تكملة قصة في قلبي طفلة يتيمة للكاتبة حنين طه

62 12٬642

تكملة قصة في قلبي طفلة يتيمة للكاتبة حنين طه

نتابع أعزاءنا القراء في زاكي هذه القصة الممتعة والتي نقدمها لكم من قسم المنوعات في زاكي, متابعة شيقة نتمناها لكم
تكملة قصة في قلبي طفلة يتيمة للكاتبة حنين طه
تكملة قصة في قلبي طفلة يتيمة للكاتبة حنين طه

الجزء السادس 

طلعت معزوليد وركبت جنبه بالسيارة كان مبين علي التعب والجهد 

شمس: لوين رح نروح

حك وجهه بتوتر

وليد: هلا بشوف بس اطمني ما رح اتركك

شمس: بتشكرك
كان عم يمشي بالسيارة وكانه ما بيعرف لوين بده يروح او وين رح ياخدني بقي عم يلف فينا كل النهار لحتى المسا وقف قدام بيت

وليد: انزلي

شمس: وين جينا

وليد: هيدا بيت رفيقي سيف هو عزابي عايش لحاله رح خليكي عنده كم يوم لنلاقي لالك حل

شمس: انا بعتذر لاني رح لبكك معي

وليد: مو مشكلة تعي معي

دق وليد الباب على سيف عدة مرات لحتى فتح الباب شب طوله متوسط عيونه بني بلون عسلي

سيف: ها هي وليد بديارنا يا مرحبا يا مرحبا شو ذكرك فيني يا زلمة مين هالصبية

وليد: انه عالباب رح نحكي يا زلمة

سيف: والله اسف بعتذربس من استغرابي بجيتك بهالوقت

فتنا على بيت سيف كان كتير معفش ملخبط ولا شي بمكانه قناني العصير عالارض قشر البزر منعوف بكل مكان ،،، تيابه مو تارك ولا قطعة تياب الا ومطالعها وراميها يعني بيته اشبه بخرابة

وليد: كيف عايش هون يا زلمة

سيف: يعني واحدعزابي شو بده يطلع منه

وليد: واذا اجت هنادي عليك زيارة

سيف: ههههههههههه اطمن اذا اجت هنادي بتخبرني قبل بيومين عالسريع بجيب شغالة اهلي تنظف البيت وترتبه

وليد: مو لو تروح تعيش مع اهلك وامك وابوك احسنلك من هالعيشة هون

وليد: ااايه حتى ابي يجنني عالطلعة والنزلة ووين رحت ووين جيت هلا فكني مني انا مين هالصبية

وليد: اااه شمس اعمليلنا فنجان قهوة

شمس: طيب حاضر

رحت عملت قهوة لالهم وانا راجعة وقفت عند الباب اتسمع عليهم شو عم يحكو

سيف: مسكينة هالبنت طيب امها ليش لتعمل فيها هيك من البداية

وليد: ما بعرف حكايتها كلها الي بعرفه قلتلك اياه

سيف: طيب يا وليد انا كيف بدي خليها تنام بالبيت وانا هون لحالي

وليد: يييي علينا سيف اعتبرها بتشتغل عندك بتنظفلك البيت اعتبرها خدامة وبتكسب فيها اجر

وجعتني كرامتي من كلام وليد بس كلامه مزبوط الي متلي شو بدها تكون الا هيك

وليد: انت بتعرف لولا اهلي وعيلتي كنت اخدتها لعنا

سيف: طيب خلص لا تحزني عليها اكتر رح ابكي بعد شوي الله يصبرني عليك وعقصصك

قدمت القهوة لالهم بعدها قام وليد وروح وانا اخدني سيف على غرفتي لنام فيها
هي كانت ت اول ليلة من بعد شقا طويل بنام مرتاحة
حتى اني صحيت مرتاحة وجسمي شبعان نوم قمت من مكاني وصرت حوس واشتغل بالبيت مسحت الشبابيك وشطفت الارض وكبيت الزبالة لحتى صار البيت بيت تاني ما بيشبه البيت الا كان امبارح
وبسرعة فتت عالمطبخ حضرت الفطور وجهزته لفيقة سيف بيك

شمس: شو كمان يا شمس بقي عليكي اه مرتديلا
وهي هيك جهزت السفرة لازم اثبت حالي بالشغل عنده حتى يقتنع فيني وما يقلعني ما صدقت متى لقيت بيت اقعد فيه بس والله تاخر كتير رح تعصر الدنيا وهو بعده ما فاق اف

سيف: شو عم تحكي مع حالك

شمس: بسم الله الرحمن الرحيم

وقع الصحن الي بايدي من الرعبة

شمس: انا اسفة اسفة كتير والله ما كان قصدي

سيف: انتي دايما بالعادة هيك بتكسري

شمس: والله من جفلتي

سيف: طيب خلص مو مشكلة لك شو عم تعملي

شمس: عم لم القزاز

سيف: هيك بايدك عم تلميهم افرضي انجرحت ايدك
جيبي مكنسة ولميه

قعد سيف عالسفرة وانا عيوني عليه كان عم ياكل وهو مبسوط

سيف: هاي اول مرة بفطر هيك فطور من زمن

شمس: صحتين

سيف: صحيح انتي ليش ما عم تفطري

شمس: مو مشكلة هلا لتخلص انا بقعد

سيف: شه ليش يعني

شمس: سمعت امبارح وليد بيك بقلك انه انا خدامة هون لهيك ما بصير اقعد معك

سيف: يا سلام من وين جبتي هالقانون دخلك
بعدين وليد حكى هيك لحتى اقبل خليكي تقعدي عندي ما بيقصد قومي حضري الك صنية اكل وروحي اقعدي كليها عالكنباي برا

