حلاوة الرز الطرابلسية أخت حلاوة الجبن طيبة كتير وبتشهي من اروع الحلويات الشهية ب

حلاوة الرز الطرابلسية أخت حلاوة الجبن طيبة كتير وبتشهي من اروع الحلويات الشهية بتمنى تجربوها كتير طيبة 
معكم صديقة زاكي الشيف الموهوبة  Amal Mahmoud

حلاوة الرز
طحنت رز على مطحنة البهارات حتى صار ناعم وممكن تشتري رز مطحون بس مهم يكون نوعية منيحة. وممكن تعمليه برز بدون طحن بتنقعيه بمي سخن عدة ساعات بعدين بتصفيه من الماء وبتسلقيه وبتكفي الوصفة.
في طنجرة حطيت كوب رز مطحون وخمس اكواب مي وحركتن لذابوا حطيتن على الغاز حتى جمدوا ونضجوا حطيت فوقن كوب سكر وحركتن وحطيت نص معلقة مسكة مدقوقة ومعلقة ماء ورد ومعلقة ماء زهر وحركتن.
خففت الغاز وحطيت جبنة موزاريلا مبروشة وحركتن حتى ذابت الجبنة فوراً شلتها عن الغاز وسكبتها في كاسات ليبردوا.

القشطة: في طنجرة حطيت اربع اكواب حليب حتى قربوا يغلوا وصار فيه فقاقيع عجنب الطنجرة يعني قبل ما يغلوا بشوي وحطيت اربع ملاعق كبيرة عصير ليمون حامض او خل ابيض وحركتن وطفيت الغاز حتى فصل الحليب عن المي وتخثروا صفيتن بكيس قماش ناعم.
خلطتن مع علبة جبنة ماسكربوني او علبة قشطة جاهزة وحركتن وزينت فيهن حلاوة الرز بس بردوا.