل شي اشترته مع مقاهرة وكيد وتسميع وتلطيش كلام
لحتى اجا يوم عرسها
كانت حلوة كتير بعرسها وزيد ما شال عيونه عنها وامه رايحة جاي تفرجي بسلفاتها عالعروس وتقلهم شوفو شو اخدت لابني

رجعنا عالبيت امي مبسوطة بهالعرس الي صار لاختي
قاعة فخمة معازيم واصلين ضيافة غير شكل
وانا مو مهم ان كنت مبسوطة او زعلانة ما كان الي الا مخدتي الا عم تحتضن دموعي كل ليلة اشكيلها وقلها عن وجع قلبي
طبعا جيات وروحات اختي كترت وشوفة حالها زادت صارت متكبرة لابعد حد رافع انفها للسما وما بتحكي لحدا

رباب ( شو زينب شو اخر اخبارك )
زينب ( عم دور على وظيفة ان شاء لاقي عن قريب )
رباب( اذا بدك بحكي مع زيد يشوفلك )
زينب ( لا شكرا كتر خيرك )
رباب ( ايه صحيح شو بدي قلك
في واحد موظف بالشركة الي ماسكها زيد بده يتزوج وبدور على عروس شو رايك دله عليكي )
ام زينب ( ايه مو غلط منيح وبكرة بتتزوجي وبتروحي عند اختك عقطر )
زينب ( شكرا انا ما عاد بدي اتزوج )
لفيت ظهري وتركتهم عم يحكو وراي وكنت سامعة اختي عم تمتم ( ليكون مفكرة تاخد واحد متل زوجي )
دخلت على غرفتي وطرقت الباب مسكت موبايلي وقعدت دور على وظائف عن طريق الفيس بوك
وانا عم دور طلع عندي زيد زوج اختي صديق مشترك
ما كان حدا عندي بالغرفة الا انا والشيطان
حسيته قعد مقابيله وصار يوسوسلي
وخطرت ببالي هديك الفكرة
عملت فيس بوك مستعار باسم ( قطرة الندى ) وضفت كم صديق وصديقة من الجروبات والبيجات حتى ما يشك فيني وبعتلو طلب صداقة
بقي طلبي يومين معلق ما وافق عليه بعدين وافق
ومباشرة وصلني مسج
زيد( ؟؟؟؟؟)
زينب( ما فهمت شو بدك )
زيد( حضرتك باعتيلي طلب صداقة )
زينب ( اااه ايه يمكن بالغلط
عالعموم تشرفت فيك انا اسمي ندى )
زيد( ماشي انا اسمي زيد اهلا فيكي )
زينب( هلا هادا الي بالصور انت )
زيد ( ايه انا ليش)
زينب ( بصراحة انت كتير شخصية )
زيد ( تسلمي شكرا وحضرتك فرجيني حالك )
زينب ( انا بنت حلوة كتير بس مو هلا بفرجيك حالي لقدام شوي )
زيد ( طيب احكيلي عن حالك )
زينب ( ما شي دارسة جامعة مختبرات )
كنت بحاول اختار تخصص ما بيعرف فيه
( وعمري 23 وسمرة وطويلة وحلوة )
زيد( اووووه شو هالجمال
طيب مو مرتبطة )
زينب ( لا اصلا ما لقيت حدا بيعجبني وانت)
زيد( انا متزوج من جديد )
زينب( اذا متزوج ليش عم تقبل طلبات صداقة وتحكي مع بنات )
زيد ( لانه ما حبيتها لمرتي مجنونة وعقلها قد النتفة )
زينب ( اها الله يهديها )
وسكرت معه المحادثة وهالمحادثة جرت وراها محادثات كتير لحتى حسيت جد انه زيد تعلق فيي اذا بتمر دقيقة وما حاكيته يجن وينقهر وانا متله كنت ارقص على جروح وحزن اختي
كنت عم شوفها حزينة وعم تحاول تبين قدامنا انها سعيدة لحتى ضعفت بالاخيرة وشكتلنا انه هي وزيد مو متفاهمين وانه زيد في بحياته وحدة تانية
كنت ممثلة بارعة ابكي وقت تبكي اختي وطبطب عليها ومن وراها روح افتح الفيس واحكي مع زوجها
مرق تلت شهور على علاقتي مع زيد
عرفت نقاط ضعفه وشو بحب وشو بيكره وكنت كل شي بيكرهو باختي اتجنبه وبين انه انا عكسه حتى حبني اااايه حبني وكنت متاكدة من هالشي وصار لازم عرفه عن حالي مين بتكون حبيبته السرية
تواعدنا شوفو بمكان خاص ومغلق ،،،، وصل قبلي بشي نص ساعة ودق علي خبرني انه عم بعد الثواني واللحظات حتى اوصل )
لبست احلى شي عندي وروحت عند كوفيرة عملتلي احلى مكياج لحتى انا ما عاد عرفت نفسي
ما بعرف هالجراة الي كنت فيها من وين اجتني او هي ما كانت جرأة هي كانت وقاحة
دقيت عالجرس وفتحلي زيد الباب وقف شي تلت دقايق مصدوم
لكن انا فتت لجوا وسكرت الباب وصرت مثل وطبق حركات البنات وقعدت ابكي
زيد ( خلص اهدي روقي لا تبكي )
زينب ( انت هلا بتحتقرني صح )
زيد ( هلا مو هيك بس ما توقعت تكوني انتي )
زينب ( لولا ما حبيتك ما كنت غامرت بكل شي لحتى اوصلك )
زيد ( بتعرفي شو انا من اول ما جيت لعندكم كان بدي اياكي انتي بس امي الله يسامحها. يا ريتك صرتي مرتي
لا تخافي انا معك ورح ابقى معك )
زينب ( واختي )
زيد ( رح طلقها )
زينب ( يا حرااام انا السبب صح )
زيد ( لا انتي ما خصك القلب وما يريد )
ابتسمت ابتسامة صفرا خبيثة حسيت حالي انتصرت على ضعفي ورح اهزم رباب كمان بس ما كنت بعرف اني بكل لحظة من هالانتصار عم ادفع الثمن غالي

