قصة الليلة

66 11٬468

قصة الليلة
#
المرأة_نصف_المجتمع_بقلم_حنين_طه

 

18425318_1520841367927102_3615140228316160274_n
الجزء الاول

اسيا( لازم تعرفو يا حضرات انه احنا النا حق بالمساواة النا حق نشارك الرجال بكل شي احنا نصف المجتمع )
هي كانت محاضرة متل كل المحاضرات الي بلقيها عرفقاتي بالمشفى ما كانت بعرف وقتها انه هالخطاب الي عملته رح يأثر كتير بالممرضة هالة وتصير مشكلة بسببه وتجي لعندي حردانة )

—————————

المرأة متل الرجل المرأة نصف المجتمع
صرعتو راسنا بهالحكي )
جاد( ايه ايه ما الك معصب من الصبح تعا اقعد وروق شو مالك )
وسيم( الست هالة تركت البيت )
جاد( معقول لك هالة اكتر انسانة كنت شوفها بتخاف عبيتها وقادرة تحافظ عليه )
وسيم( كانت قبل ما تتعرف عالدكتورة بطيخ )
جاد( الدكتورة بطيخ مين هي)
وسيم( لك ايه هي الدكتورة اسيا تعرفت عليها هالة من فترة بالمشفى الي بتداوم فيه مشفى الايمان
هي طبيبة نفسية لكن شو مفكرة حالها شغلة كبيرة
نازلة تنظير بهالبنات على انتي نصف المجتمع وانتي اساس الرجل ولازم نطالب بالمساواة
صحيت الست هالة اليوم بدها اياني اكتب البيت تبعنا باسمها تخانقنا شوي وحملت حالها وطلعت من البيت )
جاد( هههههههههههههه)
وسيم( ايه اضحك لقلك هم ببكي وهم بضحك )
جاد( طيب هلا جد طالما انت بتحبها لمرتك ومتفقين عكل شي ليش ما تكتبلها البيت باسمها )
وسيم( ما بعرف ما بعرف )

المسا متل العادة كنت لامة هالممرضات حولي وعم اخطب عليهم عن مساوىء الرجل وانه حياة الانثى لوحدها احسن الها
لمحت شب من بعيد واقف وساند ظهره عالحيط كان جاي مع ست كبيرة طول الوقت ما شال عيونه عنا حسيته متابع معنا بكل الحديث من لما ابتدى صحيح كنت احكي بسرعة واضحك بس نظري كان مركز عليه لاول مرة بنتبه لوجود زلمة
اسيا( قلتلكم ما حدا فيكم يثق بزلمة كلهم اضرب من بعض
فجأة الطفل الصغير بصير زلمة وبصير بده يتمرد على كل جنس حوا وبينسى انه الي ربته ست وانا رح يتزوجها ست بصير هو الكل بالكل
عندكم مثلا هالة طول عمرها تشتغل وتلم مصاري وتعطي زوجها ولما طالبت بجزء من حقها رفض )
رفعت نظري لشوف الشب كان عم يمشي اتجاهنا شوي شوي
جاد( مرحبا هالة كيفك )
هالة( جاد شو عم تعمل هون )
جاد( جيت مع الوالدة ارتفع ضغطها شوي )
هالة( معافية والله ما عقلبها شر )
جاد( بقدر ادحش حالي شوي بحديثكم )
نظرات جاد اتجاهي ونظراتي لاله كانت واضحة كتير
حديث العيون بتسمعه قبل ما الشفايف تنطق
( دكتورة اسيا اسمحيلي خالفك الرأي الرجال المحترم هو الي بيحترم انثاه سواء كانت حبيبته او امه او ازوجته )
اسيا( قبل هاد كله انت من وين عرفت اسمي )
جاد( اااااه)

