قصة الليلة زوجي خائن الكترونيا بقلم هلا غرابلي

76 13٬077

قصة الليلة زوجي خائن الكترونيا بقلم هلا غرابلي

هذه القصة تأتيكم من قسم المنوعات في زاكي, خبروني رأيكم في القصة في التعليقات.

قصة الليلة زوجي خائن الكترونيا بقلم هلا غرابلي
قصة الليلة زوجي خائن الكترونيا بقلم هلا غرابلي

 

#زوجي_خائن_الكترونيا_بقلم_هلاغرابلي
الجزء الاول

انسان بارد جدااا…الرومانسية بوادي و هو بوادي يعني ممكن اذا هديته وردة ياكلها😐ما كنت اسمع منه غزل و كلام حلو اطلاقا مثلا هالفستان شو طالع حلو عليكي او قصة هالشعر شو لابقتلك او انا مشتقلك كتير اليوم… انسان عملي لابعد الحدود اهم شي عنده ينجح بصفقاته التجارية و يزيد ماله و ياخد السمعة بانو هو الشخص الانجح و الاقوى بالسوق ما كان يكتفي و يشبع بنجاح واحد انسان اقرب للطمع اكتر من الطموح كان يرجع من شغله ليتغدا و يتسطح عالصوفاية و يغرق بموبايله و يرجع المسا يتحمم و يتزين و يروح يسهر مع رفقاته و وقت قله انت انسان بارد بلا مشاعر و ما عندك جنس الرومانسية و انا ما سعيدة معك يقلي الحق مو عليكي الحق عهالمسلسلات التركية و على احلام مستغانمي يلي خربتلكن راسكن انتو النسوان …..

 


كنت حس حاالي متل الوردة يلي عم تدبل كل يوم و باي لحظة ممكن توقع و تسقط من شجرة الحياة حتى عيوني خفت بريقها و ابتسامتي صارت مصطنعة و رغم كل هالشي كنت اتحمل و اصبر لانو بحبه كتير عندي اولادي ورد و جوري بالدنيا كلها و معبينلي حياتي بس في مطرح فاضي و غميق و عتم كتير بقلب ما حدا بيقدر يعبيه الا رجال واحد يلي هاملني و ما بيسال عني الا وقت بدو ياخد طلبه كنت قول هو هيك طينته و شخصيته مع انو اتنوع بستايل لبسي و تسريحة شعري و ما كان ينتبه الا لانا قله شو رايك بالفستان الجديد لياخد نظرة سريعة و يقلي امممم حلو و يرجع يحط راسه بالموبايل ضليت عهالوضع سنين لحتى بالصدفة و هو عم يتحمم بتجيه رسالة على موبايله فتحته و بتكون الرسالة واصلة عالفيسبوك فتحتها فورا و قراتا لاتلقى اقوى صدمة بحياتي رسالة من صبية كاتبتله وين الحلو غاطط مع ايموشن غمزة ؟ طلعت السهم لفوق فورا لشوف محادثته معها

 

لاتفاجا بانو زوجي انسان تاني مع غيري عم يتغزل و يحب و يعشق و احلى حكي عم يسمعها هيدا الحكي يلي انا بحاجته و محرومة منه انا مرته حلاله ….فتلت الدنيا فيني و جسمي صار يرجف و قلبي صار يدق بسرعة سكرت موبايله و رجعته لمحل ما كان لانو كان عم يتنشف و بدو يطلع من الحمام طلع لبس و تعطر و قلي يلا انا رايح و سالني فيكي شي؟قلتله لا ابدا قلي سلام اذا بدك شي حكيني قلتلو الله معك و رجعت عالتخت و انا مصدومة و التفيت على حالي و صرت ابكي ساعة و ساعتين ما بعرف اديش بكيت بس بظن لدرجة خلصو دموعي واتشربت الصدمة و بعدين قمت تحممت بالمي الباردة لطفي النار يلي شعلت

 

جواتي و طلعت و فردت سجادة الصلاة و صليت و استغفرت و دعيت لربي يهديني على طريق الصواب ….حسيت حالي ضايعة شو بدي اعمل و سالت حالي اسئلة كتير ليش هيك عم يعمل و عنده مرة حلوة و مهتمة بحالها وما مقصرة لا معه و لا مع بيتها و اولادها قلت بس يرجع بدي واجهه و اعلق معه و اساله ليش هيك عمل و بعدين بدي ضب اغراضي و اطلع من عنده ……بس ما بعرف لوين بدي روح لانو ما عندي حدا روح لعنده و انا ببلد الغربة و اولادي وين بدي اتركن…………

 