#يتبع

#سلسلة_مذكرات_امرأة_بقلم_حنين_طه
#عذاب الضمير
الجزء التاني

اللحظات الي عشتها مع زيد كانت حلوة بس مو لاني حاسة اتجاهه بحب كانت حلوة لاني حاسة اني عم احرق قلب اختي متل ما حرقت قلبي كنت عم حس قديه انا قوية وقديه انا حلوة لحتى زوج اختي فضلني عليها
ابتدت حياة اختي تخرب اكتر واكتر وانا استمتع باللعبة اكتر واكتر
زيد ( لك يسعدلي هالصوت وينك اليوم من الصبح عم دقلك )
زينب ( ايه ما حسنت حاكيك مو مرتك من الصبح عنا )
زيد ( ايه مرتاح منها )
زينب ( لك لا حرام عليك بظل حبيبة قلبك )
زيد ( ما في حبيبة لقلبي غيرك
هلا قليلي متى بدي شوفك عم اشتقلك انا المرة الماضية ما شبعت منك ابدا)
زينب ( ايه ما عم اقدر اطلع من البيت وقت ما بدي انت بتعرف امي واختي عم يدققو علي )
زيد (دبريها نار الشوق بلشت تاكلني )
زينب ( طيب طيب رح دبرها هلا رح روح امي عم تنادي باي )
بالحقيقة امي ما كانت عم تنادي بس كنت بدي اصرفو انا كنت بقرف منه ما بدي اياه وما بدي ابقى معه انا بس بدي خرب على اختي لا اكتر ولا اقل
صرت مل منه ومن كلامه يمكن لما ضمنت انه صار بايدي ما عاد بدي اياه وكنت كتير حاول اتهرب منه ومن مكالماته من بين كل عشر مكالمات رد مرة حتى هو حس علي اني متغيرة وما عادت متل الاول بس كل مرة كنت طلع حجة شكل وفهمه اني لسا بحبه وبدي اياه بس ظروفي ما عم تسمحلي حاكيه باستمرار

زينب ( لك ايه ايه شو بك رح يتفجر الموبايل على قد ما دقيت شو في )
زيد ( لا تعملي حالك مو فاهمة زينب انتي فاهمة وعارفة ليش انا متت وانا عم دق عليكي )
زينب ( قلتلك يا زيد ما عم يصحلي انه اطلع وشوفك والله )
زيد ( رح موت انا ما بعرف دبريها احكي لامك انه طالعة عند رفيقتك نادين عم بتدوري عشغل طالعة عالمريخ اي مكان مو مهم المهم شوفك المهم شم ريحتك )
بعدت التلفون عن داني وانا قرفانة اسمع صوته
زيد ( الو زينب سامعتيني )
زينب( ايه سامعتك طيب خلص رح دبرها )
زيد( انا ما عاد اصبر اساسا انا ورباب تذبحنا وضربتها وقلعتها من البيت )
زينب ( شوووو لك ليش هيك عملت )
زيد ( شو ليش بدي فقعها بدي اياها تطلب الطلاق حتى اقدر اتزوج انا وانتي )
زينب ( اه ايه طيب طيب هلا رح روح ليكها رباب وصلت )
زيد ( طيب روحي وبكرة بدي شوفك فهمتي )