_____________________________________

( بسرعة بسرعة فوتو المريض لجوا
واقع من على راس الدرج )
كل الموجودين بالمشفى صارت انظارهم على المريض الموجود على التخت
ركضت لعنده عرفته اول ما فات ( هاد جمال مريضي شو صرله )
قربت لعند جمال كان. شبه ميت
اسيا( شد حيلك يا جمال شد حيلك انت قوي وطول عمرك قوي )
بس جمال ما كان عم بتجاوب ابدا انتبهت على وجود اثار حبل على رقبة جمال حطيت ايدي على رقبته
لما صرخ الدكتور عماد ( الكل يبعد عن المريض
البقاء لله المريض توفى )
ما بعرف الاحساس الي اجاني وقتها كيف اوصفه صرت نط وخابط ( ببوس ايديكم تعملو شي لا تتركوه يموت حرام عليكم لك انقذوه اعملوله شي )
الدكتور عماد ( رجاءا دكتور اسيا تركينا نعرف شغلنا احنا مقدرين انك دكتورة وبتزعلي على مرضاكي بس ما بايدنا ايشي المريض واقع واهله ما لحقوه )
اسيا( بس بس )

نزلت على ركبي الصدمة الي شفتها ما بقدر اتحملها ( مستحيل مستحيل جمال يموت هيك )
كان في حدا من وراي حط ايدي على كتفي ( دكتورة اسيا قومي معي )
قمت معه ولسا مو مستوعبة الصدمة كيف هيك الكل شافه عم يموت وما حدا قدر يعملله شي قعدنا عالكراسي
كل دمعة كانت تنزل من عيوني كانت عم تحرق خدي عم تحرق قلبي معها
جاد( دكتورة اسيا انتي دكتورة كتير انسانية انا بتفهك
اسيا( جمال مريضي من شهرين بيجي بيتعالج عندي
قتلوه ايه قتلوه )
جاد( دكتورة اسيا شفتي بعينك انه الشب وصل ميت لهون يعني ما طلع بايد حدا اي شي)
اسيا( بصوت عالي( قلتلك كلمة قتلوه يعني قتلوه )
جاد( طيب خلص وطي صوتك متل ما بدك )

رجعت على مكتبي في الف سوال والف استفسار بينطرحو براسي ورجع جاد عالبيت مع امه
طول الليل ما غاب جنال عن بالي كنت عم اتخيل طيفه كل شوي قبل يومين كان اله موعد عندي حكينا كتير عنه وعن الكأبة الي صايرة معه بسبب تدهور احوال المادية
وقلي عن مرته كيف متغيرة معه وما عاد علاقتهم متل اول
معقول هي الي عاملة فيه هيك ما كنت قادرة احصل على اي نتيجة كل الي براسي اسئلة وبس ما في اجابات

في بيت جاد
كان سارح فكره بشي تاني
يا اخي صحيح شايفة حالها بس بيطلعلها حلوة كتير
يا ترى بتكون هديت يا ترى هي هلا منيحة
مو معقول قديه تأثرت بموت مريضها مع انها بتكره جنس ادم … كيف بدي اتوصل لالها واحكي معها
فتح الفيسبوك وصار يدور على اسم اسيا ما عم يطلع معه
اتذكر هالة مرت وسيم فات على صفحته الشخصية ودور عبروفايل هالة وصار ينبش برفقاتها حتى لقي بروفايل اسيا كانت مسيمته ( قاهرة الرجال)
ضحك ضحكة طويلة ( ها وهي لقيتك يا قاهرة الرجال
لنشوف كيف بدك تطلعي معي براس
عمل بروفايل وهمي وسماه ( قاهر النساء)
وبعتلها طلب صداقة بقي يومين ناطر توافق عالطلب بس اسيا ما كانت بتفتح الفيس من صدمتها على موت جمال
كانت حياتها شبه مقلوبة عم بتفكر يا ترا شو الي صار معك يا جمال كيف متت وعلامات الخنق الموجودة عرقبتك كلها اشياء بتدل انه جمال مات مقتول
بس ليش ومين عمل هيك وليش المشفى سكر عقضتيه هيك ما حدا بيعرف
بعد يومين ولما جاد قرب يفقد الامل وافقت اسيا عطلبه
اول ما وصله اشارة بموافقتها بعتلها مسج
جاد(مسا الخير )
اسيا( اسمك قاهر النساءحلو كتير )
جاد (ممكن لا بقى تعصبي)
اسيا( مين قلك اني معصبة )
جاد( هلا انتي ليش مسمية حالك قاهرة الرجال )
اسيا( لانه الرجال ما بدهم الا قهر كل هموم الدنيا بتيجي من وراكم )
جاد( اوف اوف يا لطيف هلا احنا هيك )
اسيا( تماما لازم يكون مساواة بينا وبينكم مو معقول ماخدين مجدكم بالدنيا واحنا ولا ايشي )
جاد( مستحيل بمجتمعنا يصير في مساواة بين الزلمة والانثى صدقيني هلا انا مو فاتح لنتناقش بموضوع المساواة فتحت لقلك
انك حلوة كتير )