شمس: ماشي شكرا

سيف: العفو وصحيح يسلمو ايديكي على تنظيف البيت

ابتسمتله بهدوء واخدت منه الاكل ورحت عالكنباي اكل
بس شفته خلص فطور قمت نظفت المطبخ وتفقدت البراد لشوف شو رح اطبخ

شمس: استاد سيف انا رح اطبخ اليوم ملوخية اذا ما عندك مانع

سيف: اللللله بس كتري عليهم التومات لانه هيك بحبها

شمس: حاضر صحيح بتحب اطلع نظف غرفتك قبل ما تطلع

سيف: شمس انتي مو خدامة

شمس: حتى لو بنقعد عنظافة مو خسرانين شي

سيف: قصدك انا عفن صح

شمس: لا والله مو قصدي ابدا

سيف: ههههههههه بعرف حالي طيب اذا حابة تنظفيها براحتك بس انا عم نبهك رح تشوفي اوساخ من سنة زمان

شمس: هههه مو مشكلة

طلعت على غرفة سيف لحتى نظفها لفت نظري صورته عالتواليت مع صبية كتير حلوة ولابسة متل ما بيلبسو البنات بالتلفزيون مسكت الصورة اطلع فيها واتخيل حالي بهاللبس وبالهالاناقة
مع دخلة سيف علي

سيف: شو عجبتك

شمس: ايه كتير حلوين

سيف: هادي هنادي خطيبتي

شمس: لابقين لبعض كتير

سيف: شكرا هي مسافرة ما بتيجي كتير لهون عم تكمل ماجستير برا اول ما تخلص رح نتزوج

شمس: الله يوفقك

تركته بالغرفة ونزلت لكمل طبيخ ،،، كنت كل شوي اطلع عساعتي وعد دقايقها وثوانيها كنت متوقعة وليد يجي ويشق علي بس مرق اليوم الاول والتاني والتالت وما اجا حسيت بخيبة امل كتير كبيرة لما ما اجا ولا سئل عني
وكل ما كنت شوفه مطنشني اكتر كل ما كنت اجتهد بالشغل عند سيف لحتىى يقتنع فيني ويخليني عنده خدامة

شمس: بيحكي معك وليد

سيف: ايه حكى معي امبارح ليش بدك منه شي

شمس: اانه لا بس يعني

سيف: احكي شمس اذا ناقصك شي قوليلي انا بجبلك اياه

شمس: ما سئل عني وليد

سيف: سئل عنك ايه امبلى امبلى سئل وانا قلتله انك منيحة

شمس: ماشي سلم عليه ان حاكاك

سيف: طيب بتوصيني على شي من برا

شمس : لا شكرا الك

انا كنت بعرف حدودي كتير منيح وبعرف انه مستحيل واحد متل وليد بطلع على وحدة متلي بس كنت حب شوفه وحب اسمع صوته وجوده ونبرة صوته بيفرضو على قلبك وجودهم غصب عنك واوقات كنت فكر لو ما ما بدي شوفه كرماله كنت ناطرته ليخبرني اي معلومة عن امي
اذا بعدها متزوجة او انفصلت ووين بعدها ساكنة وكتير اشيا

==========

دق دق دق

شمس: ايه جاية جاية
استاذ وليد هاد انت

وليد: شمس الشموسة كيفك

شمس: بخير الحمد لله صرلي كتير ناطرتك بس انت تاخرت

وليد : ما فهمت عليكي

شمس: قصدي ناطرة منك تجبلي اخبار عن امي

وليد: والله يا شمس ما بعرف كيف بدي قلك اياها

شمس: خير امي صايرلها شي

وليد: لا مو هيك هي منيحة اطمني بس ما عرفت عنها شي لهيك منحرج منك

شمس: وقعت قلبي

وليد: سلامة قلبك يا رب

قرب وليد مني وهو عم يطلع بعيوني

وليد: كتير حليانة

حاولت اتهرب منه وروح بنظري يمين وشمال

شمس: انا حاطة القهوة عالغاز هلا شوي وبتخلص
حمدت الله انه بهداك الوقت اجا سيف
وتنحنح من بعيد

وليد: تأخرت

سيف: كنت عم البس وبدل تيابي

وليد: شو سالت الشباب السهرة وين

سيف: رح نروح عالقهوة بدي اغلبك بدق طاولة غير شكل

طلع سيف مع وليد بعد ما وصاني سكر عحالي الباب منيح وما افتح لحدا ابدا انا نطرته لحتى طلع وسكرت الابواب ورحت فتحت التلفزيون لحتى نمت وما فقت وما حسيت الا عحدا عم يغطيني بس النوم كان غالبني ما قدرت صحصح منيح
لحتى طلع الضو عرفت اني غفيانة عالكنباي وسيف بيك حط علي غطا خجلت كتير من حالي لانه نومي دفش كتير دايما كانو يقولو عني نعومة بكل شي الا بالنوم وبتكمل معي اذا بكون حلمت وحكيت وانا نايمة وخبصتلي شي خبصة

سيف: صباح الخير

شمس: صباح الورد انا بعتذر على نومتي هون امبارح

سيف: اما شو عليكي نومة غير شكل لك ما بتخافي تنطبشي

شمس: ههههههههه اذا هالطبشات لا تخاف متعودة بس ما كون فتحتلي شي حكاية وانا نايمة

سيف: ليش بتحكي كمان وانتي نايمة

شمس: ييييييي والي مواقف ومواقف بهالشغلة مرة من المرات امي قالتلي شغلة اعملها وما قول لابي من كتر ما الشغلة علقت براسي وانا نايمة عدتها اكتر من الف مرة وطبعا ابي سمعها وراح خانقها لامي وانا ورطت