سكرت معه الخط وقلبي مقبوض طلعت لبرا كانت اختي قاعدة عم تبكي ووجها معلم ومطبع كانت عم تشكي لامي شو صار معها ومو قدرانة تلقط نفسها
اول ما شافتني ركضت علي وضمتني وصارت تبكي
لاول مرة ما بحس بفرح وانا شايفة رباب عم تبكي لاول مرة بحس بحزن رهيب تمالكتي وقت شفت دموعها وقت شفتها كيف عم بتضمني بقوة لدرجة انه اضافيرها اانغزت بلحمي
رباب( تعباااانة انا انا يا زينب تعبانة كنت مفكرة حالي رح اتزوج وانبسط وشوف حالي عالجميع كسرني زيد عم يحاول يخليني اكره وجودي معه يمكن ربنا عم يعاقبني لانه دايما كنت عايرك اني انخطبت وتزوجت وانتي لا بس والله انا عم ادفع التمن غالي والله انا عم موت كل يوم بسمع صوته عم يحكي مع عشيقته ويتغزل فيها وبسمارها كل ليلة عم طق وانا سامعته عم يحكي ابيات شعر بالغمازة الي عخدها انا ما عاد قادة اتحمل ما عاد قادرة
سامحيني يا زينب سامحيني )

اجتني رغبة كبيرة بهديك اللحظة انزل على رجلين رباب بوسهم واترجاها هي الي تسامحني كان نفسي قلها انه انا الي خربت حياتها وقلها انتي الي سامحيني اترجاها وقلها انتي الي اغفريلي خطأي انا الي اذيتك وبكيتك ليالي انا هي الي عم تسمعي زوجك بيضحك معها بس انا اجبن من اني كون صريحة وواضحة انا اضعف من اني كون انسانة بتطلب السماح
نامت ليلتها اختي عنا وتاني يوم لبست شي عادي وطلبت من امي اطلع من البيت شوف وظيفة ورحت لعند زيد كنت رايحة لعنده وناوية انهي هالعلاقة ما بيني وبينه بدي حط حد لهلمسخرة الي عملتها
مع جمال ريحة العطر الي حاططها كنت كرهانو
فتلت نظري بالبيت بكل مكان عم شم وشوف وجه رباب
كنت واقفة ومعطيتو ظهري لما حسيت فيه قريب من رقبتي بعدت بسرعة
زيد ( لك مالك شو صرلك )
زينب ( ما في شي بس متل ما قلتلك انا ما معي وقت كتير وخايفة حدا يشوفني او يعرف اني هون )
زيد ( لا تخافي هون امان كتير )
كان عم يحاول يتقربلي مرة تانية لما سمعنا صوت الباب عم يدق )

زينب ( انت مواعد حدا مين هاد الي عالباب )
زيد ( ما بعرف ما بعرف مو مواعد حد )
قرب زيد ناح الباب وشاف من العين ساحرة اختي رباب
رباب( افتح يا زيد بعرف انك جوا لانه مفتاحي ما عم يزبط افتح الباب فيه افتحلي جيت اخود اغراضي وروح وتاركتلك كل شي ما عاد بدي منك شي )

رجع زيد لعندي
زينب ( شو بدي اعمل هلا والله لانفضح والله اختي لتفرمني اذا هلا بتشوفني هون )
زيد ( اسمعي لا تظلي تبكي وتوتريني خلص ما رح افتحلها الباب )
زينب ( مفكر رباب رح تمرقها هيك طالما عرفت انك بالبيت رح تظل قاعدتلك من هلا لبكرة يا امي على هالمصيبة الي وقعت فوق راسي
يا امي على هالورطة )
زيد ( حاجتك بقا حاجتك )