قفلت المحادثة معه بسرعة
كتير سمعت هالكلمة من ناس بس ما عمري تأثرت فيها هالمرة حاسة فيها غير هالشخص الي بحاكيني بيشبه اسلوب جاد الشب الي شفته من يومين بالمشفى
ااافت اسيا شو صرلك من متى انتي بتفكري بشب
بس خلص احيانا قلوبنا ما بتكون بايدنا صرت كل شوي افتح الفيس لشوفه اذا بعتلي شي

محادثاتي مع قاهر النساء كانت شبه يومية
دائما كنت حاول وصله شو هي شخصيتي وهو يحاول يتغزل فيني بكل محادثة وبكل مرة حاول غير الحديث
يمكن لاني كنت شاهدة عكتير قصص حب
ما بدي نهايتي تكون متلهم او يمكن لانه انا الي عم بعطي النساء قوة ما بيزبط كون ضعيفة

اسيا( ها هي عمتي قاعدة هون )
عمتي( جايبلك عريس يا روح عمتك )
اسيا( يا عيني يا عيني طيب لخلي اختي صافي تعملي فنجان قهوة اعرف ركز و وصحصحلك عمتي
ترا هاي المواضيع بدها نفس قوي لاعرف احكي فيها )

وهي فنجان القهوة وصل هاتي عمتي لشوف احكي مين العريس
عمتي( شب حليوة ومهندس
اخته بتكون جارتي مسكينة توفى زوجها من فترة وقع عن درج البيت ومات)
توقف الزمن كله عند كلام عمتي
اسيا( عمتي شو اسمه زوجها )
عمتي( اسمه جمال يلا الله يرحمه بقولو كان قمرجي راح وريح )
انتفضت من مكاني مرة وحدة انتو مين سمحلكم تحكو عن جمال وتجيبو سيرته جمال من اشرف المرضى الي تعاملت معهم واذا حدا بعد اليوم بجيب سيرته انا رح حاسبه
ركضت جهة الباب بدي روح بدي اهرب
لفيت وجهي كانت امي كازة عسنانها وبتقول لعمتي الله يهديكي لو بعرف بدك تحكي عن جمال ما خليتك ما صدقت وهي تنسى

معقول انا انسى شخص مات قدامي بلا اي قوة وما قدرت ساعده

ركضت بسرعة ركبت سيارتي وسقت بسرعة جنونية لوصل عالعيادة
او ما صفيت سيارتي ونزلت كان في شبين زعران حاولو يتحركشو فيني
كنت مبلشة بهدلة فيهم لما سمعت من وراي صوت حدا عم يسب عليهم وعلق معهم
هاد جاد شو جابو ااااخ نهاري من اوله مبين غير شكل
تركت جاد ورحت عالعيادة وهو ترك الشباب وصار عم يمشي وراي
جاد( لك اسيا انطري شوي عيب هيك اركض وراكي متل الصغار لك دكتورة)
اسيا( شو بدك خير نعم ليش عم تلحقني من مطرح لمطرح )
جاد( اول شي بعتذر بس انا كنت جاي عالمشفى لسبب وبالصدفة شفتك
بعدين تاكدتي هلا من كلامي مستحيل بمجتمعنا الزلمة يكون متل الانثى )
اسيا( يعني انت قاهر النساء)
جاد( اه لك لا خليني اشرحلك )
ما بعرف ليش عصبت كتير بس عرفت انه هو نفسه قاهر النساء ولو اني من جواتي كنت مبسوطة
دخلت عالعيادة بدي اطرء الباب بوجهه بس خفت ارتعبت
كل شي بالعيادة مقلوب فوقاني تحتاني
وقفت بمكاني وجاد وراي
جاد( اسيا شو في شو عم يصير هون )
اسيا ( في حدا داخل عالعيادة لك ليش)
تفقدت بسرعة شو ناقص
الي ناقص كان ملف علاج جمال والي زايد ظرف فيه صور لالي معمول لالها فوتشوب وكلها خادشة للحياء
وقعت من طولي وحطيت ايدي على راسي شو هالمصيبة الي وقعت فيها
ضمني جاد لصدره ( اسيا لا تخافي انا معك )
اسيا( شو الي صاير يا جاد شو بعني هيك )
جاد( جمال في من وراه قصة كبيرة
وانتي هلا بخطر )