سيف: ههههههههههه مو طبيعية انتي بالله ما اكلتي من امك قتلة

شمس: قال اكلت قتلة والله وغير شكل كمان

سيف: بدك الصراحة بتستاهلي بالمناسبة شمس انتي وينه ابوكي

شمس: ابي بعيد عني كتير من زمان من سبع سنين لهلا ما بعرف عنه اي شي

سيف: اوف ليش طيب

شمس: حكاية طويلة

سيف:وهي قعدة يا ستي احكيلي يمكن ترتاحي

ما بعرف شو الشي الي خلاني احكي لسيف عن كل شي مرقت فيه بحياتي يمكن الكلام الي جوا قلبي كان بحاجة انه يطلع ولقيت سيف قدامي وخبرته واوقات بعد ما تعترف بكل شي عندك بتندم بتتمنى لو كنت سكتت وما قلت شي واكتر شي ريحني وقتها انه خبرته عن وفا حتى اذا بيوم صرلي شي ياخد حقها من المصح والي بيشتغلو فيه

سيف: يا الله قديه شفتي بحياتك

شمس: بعين الله هي الحياة هيك اول عشرين سنة فيهم صعبين وبعدين بتتعود

سيف: ههههههههههه

شمس: الباب عم يدق مين بده يكون جايينا

سيف: خليكي انا بفتح

راح سيف يفتح الباب وبعد شوي سمعته عم يحكي مع حدا وكانه وليدكنت سامعة صوته

وليد: شموسة كيفك

شمس: الحمد لله بخير

وليد: روحي البسي بدنا نروح مشوار

اطلعت بسيف
شمس: لوين

وليد: بدي اخدك معي رحلة

من فرحتي رحت غيرت تيابي بدون حتى ما استشير واخد رأيي سيف
وطلعت اول مشوار مع وليد رحنا عالحديقة واشترينا ذرة واشيا طيبة كان وليد كتير حنون علي وكتير متسامح حبيت فيه طيبته وحنانه كان شخص من عالم تاني

وليد: بتعرفي يا شمس شغلة

شمس: قلي

وليد: انا كتير عرفت بنات بحياتي بس انتي غير فيكي شي غير ارتحتلك

شمس: حتى انا

وليد: شو حتى انتي كتير عرفتي حدا بحياتك

شمس: لا قصدي ارتحتلك

وليد: ايوا حبيته لهلارتياح الي بعلاقتنا

نزلت عيوني عنه وابتسمت انه معقول الي عم عيشه مزبوط معقول وليد يترك كل البنات ويلتفت الي ،،، المسا رجعني وليد عالبيت عند سيف كان قاعد ومكركب ومو على بعضه

شمس: استاذ سيف في شي

سيف: في انه البيت قايم قاعد وما نظفتيه

اطلعت حولي بالبيت لقيته كله بيلمع لانه نظفته قبل ما اطلع

شمس: ولا يهمك هلا بنظفه

على قد ما كنت مبسوطة بهاليوم ما حبيت ابدا نكد عحالي صرت ت اشتغل وانا اضحك واتذكر كل شي مرقت فيه مع وليد بالنهار ،،،
تاني نهار لقيت وليد جاية لعنا حتى نطلع انا وهو خفت وافق وسيف يزعل وبنفس الوقت خفت ارفض واخسر وليد

شمس: بس سيف لسا ما صحي

وليد: شو بدك فيه هلا بس يفيق انا بخبره

شمس: طيب متل ما بدك

غيرت تيابي عالسريع ورحت مع وليد لبرا فتلنا بالشوارع ووبعدها رحنا قعدنا لحالنا تصرفات وليد هداك اليوم ما عحبتني كان متل المراهقين

شمس: وليد ممكن لو سمحت ارجع عالبيت

وليد: شمس شو صرلك انا وليد ولا نسيتي انا الي انقذتك ولو ما بحبك ما بطلع معك وبحافظ عليكي

شمس: بتحبني

وليد: هلا بدك تعمليلي حالك هبلة ومو عارفة

بهاد الوقت كان سيف عم يرن ورن كتير كتير على وليد لرد

وليد: ايه سيف شو صرلك ايه شمس معي شو انت كاين ولي امرها لحتى عم تحقق معي طيب خلص هلا برجعها

قفل وليد الخط ( رح رجعك هلا لانه سيف زعل ليش طلعتي بدون ما تخبريه يا حبيبي ما كان باقي علي الا سيف )

رجعنا عالبيت ونزلني وليد بدون ما ينزل وانا دخلت عالبيت وسيف رايح جاي

سيف: بكير

شمس: عفوا استاذ سيف انا صح طلعت من البيت بس كنت منظفته ومرتبته قبل ما اطلع وحياتي الخاصة على جنب طالما انا مو مقصرة بشغلي

سيف: لا ستي هون مو فندق لتروحي وتيجي على راحتك

شمس: انا ما عملت شي غلط

سيف : وبنت بعمرك بتطلع مع واحد غريب عنها شو ما غلط

شمس: انا مسؤولة عن تصرفاتي

سيف: لا ستي مو مسؤولة وبعدين انتي ما بتعرفي وليد مزبوط متلي

شمس: انا بعرفه وبعرف انه كتير شخص منيح وبعرف انه هو الي انقذني وساعدني

سيف: ايه مزبوط انقذك وانا ما بقول عنه انه نذل
انا عم احكي عن شغلات تانية

وقت عليت اصواتنا كتير انا تركته وطلعت لبرا عالحديقة اركض وانا عم ابكي وهو لحقتي لبرا وقفت وانا معطيته ظهري

سيف: خلص فوتي لجوا انا اسف ما كان قصدي صرخ عليكي

شمس: انا طول حياتي وفلان وعلان بيتحكمو فيني ما في يوم اخدت قرار لوحدي اتركوني مش يمكن قرارتي تطلع بلحظة صح