رحت تخبيت بالسقيفة تبع البيت وبعد هيك راح زيد فتح الباب لرباب
دخلت اختي وعم بتزيح بنظرها يمين وشمال كانه كانت متاكدة انه في حدا كان عند زيد بس مو قادرة تلقط شي اخدت اغراضها ودورت بالبيت مزبوط
وتخانقت مع زيد شوي وطلعت
الخوف الي حسيته بهداك الوقت كان كفيل يقتلني ويخليني موت
كان كفيل لاحلى عنوان بالصحف ( فتاة خائنة تموت من الرعبة )
نزلت من السقيفة وانا عم القط اخر انفاسي)
زينب( ولي عشوي رحت فيها
زيد انا ما بقى فيني عيش هيك )
زيد ( قلتلك رح طلقها لرباب بس اصبري علي )
زينب ( انا ما بدي منك شي وما بدي تطلقها لرباب بدي تتركني بحالي يا اخي ارجع ابدا من اول وجديد بعيد عني ببوس ايدك )
زيد ( ما فهمت شو آمرتي وانا شو وحبي شو وتعلقي فيكي شو
رح اعتبرك خايفة من الموقف الي صار واسكت واعتبر حالي ما سمعت شي فهمتي )
هزبت براسي ( ايه ايه انا هلا مو قادرة فكر بشي بس بدي روح الله يخليك )
نطرت عنده كمان ساعة وبعد هيك روحت عالبيت ودخلت ما حكيت حدا ما كان الي نفس احكي ولا عندي القدرة اتنفس
حتى انه امي واختي لاحظو انه وشي مخطوف وحاولو يفهمو مني شو في وشو عم يصير بس انا كنت ارجف بقوة وهلوس وما جاوبتهم بشي
بقيت يومين ملقحة بالفراش لا بقدر احكي ولا اكل وحرارتي بحدود الاربعين وطول الوقت قافلة تلفوني لحتى ما يرن علي زيد ولا اسمع صوتو
ما وعيت عحالي الا وانا سامعة صوت زيد برا عم يحكي مع امي وكان جاي ليرجع رباب كنت بعرف انه هو موجاي كراميل اختي جاي لحتى تبقى الفرصة متاحة قدامه متل اول ووقت ما يحب يشوفني ويحكيني وكنت سامعة صوت امي من برا عم تحكيله اني مريضة وملازمة الفراش
وهو طلب يشوفني وياخدني عشي مشفى ليعالجني
وطبعا ضحك على اختي بكلمتين سلب عقلها فيهم

رباب ( يلا اختي قومي لحتى لبسك بدنا ناخدك عالمشفى )
زينب( ما بدي روح مكان )
رباب( لك اختي ليش شوفي حالتك كيف وشك اصفر وحرارتك عالية وليكو صهرك برا بدنا ناخدك عالمشفى يفحصوكي ويعالجوكي )
زينب( قلتلك ما بدي روح ما بدي روح حلي عني بقا
صرت اضرب راسي بايدي وقلها عم قلك ما بدي روح )
رباب ( طيب خلص متل ما بدك لا تزعلي )
قعدت جنبي ورميت حالي بحضنها بكيت وبكيت لحتى خلصو دموع عيوني وبعدها طلعت اختي خبرت زيد اني رفضت روح عالمشفى حاول هو يعترض واني لازم روح غصب عني بس رباب فهمته انه حالتي ما بتسمح يجبروني عشي ما بدي اياه
رجعت رباب مع زيد وانا ما نمت وانا ئن واصرخ من وجع قلبي ق وروحي وما صدقت متى طلع الضو غيرت تيابي ورحت عالمشفى لانه ما بقا قادر اتحمل الوجع
هنيك كان في ممرض اسمه حسام طول الوقت ما شال عيونه عني ويحاول بساعدني بكل شي

حسام ( كيف حاسة حالك هلا )
زينب ( منيحة الحمد لله رح التزم بكل الدوا الي كتبلي اياه الدكتور )
حسام ( ايه ضروري طبعا وبالنسبة للسعلة الي عندك ضروري تعملي تبخيرة وتاخدي دواها باستمرار )
زينب( اكيد شكرا الك )
حسام ( انسة زينب بدايقك شي اني اخد رقمك لحتى اطمن عليك )
ابتسمتله بعفوية (لك طبعا ما بتدايق )
اعطيت رقمي لحسام ورحعت عالبيت ما بعرف شو الشي الي دفعني اعطي رقمي لحسام بس كان شخص دافي مشاعره مريحة بحكي بثقة حبيت فكرتي الاولى الي اخدتها عنه وحبيت كمل معرفتي اله
المسا دقلي رقم غريب وكنت بعرف انه حسام كان عم يسألني اسئلة عادية عن صحتي واذا تحسنت او لا
ارتحت بمكالمتي معه وبهديك الليلة نمت وانا فرحاانة وحاسة براحة ما حسيتها من زمان كتير
وتلفونات زيد ما كنت رد ولا اي وحدة منها قلت لحالي اخرته بمل وبزهق خاصة اني كنت عم اسمع من اختي عن تطور علاقتهم وتحسنها اكتر من اول بس ما كنت بعرف هي عم تتحسن لانه زيد قرر يتغير وينساني ولا لحتى يرجع يتقرب مني مرة تانية