لاول مرة بحياتي بعرف شو هو شعور الخوف يمكن مزبوط كلام جاد المرأة عمرها ما بتساوي الرجل
خفت على سمعتي كطبيبة وعلى حالي كبنت

هداك النهار ما قدرت داوم او اعمل شي وجاداقترح علي ارجع عالبيت وبجيب حدا يضب العيادة كلها
طول اليوم كنت عم ارجف وجسمي متل النار طيب القصة كيف بدها تنتهي
المسا بعتلي جاد مسج
انا معك حين تكونين وحيدة
انا بقربك حتى وان كنتي بعيدة
انا هنا لكي تكوني سعيدة
شوية راحة نفسية تسللت لقلبي يعني الخوف الي كنت حاسة فيه بعده موجود بس خف شوي
معقول وجود رجال بجنبك بخليكي تحسي بالامان هيك
قررت احكي لجاد كل شي بعرفه يمكن اقدر لاقي حل وارتاح شوي
….

#المرأة_نصف_المجتمع_بقلم_حنين_طه
الجزء الثاني والاخير

كانت الايام بتمر علي ببطىء او يمكن انا كنت حسها بطيئة
وجود جاد جنبي كان يحسسني بكتير راحة وامان
بس لما يكون في جواتي خوف ورهبة من مستقبل انا بجهلو ممكن باي وقت واي ساعة يصيرلي شي ما بعرفه ما بتعود بتحس لا براحة ولا باطمئنان
حتى امي واخواتي انتبهو اني كتير متغيرة وما عدت متل اول اقعد معهم واضحك معهم
اسيا( هالة هاد انتي فوتي )
هالة( بقالي ساعة بحكي للسكرتيرة بدي شوفك ضروري وما عم تقبل )
اسيا( ايه انا قلتلها ما بدي شوف حدا )
هالة( اسيا شو مالك صايرلك شي كتير متغيرة عن اول شو في )
اسيا( ما في شي صدقيني بس تعبانة شوي هاتي قوليلي شو اخر اخبارك
هالة( ما بعرف وسيم صرله فترة بنق عراسي نرجع لبعض وانا محتارة كتير والله يا اسيا من بعد ما رفض يكتب البيت باسمي حاسة انه ما عاد اله امان )
اسيا( هالة حبيبتي بدي ابعد شوي عن طريقة النصائح الي كنت انصحك اياهم زمان
اذا انتي حاسة انك محتاجة لوسيم وحابة ترجعيله روحي ارجعيله هلا مو شرط لما رفض يكتبلك البيت باسمك انه شخص مو منيح بس الرجل الشرقي بيعتبرها اهانة بحقه يكتب بيته باسم زوجته بخاف من اهله من رفقاته من المجتمع )
اطلعت فيني هالة بطرف عينها كانت مستغربة كلامي
كانها كانت عم تقلي مو انتي اسيا الي بعرفك
حتى انا كنت مستغربة من حالي
بعد ما روحت من عندي هالة دقيت على جاد لاطمن على اخباره
اسيا( كيفك )
جاد( هلا ما كنت منيح بس لما سمعتك صوتك صرت من احسن ما يكون )
اسيا( هلا انت على طول هيك لسانك حلو )
جاد( لساني بيحلى لما بكون يحكي معك
اسيا مو حاسة انه صار الوقت )
اسيا( ما فهمت)
جاد( لا تغشمي حالك انتي فاهمة علي صار الوقت لحتى ابعت الوالدة عندكم عالبيت مشتاق كتير لتصيري حلالي
بدي غيرلك نظريتك عن كل رجال الكون )
اسيا( لسا بكير جاد على هيك خطوة )
جاد( …..)
اسيا( زعلت )
جاد( لك لا بس انا بدي قربلك وانتي عم تبعدي خلص متل ما بدك )
اسيا( ليك بوعدك اول ما روق شوي وتتحسن نفسيتي نحكي بالموضوع )
جاد( اسيا قبل ما تسكري بدي قلك شي لو غبتي العمر كله رح انطرك )