كل هالحكي يلي حكيته ما عملت شي منه سكتت بس و صرت فكر انو مين هاي يلي عم يحكي معها مين هاي يلي قدرت تخليه يحكيها هيك حكي حلو نطرته لرجع و انا كنت عاملة حالي نايمة بس انا فايقة رجع غير تيابه و حط راسه و نام نطرته لينام عالاخير و اخدت موبايله و فتت على المطبخ و فتحت سجل الرسائل عالفيسبوك لاتفاجا بشي جديد انو زوجي ما بيحكي مع بنت وحدة بس لااااااا بيحكي م بنااااات كتير و كل محادثاته معن حكي فاضي واحيانا غزل و حكي حلو و احيانا حكي خادش للحياء بيني و بين حالي ارتحت و خف حزني شوي…. ليش؟ لانو عم يحكي مع 3بنات معناتا عم يحكي ليتسلى و لسا ما وقع بوحدة تعلقه فيها و تاخدله عقله عالاخير اخدت نظرة عالواتس اب و كله كان رسائل مع رفقاته او من شغله اطمن قلبي اكتر انو ما عاطي رقمه لبنت من هالبنات و مكتفي بس بالفيسبوك سكرته و رجعت حطيت راسي و نمت و قلت للصبح بفكر شو بدي اعمل …….

 


فقت و شربت قهوتي و اقعدت مع حالي لعله و عسى يطلع معي شي و بعد تفكير اجت الفكرة الخطيرة يلي ما بس خلته يندم بس و يبكي و ينهار عالاخر بدون اي رحمة او شفقة مني و باشرت بالتنفيذ فيها فورا ….
لبست تيابي فورا و نزلت على كافي نت و طلبت من الشب يلي بشتغل هنيك يعملي حسابين فيسبوك حساب باسم بنت و حساب باسم شب و حطيت اسم البنت ريم و اسم الشب ايمن ركزت على حساب البنت حاليا لانو هادا يلي بهمني بالوقت الحالي لهيك حطتلا الصورة الشخصية صورة بنت جبت صورتها من النت و نزلتلا معلومات وهمية عن مواليد و الدراسة و حتى ضفت ناس ما بعرفن حتى يبين الحساب حقيقي و من هالاضافات بعتت وحدة لزوجي النسونجي … اما حساب الشب حفظته و حطيته على جنب لانو وقته لسا مطول ليجي و يؤدي مهمته
……………………..…………****

 

 


الجزء التاني:


بعد ما خلصت من الكافي نت مريت على محل موبايلات و اشتريت موبايل مستعمل و شريحة و نزلت عليه تطبيق الفيسبوك و حساب الشب ايمن يلي عملته اما حساب البنت ريم نزلته على موبايلي الشخصي و رجعت عالبيت و كنت كل شوي افتح لشوف قبل الصداقة الا لا وبعد 4ساعات لقبلها و بعد ساعة فات حكاني ليتعرف علي و انا كنت ناطرته بالدقيقة ليحكيني حتى لو هو ما بادر انا كنت رح بادر و بلش بشو اسمك و عمرك و دراستك و هيدي صورتك يلي حاطتيها انا جاوبته على كل اسئلته بدلع و خاصة عن صورتي و اكدتله انو هاي انا و انا لسا احلى عالواقع من الصورة

 

و سالني اذا مرتبطة الا لا قلتلو انا متزوجة و عندي ولدين قلي ممتاز انا برتاح اكتر بالحكي مع المتزوجين و سالته عن حاله و ما نكر انو متزوج و سالته عن مرته و متل كل رجاااال على كوكب الارض بيعمل مرته نكدية و ما الها علاقة بالرومانسية و الدلع و النغاشة و انو جو البيت ما بينطاق و انو مرته مملة و كل هالحكي ما في اله اساس من الصحة و يلي فيه بحطه بمرته ….

 

صرت كل يوم حكيه ساعة و ساعتين بكل المواضيع مع انه على حسب علمي ما بيفضى يحك راسه بالشغل و بين عليه انو انعجب بشخصيتي و بثقافتي و بكلامي لدرجة يقلي نيال زوجك فيكي و انو بحب حكيكي على طول و يسمعني احلى الكلام و الشعر وضلينا عم نحكي هيك لمدة اسبوعين و انا كان بس يرجع عالبيت و يفوت يتحمم افتح بسرعة و شوف سجل الرسائل لاطمن انو كل تركيزه معي و انو ما عم يحكي باقي البنات بالاسبوع التالت بلش يحكي معي من النوع التقيل جدا على جسمك بجنن و نفسي اعمل معك هيك يعني حكي ما بينحكى الا بين رجال و مرته و انا كنت سااااايره كتير و كنت اعطيه كلمة او كلمتين انو موافقة على طريقة حكيك و هو يكتبلي عشر سطور انا كنت عهالحكي بالذات اعمله سكرين شات لانو رح يلزمني لقدام و بالاسبوع التالت و الرابع كان كل حكيه من هالطراز و اتقل و هيدا المطوب بالنسبة الي……