ام زينب( يا زينب تعي لهون موبايلك عم يرن )
تركت الجلي من ايدي مسحت ايدي بتيابي وركضت لرد على حسام
حسام ( يسعدلي هالصوت يا رب )
زينب ( لك وينك امبارح طول الوقت ناطرتك ما كنت ترن )
حسام ( كان عندي مناوبة ما حسنت احكيكي
هلا انا داقق عليكي لقلك عن مفاجأة )
زينب( ممممم شو هي )
حسام ( احزري )
زينب( بالله شو عجزت )
حسام ( المسا الوالدة جاية لعندكم حتى تطلب ايدك رسمي )
زينب ( لك كيف هيك بسرعة وفجأة ما بصير ما لحقت جهز حالي)
حسام ( ايه لانه احنا بزمن السرعة عرفتي شلون بعدين انا ما بحب اللف والدوران وطق الحنك بلا داعي جيتك من قصيرها وقلتلك رايدك عسنة الله ورسوله )
زينب( طيب طيب روح هلا بدي الحق جهز حالي وروح خبر امي عنك باي باي)
سكرت مع حسام وانا نط وارقص وغني ورحت ركضت على امي وصرت بوس فيها

ام زينب ( لك اصبري عمهلك علي رح تطيري وجهي لشو كل هالسعادة )
زينب( جايني عريس رح تخلصي مني ابسط يا عم )
حكيت لامي عن حسام وشو مواصفاته وقمت غير تيابي ووقتها سمعت امي عم تحكي مع اختي رباب لتخبرها تكون موجودة المسوية

الساعة6 المسا اجت اختي وزوجها وكانت معالم وجهه ما عم تتفسربس انا كنت بعرف ماله وقادرة فسر ملامحه منيح فكنت اتجنب عيني تجي بعينه
بعد بنص ساعة اجا حسام واهله جماعة راقيين برغم بساطتهم واثقين من نفسهم برغم طيبة قلبهم
طلبني والده لحسام بنفس القعدة وامي اعطتهم
تنحنح زيد وقال لامي انه لازم يسال عن الشب
ام زينب ( ابني المكتوب مبين من عنوانه خلص اتكلنا على الله صحيح انت ولي امرها بعدم وجود ابوها لكن صدقيني مبينين هالجماعة بينحطو عالجرح بطيب

ابو حسام ( اذا اتكلنا على الله على بركة الله )

قمت للمطبخ حتى حضر العصير لحقني زيد عاساس بده يشرب مي رد باب المطبخ وحاوطني من ورا
لفيت وجهي خبطت فيه تخربطت ما عاد عرفت احكي
زينب ( ااانننت شوو عم تعمل هون )
زيد ( اوعي تفكري انه هيك بتلوي ذراعي والله بقلب الدنيا عراسك وراس الجميع انتي الي والي وبس انا خربت بيتي اكتر من مرة بسببك انا ما بقدر عيش ببلاكي افهمي )
زينب ( طيب روح هلا بنحكي بعدين بلا ما تشوفك رباب )
زيد ( رح روح ورح نحكي تمام يا زينب )
طلع من عندي وانا والله ما عاد عرفت شو عم خبص وشو اعمل بالعصير

كل شي بخص علاقتي مع حسام كان ماشي متل ما بدي وزيادة متل ما بحلم بالزبط ومتل ما كنت خطط لحياتي دايما بس زيد وملاحقاته ما تركتني اتهنى بعلاقتي مع حسام
بيرن بالثانية اكتر من خمس ست مرات حاولت معه بالحسنى انه فهمه اني خلص بدي ابدا حياة جديدة وعالم جديد بعيد عنه فهمته الغلط الي عملناه انا وهو بس تهديداته كانت بتزيد كل يوم كنت مفكرته عم يحكي حكي بالهوا ما توقعته ينفذ تهديداته
————————