سيف: انتي ما عم تفهمي علي بس لانه ما بدي اياكي تنصدمي باي شي جديد

شمس: بشو بدي انصدم يعني علاقتي بوليد ما فيها شي

سيف: شمس انا مو اهبل ووقت يجي وليد او يحكي عالتلفون انتبهي على حالك وعلى عيونك كيف بصيرو يلمعو بتعرفي

شمس: انا بعرف الي متلي مو من حقهم يحبو ولا بيطلعلهم يعشقو

سيف: ابدا انتي اكتر وحدة بالدنيا بيطلعلك تحبي وتنحبي بس اختاري صح الله يرضى عليكي

ونحنا عم نحكي وعم نتجادل خبط سيف ماسورة المي الي جنب منا وهو خبطها من هون وهي عبت الدنيا مي من هون وركضنا التنين عليها نحاول نسكرها

شمس: يا ولي تعبينا مي ههههههههههههههه رح موت من ضحكي منظرك بموت ضحك

سيف: بالله شو عاساس منظرك انظم

شمس: عالاقل مو متلك تغرقو تيابي الغاليين بالمي

سيف: طيب هلا بفرجيكي
قام سيف ايديه عن الماسورة وعباني مي كلي وانا صرخ ونادي عليه ليسكرها وبعد ما خلص نوبات الضحك تبعته سكرها وفتنا عالبيت

سيف: بسرعة روحي اتدفي هلا بتبردي وبتمرضي

جيت لروح على غرفتي وانا رايحة التفت عليه
شمس: شكرا سيف
بعد هاليوم لقاءاتي بوليد خفت حتى ما زعل سيف
لانه حسيته بخاف علي فعلا ويمكن مو حاببلي اياها شغلة اطلع وانزل مع وليد عالفاضي

سيف: شمس تعي شوفي شو جبتلك

شمس: ليكني جيت شو جبت

سيف: تا تا تا تن
موبايل

شمس: موبايل الي انا

سيف: ايه انتي الك اكتر من شهرين هون بتشتغلي وما عم تقبلي تقبضي راتب ابدا جبتلك موبايل منه بتصيري اذا نقصك شي بتخبريني ومنه بتتسلي باوقات الفراغ

شمس: اعطيني لشوف
يا الله شو حلو بس ليش بدون كبسات انا بدي واحد كبس عليه

سيف: يا هبلة هيك الموديل اخر شي نزل عالسوق جبتلك تعي لعلمك عليه

شمس: طيب جاية بس لطفي تحت الطبخة

فتت طفيت تحت الطبخة ورحت قعدت جنب سيف ليعلمني عليه وانا ما كنت هبلة بسرعة لقطت منه وصرت اتعلم

سيف: يا عيني عليكي شطورة

شمس: شكرا شكرا سيف الله يخليلي اياك

بقيت كل النهار قاعدة عالموبايل واتعلم عليه

سيف: شمس قومي اعمليلي فنجان قهوة

شس: يلا كمان شوي بس لاتعلم هالشغلة

سيف: طيب قومي قطعيلي فواكه

شمس: يلا باقي كم برنامج اتعلم عليهم وبقوم

سيف: طيب ناوليني كاسة مي

شمس: حباب سيف اتناول انت

سيف: بستاهل انا لانه انا الي جبت الدب لكرمي

المسا بعد ما راح سيف ينام طلعت عغرفتي ودقيت على وليد

وليد: ايوا مين معي

شمس: وليد انا شمس

وليد: بعد زمان عن هالصوت

شمس: هيدا رقمي

وليد: اوووه صار معك موبايل

شمس: ايه سيف اشترالي واحد اليوم

وليد: والله بيطلع منك يا سيف
المهم مشتاقلك مشتاقلك قد الدنيا

بعد هي المكالمة رجعت علاقتي بوليد متل اول بس بدون علم سيف وكل مرة شوف فيها وليد اتعلق فيه اكتر من قبل وبنفس الوقت ما زعل مني سيف

وليد: شمس انا برا اطلعي لشوفك شوي

شمس: ما بقدر سيف بالبيت

وليد: وشو يعني سيف شو هو كاين ولي امرك

شمس: قلتلك ما بقدر صعب كتير

وليد: ماشي سلام

زعلت كتير اني ما رديت عليه وزعلته وكنت مفكرة انه بسهولة رح اقدر راضيه بس طلعت غلطانة بقيت اكتر من اسبوع وانا رن عليه وهو ما يرد وابعتله مسجات وما يرد حتى اني بديت افقد الامل
لاجا نهار ما كنت حاسبة حسابه ابدا كنت قاعدة عم مسح بشبابيك البيت لمحت سيارةعم تقرب لعند البيت نزلت منه الصبية الي شفت صورتها مع سيف مرة نزلت من عالشباك ورحت لافتحلها الباب

هنادي: سيف موجود

شمس: سيف نايم فوق تفضلي

هنادي: وعم تناديه سيف حاف برافو
بقى انتي هي شمس الخدامة صح

حاولت اتجاهل اهانتها

شمس: ايوا انا هي

هنادي: ما بكي شي
روحي يا بنت ضبي اغراضك وتيابك لحتى تطلعي من هون

شمس: بس

هنادي: ما بس ولا شي سيف ما عاد بحاجة لخدامة لانه انا رجعت ورح نتزوج بقا مو بحاجتك

شمس: بس لازم خبر سيف

هنادي: اولا اسمه الاستاذ سيف وتانيا انا الامرة الناهية هون يلا معك نص ساعة لتطلعي من هون

فتت ضب تيابي وانا عم امسح بدموعي ورن على وليد وما يرد قمت بعتله مسج

( وليد رد علي خطيبة سيف رجعت وقلعتني من البيت وانا ما بقيلي مكان اقعد فيه )