 


هلا اجا دور حساب ايمن ليبدا مهمته قبل ما بلش اشتغل فيه عملت على حساب ريم تعديل صغير انو ريم متزوجة من ايمن (ههههه طبعا ريم و ايمن هن انا ) بالاسبوع الخامس وقفت حساب ريم و انتقلت على حساب ايمن و بعتت طلب اضافة لزوجي و فتت عنده عالرسائل دغري لابعتله كل صور السكرين شات يلي لقطن و قصيت منن شو حاكيه انا و رفقت معن مسبات كتيرة لزوجي انو انت واحد…….هيك باعتلها حك لمرتي يا…… و رح فرجيك و ردلك الضرب ضربين و رح بصل لنص بيتك و لمرتك و على نص تختك و طبق هالحكي كله مع مرتك يا …….. زوجي شاف الحكي و ما رد ابدا ..

 


نطرت على احر من الجمر ليجي و شوف مزاجه و تعابير وجهه واجا قلي ما تحكي معي ولا كلمة راسي حاسه رح ينفجر (طول بالك علي لخليك انت يلي تنفجر لسا ما بلشنا😃) و فات حط راسه و نام
تاني يوم انا بعتت طلب صداقة من حساب ايمن لحسابي الشخصي و بس رجع زوجي قلتله في واحد اسمه ايمن بعتلي طلب صداقة بتعرفه شي و قام متل المجنون و اخد موبايلي مني و حظره فورا قلتلو شبك ليش هيك عملت قلي اوعا تقبلي طلبات صداقة او رسائل من حسابات ما بتعرفيا قلتلو اوك..

 


تالت يوم عالضبط حطيت الشريحة يلي اشتريتا و بعتت مسج منها لرقمي الخاص مكتوب فيها حكي تماما بشبه طريقة حكي زوجي الوسخة و كتبت اخر رسالة ايمن يلي رح يوصلك قريبا …..و لما اجا زوجي قلتلو صارت معي قصة غريبة اليوم فورا لمعه عيونه لانو هديك الفترة قلقان و مشغول فكره قلي شو صار قلتلو اجتني رسالة على رقمي فيها حكي وسخ من واحد اسمه ايمن بس شكلن مخربطين و ما كفيت جملتي الا ولع من محله و صار وجهه احمر و قلي هاتي موبايل و قراه الرسالة و هو معصب و نار عم تشعل فيه(جرب نار الغيرة اه جرب اه جرب و قلي و اوصفلي)و فورا قام شريحتي و علكا و كبها و قلي بكرا بشتريلك وحدة تانية قلتلو يا مجنون ليش هيك عملت و مين هيدا ايمن يلي عم يلاحقني ساعة عالموبايل و ساعة عالفيسبوك قلي هادا واحد ما بيسوا اختلفت انا و اياه بالشغل و الي معه مصاري و ما عم يعطيني اياهن لهيك هددته بالشرطة ….

 

كان الخوف و القلق بعيونه …كانت النار عم تحرقه و النوم رح يطير من عيونه صار يدقلي 3مرات بالنهار ليطمن اذا صار معي شي جديد الا لا و تاني يوم من هالقصة فات لعند ايمن و بعتله حكي انو ابعد عن مرتي احسنلك و من وين جبت رقمها و انو رح خبر الشرطة عنك انك عم تهددني… ايمن يلي هو انا رد عليه قلو على فكرة مرتك حلوة يعني طول و جسم و عيون كبار عسليات (اعطيت كل مواصفاتي)و اولادك حلوين كتير طالعين لامن و مسكنها بمنطقة حلوة و الطابق التالت اطلالته احلى اطلالة بالبناية رد عليه زوجي بمسبات مقطعة و على ما يبدو كان متوتر كتير و دقلي على موبايلي فورا و صوته كان عم يرجف و قلي لينا وينك انت قلتلو بالبيت و قلي الاولاد وينن قلتلو هلا اجو من النادي قلي مين ما دق الباب عليكي اوعا تفتحي و ما تطلعي من البيت مسافة طريق و بكون عندك قلتلو شوفي ليش خوفتني (عايشة دور الضحية ) قلي لاجي بحكيلك

 


…………….***
الجزء التالت:


قلي هلا لاجي بقلك ما في نص ساعة الا كان جاي دخل و شكله منهار عالاخر لدرجة طالع عالدرج ركض فات و قعد قلتلو شبك حط ايديه على وجهه و بلش يبكي…. اول مرة بحياتي بشوف زوجي عم يبكي لانو هو انسان المشاعر و الاحاسيس ما ملعبه ابدا شفقت عليه ل لحظة بس انا قضيت سنين عم ابكي بالوقت يلي انت فيه داير من بنت لبنت تتغزل فيها و انا مرتك كنت محرومة من هاالشي و كنت مفكر انو المصاري بتعوض المراة عن كل شي شديت حالي و قربت لعنده و حضنته و صرت ابكي معه و قلتله انا خايفة كتير شوفي احكيلي شو صاير معك قلي ما قادر احكي هلا مخنوق قومي ضبي تيابك و تياب الاولاد و خلينا ننزل على لبنان اسبوعين 😍😍

 

نغير جو ما انت كنتي تقليلي على طول نفسك تنزلي عليها قلتلو ما قبل ما اعرف ليش و شو صاير معك ما بتحرك خطوة برا البيت مين هيدا ايمن و شو بده مني و منك الموضوع ما موضوع مصاري الموضوع اكبر من هيك بكتير سكت شوي و قلي رح احكيلك بس بدي تعرفي قبل اني ولله ندمااااان و ما توقعت توصل الامور لهل الدرجة و اني انا بحبك كتير و ما عرفت حالي بحبك هالقد الا لما انحطيت بهالموقف قلتلو ماشي تابع و حكالي كل القصة كاملة طبعا انا عملت حالي متفاجئة و مصدومة بجد و مش بنطق ولا عارفة ارد😃 مع انو هالقصة كلها انا يلي مخرجتا و بطلتا بس لزوم الموقف قلتلو انا بدي احجز تكت و انزل لعند اهلي فورا انا ما بقدر عيش معك هيك خايفة على حاالي من شي انا ما عملته و ادفع تمن تخبيصاتك انا و اولادك يعني ممكن ايمن يتعرضلي و يصير بنص بيتي و يأذيني

 

قلي لا مستحيل خلي حدا يلمس شعر منك طول ما انا عايش و انا رح اتصرف فورا اول ما نرجع من لبنان رح روح بلغ الشرطة و اعطين حسابه و رقمه و هنا اكيد بيعرفو كيف يجيبوه قلتلو طيب لنشوف (انا هون صرت بدي اكسب وقت و ماطل بس حتى لاقي تصريفة من هالورطة قبل ما انعرف انو انا ايمن و انا ريم وانا ورا هالمصايب كلها و بيخرب كل شي تعبت عليه و عملته و فوق منها اكيد بطلق )فتت ضبيت اغراضنا و نزلن قضينا اسبوعين و انبسطت كتير و هو كان احيانا حسه دايما عم يفكر و خلال قعدتنا فتح موضوع مع انو شو رايك نغير محل سكنا للامان اكتر انا رفضت تماما لانو منطقة تعودت عليها بعدين قبلت بعدها لانو كان حل انقل من بيتي اهون علي من انو يروح زوجي و يقدم بلاغ و ينعرف الرقم تابع الي و طلبت منه يحظر ايمن حتى ما بقا ياخد و يعطي معه و لحمدلله كانت صفحة و طويناها و زوجي تغير معي كتي خاصة انو اعتبرني ما تركته بظروف صعبة بس بالرغم من هالشي صرت كل فترة افتح موبايله لاتاكد انو ما رجع يحكي مع بنات و كان ماشي تمام التمام .
انتهت .
#فرح

 

اكتب كلمة #زاكي في التعليقات لتصلك مزيد من الوصفات المجربة والمميزة خصيصاً لك

هل تحب مشاهدة وصفات بالصوت والصورة؟ اعمل اشتراك لقناة زاكي على اليوتيوب من هنا لتصلك جديد وصفاتنا بالفيديو:
قناة زاكي على اليوتيوب

عندك جوال ذكي؟ ممتاز كتير تفضل أحلى هدية من زاكي لعيونك, حمل على جوالك تطبيق زاكي, أقوى مرجع عربي لفن الطهي, من هنا:
تطبيق زاكي للأجهزة الذكية

عندك حساب على الفيس بوك؟ طيب شو بتنستى استفيد من وقتك وتعلم كل يوم وصفة جديدة على يد أمهر شيفات في الوطن العربي, بالانضمام لمجموعة زاكي وصفحة زاكي على الفيس:
للانضمام على مجموعة زاكي من هنا
للاعجاب بصفحة زاكي من هنا ومتابعة كل جديد

احفظ موقع زاكي في المفضلة على جوالك, لتصلك دوماً جديد وصفاتنا مش هتلاقيها إلا في زاكي
موقع زاكي لفن الطهي

عرض التعليقات (76)