احساس الحب كان شي اول مرة بجربه اول مرة بعيشه جاد
كان بيحمل كل مواصفات فارس احلامي
هو الشخص الوحيد الي تنازلت كرماله عن مبدائي دايما كنت فكر انه الانثى لازم تساوي الرجل لازم تكون نصف المجتمع بس هو خلاني اتنازل عن كل شي ايه كل شي بس كون جنبه

طلعت من العيادة وتوجهت عالبيت كنت شايفة وراي سيارة سودة عم تلاحقني عالدعسة ما بعرف من هم هدول بس اول احساس اجاني انهم من طرف قضية جمال
حاولت اتماسك ومسكت موبايلي ورنيت على جاد
جاد( معقول لحقتي تشتاقيلي )
اسيا( جااا جاد انا بالطريق للبيت وفي سيارة عم تلاحقني ما عم بعرف شو اعمل )
جاد( اسيا خليكي معي عالخط اوعي توقفي السيارة واوعي تروحي اي طريق فرعية حاولي تظلي بشوارع فيها ناس كتير حتى ما بقدرو يعملولك شي واعطيني عنوانك هلا بجيكي)
اسيا( جاد انا خايفة كتير )
حاد( الف مرة قلتلك لا تخافي وانا معك )
اعطيت جاد العنوان وصرت لف بنفس الشارع الرئيسي حاولت ما ادخل ولا اي طريق فرعية عالاقل وجود الناس بيعطيني شوية احساس بالامان لحتى يجي جاد )
بعد ربع ساعة وصل جاد لعندي والسيارة ما عادت موجودة كنت برجف وشفافي زرق وايدي باردين كتير
ما كنت قادرة احكي شي خفت كتير
اول ما شفت جاد ارتميت بين ايديه
مسح على راسي وقلي لا تخافي انا معك انا جنبك
وصلني جاد عالبيت كان بيت اهلي مقلوب فوقاني تحتاني صرت متل المجنونة لف بالغرف دور على امي واخواتي
جاد( دقي عليهم شوفي وينهم )
مسكت موبايلي وحكيت مع اختي صافي قالتلي انهم عند عمتي ومو موجودين بالبيت ،،،، ارتحت شوي لما عرفت انهم بامان سكرت معها وغطيت وجهي بايدي وصرت ابكي
جاد( كانو عم بدورو على شي هون بالبيت يا ترى شو بدهم ،،،، اكيد بكونو عم يدورو على ملف او شي بخص جمال
انحنى جاد قدامي ومسك ايدي
( اسيا اوثقي فيني قليلي شو قصته جمال فهميني ليش كل هالضجة بسببه فهميني )
اسيا( جمااال كان عم يعاني من اكتئاب حاد
كان رجل اعمال كبير ووضعه المادي مرتاح فجأة خسر كل امواله زعل وقتها كتير واكتئب بس كان وضعه مقدور عليه
لحتى عرف انه الي خسره امواله هي مرته )
جاد( كيف )
اسيا( كانت بتشتغل ضده لصالح واحد بيقولوله الذيب )
جاد( عم تخونه )
اسيا( هلا ما بعرف اذا الموضوع توصل لخيانة لانه هو نفسه ما كان بيعرف بس الي كان بيعرفه انه مرته كانت تاخد كل وراقو وملفاته وتعطيها لهاد الي اسمه الذيب حتى صفي جمال عالحديدة )
جاد( طيب اهدي مل شي واله حل )