الساعة 7 المسا الكل مجموعين عند بيت اهلي رباب وزيد وحسام وانا وامي وعم نحكي ونضحك لما وقف زيد بين الكل
زيد ( يا جماعة طبعا انتو بتعرفو اني عزمت الجميع عالعشا اليوم ورح يوصل بعد شوي لاني وصيت عليه من افخم وارقى المطاعم بس ما سالتوني شو مناسبة هالعشا

حسام ( شكله المدام حامل )
زيد ( لا والله عديل مو حامل المناسبة اقوى من هيك بدي عرفكم على حبيبتي السرية مين بتكون )

نشف الدم بعروقي وما عاد حسيت باطراف ايدي قشعريرة ما بعرف من وين اجت بلحظات كانت ماشية بجسمي متل تيار كهربا وانا بحاكي حالي ( معقول يعملها لا مو معقول يخرب بيته وبيتي هيك
)

قرب زيد لعند حسام وسحب موبايله وفرجاه لحسام
زيد ( بالله تشوفلي حبيبتي مين بتشبه اكيد حدا بتعرفه )
مسك حسام التلفون وانا انخطف لوني
كانت الصورة لبنوتة صغيرة بتكون بتقرب لزيد
ضحك حسام ورجع التلفون لزيد ( الله يخليلكم اياها يا رب

قمت من جنب حسام وقلتله انه بدي روح عالتواليت
دخلت عالتواليت وفتحت المي وصرت غسل وجههي واطلع على حالي بالمراية ( يا ربي متى بدي اخلص من هالكابوس )
وقتها وصلني مسج عتلفوني من زيد ( شفتي كيف بلحظة بقدر اخرب حياتك لا تنسي انه عندي الك بدل الصورة مليون هالمرة فرجيته لحسام صورة بنت صغيرة المرة الجاي بخليه يشوفك
يا اما بتمشي متل ما بدي او بتصرف )

#سلسلة_مذكرات_امرأة_بقلم_حنين_طه

#عذاب_الضمير

الجزء التالت والاخير

كان في قدامي طريقين
واحد بياخدني على جهنم والتاني بيلف فيني بس كمان بالنهاية بياخدني عجهنم
بعد ما روح حسام من عندي دقيت على زيد
زينب ( شو عم بتحاول تعمل يا زيد )
زيد( شوفة عينك انا بدونك ما فيني عيش )
زينب( يا زيد منشان الله انا بعترف اني غلطت والله غلطت لما حكيت معك وندمت خلص كمل طريقك مع مرتك حبيبتك
واتركيني كمل طريقي انا كمان مع خطيبي لا تخلي نار الغيرة تعميك )
زيد( والله هالنار انتي الي شعلتيها يا اما بتحرقنا سوا يا بلا )
زينب(طيب والمعنى هلا شو بدك )
زيد( بدي شوفك بدي حسك معي بدي نكون سوا وننسى العالم ننسى الدنيا )
زينب( بتوعدني اذا جيت اشوفك بكرة تتركني بحالي بتوعدني ننهي هالقصة )
زيد ( مممممم بشوف خلص خلص جهزي حالك بكرة بشوفك قدام الكفتيريا الي باخر الشارع وبعد ها بنقرر وين بنروح )
زبنب ( طيب ماشي تصبح على خير )
كنت عم عد الساعات والدقايق والثواني لحتى يجي تاني نهار وشوف زيد واخلص تخيلت حريتي وصرت ارسم مواقف واحداث وسعادة رح عيش فيها بعد ما اخلص من زيد

زينب( امي انا طالعة بدك شي )
ام زينب( لوين امي رايحة )
زينب ( بدي روح عند رفقيتي ومر عالسوق اشتري كم غرض يلا بخاطرك )
طلعت من البيت ورحت وقفت قدام الكفتيريا انطر زيد
اجا بعد شوي ركبت معه بالسيارة وطول الطريق ساكتة
زيد ( هلا ركبتي معي حتى تظلي ساكتة )
زينب( ما الي خلق احكي قلتلك انا جاية هون لحط حد لكل شي عم يصير )
زيد ( ممممممم رح نروح عبيت رفيقي نقعد )
زينب( لااا خلينا نقعد باي مكان عام )
زيد ( له لك زينب خايفة مني )
زينب( هلا مو هيك ….. ثواني شوي موبايلي عم يدق
الو ايه حسام ،،، كيفك انت انا طالعة والله مو بالبيت ليكني بالسوق عم اشتري تياب ،،،، لا لا ما بطول خلص ولا يهمك )
زيد ( شوليش ما قلتيله انك معي )
رحنا انا وزيد قعدنا بكفتيريا وصار يحكيلي عن مشاعره وانه عم يشوف وجهي برباب وانه متحملها كرمالي حتى انه خبراهله بوجود علاقة بحياته )
زينب ( يا زيد افهمني انا ما فيني ما فيني )
زيد( انتي كنتي عم تضحكي علي بدك تخربي حياة اختك وبس لا بتحبيني ولا ما يحزنون وانا متل ما خربتي حياتي رح خرب حياتك ودمرك كمان )
زينب( شوي لرد عموبايلي
الو حسام ،،، لك شو في مالك شو وقت دقيت علي شافني اخوك بالسيارة مع واحد لا هاد
طيب اهدى لفهمك ،،،، مزبوط انا كنت مع زوج اختي رباب وليكنا قاعدين مع بعض لانه في مشكلة صايرة مع اختي رباب وعم حاول ساعده بحلها
شلون انا باي كفتيريا ليش بدك تيجي
بس يا حسام طيب اكتب العنوان عندك )