ورجعت دقتيله لحتى بالاخير رد علي

وليد: ايه شمس

شمس: وليد ساعدني ما بقي الي اي مكان روح عليه هنادي رجعت وقلعتني من هون

وليد: له له ووينه الشهم سيف الي كان عامل فيها محامي عنك ما يسكت خطيبته ويبعد غضبها عنك

شمس: هو ما عرف بعده نايم

وليد: طيب حبيبتي لا تخافي اطلعي من عندهم وانا رح مر عليكي هلا بخليكي بفندق لحتى ما الله يفرجها

بالفعل اخدت اغراضي وطلعت من بيت سيف وبعد بعشر دقايق لقيت وليد ناطرني عاول الطريق كنت كتير مخنوقة ومحترق قلبي من الي صار والي قهرني اكتر اني ما خبرت سيف اول ما ركبت مع وليد اخد مني الموبايل وشال منه الخط وحط بداله خط جديد

وليد: هيك احسن حتى ما تجيبي مشاكل لحالك ومشاكل لسيف لخطيبته لانه انتي ما بتعرفيها لهنادي غيورة ومجنونة

شمس: الي قاهرني انها دخلت عالبيت بتعرف اسمي يعني هي مقصودة

وليد: انسي المهم هلا النا بحالنا

اخدني وليد على فندق بسيط حجزلي غرفة وصار يشق علي كل كم يوم وانا احترق حرق نفسي اتصل على سيف وخبره شو صار لانه ما كنت بعرف شو ممكن هي هنادي تكون قالتله
علاقتي مع وليد كانت علاقة حلوة وكتير قوية وما كنت احتاج اي شي وهو معي بس دايما حس بشي ناقصني ما اعرف شو هو كان نفسي بيوم من الايام اساله ليش ما يتزوجني وياخدني لعيش معه ببيتهم بدل هالشنططة بالفنادق بس كنت خاف من ردة فعله او يمكن كنت خاف اخسره اذا طلبت هيك طلب لهيك كنت دايما قول لحالي طالما بحبني اكيد بالنهاية رح يتزوجني

——�————

شمس: الو

الفندق : ست شمس في واحد هون تحت عم يسال عنك

شمس: بيسال عني انا طيب هلا بنزل بشوفه

نزلت لغرفة الاستقبال لحتى شوف مين ناطرني شفت من بعيد سيف خفت روح شوفه واعمل مشاكل بينه وبين هنادي وحتى بيني انا ووليد بس هو شافني ومشى لعندي انا امشي لروح وهو يلحق فيني

سيف: شو عم تحاولي تعملي انا بشو غلطت معك لحتى تتركي البيت هيك وتروحي ولا وليد اكل عقلك

شمس: وانا شو عملتلك لحتى تيجي خطيبتك وتقلعني من نص بيتك

سيف: شو عم تحكي هنادي هي الي قلعتك انا قالتلي انه انتي بس شفتهيا طلبتي تروحي

شمس: بحلفلك انه هالشي ما صار هي قلعتني من البيت اساسا هي جاي عالبيت كرمال تشوفني لانها اول ما دخلت قالتلي انتي الخدامة شمس

سيف: كله من وليد

شمس: انت ليش حاطط وليد براسك ما عم افهم مع انه كنتو كتير رفقة

سيف: لانه كاشفه وبعرف نواياه

شمس: انا ما عم افهم عليك

سيف: المهم قومي معي يلا بدنا نرجع عالبيت

شمس: وهنادي

سيف: انا بتصرف معها

شمس: اعطيني شوية وقت وبوعدك لما بحس حالي جاهزة رح ارجع

سيف: طيب اعطيني رقمك

اعطيت سيف رقمي وطلبت منه ما يرن علي الا اذا انا دقيتله ودقيت على وليد لخبره شو صار معي بس ما رد وبقي يومين كاملات ما عم يرد علي ولا حتى عم شوفو بعتله كتير مسجات ليرد علي وكمان ما رد ولا على اي مسج وقعدتي بالفندق طولت وانا ما في بايدي اي شغل صحيح هو كان دافعلي مقدم بالفندق بس الواحد ما بيعرف الايام شو بتخبي وانا قلبي بلش يغلي على وليد قررت رن على سيف واساله عن وليد بس سيف حاول يتهرب من الاجابة وقلي رح يمر علي المسا نطرته لحتى اجا

سيف : تاخرت عليكي

شمس: مو مشكلة سيف في اي اخبار عن وليد

نزل سيف عيونه للارض وطلع من جيبته كرت

شمس: شو هاد

سيف: اقرأيه

اخدت الكرت من ايد سيف وكنت عم اقرأه بقلبي قبل عيوني وعم تنزل دموع كان كرت خطبة وليد على وحدة ايمها منار ،،، قرب على سيف وحضني

سيف: حاولت من البداية افهمك
ممكن تهدي شوي وما عاد تبكي

شمس: هو ما دخله الحق علي انا الي رفعت رقبتي لفوق وحبيت واحد مو من توبي

سيف: لا الحب ما بيعرف طبقات ولا بيعرف مستويات

شمس: سيف انا اول مرة بحياتي بحس حالي يتيمة ايه يتيمة اب وام وحب

سيف: ممكن هالكلام ما بدي اسمعه

شمس: بصير تتركني لوحدي

سيف: طيب انا رح اتركك ترتاحي بكرة الصبح بمر عليكي

بعد الي صار بيني وبين وليد وكمية الوجع الي اجتني منه قررت حتى سيف ابعد عنه لهيك تاني يوم عملت خروج من الفندق وطلعت منه مشيت كتير بعدها وقفت تكسي