بعد هاليوم تكركبت كتير صرت هلوس دايما وكوبس وانا نايمة الي بيقدر يوصل لبيت اهلي ويعمل فيه هيك بيقدر يعمل كل شي بس الشي الحلو الي كان عم يقطع بحياتي هو جاد
تقدملي رسمي من اهلي وانخطبنا بحفلة عائلية ململة
يومي ما كان بيكمل بدونه ولا مرة حسيته بحاول يزعلني او يدايقني واذا فكر يزعلني كنت ارجعله بالاسطوانة القديمة تبع المراة والمساواة فهو بيختصر على حاله ومن الاصل ما بزعلني ،،،،، بنفس الوقت اخدت اجازة من شغلي
كنت حابة ارتاح شوي واهدى وريح نفسيتي

صافي ( اسيا ساعدني بحل مسألة الرياضيات هي )
اسيا( بعدين صافي مو فاضيتلك هلا )
صافي ( اي شو وراكي يعني )
اسيا( عم اكتب بحث ااااخ شو كتيرة غلبة هاتي اشوف بس مسألة وحدة ها
ييييي تلفوني وصلني مسج ناولني اياه وجيبي كتابك وتعي)

مسكت موبايلي كانت رسالة واتس من رقم غريب باعتلي صورة لجاد
ومكتوب عليها حبيب القلب مع ارملة جمال
كيف وقع التلفون من ايدي ما بعرف
صافي( اسيا في شي )
اسيا ( ااه لا ما في شي روحي صافي بعدين بدرسك)
صافي( يا ربي لسا هلا كنتي بدك تساعديني شو صرلك )
اسيا( قلتلك بعدين روحي من قدامي)

شو الشعور والاحساس الي اجاني وقتها ما بعرف حاولت فكر بالموضوع حاولت رتب الفكرة ركبها انه جاد وارملة جمال
مازبطت ما ركبت على بعضها وظنون السوء ما في اكتر منها
معقول جاد يخوني معقول يكون عم يخدعني وبيشتغل مع مرت جمال ضدي طول هالوقت عم يخدعني
بس قلبي حبه وقلبي ما بيحكيلي الا الصحيح

بعدها بساعتين دقلي جاد قفلت بوجهه وسكرت تلفوني كله
دقلي عموبايل امي عملت حالي نايمة ورفضت احكي معه
بس يعني لمتى بدي اظل اهرب منه
تهربت يوم وتنين بس هو كمان قلبه حسه انه في شي خاصة لما اجا يزورني وتمارضت وما قبلت اطلع شوفه دخل لعندي عالغرفة وانا قمت من مطرحي بدي اطلع من المكان الي هو فيه مسك ايدي بقوة وشدني لاله
جاد( شو في مالك ليش هيك عم تتصرفي)
اسيا( والله اسال حالك )
جاد( شو اسال حالي عن شو بدي اسال حالي
بلاها هالتصرفات المولدنة )
اسيا( والله لكل فعل رد فعل )
جاد( لا تظلي تحكي بالالغاز فهميني مالك )
تجاهلت كلامه وفلتت ايدي ورحت استخبيت بالحمام
ما بقدر واجهه ما بقدر اطلع بعيونه وقله انت خاين
سمعت صوته عم بودع باهلي وطلع من البيت
طلعت من التواليت كانت امي عم تصرخ وتقول ( رح تطيري الشب من ايدك )
تجاهلت كلامها ودخلت على غرفتي بعتت لجاد صورته مع ارملة جمال بعد شوي بعتلي اشارات استفهام
وكتبلي( في سوء تفاهم بالموضوع اسيا صدقيني
لازم نحكي ولازم تسمعيني )

رفضت اسمع منه اي شي ولا اتقبل شي مرق علي اسبوع صعب ايام مرة متل العلقم
لما بتكتر الضربات عالراس ما بعود لا راسك ولا جسمك بيتحملو

اسيا( امي انا طالعة عالعيادة )
امي( وبعدين يا بنتي قليلنا شو صاير بينك وبين جاد والله هالشب شاريكي )
اسيا( ولا شي امي بس ما تفاهمنا وبس)