………
زيد( شو بده يشرف )
زينب ( ايه بده يجي يشوف ليش كذبت عليه وليش انا موجودة معك
يا ربي شو هالورطة هاي الي انا علقت فيها
اسمع اخترع اي شي احكيله اي كلام انت ما بتعرف حسام والله بجن علي هلأ)

بعد شوي وصل حسام والشرار بقدح من عيونه قدح
كنت متوقعة انه زيد يخترع اي شي لحسام يقله مثلا انه زعلان لانه رباب لهلا ما حملت
او زعلان لانه هو ورباب مو متافهمين على اكلة او لبسة معينة
حسام ( مرحبا اخي زيد )
زيد ( اهلين عديل )
حسام ( ما تواخذني انه جيت لهون ورح اقتحم خصوصيات حياتك وخصوصية هالقعدة بس انا شخص ما بقبل انه خطيبتي وزوجتي بالمستقبل تقعد مع حدا غريب ويشوفها الي رايح والي جاي )
زيد ( ايه حقك طبعا انا يا سيدي كنت جاي اقعد مع زينب لحتى حل مشكلة بيني وبين رباب )
اخدت نفس وبلشت ارتاح واهدى
حسام ( اها طيب كان فيكم تخبروني يعني)
زيد( جايبك بالحكي ما سألتني شو هي المشكلة الي بيني وبين رباب )
حسام( …..)
زيد ( عم اشكي لزينب اني مو قادر حبها لرباب مو قادر كون معها بتعرف ليش لانه بحب وحدة تانية لانه قلبي مع البنت الي انت خطفتها مني انا بحبها لزينب )
حسام( شو )
زينب( لا تصدقه هاد عم يكذب عليك )
حسام ( انتي اخرسي )
زيد ( بعد ما تزوجت انا ورباب دخلت خطيبتك لحياتي قلبت كياني فوقاني تحتاني علقتني فيها صرت ما عم شوف غيرها بحياتي هي الي علقتني فيها وعندي اثبات على كل كل شي حكيته )
فجأة تحول المكان الهادي لبركان قام حسام من مكانه وبلش يضرب بزيد والتمو العالم كلهم عليهم
وصاحب الكفتيريا طلبلهم الشرطة اخدتهم تنيناتهم )
رجعت عالبيت متل الي عاملة عملة خجلانة من حالي بسرعة فتت على غرفتي وصرت اخد من كل الادوية الموجودة قدامي ما تركت شي ما اخدت منه
شربت بما يقارب 100 حبة دوا
كنت بدي اموت او بالاحرى بدي اهرب ما بدي واجه حسام وقله مزبوط كلام زيد انا حقيرة انا اقتحمت حياته ودخلت عليها ما كنت حابة بررله ليش هيك عملت لانه شو ما كانت اسبابي مو من حقي اعمل هيك
ما بدي واجه امي وقلها انه كسرت ظهرك والسبب انتي اااايه انتي ما عرفتي تربينا انا واختي نحب بعض ما عرفتي تخلي قلوبنا على بعض
والاهم من هاد كله ما بدي واااجه رباب

شوي بلشو عيوني يغبشو وما عاد شفت قدامي واغمى علي

…………………..