السواق: لوين يا اختي

شمس: على هاد العنوان لو سمحت

السواق: بس هاد بمحافظة بعيدة

شمس: مو مشكلة قد ما كان بدفعلك انا

طلعت مع السواق لعند بيت اهلي بيت ابي وجدي كنت بعرف انه هاي خطوة كبيرة وصعبة بس كان لازم اعملها كان لازم ذكرهم ببنتهم الي رموها ونسيوها ومع اني كنت بعرف من زمان انهم سافرو وتركو البيت الا انه كان عند امل اني لاقي ولو خيط صغير يوصلني لعندهم اول ما وصلت لهناك كان كل شي متغير بالمدينة بس بيتنا بعده متل ما هو بعدها ذكرياته عالقة جوا روحي وقلبي وراسي
ترددت كتير قبل ما انزل من التكسي وخبرت السواق ينطرني شوي

….يتبع

#الجزء السابع و الأخير

اخدت نفس قوي كتير ودقيت الباب بعد شوي فتحتلي صبية لابسة لبس مرتب كتير الباب
هي نفسها ما تغيرت هي اختي سيرين بعده شعرها ناعم وحرير وبتطاير عوجها

شمس: مرحبا

سيرين: اهلين بشو اخدمك

وانا عم احكي معها طلت من ورا الباب خالة خولة
عرفتها اول ما شفتها الطيبة والحنية مبينة بعيونها حتى هي اول ما شافتني عرفتني ووقعت على طولها
ركضت سيرين لعندها لجوا وانا ركضت معهم بقينا عم نفيق فيها وهي لا من تمها ولا من كمها
فتحت عيونها شوي
خولة: ششششمس شمس صح
ضمتني لصدرها وصارت تبكي يا روحي شو افتقدتك ليالي كتيرة ما نمتها وانا عم فكر فيكي وفكر شو صرلك ببعدك عنا

شمس: سالت عنكم كتير وقالولنا انكم رحلتو من هون

خولة : رحلنا فترة ورجعنا لك سيرين جمانة تعالو سلمو على اختكم
قربو اخواتي علي ليسلمو علي بس كان سلامهم بارد وكانه ما حبو شوفتي من جديد

شمس: خالة خولة وينه ابي وجدي وتيتا

اطلعت بوجوهمم كلهم كانو عم يطلعو ببعض

خولة : امي خدو اخوكم سعد وروحو عغرفكم شوي

شمس: هاد اخي انا صار الي اخ تعا يا روحي تعا
حضنته وصرت شمه ياعمري ما احلاك الله يحماك

اخدت جمانة سعد من ايده وراحو على غرفهم

شمس: ايه خالتي احكي

خولة: شو صوت هالزمير

شمس: ييييييييي هاد سواق التكسي نسيت اصرفه

خولة: خليكي هون انا بصرفه

رجعت خالة خولة لعندي

شمس: ايه خالتي ما قلتيلي وينه ابي وجدي وتيتا

خولة: جدك توفى بعد ما غبتي عنا بسنتين
جدك كان مفكر يربيها لامك ويعمللها فركة اذن لكن بعد ما انتو غبتو وكانه فص ملح وغاب هو كان متوقع تنزلو بفندق ما ترك حدا الا وسال عنكم وابدا ما عرفلكم اثر ومن زعله عليكي توفى قهر اما ستك وابوكي طلعو الصبح على حفلة بنت عمتك اليوم خطبتها

شمس: جد الف مبروك طيب انتو ليش مو رايحين معهم

خولة : المشوار بعيد وبمحافظة تانية وانا مريضة ما بيسوالي السفر ااااخ يا شمس شو رح يفرحو هلا لما يشوفوكي احكيلي شمس انتي وين كنتي وين اخدتك الايام

خولة كانت احن وحدة علي بالبيت ومن اول ما رجعت عالبيت وهي حنونة علي
قربت على خولة ومسكت ايدها وصرت ابكي
خولة: لا تبكي يا روحي احكيلي شو وجعك
حطيت راسي عصدرها وصرت ابكي ايه بكيت لحتى ما بقا بعيوني دموع

شمس: ااااخ لو تعرفي شو شفت شغلات بشعة بحياتي من لما طلعت من عندكم من هون لليوم
صرت احكي لخولة عن كل شي مريت فيه وانا ابكي وهي تبكي متلي
بقيت انا وخالتي خولة سهرانين لحتى رجع ابي وتيتا سمعنا صوت سيارتهم واقفة عالباب برا

اول ما دخلو ما كانو منتبهين علينا بس لما رفعو روسوهم واطلعو علينا شافني ابي واقفة جنب خولة
فرك عيونه اكتر من مرة وستي قعدت على ركبها تصرخ وتبكي ومو قادرة تحكي
ركضت على ابي وعلى تيتا وابي يبكي ويقلي سامحيني يا ابي سامحيني انا ظلمتك
اما ستي كانت متل الي مو مصدقة عيونها كل شوي تتحسس بايدي ورجلي وتتاكد اني حقيقة قدامها

ما بعرف كيف بعد كل الي مرقت فيه قدرت سامح ابي وستي وحتى جدي المتوفي يمكن حاجتي لاني كون بين عيلة واسرة خلوني اتنازل عن كل ساعة الم مرقت فيهم بحياتي وبالاخص لما شفت اخي الصغير واخواتي سيرين وجمانة

كل يوم كان يمرق علي مع اهلي كنت حس حالي بالجنة وابي وستي رح يقطعو حالهم لالي كنت شايفة تانيب الضمير بعيونهم وتصرفاتهم حتى سعد من اول يوم حبني ولزق فيني لانه عيونه زرق على لون عيوني
بس جمانة وسيرين كانو عم يتجنبوني كتير ما عرفت ليش

شمس: خالة ممكن اسالك شي ليش سيرين وجمانة ما عم يقربو علي ولا عم يحاكوني والله ناطف قلبي لحاكيهم واقعد معهم