رحت عدوامي بعد فترة اجازة طويلة كنت خايفة ما بنكر بس كان لازم اخد موقف وكون قوية
اول ما وصلت عالعيادة ما لقيت السكرتيرة نديت عليها
ما لقيتها دخلت عمكتبي وتركت الباب مفتوح
قعدت عكرسيتي بدي اطول وراق من شنتايتي لما دخلو لعندي تنين وقفلو باب العيادة وراهم

هاد كان اخر شي بتذكره

————————-

اسيا( ااااخ وين انا ليش هيك راسي تقيل )
فتحت عيوني لقيت جاد ماسك ايدي وعم يبتسلملي)
جاد( الحمد لله عسلامتك )
اسيا( وين انا وانت شو عم تعمل هون اطلع من عندي ما بدي شوفك )
بعد شوي فات لعندي ضابط هناني بسلامتي وقلي كل الشكر لجاد لولا وجوده ما قدرنا نلحقك

اسيا( انا ما عدت فهمت شي )
جاد( انتي قومي بالسلامة ورح فهمك كل شي)
اسيا( هلا بدي اعرف)
جاد( ااااخ منك ام بصلة محروقة
لما اتهمتيني اني عم اتعامل مع ارملة جمال واني خنتك انا وقتها ما كنت بعرف انها بتكون ارملته
بس قلت الموضوع مستحيل يكون صدفة
قبل بيومين من لقائي بوجدان رنت علي هالة وطلبت تشوفني لامر ضروري وقالتلي بالحرف الواحد ما بدها حدا يعرف اني رح شوفها ،،، ما كان عندي اي فكرة شو بدها تقلي بس لما التقيت فيها خبرتني انه وسيم عم يخونها مع وحدة اسمها وجدان وانه متغير كتير عليها
وبحكم اني رفيقه طلبت مني مساعدة واحكي مع الست لتبعد عن وسيم
انتهزو الفرصة ولما تقابلت انا ووجدان صورنا وبعتولك الصورة لتشكي فيي
للاسف وجدان وهالة و وسيم مثلث وسخ وجدان وهالة رفقات من زمان ووسيم بشتغل عند تاجر مخدرات اسمه الذيب
وجدان وقتها قررت تخون زوجها وتشلحه فلوسه
ولما جمال حس عليها وعرف انها هي قتلوه )
اسيا( مين الي قتله )

جمال( وسيم ووجدان خنقوه قبل ما يرموه عن الدرج ويحطو القضية عاساس انها قضاء وقدر ولانه هالة بتعرف كتير شغلات وقضايا على مدير المشفى عندكم
مرقها وما فتح فيها اي تحقيق )
اسيا( العما شو احنا عايشين بغابة )
جاد( شفتي طلع كل الي حواليكي عم يخدعوكي وبالاخير شكيتي فيني)
اسيا( هلا هاد الي طلع معك طيب انا شو دخلني ليش ليلاحقوني )
جاد ( كانو خايفين تكوني بتعرفي شي عنهم او انه جمال حكالك شي كانو بدهم يقتلوكي
بهداك اليوم لما دوامتي دقت علي امك وخبرتني انك طلعتي عدوامك والحمد لله قدرنا نلحقك قبل ما يأذوكي )
اسيا( يعني انا هلا بامان )
قام جاد من مطرحه وحرك راسه ( يعني مو كتير بامان الا لما نتزوج شو قلتي)
اسيا( موافقة )

الغيمة السودة الي كانت ملاحقيتنا راحت زعلت اكتر عجمال كيف شب متله راح ضحية ناس ما بتخاف الله
حددنا انا وجاد عرسنا بعد اسبوع ،،،،، مع اني ما كنت بلحق جهز حالي بس مو مهم المهم كون جنب جاد

اخر شي بحب اتذكره لما كنا نرقص سلو
جاد( لساتك مصرة انه المرأة نصف المجتمع )
اسيا( ايه طبعا ورح ظل طالب بالمسواة لاخر يوم بعمري)
جاد( بدي قلك شغلة صغيرة الانسان لما بكون لانثاه رجل حقيقي بتكون هي المجتمع كله مو نصه )
اسيا( جاااد الله لا يحرمني منك )

#انتهت

عرض التعليقات (66)