بسرعة بسرعة نادو الدكتور المناوب الصبية ماخدة جرعة كبيرة من الدوا )

الدكتور ( لولا لطف ربنا بنتك بعداد الموتى
اسمحولي هاي محاوووولة انتحار وانا ما بقدر اسكت عنها واتغاطى لازم خبر الشرطة )
ام زينب ( الله يخليك يا دكتور مو ناقصنا فضايح بلاش الشرطة والله رح نصير علكة بتم العالم )
الدكتور يا خالتي والله ما بقدر خبي الموضوع واكتمه كأنه ما صار شي مسؤولية كبيرة علي هي )
ام زينب( بوعدك يا دكتور ما حدا يعرف وما يصير شي )
رق قلب الدكتور على كلام ام زينب ودموعها الي عم يكتو متل حبات المطر من ناح واجبه كانسان ما يخبر الشرطة ومن ناح واجبه كدكتور يخبر عن محاولة الانتحار لكن بعد ترجي ام زينب قرر يترك زينب وما يبلغ عن فعلتها

صحيت وانا حاسة راسي تقيل كتير مو قادرة ارفعه فتلت بنظري
كانت اختي واقفة عالشباك ومعطيتني ظهرها
لفت شوي شوي علي
رباب ( الحمد لله عسلامتك )
زينب ( رباااب انا )
رباب( ما تحكي شي كل شي صار واضح قدامي
بتعرفي شو انا مو زعلانة من زيد لانه وسخ بظل غريب عني بس انا زعلانة منك طلعتي اوسخ بكتير منه
بتعرفي ليش لانه في بيني وبينك علاقة اقوى من اي علاقة بالكون بينا علاقة دم
بعترف اني كنت انسانة متسلطة مغرورة انانية بس بعمري ما كنت وسخة
عالعموم هاد الظرف فيه دبلتك تركلك اياها حسام وبقلك ( ديري بالك عحالك بس ما بقدر يكمل مع وحدة خاينة الي قدرت تخون اختها وربها ودينها عادي جدا بعد هيك تخون زوجها انا كنت كتير حاقدة عليكي بس لما شفتك ندمتي وقدرتي تقتلي حالك خفت ناري شوي بس ما بقدر سامحك مستحيل سامحك
صحيح قبل ما اطلع لا بقا تخافي من زيد يعملك شي لانه الصور الي معه كلها اخدناها منه وما بقى بيملك شي ياذيكي
وهلا انا راجعة على بيتي بيت زوجي بيت زيد صحيح هو حقير بس العيشة معه ارحم من اني اطلق وارجع عيش معك بنفس البيت
بدي ارجع لزوجي حتى ظل طول عمري عايرك اني تزوجت وبقيت مع زوجي وانتي خطيبك رماكي وتركك
انتي بتستاهلي الواحد يجرحك بالكلام سلام اختي )

كل الكلام الي قالته رباب مزبوط قالتلي اياه وما قدرت رد عليها بكلمة ما قدرت اعترض بصراحة معها حق تغز سكاكين كلامها جوا قلبي

…………………….

هوا كتير وبرد عم يطير الشجر
دخلت على غرفتي شعلت الصوبيا وقعدت مقابيلها اتذكر كيف اجتني الجرأة وحاولت انتحر يمكن الانسان لما بيوصل لاعلى مراتب ومراحل من اليأس بتصير روحه سهلة وما عاد بتعز عليه
تلخبطت الذكريات براسي ( خلص ما بدي اتذكر ما بدي
يا رب بدي انسى بدي انسى )
كل اوجاع الدنيا ممكن تكابري عليها وتقاوميها الا وجعين وجع الضمير والعقل ووجع القلب
وانا كيف بدي ارتاح وانا عم املك الوجعين سوا بنفس وذات الوقت

ام زينب ( امي زينب شو في ليش عم تصرخي )
زينب( ما في شي امي عم احكي قصتي لحنين حتى تكتبها لكل البنات بلكي قصتي انا بتنبه غيري وبلكي بقدر احمي غيري كتير بنات يوقعو بفخ حقدهم وديقة عينهم )
ام زينب ( لا حول ولا قوة الا بالله ناقصنا فضايح لك احنا امي )
زينب( لا تخافي امي ما حدا رح يعرف مين صاحبة القصة المهم الرسالة الي بالقصة يعرفها الكل
دخلك امي في حبة دوا او شي ممكن الواحد يعمله يمحي الماضي تبعه فيها
امحي كل شي مريت فيه زمان انسى بدي انسى )
ام زينب ( فيه قومي توضي وصلي لربك ركعتين وادعيله هو الي خلقك وهو الي بقدر يخليكي تنسي )
زينب ( ونعم بالله )

#انتهت