خولة : هههههههه هدول بناتي بنص عقل فكرو انك جيتي لهون يعني رح تاخدي كل الحب والدلال منهم

شمس: ايوا اذا هيك مقدور عليهم

علاقتي بالبداية مع اخواتي كانت متوترة كتير بس كنت دايما حاول الزق فيهم ودايما حاول سايرهم وحاكيهم لحتى اكسبهم ناحي

شمس: سيرين جمانة شو رايكم نعمل قالب كيك

سيرين: اعملي لحالك انا ما بحب اتعب

شمس: لا ما حزرتي بدك تعملي معنا وهلا

سيرين: شو غصب

شمس: ايه غصب يلا

قمنا تلاتنا عالمطبخ نحضر قالب الكيك وطول الوقت واحنا نلعب بالطحين والبيض وما خلصنا الا تيابنا ووجوهنا ملغمطة تلغمط ،،،، اطلعنا التلاتة ببعض وصرنا نضحك عحالنا
بعد يومين عمتي عزمتنا لعندها عالغدا بمناسبة رجعتي وكانت عازمة اهل خطيب بنتها
تلبسنا كلنا وتشيكنا واصرت جمانة تلبسني عكيفها وتحطلي مكياج وتكتر
اول ما وصلنا عند عمتي استقبلتنا بكل حب هي وبنتها منار والكل عم يحاولو يتجنبو يسالوني عن فترة غيابي او حتى يدايقوني بكلمة كانت منار مبسوطة بحالها كتير وبخطبتها
بعد شوي اندق الباب وكانو اهل خطيبها لمنار
لما شفتهم غص قلبي هيدا وليد خاطب بنت عمتي وقد ما كنت متلبكة بشوفته تلبك هو اكتر مني بس كل الوقت كنت حاول اتجنب تيجي عيني بعينه او حتى حاكيه كنت ماسكة دمعتي بالغصب
رجعت عالبيت وطالعت كل البكى القديم باجدد منه ما بعرف ليش خطرلي طالع موبايلي وافتحه
اول ما فتحته وصلني حوالي الف مسج من سيف

افتحي خطك بدي اطمن عليكي

بدي حاكيكي بس كلمة

بوعدك اطمن عليكي وما عاد ارجع رنلك مرة تانية

وانا عم اقرا بالمسجات رن على رقمي وليد يمكن اجاه مسج اني فتحت الموبايل كنت بين اه ولا بين رد او ما رد

وليد: شمس مرحبا

شمس: يا هلا بعد زمان عن هالصوت

وليد: بعترف اني غلطت كان لازم حاكيكي من زمان

شمس: كان لازم كتير اشيا تصير من زمان وما صارت

وليد: شمس انا والله حبيتك بس كان صعب

شمس: بعرف كان صعب تتزوجني وانا بهالوضع وبهالحالة

وليد: ما كنت بعرف اهلك وعيلتك

شمس: انت بس تتزوجني رح تتزوج عيلتي ولا تتزوجني انا

وليد: سامحيني وما تزعلي مني

شمس: انا مسامحتك ومو زعلانة منك بتعرف ليش
سامحتك لانه قررت سامح كل الي بعرفهم واذوني بيوم انا حدا كتير انئذيت بحياتي من لما جدي ظلمني لحتى امي عاملتني بكل كره وبعدها جيت انت بس انت اكتر واحد خذلني فيهم بتعرف ليش
لانك انت الوحيد من بينهم الي اخترتك بارادتي انا بالنسبة للزعل اطمن
ومو زعلانة منك لانه الزعل يعني انت بتهمني وامرك بعنيني وانت ما بتهمني ولا امرك بعنيني
صحيح منار بتحبك كتير دير بالك عليها

وليد: يعني ما في امل

شمس: قلتلك منار بتحبك يلا سلام
ما بعرف ليش ارتحت كتير بس حكيته لوليد حلو انه الواحد يطالع الحكي الي جواته وما يتركه يخنقه ويعذبه

جمانة: لك تلفونك رح يطق قد ما برن
ردي عليه بقا

شمس: خليه يرن

جمانة: شكله قلقان عليكي كتير

شمس: جماااااانة شو هالحكي

جمانة: لك بالدقيقة برن سبع الاف مرة ردي عليه بقا

يا الله شو كنت حابة رد على سيف واسمع صوته وردله شوي من معروفه علي بس الوجع الي اكلته من وليد خلاني اتراجع خفت ارجع انصدم بسيف حتى لو كان منيح معي ما كمان وليد كان منيح معي بالبداية يا ريتهم بالنهايات بكونو متل البدايات

=============
21/3

اخواتي عم يحضرو بالسر لعيد الام كرمال يفرحو تيتا وخالتي خولة وعم بزينو وبرتبو

المسا وصلت الكيكة وقربنا نخلص الصالة من تزيين وترتيب واحنا مبلوشين بالترتيب وتيتا وخولة قاعدين بالحديقة وعاملين حالهم مو منتبهين لالنا

اندق الباب رحت لافتح كان سيف لما شفته سكرت الباب بوجهه بسرعة من لخمتي
رجع رن الجرس فتحتله وانا منزلة راسي

شمس: انت كيف عرفت عنواني

سيف: الحمد لله الي شفقت علي اختك وردت علي واعطتني العنوان

شمس: انا بربيكي يا جمانة

سيف: بيتكم حلو كتير

شمس: تسلم من زوقك

سيف: طيب يلا روحي غيري تيابك وتجهزي لانه ما بقا الا توصل امي وابي واخواتي

شمس: كيف

سيف: ايه جايين نطلب ايدك رسمي لابنهم المصون سيف ما تحكي ها عريس لقطة

شمس: وهنادي

سيف: ما هو انتي لو بتردي عموبايلك كنتي عرفتي انه تركنا من زمان

شمس: حرام عليك

سيف: هي ما بدها تتزوج بدها تظل تدلل وبدك الصراحة الحب هو انه لما يغيب حبيبك عنك تفتقده وتحس بغيابه وانا من اول لحظة غبتي فيها وانا روحي مفارقة جسمي
شمس: ما شاء الله المتنبي واقف قدامي
بعدين انت شو عرفك اني موافقة عليكي

سيف: ايه عيونك بيحكو رح تطيري من الفرحة اني رح اتزوجك لك لساتك واقفة يلا بسرعة مو حلوة تيجي حماتك وتشوفك بهالشوفة

تركته واقف عالباب ورحت ركض لجوا غيرت وناديت على جمانة لتلبسني وتزبطني

جمانة : هلا تعي يا جمانة زبطيني ما كنتي عاساس تقلانة ما بدك اياه اااخ من حركات البنات
قربت علي وحضنتني وصارت تبوس فيني

وقت الحفلة الي عم نحضر فيها اجتمعو اهل سيف كلهم وطلبوني من اهلي كان ابي كتير مبسوط انه شافني ورح يزوجني بحياته ،،،، اتفقو اهلي وسيف عالخطبة وطلب سيف نروح نقعد لوحدنا شوي قال مشتاقلي اله زمان ما شافني

سيف: شمس عم تبكي احنا هلا سوا

شمس: اليوم عيد الام يا سيف

سيف: ايه واحتفلنا كلنا سوا من شوي

شمس: مو كلنا يا سيف امي ما كانت معنا

سيف: بعد كل شي عملته فيكي عم بتفكري فيها

شمس: انا قلتلك بدي سامح كل شخص زعلني بيوم بدي ابدا حياتي بدون حقد وكره بعدين امي شافت حياة كتير صعبة ابوها مات وهي صغيرة وامها تزوجت واحد تاني كان قاسي ولئيم كتير عليها كانت تتمنى لو انها زلمة وتقدر توقف بوجهه ومن بعدها تزوجت ابي وكمان كان كل هم الصبي
ما بنكر انه امي غلطت فيني بس ما عليها حق قد ما في على مجتمعنا الشرقي حق

سيف: بوعدك جبلك عنوانها بس انتي لا تبكي اليوم لازم يكون هو احلى يوم بحياتنا

هزيت راسي وضميته لسيف من صدره
بعد يومين اتصل فيني وخبرني انه رح نروح مشوار لما ركبت معه كان مدايق ووجهه مخنق

شمس: شو في

سيف: عرفت مكان مك

شمس: طيب احكي

سيف: امك مريضة سرطان وهي هلا بمشفى السرطان

حطيت ايدي على تمي من صدمتي وبلشت كت بهالدموع معقول ليلى القوية تمرض

شمس: خدني لعندها

سيف: متاكدة

شمس: ايه

وصلني سيف على مشفى السرطان اول ما فتت سالت عن غرفة امي ورحت شفتها كانت نايمة على التخت شعرها كاتت وحواجبها رايحين عالتخت وحدة مو ليلى الي انا بعرفها
فتت عالغرفة وانا عم غني

يامو يامو يامو يا ست الحبايب يا مو

لما سمعت صوتي التفت علي ،،، امي عرفتني من صوتي شافتني وعيونها مليانة دموع قربت لعندها بست جبينها ومسكت ايديها بوستهم

شمس: اشتقتلك يا امي
اشتقت لليلى
حتى هدول ايديكي اشتقت للكف منهم
انا بحبك يا ليلى بحبك يا امي

فرح قلبي لما شفت ابتسامتها عخدها حتى لو ما قدرت تحكي معي بس ضحكتها كانت كفيلة لاعرف انها فرحانة بشوفتي

شمس: امي انتي سامعتيني انا رح اتزوج رح اتزوج من سيف شب كتير منيح وبحبني وبحبه
بدي اياكي تدعيلي الله يوفقني يا امي انا محتاجة دعوة حلوة منك
حطت ايدها على راسي ومسحت على شعري
ورفعت عيونها للسقف وكانها عم تدعيلي بعيونها

ودعتها ووعدتها ارجع شوفها كل يوم
بس طلعت شفت سيف واقف مع ممرضة وعم يطق حنك وقفت مقابيله وحطيت ايدي على خصري وانا اطلع فيه لحتى انتبهلي حك انفه واجا لعندي
سيف: انتي هون

شمس: لا هناك

سيف: كنت عم اسالها عن حالة امك

شمس: بالله شو صدقتك

سيف: خلص وعد اخر مرة

شمس: روح من وجهي سيف

سيف: انتي مو قلتي بدك تسامحي الكل بس هالمرة سامحيني انتي طولتي جوا وانا ما بعرف اقعد ساكت بتعرفيني

شمس: اخر مرة

سيف: وعد
لفني عليه وهمسلي بداني

سيف: بحبك

تزوجت انا وسيف كان عرسي خيالي وحلو كتير حضر عرسي ابي واهلي متل ما بتحلم اي بنت
وحتى وليد حضر العرس وهو عم يتحسر مع انه منار كانت طيبة وحلوة بس الي عينه فارغة بتظل طول عمره فارغة
بس حسرتي الوحيدة كانت امي الي ما قدرت تحضر العرس بسبب حالتها الصحية بس انا بعد العرس بيومين اخدتلها صور الحفلة وفرجتها عليهم كلهم وكل ما كانت تشوف صورة شوف بسمتها

سبحان الله ربنا بياااخد منك ليعطيك على قد ما اخدت مني الدنيا فرح اعطتني حب
والي بيرضى بنصيبه

#انتهت

 

عرض التعليقات (62)